Utshovঅধ্যায় 50
50.1
সংজয় উবাচ
তস্মিন্নহনি নির্বৃত্তে ঘোরে প্রাণভৃতাং ক্ষয়ে
আদিত্যেঽস্তংগতে শ্রীমান্সংধ্যাকাল উপস্থিতে
50.2
ব্যপয়াতেষু সৈন্যেষু বাসায় ভরতর্ষভ
হত্বা সংশপ্তকব্রাতান্দিব্যৈরস্ত্রৈঃ কপিধ্বজঃ
50.3
প্রায়াত্স্বশিবিরং জিষ্ণুর্জৈত্রমাস্থায় তং রথম্
গচ্ছন্নেব চ গোবিন্দং সন্নকণ্ঠোঽভ্যভাষত
50.4
কিং নু মে হৃদয়ং ত্রস্তং বাক্যং সজ্জতি কেশব
স্পন্দন্তি চাপ্যনিষ্টানি গাত্রং সীদতি চাচ্যুত
50.5
অনিষ্টং চৈব মে শ্লিষ্টং হৃদয়ান্নাপসর্পতি
ভুবি যদ্দিক্ষু চাপ্যুগ্রা উত্পাতাস্ত্রাসয়ন্তি মাম্
50.6
বহুপ্রকারা দৃশ্যন্তে সর্ব এবাঘশংসিনঃ
অপি স্বস্তি ভবেদ্রাজ্ঞঃ সামাত্যস্য গুরোর্মম
50.7
বাসুদেব উবাচ
ব্যক্তং শিবং তব ভ্রাতুঃ সামাত্যস্য ভবিষ্যতি
মা শুচঃ কিংচিদেবান্যত্তত্রানিষ্টং ভবিষ্যতি
50.8
সংজয় উবাচ
ততঃ সংধ্যামুপাস্যৈব বীরৌ বীরাবসাদনে
কথয়ন্তৌ রণে বৃত্তং প্রয়াতৌ রথমাস্থিতৌ
50.9
ততঃ স্বশিবিরং প্রাপ্তৌ হতানন্দং হতত্বিষম্
বাসুদেবোঽর্জুনশ্চৈব কৃত্বা কর্ম সুদুষ্করম্
50.10
ধ্বস্তাকারং সমালক্ষ্য শিবিরং পরবীরহা
বীভত্সুরব্রবীত্কৃষ্ণমস্বস্থহৃদয়স্ততঃ
50.11
নাদ্য নন্দন্তি তূর্যাণি মঙ্গল্যানি জনার্দন
মিশ্রা দুন্দুভিনির্ঘোষৈঃ শঙ্খাশ্চাডম্বরৈঃ সহ
বীণা বা নাদ্য বাদ্যন্তে শম্যাতালস্বনৈঃ সহ
50.12
মঙ্গল্যানি চ গীতানি ন গায়ন্তি পঠন্তি চ
স্তুতিয়ুক্তানি রম্যাণি মমানীকেষু বন্দিনঃ
50.13
যোধাশ্চাপি হি মাং দৃষ্ট্বা নিবর্তন্তে হ্যধোমুখাঃ
কর্মাণি চ যথাপূর্বং কৃত্বা নাভিবদন্তি মাম্
50.14
অপি স্বস্তি ভবেদদ্য ভ্রাতৃভ্যো মম মাধব
ন হি শুধ্যতি মে ভাবো দৃষ্ট্বা স্বজনমাকুলম্
50.15
অপি পাঞ্চালরাজস্য বিরাটস্য চ মানদ
সর্বেষাং চৈব যোধানাং সামগ্র্যং স্যান্মমাচ্যুত
50.16
ন চ মামদ্য সৌভদ্রঃ প্রহৃষ্টো ভ্রাতৃভিঃ সহ
রণাদায়ান্তমুচিতং প্রত্যুদ্যাতি হসন্নিব
50.17
এবং সংকথয়ন্তৌ তৌ প্রবিষ্টৌ শিবিরং স্বকম্
দদৃশাতে ভৃশাস্বস্থান্পাণ্ডবান্নষ্টচেতসঃ
50.18
দৃষ্ট্বা ভ্রাতৄংশ্চ পুত্রাংশ্চ বিমনা বানরধ্বজঃ
অপশ্যংশ্চৈব সৌভদ্রমিদং বচনমব্রবীৎ
50.19
মুখবর্ণোঽপ্রসন্নো বঃ সর্বেষামেব লক্ষ্যতে
ন চাভিমন্যুং পশ্যামি ন চ মাং প্রতিনন্দথ
50.20
ময়া শ্রুতশ্চ দ্রোণেন চক্রব্যূহো বিনির্মিতঃ
