অধ্যায় 49

49.1

সংজয় উবাচ
তস্মিংস্তু নিহতে বীরে সৌভদ্রে রথয়ূথপে
বিমুক্তরথসংনাহাঃ সর্বে নিক্ষিপ্তকার্মুকাঃ

উপোপবিষ্টা রাজানং পরিবার্য যুধিষ্ঠিরম্
তদেব দুঃখং ধ্যায়ন্তঃ সৌভদ্রগতমানসাঃ

ততো যুধিষ্ঠিরো রাজা বিললাপ সুদুঃখিতঃ
অভিমন্যৌ হতে বীরে ভ্রাতুঃ পুত্রে মহারথে

দ্রোণানীকমসংবাধং মম প্রিয়চিকীর্ষয়া
ভিত্ত্বা ব্যূহং প্রবিষ্টোঽসৌ গোমধ্যমিব কেসরী

যস্য শূরা মহেষ্বাসাঃ প্রত্যনীকগতা রণে
প্রভগ্না বিনিবর্তন্তে কৃতাস্ত্রা যুদ্ধদুর্মদাঃ

অত্যন্তশত্রুরস্মাকং যেন দুঃশাসনঃ শরৈঃ
ক্ষিপ্রং হ্যভিমুখঃ সংখ্যে বিসংজ্ঞো বিমুখীকৃতঃ

স তীর্ত্বা দুস্তরং বীরো দ্রোণানীকমহার্ণবম্
প্রাপ্য দৌঃশাসনিং কার্ষ্ণির্যাতো বৈবস্বতক্ষয়ম্

কথং দ্রক্ষ্যামি কৌন্তেয়ং সৌভদ্রে নিহতেঽর্জুনম্
সুভদ্রাং বা মহাভাগাং প্রিয়ং পুত্রমপশ্যতীম্

কিং স্বিদ্বয়মপেতার্থমশ্লিষ্টমসমঞ্জসম্
তাবুভৌ প্রতিবক্ষ্যামো হৃষীকেশধনংজয়ৌ

অহমেব সুভদ্রায়াঃ কেশবার্জুনয়োরপি
প্রিয়কামো জয়াকাঙ্ক্ষী কৃতবানিদমপ্রিয়ম্

ন লুব্ধো বুধ্যতে দোষান্মোহাল্লোভঃ প্রবর্ততে
মধু লিপ্সুর্হি নাপশ্যং প্রপাতমিদমীদৃশম্

যো হি ভোজ্যে পুরস্কার্যো যানেষু শয়নেষু চ
ভূষণেষু চ সোঽস্মাভির্বালো যুধি পুরস্কৃতঃ

কথং হি বালস্তরুণো যুদ্ধানামবিশারদঃ
সদশ্ব ইব সংবাধে বিষমে ক্ষেমমর্হতি

নো চেদ্ধি বয়মপ্যেনং মহীমনুশয়ীমহি
বীভত্সোঃ কোপদীপ্তস্য দগ্ধাঃ কৃপণচক্ষুষা

অলুব্ধো মতিমান্হ্রীমান্ক্ষমাবান্রূপবান্বলী
বপুষ্মান্মানকৃদ্বীরঃ প্রিয়ঃ সত্যপরায়ণঃ

যস্য শ্লাঘন্তি বিবুধাঃ কর্মাণ্যূর্জিতকর্মণঃ
নিবাতকবচাঞ্জঘ্নে কালকেয়াংশ্চ বীর্যবান্

মহেন্দ্রশত্রবো যেন হিরণ্যপুরবাসিনঃ
অক্ষ্ণোর্নিমেষমাত্রেণ পৌলোমাঃ সগণা হতাঃ

পরেভ্যোঽপ্যভয়ার্থিভ্যো যো দদাত্যভয়ং বিভুঃ
তস্যাস্মাভির্ন শকিতস্ত্রাতুমদ্যাত্মজো ভয়াৎ

ভয়ং তু সুমহত্প্রাপ্তং ধার্তরাষ্ট্রং মহদ্বলম্
পার্থঃ পুত্রবধাত্ক্রুদ্ধঃ কৌরবাঞ্শোষয়িষ্যতি

ক্ষুদ্রঃ ক্ষুদ্রসহায়শ্চ স্বপক্ষক্ষয়মাতুরঃ
ব্যক্তং দুর্যোধনো দৃষ্ট্বা শোচন্হাস্যতি জীবিতম্

ন মে জয়ঃ প্রীতিকরো ন রাজ্যং; ন চামরত্বং ন সুরৈঃ সলোকতা
ইমং সমীক্ষ্যাপ্রতিবীর্যপৌরুষং; নিপাতিতং দেববরাত্মজাত্মজম্