Utshovঅধ্যায় 45
45.1
ধৃতরাষ্ট্র উবাচ
যথা বদসি মে সূত একস্য বহুভিঃ সহ
সংগ্রামং তুমুলং ঘোরং জয়ং চৈব মহাত্মনঃ
45.2
অশ্রদ্ধেয়মিবাশ্চর্যং সৌভদ্রস্যাথ বিক্রমম্
কিং তু নাত্যদ্ভুতং তেষাং যেষাং ধর্মো ব্যপাশ্রয়ঃ
45.3
দুর্যোধনেঽথ বিমুখে রাজপুত্রশতে হতে
সৌভদ্রে প্রতিপত্তিং কাং প্রত্যপদ্যন্ত মামকাঃ
45.4
সংজয় উবাচ
সংশুষ্কাস্যাশ্চলন্নেত্রাঃ প্রস্বিন্না লোমহর্ষিণঃ
পলায়নকৃতোত্সাহা নিরুত্সাহা দ্বিষজ্জয়ে
45.5
হতান্ভ্রাতৄন্পিতৄন্পুত্রান্সুহৃত্সংবন্ধিবান্ধবান্
উত্সৃজ্যোত্সৃজ্য সমিয়ুস্ত্বরয়ন্তো হয়দ্বিপান্
45.6
তান্প্রভগ্নাংস্তথা দৃষ্ট্বা দ্রোণো দ্রৌণির্বৃহদ্বলঃ
কৃপো দুর্যোধনঃ কর্ণঃ কৃতবর্মাথ সৌবলঃ
45.7
অভিদ্রুতাঃ সুসংক্রুদ্ধাঃ সৌভদ্রমপরাজিতম্
তেঽপি পৌত্রেণ তে রাজন্প্রায়শো বিমুখীকৃতাঃ
45.8
একস্তু সুখসংবৃদ্ধো বাল্যাদ্দর্পাচ্চ নির্ভয়ঃ
ইষ্বস্ত্রবিন্মহাতেজা লক্ষ্মণোঽঽর্জুনিমভ্যয়াৎ
45.9
তমন্বগেবাস্য পিতা পুত্রগৃদ্ধী ন্যবর্তত
অনু দুর্যোধনং চান্যে ন্যবর্তন্ত মহারথাঃ
45.10
তং তেঽভিষিষিচুর্বাণৈর্মেঘা গিরিমিবাম্বুভিঃ
স চ তান্প্রমমাথৈকো বিষ্বগ্বাতো যথাম্বুদান্
45.11
পৌত্রং তু তব দুর্ধর্ষং লক্ষ্মণং প্রিয়দর্শনম্
পিতুঃ সমীপে তিষ্ঠন্তং শূরমুদ্যতকার্মুকম্
45.12
অত্যন্তসুখসংবৃদ্ধং ধনেশ্বরসুতোপমম্
আসসাদ রণে কার্ষ্ণির্মত্তো মত্তমিব দ্বিপম্
45.13
লক্ষ্মণেন তু সংগম্য সৌভদ্রঃ পরবীরহা
শরৈঃ সুনিশিতৈস্তীক্ষ্ণৈর্বাহ্বোরুরসি চার্পিতঃ
45.14
সংক্রুদ্ধো বৈ মহাবাহুর্দণ্ডাহত ইবোরগঃ
পৌত্রস্তব মহারাজ তব পৌত্রমভাষত
45.15
সুদৃষ্টঃ ক্রিয়তাং লোকো অমুং লোকং গমিষ্যসি
পশ্যতাং বান্ধবানাং ত্বাং নয়ামি যমসাদনম্
45.16
এবমুক্ত্বা ততো ভল্লং সৌভদ্রঃ পরবীরহা
উদ্ববর্হ মহাবাহুর্নির্মুক্তোরগসংনিভম্
45.17
স তস্য ভুজনির্মুক্তো লক্ষ্মণস্য সুদর্শনম্
সুনসং সুভ্রু কেশান্তং শিরোঽহার্ষীত্সকুণ্ডলম্
লক্ষ্মণং নিহতং দৃষ্ট্বা হা হেত্যুচ্চুক্রুশুর্জনাঃ
45.18
ততো দুর্যোধনঃ ক্রুদ্ধঃ প্রিয়ে পুত্রে নিপাতিতে
হতৈনমিতি চুক্রোশ ক্ষত্রিয়ান্ক্ষত্রিয়র্ষভঃ
45.19
ততো দ্রোণঃ কৃপঃ কর্ণো দ্রোণপুত্রো বৃহদ্বলঃ
কৃতবর্মা চ হার্দিক্যঃ ষড্রথাঃ পর্যবারয়ন্
45.20
স তান্বিদ্ধ্বা শিতৈর্বাণৈর্বিমুখীকৃত্য চার্জুনিঃ
বেগেনাভ্যপতত্ক্রুদ্ধঃ সৈন্ধবস্য মহদ্বলম্
45.21
আবব্রুস্তস্য পন্থানং গজানীকেন দংশিতাঃ
কলিঙ্গাশ্চ নিষাদাশ্চ ক্রাথপুত্রশ্চ বীর্যবান্
তত্প্রসক্তমিবাত্যর্থং যুদ্ধমাসীদ্বিশাং পতে
45.22
ততস্তত্কুঞ্জরানীকং ব্যধমদ্ধৃষ্টমার্জুনিঃ
যথা বিবান্নিত্যগতির্জলদাঞ্শতশোঽম্বরে
45.23
ততঃ ক্রাথঃ শরব্রাতৈরার্জুনিং সমবাকিরৎ
অথেতরে সংনিবৃত্তাঃ পুনর্দ্রোণমুখা রথাঃ
পরমাস্ত্রাণি ধুন্বানাঃ সৌভদ্রমভিদুদ্রুবুঃ
45.24
তান্নিবার্যার্জুনির্বাণৈঃ ক্রাথপুত্রমথার্দয়ৎ
শরৌঘেণাপ্রমেয়েণ ত্বরমাণো জিঘাংসয়া
45.25
সধনুর্বাণকেয়ূরৌ বাহূ সমুকুটং শিরঃ
ছত্রং ধ্বজং নিয়ন্তারমশ্বাংশ্চাস্য ন্যপাতয়ৎ
45.26
কুলশীলশ্রুতবলৈঃ কীর্ত্যা চাস্ত্রবলেন চ
যুক্তে তস্মিন্হতে বীরাঃ প্রায়শো বিমুখাভবন্