ন চ বস্তস্য ভেত্তাস্তি ঋতে সৌভদ্রমাহবে
50.21
ন চোপদিষ্টস্তস্যাসীন্ময়ানীকবিনির্গমঃ
কচ্চিন্ন বালো যুষ্মাভিঃ পরানীকং প্রবেশিতঃ
50.22
ভিত্ত্বানীকং মহেষ্বাসঃ পরেষাং বহুশো যুধি
কচ্চিন্ন নিহতঃ শেতে সৌভদ্রঃ পরবীরহা
50.23
লোহিতাক্ষং মহাবাহুং জাতং সিংহমিবাদ্রিষু
উপেন্দ্রসদৃশং ব্রূত কথমায়োধনে হতঃ
50.24
সুকুমারং মহেষ্বাসং বাসবস্যাত্মজাত্মজম্
সদা মম প্রিয়ং ব্রূত কথমায়োধনে হতঃ
50.25
বার্ষ্ণেয়ীদয়িতং শূরং ময়া সততলালিতম্
অম্বায়াশ্চ প্রিয়ং নিত্যং কোঽবধীত্কালচোদিতঃ
50.26
সদৃশো বৃষ্ণিসিংহস্য কেশবস্য মহাত্মনঃ
বিক্রমশ্রুতমাহাত্ম্যৈঃ কথমায়োধনে হতঃ
50.27
সুভদ্রায়াঃ প্রিয়ং নিত্যং দ্রৌপদ্যাঃ কেশবস্য চ
যদি পুত্রং ন পশ্যামি যাস্যামি যমসাদনম্
50.28
মৃদুকুঞ্চিতকেশান্তং বালং বালমৃগেক্ষণম্
মত্তদ্বিরদবিক্রান্তং শালপোতমিবোদ্গতম্
50.29
স্মিতাভিভাষিণং দান্তং গুরুবাক্যকরং সদা
বাল্যেঽপ্যবালকর্মাণং প্রিয়বাক্যমমত্সরম্
50.30
মহোত্সাহং মহাবাহুং দীর্ঘরাজীবলোচনম্
ভক্তানুকম্পিনং দান্তং ন চ নীচানুসারিণম্
50.31
কৃতজ্ঞং জ্ঞানসংপন্নং কৃতাস্ত্রমনিবর্তিনম্
যুদ্ধাভিনন্দিনং নিত্যং দ্বিষতামঘবর্ধনম্
50.32
স্বেষাং প্রিয়হিতে যুক্তং পিতৄণাং জয়গৃদ্ধিনম্
ন চ পূর্বপ্রহর্তারং সংগ্রামে নষ্টসংভ্রমম্
যদি পুত্রং ন পশ্যামি যাস্যামি যমসাদনম্
50.33
সুললাটং সুকেশান্তং সুভ্র্বক্ষিদশনচ্ছদম্
অপশ্যতস্তদ্বদনং কা শান্তির্হৃদয়স্য মে
50.34
তন্ত্রীস্বনসুখং রম্যং পুংস্কোকিলসমধ্বনিম্
অশৃণ্বতঃ স্বনং তস্য কা শান্তির্হৃদয়স্য মে
50.35
রূপং চাপ্রতিরূপং তত্ত্রিদশেষ্বপি দুর্লভম্
অপশ্যতোঽদ্য বীরস্য কা শান্তির্হৃদয়স্য মে
50.36
অভিবাদনদক্ষং তং পিতৄণাং বচনে রতম্
নাদ্যাহং যদি পশ্যামি কা শান্তির্হৃদয়স্য মে
50.37
সুকুমারঃ সদা বীরো মহার্হশয়নোচিতঃ
ভূমাবনাথবচ্ছেতে নূনং নাথবতাং বরঃ
50.38
শয়ানং সমুপাসন্তি যং পুরা পরমস্ত্রিয়ঃ
তমদ্য বিপ্রবিদ্ধাঙ্গমুপাসন্ত্যশিবাঃ শিবাঃ
50.39
যঃ পুরা বোধ্যতে সুপ্তঃ সূতমাগধবন্দিভিঃ
বোধয়ন্ত্যদ্য তং নূনং শ্বাপদা বিকৃতৈঃ স্বরৈঃ
50.40
ছত্রচ্ছায়াসমুচিতং তস্য তদ্বদনং শুভম্
নূনমদ্য রজোধ্বস্তং রণে রেণুঃ করিষ্যতি
50.41
হা পুত্রকাবিতৃপ্তস্য সততং পুত্রদর্শনে
ভাগ্যহীনস্য কালেন যথা মে নীয়সে বলাৎ
50.42
