Utshovঅধ্যায় 48
48.1
সংজয় উবাচ
বিষ্ণোঃ স্বসানন্দিকরঃ স বিষ্ণ্বায়ুধভূষিতঃ
ররাজাতিরথঃ সংখ্যে জনার্দন ইবাপরঃ
48.2
মারুতোদ্ধূতকেশান্তমুদ্যতারিবরায়ুধম্
বপুঃ সমীক্ষ্য পৃথ্বীশা দুঃসমীক্ষ্যং সুরৈরপি
48.3
তচ্চক্রং ভৃশমুদ্বিগ্নাঃ সংচিচ্ছিদুরনেকধা
মহারথস্ততঃ কার্ষ্ণিঃ সংজগ্রাহ মহাগদাম্
48.4
বিধনুঃস্যন্দনাসিস্তৈর্বিচক্রশ্চারিভিঃ কৃতঃ
অভিমন্যুর্গদাপাণিরশ্বত্থামানমাদ্রবৎ
48.5
স গদামুদ্যতাং দৃষ্ট্বা জ্বলন্তীমশনীমিব
অপাক্রামদ্রথোপস্থাদ্বিক্রমাংস্ত্রীন্নরর্ষভঃ
48.6
তস্যাশ্বান্গদয়া হত্বা তথোভৌ পার্ষ্ণিসারথী
শরাচিতাঙ্গঃ সৌভদ্রঃ শ্বাবিদ্বত্প্রত্যদৃশ্যত
48.7
ততঃ সুবলদায়াদং কালকেয়মপোথয়ৎ
জঘান চাস্যানুচরান্গান্ধারান্সপ্তসপ্ততিম্
48.8
পুনর্ব্রহ্মবসাতীয়াঞ্জঘান রথিনো দশ
কেকয়ানাং রথান্সপ্ত হত্বা চ দশ কুঞ্জরান্
দৌঃশাসনিরথং সাশ্বং গদয়া সমপোথয়ৎ
48.9
ততো দৌঃশাসনিঃ ক্রুদ্ধো গদামুদ্যম্য মারিষ
অভিদুদ্রাব সৌভদ্রং তিষ্ঠ তিষ্ঠেতি চাব্রবীৎ
48.10
তাবুদ্যতগদৌ বীরাবন্যোন্যবধকাঙ্ক্ষিণৌ
ভ্রাতৃব্যৌ সংপ্রজহ্রাতে পুরেব ত্র্যম্বকান্তকৌ
48.11
তাবন্যোন্যং গদাগ্রাভ্যাং সংহত্য পতিতৌ ক্ষিতৌ
ইন্দ্রধ্বজাবিবোত্সৃষ্টৌ রণমধ্যে পরংতপৌ
48.12
দৌঃশাসনিরথোত্থায় কুরূণাং কীর্তিবর্ধনঃ
প্রোত্তিষ্ঠমানং সৌভদ্রং গদয়া মূর্ধ্ন্যতাডয়ৎ
48.13
গদাবেগেন মহতা ব্যায়ামেন চ মোহিতঃ
বিচেতা ন্যপতদ্ভূমৌ সৌভদ্রঃ পরবীরহা
এবং বিনিহতো রাজন্নেকো বহুভিরাহবে
48.14
ক্ষোভয়িত্বা চমূং সর্বাং নলিনীমিব কুঞ্জরঃ
অশোভত হতো বীরো ব্যাধৈর্বনগজো যথা
48.15
তং তথা পতিতং শূরং তাবকাঃ পর্যবারয়ন্
দাবং দগ্ধ্বা যথা শান্তং পাবকং শিশিরাত্যয়ে
48.16
বিমৃদ্য তরুশৃঙ্গাণি সংনিবৃত্তমিবানিলম্
অস্তং গতমিবাদিত্যং তপ্ত্বা ভারতবাহিনীম্
48.17
উপপ্লুতং যথা সোমং সংশুষ্কমিব সাগরম্
পূর্ণচন্দ্রাভবদনং কাকপক্ষবৃতাক্ষকম্
48.18
তং ভূমৌ পতিতং দৃষ্ট্বা তাবকাস্তে মহারথাঃ
মুদা পরময়া যুক্তাশ্চুক্রুশুঃ সিংহবন্মুহুঃ
48.19
আসীত্পরমকো হর্ষস্তাবকানাং বিশাং পতে
ইতরেষাং তু বীরাণাং নেত্রেভ্যঃ প্রাপতজ্জলম্
