Utshovঅধ্যায় 47
47.1
সংজয় উবাচ
স কর্ণং কর্ণিনা কর্ণে পুনর্বিব্যাধ ফাল্গুনিঃ
শরৈঃ পঞ্চাশতা চৈনমবিধ্যত্কোপয়ন্ভৃশম্
47.2
প্রতিবিব্যাধ রাধেয়স্তাবদ্ভিরথ তং পুনঃ
স তৈরাচিতসর্বাঙ্গো বহ্বশোভত ভারত
47.3
কর্ণং চাপ্যকরোত্ক্রুদ্ধো রুধিরোত্পীডবাহিনম্
কর্ণোঽপি বিবভৌ শূরঃ শরৈশ্চিত্রোঽসৃগাপ্লুতঃ
47.4
তাবুভৌ শরচিত্রাঙ্গৌ রুধিরেণ সমুক্ষিতৌ
বভূবতুর্মহাত্মানৌ পুষ্পিতাবিব কিংশুকৌ
47.5
অথ কর্ণস্য সচিবান্ষট্শূরাংশ্চিত্রয়োধিনঃ
সাশ্বসূতধ্বজরথান্সৌভদ্রো নিজঘান হ
47.6
অথেতরান্মহেষ্বাসান্দশভির্দশভিঃ শরৈঃ
প্রত্যবিধ্যদসংভ্রান্তস্তদদ্ভুতমিবাভবৎ
47.7
মাগধস্য পুনঃ পুত্রং হত্বা ষড্ভিরজিহ্মগৈঃ
সাশ্বং সসূতং তরুণমশ্বকেতুমপাতয়ৎ
47.8
মার্তিকাবতকং ভোজং ততঃ কুঞ্জরকেতনম্
ক্ষুরপ্রেণ সমুন্মথ্য ননাদ বিসৃজঞ্শরান্
47.9
তস্য দৌঃশাসনির্বিদ্ধ্বা চতুর্ভিশ্চতুরো হয়ান্
সূতমেকেন বিব্যাধ দশভিশ্চার্জুনাত্মজম্
47.10
ততো দৌঃশাসনিং কার্ষ্ণির্বিদ্ধ্বা সপ্তভিরাশুগৈঃ
সংরম্ভাদ্রক্তনয়নো বাক্যমুচ্চৈরথাব্রবীৎ
47.11
পিতা তবাহবং ত্যক্ত্বা গতঃ কাপুরুষো যথা
দিষ্ট্যা ত্বমপি জানীষে যোদ্ধুং ন ত্বদ্য মোক্ষ্যসে
47.12
এতাবদুক্ত্বা বচনং কর্মারপরিমার্জিতম্
নারাচং বিসসর্জাস্মৈ তং দ্রৌণিস্ত্রিভিরাচ্ছিনৎ
47.13
তস্যার্জুনির্ধ্বজং ছিত্ত্বা শল্যং ত্রিভিরতাডয়ৎ
তং শল্যো নবভির্বাণৈর্গার্ধ্রপত্রৈরতাডয়ৎ
47.14
তস্যার্জুনির্ধ্বজং ছিত্ত্বা উভৌ চ পার্ষ্ণিসারথী
তং বিব্যাধায়সৈঃ ষড্ভিঃ সোঽপক্রামদ্রথান্তরম্
47.15
শত্রুংজয়ং চন্দ্রকেতুং মেঘবেগং সুবর্চসম্
সূর্যভাসং চ পঞ্চৈতান্হত্বা বিব্যাধ সৌবলম্
47.16
তং সৌবলস্ত্রিভির্বিদ্ধ্বা দুর্যোধনমথাব্রবীৎ
সর্ব এনং প্রমথ্নীমঃ পুরৈকৈকং হিনস্তি নঃ
47.17
অথাব্রবীত্তদা দ্রোণং কর্ণো বৈকর্তনো বৃষা
পুরা সর্বান্প্রমথ্নাতি ব্রূহ্যস্য বধমাশু নঃ
47.18
ততো দ্রোণো মহেষ্বাসঃ সর্বাংস্তান্প্রত্যভাষত
অস্তি বোঽস্যান্তরং কশ্চিত্কুমারস্য প্রপশ্যতি
47.19
অন্বস্য পিতরং হ্যদ্য চরতঃ সর্বতোদিশম্
শীঘ্রতাং নরসিংহস্য পাণ্ডবেয়স্য পশ্যত
47.20
ধনুর্মণ্ডলমেবাস্য রথমার্গেষু দৃশ্যতে
সংদধানস্য বিশিখাঞ্শীঘ্রং চৈব বিমুঞ্চতঃ