সাদ্য সংয়মনী নূনং সদা সুকৃতিনাং গতিঃ
স্বভাভির্ভাসিতা রম্যা ত্বয়াত্যর্থং বিরাজতে
50.43
নূনং বৈবস্বতশ্চ ত্বা বরুণশ্চ প্রিয়াতিথিঃ
শতক্রতুর্ধনেশশ্চ প্রাপ্তমর্চন্ত্যভীরুকম্
50.44
এবং বিলপ্য বহুধা ভিন্নপোতো বণিগ্যথা
দুঃখেন মহতাবিষ্টো যুধিষ্ঠিরমপৃচ্ছত
50.45
কচ্চিত্স কদনং কৃত্বা পরেষাং পাণ্ডুনন্দন
স্বর্গতোঽভিমুখঃ সংখ্যে যুধ্যমানো নরর্ষভঃ
50.46
স নূনং বহুভির্যত্তৈর্যুধ্যমানো নরর্ষভৈঃ
অসহায়ঃ সহায়ার্থী মামনুধ্যাতবান্ধ্রুবম্
50.47
পীড্যমানঃ শরৈর্বালস্তাত সাধ্বভিধাব মাম্
ইতি বিপ্রলপন্মন্যে নৃশংসৈর্বহুভির্হতঃ
50.48
অথ বা মত্প্রসূতশ্চ স্বস্রীয়ো মাধবস্য চ
সুভদ্রায়াং চ সংভূতো নৈবং বক্তুমিহার্হতি
50.49
বজ্রসারময়ং নূনং হৃদয়ং সুদৃঢং মম
অপশ্যতো দীর্ঘবাহুং রক্তাক্ষং যন্ন দীর্যতে
50.50
কথং বালে মহেষ্বাসে নৃশংসা মর্মভেদিনঃ
স্বস্রীয়ে বাসুদেবস্য মম পুত্রেঽক্ষিপঞ্শরান্
50.51
যো মাং নিত্যমদীনাত্মা প্রত্যুদ্গম্যাভিনন্দতি
উপয়ান্তং রিপূন্হত্বা সোঽদ্য মাং কিং ন পশ্যতি
50.52
নূনং স পতিতঃ শেতে ধরণ্যাং রুধিরোক্ষিতঃ
শোভয়ন্মেদিনীং গাত্রৈরাদিত্য ইব পাতিতঃ
50.53
রণে বিনিহতং শ্রুত্বা শোকার্তা বৈ বিনংক্ষ্যতি
সুভদ্রা বক্ষ্যতে কিং মামভিমন্যুমপশ্যতী
দ্রৌপদী চৈব দুঃখার্তে তে চ বক্ষ্যামি কিং ন্বহম্
50.54
বজ্রসারময়ং নূনং হৃদয়ং যন্ন যাস্যতি
সহস্রধা বধূং দৃষ্ট্বা রুদতীং শোককর্শিতাম্
50.55
হৃষ্টানাং ধার্তরাষ্ট্রাণাং সিংহনাদো ময়া শ্রুতঃ
যুয়ুত্সুশ্চাপি কৃষ্ণেন শ্রুতো বীরানুপালভন্
50.56
অশক্নুবন্তো বীভত্সুং বালং হত্বা মহারথাঃ
কিং নদধ্বমধর্মজ্ঞাঃ পার্থে বৈ দৃশ্যতাং বলম্
50.57
কিং তয়োর্বিপ্রিয়ং কৃত্বা কেশবার্জুনয়োর্মৃধে
সিংহবন্নদত প্রীতাঃ শোককাল উপস্থিতে
50.58
আগমিষ্যতি বঃ ক্ষিপ্রং ফলং পাপস্য কর্মণঃ
অধর্মো হি কৃতস্তীব্রঃ কথং স্যাদফলশ্চিরম্
50.59
ইতি তান্প্রতি ভাষন্বৈ বৈশ্যাপুত্রো মহামতিঃ
অপায়াচ্ছস্ত্রমুত্সৃজ্য কোপদুঃখসমন্বিতঃ
50.60
কিমর্থমেতন্নাখ্যাতং ত্বয়া কৃষ্ণ রণে মম
অধক্ষ্যং তানহং সর্বাংস্তদা ক্রূরান্মহারথান্
50.61
নিগৃহ্য বাসুদেবস্তং পুত্রাধিভিরভিপ্লুতম্
মৈবমিত্যব্রবীত্কৃষ্ণস্তীব্রশোকসমন্বিতম্
50.62
সর্বেষামেষ বৈ পন্থাঃ শূরাণামনিবর্তিনাম্
ক্ষত্রিয়াণাং বিশেষেণ যেষাং যুদ্ধেন জীবিকা