48.20
অভিক্রোশন্তি ভূতানি অন্তরিক্ষে বিশাং পতে
দৃষ্ট্বা নিপতিতং বীরং চ্যুতং চন্দ্রমিবাম্বরাৎ
48.21
দ্রোণকর্ণমুখৈঃ ষড্ভির্ধার্তরাষ্ট্রৈর্মহারথৈঃ
একোঽয়ং নিহতঃ শেতে নৈষ ধর্মো মতো হি নঃ
48.22
তস্মিংস্তু নিহতে বীরে বহ্বশোভত মেদিনী
দ্যৌর্যথা পূর্ণচন্দ্রেণ নক্ষত্রগণমালিনী
48.23
রুক্মপুঙ্খৈশ্চ সংপূর্ণা রুধিরৌঘপরিপ্লুতা
উত্তমাঙ্গৈশ্চ বীরাণাং ভ্রাজমানৈঃ সকুণ্ডলৈঃ
48.24
বিচিত্রৈশ্চ পরিস্তোমৈঃ পতাকাভিশ্চ সংবৃতা
চামরৈশ্চ কুথাভিশ্চ প্রবিদ্ধৈশ্চাম্বরোত্তমৈঃ
48.25
রথাশ্বনরনাগানামলংকারৈশ্চ সুপ্রভৈঃ
খড্গৈশ্চ নিশিতৈঃ পীতৈর্নির্মুক্তৈর্ভুজগৈরিব
48.26
চাপৈশ্চ বিশিখৈশ্ছিন্নৈঃ শক্ত্যৃষ্টিপ্রাসকম্পনৈঃ
বিবিধৈরায়ুধৈশ্চান্যৈঃ সংবৃতা ভূরশোভত
48.27
বাজিভিশ্চাপি নির্জীবৈঃ স্বপদ্ভিঃ শোণিতোক্ষিতৈঃ
সারোহৈর্বিষমা ভূমিঃ সৌভদ্রেণ নিপাতিতৈঃ
48.28
সাঙ্কুশৈঃ সমহামাত্রৈঃ সবর্মায়ুধকেতুভিঃ
পর্বতৈরিব বিধ্বস্তৈর্বিশিখোন্মথিতৈর্গজৈঃ
48.29
পৃথিব্যামনুকীর্ণৈশ্চ ব্যশ্বসারথিয়োধিভিঃ
হ্রদৈরিব প্রক্ষুভিতৈর্হতনাগৈ রথোত্তমৈঃ
48.30
পদাতিসংঘৈশ্চ হতৈর্বিবিধায়ুধভূষণৈঃ
ভীরূণাং ত্রাসজননী ঘোররূপাভবন্মহী
48.31
তং দৃষ্ট্বা পতিতং ভূমৌ চন্দ্রার্কসদৃশদ্যুতিম্
তাবকানাং পরা প্রীতিঃ পাণ্ডূনাং চাভবদ্ব্যথা
48.32
অভিমন্যৌ হতে রাজঞ্শিশুকেঽপ্রাপ্তয়ৌবনে
সংপ্রাদ্রবচ্চমূঃ সর্বা ধর্মরাজস্য পশ্যতঃ
48.33
দীর্যমাণং বলং দৃষ্ট্বা সৌভদ্রে বিনিপাতিতে
অজাতশত্রুঃ স্বান্বীরানিদং বচনমব্রবীৎ
48.34
স্বর্গমেষ গতঃ শূরো যো হতো নপরাঙ্মুখঃ
সংস্তম্ভয়ত মা ভৈষ্ট বিজেষ্যামো রণে রিপূন্
48.35
ইত্যেবং স মহাতেজা দুঃখিতেভ্যো মহাদ্যুতিঃ
ধর্মরাজো যুধাং শ্রেষ্ঠো ব্রুবন্দুঃখমপানুদৎ
48.36
যুদ্ধে হ্যাশীবিষাকারান্রাজপুত্রান্রণে বহূন্
পূর্বং নিহত্য সংগ্রামে পশ্চাদার্জুনিরন্বগাৎ
48.37
হত্বা দশসহস্রাণি কৌসল্যং চ মহারথম্
কৃষ্ণার্জুনসমঃ কার্ষ্ণিঃ শক্রসদ্ম গতো ধ্রুবম্
48.38
রথাশ্বনরমাতঙ্গান্বিনিহত্য সহস্রশঃ
অবিতৃপ্তঃ স সংগ্রামাদশোচ্যঃ পুণ্যকর্মকৃৎ
48.39