47.21
আরুজন্নিব মে প্রাণান্মোহয়ন্নপি সায়কৈঃ
প্রহর্ষয়তি মা ভূয়ঃ সৌভদ্রঃ পরবীরহা
47.22
অতি মা নন্দয়ত্যেষ সৌভদ্রো বিচরন্রণে
অন্তরং যস্য সংরব্ধা ন পশ্যন্তি মহারথাঃ
47.23
অস্যতো লঘুহস্তস্য দিশঃ সর্বা মহেষুভিঃ
ন বিশেষং প্রপশ্যামি রণে গাণ্ডীবধন্বনঃ
47.24
অথ কর্ণঃ পুনর্দ্রোণমাহার্জুনিশরার্দিতঃ
স্থাতব্যমিতি তিষ্ঠামি পীড্যমানোঽভিমন্যুনা
47.25
তেজস্বিনঃ কুমারস্য শরাঃ পরমদারুণাঃ
ক্ষিণ্বন্তি হৃদয়ং মেঽদ্য ঘোরাঃ পাবকতেজসঃ
47.26
তমাচার্যোঽব্রবীত্কর্ণং শনকৈঃ প্রহসন্নিব
অভেদ্যমস্য কবচং যুবা চাশুপরাক্রমঃ
47.27
উপদিষ্টা ময়া অস্য পিতুঃ কবচধারণা
তামেষ নিখিলাং বেত্তি ধ্রুবং পরপুরংজয়ঃ
47.28
শক্যং ত্বস্য ধনুশ্ছেত্তুং জ্যাং চ বাণৈঃ সমাহিতৈঃ
অভীশবো হয়াশ্চৈব তথোভৌ পার্ষ্ণিসারথী
47.29
এতত্কুরু মহেষ্বাস রাধেয় যদি শক্যতে
অথৈনং বিমুখীকৃত্য পশ্চাত্প্রহরণং কুরু
47.30
সধনুষ্কো ন শক্যোঽয়মপি জেতুং সুরাসুরৈঃ
বিরথং বিধনুষ্কং চ কুরুষ্বৈনং যদীচ্ছসি
47.31
তদাচার্যবচঃ শ্রুত্বা কর্ণো বৈকর্তনস্ত্বরন্
অস্যতো লঘুহস্তস্য পৃষত্কৈর্ধনুরাচ্ছিনৎ
47.32
অশ্বানস্যাবধীদ্ভোজো গৌতমঃ পার্ষ্ণিসারথী
শেষাস্তু ছিন্নধন্বানং শরবর্ষৈরবাকিরন্
47.33
ত্বরমাণাস্ত্বরাকালে বিরথং ষণ্মহারথাঃ
শরবর্ষৈরকরুণা বালমেকমবাকিরন্
47.34
স ছিন্নধন্বা বিরথঃ স্বধর্মমনুপালয়ন্
খড্গচর্মধরঃ শ্রীমানুত্পপাত বিহায়সম্
47.35
মার্গৈঃ স কৈশিকাদ্যৈশ্চ লাঘবেন বলেন চ
আর্জুনির্ব্যচরদ্ব্যোম্নি ভৃশং বৈ পক্ষিরাডিব
47.36
ময্যেব নিপতত্যেষ সাসিরিত্যূর্ধ্বদৃষ্টয়ঃ
বিব্যধুস্তং মহেষ্বাসাঃ সমরে ছিদ্রদর্শিনঃ
47.37
তস্য দ্রোণোঽচ্ছিনন্মুষ্টৌ খড্গং মণিময়ত্সরুম্
রাধেয়ো নিশিতৈর্বাণৈর্ব্যধমচ্চর্ম চোত্তমম্
47.38
ব্যসিচর্মেষুপূর্ণাঙ্গঃ সোঽন্তরিক্ষাত্পুনঃ ক্ষিতিম্
আস্থিতশ্চক্রমুদ্যম্য দ্রোণং ক্রুদ্ধোঽভ্যধাবত
47.39
স চক্ররেণূজ্জ্বলশোভিতাঙ্গো; বভাবতীবোন্নতচক্রপাণিঃ
রণেঽভিমন্যুঃ ক্ষণদাসুভদ্রঃ; স বাসুভদ্রানুকৃতিং প্রকুর্বন্
47.40
স্রুতরুধিরকৃতৈকরাগবক্ত্রো; ভ্রুকুটিপুটাকুটিলোঽতিসিংহনাদঃ
প্রভুরমিতবলো রণেঽভিমন্যু;র্নৃপবরমধ্যগতো ভৃশং ব্যরাজৎ