50.63
এষা বৈ যুধ্যমানানাং শূরাণামনিবর্তিনাম্
বিহিতা ধর্মশাস্ত্রজ্ঞৈর্গতির্গতিমতাং বর
50.64
ধ্রুবং যুদ্ধে হি মরণং শূরাণামনিবর্তিনাম্
গতঃ পুণ্যকৃতাং লোকানভিমন্যুর্ন সংশয়ঃ
50.65
এতচ্চ সর্ববীরাণাং কাঙ্ক্ষিতং ভরতর্ষভ
সংগ্রামেঽভিমুখা মৃত্যুং প্রাপ্নুয়ামেতি মানদ
50.66
স চ বীরান্রণে হত্বা রাজপুত্রান্মহাবলান্
বীরৈরাকাঙ্ক্ষিতং মৃত্যুং সংপ্রাপ্তোঽভিমুখো রণে
50.67
মা শুচঃ পুরুষব্যাঘ্র পূর্বৈরেষ সনাতনঃ
ধর্মকৃদ্ভিঃ কৃতো ধর্মঃ ক্ষত্রিয়াণাং রণে ক্ষয়ঃ
50.68
ইমে তে ভ্রাতরঃ সর্বে দীনা ভরতসত্তম
ত্বয়ি শোকসমাবিষ্টে নৃপাশ্চ সুহৃদস্তব
50.69
এতাংস্ত্বং বচসা সাম্না সমাশ্বাসয় মানদ
বিদিতং বেদিতব্যং তে ন শোকং কর্তুমর্হসি
50.70
এবমাশ্বাসিতঃ পার্থঃ কৃষ্ণেনাদ্ভুতকর্মণা
ততোঽব্রবীত্তদা ভ্রাতৄন্সর্বান্পার্থঃ সগদ্গদান্
50.71
স দীর্ঘবাহুঃ পৃথ্বংসো দীর্ঘরাজীবলোচনঃ
অভিমন্যুর্যথা বৃত্তঃ শ্রোতুমিচ্ছাম্যহং তথা
50.72
সনাগস্যন্দনহয়ান্দ্রক্ষ্যধ্বং নিহতান্ময়া
সংগ্রামে সানুবন্ধাংস্তান্মম পুত্রস্য বৈরিণঃ
50.73
কথং চ বঃ কৃতাস্ত্রাণাং সর্বেষাং শস্ত্রপাণিনাম্
সৌভদ্রো নিধনং গচ্ছেদ্বজ্রিণাপি সমাগতঃ
50.74
যদ্যেবমহমজ্ঞাস্যমশক্তান্রক্ষণে মম
পুত্রস্য পাণ্ডুপাঞ্চালান্ময়া গুপ্তো ভবেত্ততঃ
50.75
কথং চ বো রথস্থানাং শরবর্ষাণি মুঞ্চতাম্
নীতোঽভিমন্যুর্নিধনং কদর্থীকৃত্য বঃ পরৈঃ
50.76
অহো বঃ পৌরুষং নাস্তি ন চ বোঽস্তি পরাক্রমঃ
যত্রাভিমন্যুঃ সমরে পশ্যতাং বো নিপাতিতঃ
50.77
আত্মানমেব গর্হেয়ং যদহং বঃ সুদুর্বলান্
যুষ্মানাজ্ঞায় নির্যাতো ভীরূনকৃতনিশ্রমান্
50.78
আহোস্বিদ্ভূষণার্থায় বর্মশস্ত্রায়ুধানি বঃ
বাচশ্চ বক্তুং সংসত্সু মম পুত্রমরক্ষতাম্
50.79
এবমুক্ত্বা ততো বাক্যং তিষ্ঠংশ্চাপবরাসিমান্
ন স্মাশক্যত বীভত্সুঃ কেনচিত্প্রসমীক্ষিতুম্
50.80
তমন্তকমিব ক্রুদ্ধং নিঃশ্বসন্তং মুহুর্মুহুঃ
পুত্রশোকাভিসংতপ্তমশ্রুপূর্ণমুখং তদা
50.81
নাভিভাষ্টুং শক্নুবন্তি দ্রষ্টুং বা সুহৃদোঽর্জুনম্
অন্যত্র বাসুদেবাদ্বা জ্যেষ্টাদ্বা পাণ্ডুনন্দনাৎ
50.82
সর্বাস্ববস্থাসু হিতাবর্জুনস্য মনোনুগৌ
বহুমানাত্প্রিয়ত্বাচ্চ তাবেনং বক্তুমর্হতঃ
50.83
ততস্তং পুত্রশোকেন ভৃশং পীডিতমানসম্
রাজীবলোচনং ক্রুদ্ধং রাজা বচনমব্রবীৎ