বয়ং তু প্রবরং হত্বা তেষাং তৈঃ শরপীডিতাঃ
নিবেশায়াভ্যুপায়াম সায়াহ্নে রুধিরোক্ষিতাঃ
48.40
নিরীক্ষমাণাস্তু বয়ং পরে চায়োধনং শনৈঃ
অপয়াতা মহারাজ গ্লানিং প্রাপ্তা বিচেতসঃ
48.41
ততো নিশায়া দিবসস্য চাশিবঃ; শিবারুতঃ সংধিরবর্ততাদ্ভুতঃ
কুশেশয়াপীডনিভে দিবাকরে; বিলম্বমানেঽস্তমুপেত্য পর্বতম্
48.42
বরাসিশক্ত্যৃষ্টিবরূথচর্মণাং; বিভূষণানাং চ সমাক্ষিপন্প্রভাম্
দিবং চ ভূমিং চ সমানয়ন্নিব; প্রিয়াং তনুং ভানুরুপৈতি পাবকম্
48.43
মহাভ্রকূটাচলশৃঙ্গসংনিভৈ;র্গজৈরনেকৈরিব বজ্রপাতিতৈঃ
সবৈজয়ন্ত্যঙ্কুশবর্ময়ন্তৃভি;র্নিপাতিতৈর্নিষ্টনতীব গৌশ্চিতা
48.44
হতেশ্বরৈশ্চূর্ণিতপত্ত্যুপস্করৈ;র্হতাশ্বসূতৈর্বিপতাককেতুভিঃ
মহারথৈর্ভূঃ শুশুভে বিচূর্ণিতৈঃ; পুরৈরিবামিত্রহতৈর্নরাধিপ
48.45
রথাশ্ববৃন্দৈঃ সহসাদিভির্হতৈঃ; প্রবিদ্ধভাণ্ডাভরণৈঃ পৃথগ্বিধৈঃ
নিরস্তজিহ্বাদশনান্ত্রলোচনৈ;র্ধরা বভৌ ঘোরবিরূপদর্শনা
48.46
প্রবিদ্ধবর্মাভরণা বরায়ুধা; বিপন্নহস্ত্যশ্বরথানুগা নরাঃ
মহার্হশয্যাস্তরণোচিতাঃ সদা; ক্ষিতাবনাথা ইব শেরতে হতাঃ
48.47
অতীব হৃষ্টাঃ শ্বসৃগালবায়সা; বডাঃ সুপর্ণাশ্চ বৃকাস্তরক্ষবঃ
বয়াংস্যসৃক্পান্যথ রক্ষসাং গণাঃ; পিশাচসংঘাশ্চ সুদারুণা রণে
48.48
ত্বচো বিনির্ভিদ্য পিবন্বসামসৃ;ক্তথৈব মজ্জাং পিশিতানি চাশ্নুবন্
বপাং বিলুম্পন্তি হসন্তি গান্তি চ; প্রকর্ষমাণাঃ কুণপান্যনেকশঃ
48.49
শরীরসংঘাটবহা অসৃগ্জলা; রথোডুপা কুঞ্জরশৈলসংকটা
মনুষ্যশীর্ষোপলমাংসকর্দমা; প্রবিদ্ধনানাবিধশস্ত্রমালিনী
48.50
মহাভয়া বৈতরণীব দুস্তরা; প্রবর্তিতা যোধবরৈস্তদা নদী
উবাহ মধ্যেন রণাজিরং ভৃশং; ভয়াবহা জীবমৃতপ্রবাহিনী
48.51
পিবন্তি চাশ্নন্তি চ যত্র দুর্দৃশাঃ; পিশাচসংঘা বিবিধাঃ সুভৈরবাঃ
সুনন্দিতাঃ প্রাণভৃতাং ভয়ংকরাঃ; সমানভক্ষাঃ শ্বসৃগালপক্ষিণঃ
48.52
তথা তদায়োধনমুগ্রদর্শনং; নিশামুখে পিতৃপতিরাষ্ট্রসংনিভম্
নিরীক্ষমাণাঃ শনকৈর্জহুর্নরাঃ; সমুত্থিতারুণ্ডকুলোপসংকুলম্
48.53
অপেতবিধ্বস্তমহার্হভূষণং; নিপাতিতং শক্রসমং মহারথম্
রণেঽভিমন্যুং দদৃশুস্তদা জনা; ব্যপোঢহব্যং সদসীব পাবকম্