Utshovঅধ্যায় 46
46.1
ধৃতরাষ্ট্র উবাচ
তথা প্রবিষ্টং তরুণং সৌভদ্রমপরাজিতম্
কুলানুরূপং কুর্বাণং সংগ্রামেষ্বপলায়িনম্
46.2
আজানেয়ৈঃ সুবলিভির্যুক্তমশ্বৈস্ত্রিহায়নৈঃ
প্লবমানমিবাকাশে কে শূরাঃ সমবারয়ন্
46.3
সংজয় উবাচ
অভিমন্যুঃ প্রবিশ্যৈব তাবকান্নিশিতৈঃ শরৈঃ
অকরোদ্বিমুখান্সর্বান্পার্থিবান্পাণ্ডুনন্দনঃ
46.4
তং তু দ্রোণঃ কৃপঃ কর্ণো দ্রৌণিশ্চ সবৃহদ্বলঃ
কৃতবর্মা চ হার্দিক্যঃ ষড্রথাঃ পর্যবারয়ন্
46.5
দৃষ্ট্বা তু সৈন্ধবে ভারমতিমাত্রং সমাহিতম্
সৈন্যং তব মহারাজ যুধিষ্ঠিরমুপাদ্রবৎ
46.6
সৌভদ্রমিতরে বীরমভ্যবর্ষঞ্শরাম্বুভিঃ
তালমাত্রাণি চাপানি বিকর্ষন্তো মহারথাঃ
46.7
তাংস্তু সর্বান্মহেষ্বাসান্সর্ববিদ্যাসু নিষ্ঠিতান্
ব্যষ্টম্ভয়দ্রণে বাণৈঃ সৌভদ্রঃ পরবীরহা
46.8
দ্রোণং পঞ্চাশতা বিদ্ধ্বা বিংশত্যা চ বৃহদ্বলম্
অশীত্যা কৃতবর্মাণং কৃপং ষষ্ট্যা শিলীমুখৈঃ
46.9
রুক্মপুঙ্খৈর্মহাবেগৈরাকর্ণসমচোদিতৈঃ
অবিধ্যদ্দশভির্বাণৈরশ্বত্থামানমার্জুনিঃ
46.10
স কর্ণং কর্ণিনা কর্ণে পীতেন নিশিতেন চ
ফাল্গুনির্দ্বিষতাং মধ্যে বিব্যাধ পরমেষুণা
46.11
পাতয়িত্বা কৃপস্যাশ্বাংস্তথোভৌ পার্ষ্ণিসারথী
অথৈনং দশভির্বাণৈঃ প্রত্যবিধ্যত্স্তনান্তরে
46.12
ততো বৃন্দারকং বীরং কুরূণাং কীর্তিবর্ধনম্
পুত্রাণাং তব বীরাণাং পশ্যতামবধীদ্বলী
46.13
তং দ্রৌণিঃ পঞ্চবিংশত্যা ক্ষুদ্রকাণাং সমর্পয়ৎ
বরং বরমমিত্রাণামারুজন্তমভীতবৎ
46.14
স তু বাণৈঃ শিতৈস্তূর্ণং প্রত্যবিধ্যত মারিষ
পশ্যতাং ধার্তরাষ্ট্রাণামশ্বত্থামানমার্জুনিঃ
46.15
ষষ্ট্যা শরাণাং তং দ্রৌণিস্তিগ্মধারৈঃ সুতেজনৈঃ
উগ্রৈর্নাকম্পয়দ্বিদ্ধ্বা মৈনাকমিব পর্বতম্
46.16
স তু দ্রৌণিং ত্রিসপ্তত্যা হেমপুঙ্খৈরজিহ্মগৈঃ
প্রত্যবিধ্যন্মহাতেজা বলবানপকারিণম্
46.17
তস্মিন্দ্রোণো বাণশতং পুত্রগৃদ্ধী ন্যপাতয়ৎ
অশ্বত্থামা তথাষ্টৌ চ পরীপ্সন্পিতরং রণে
46.18
কর্ণো দ্বাবিংশতিং ভল্লান্কৃতবর্মা চতুর্দশ
বৃহদ্বলস্তু পঞ্চাশত্কৃপঃ শারদ্বতো দশ
46.19
তাংস্তু প্রত্যবধীত্সর্বান্দশভির্দশভিঃ শরৈঃ
তৈরর্দ্যমানঃ সৌভদ্রঃ সর্বতো নিশিতৈঃ শরৈঃ
46.20
তং কোসলানামধিপঃ কর্ণিনাতাডয়দ্ধৃদি
স তস্যাশ্বান্ধ্বজং চাপং সূতং চাপাতয়ত্ক্ষিতৌ
46.21
অথ কোসলরাজস্তু বিরথঃ খড্গচর্মধৃৎ
ইয়েষ ফাল্গুনেঃ কায়াচ্ছিরো হর্তুং সকুণ্ডলম্
46.22
স কোসলানাং ভর্তারং রাজপুত্রং বৃহদ্বলম্
হৃদি বিব্যাধ বাণেন স ভিন্নহৃদয়োঽপতৎ
46.23
বভঞ্জ চ সহস্রাণি দশ রাজন্মহাত্মনাম্
সৃজতামশিবা বাচঃ খড্গকার্মুকধারিণাম্
46.24
তথা বৃহদ্বলং হত্বা সৌভদ্রো ব্যচরদ্রণে
বিষ্টম্ভয়ন্মহেষ্বাসান্যোধাংস্তব শরাম্বুভিঃ