Utshovঅধ্যায় 44
44.1
সংজয় উবাচ
আদদানস্তু শূরাণামায়ূংষ্যভবদার্জুনিঃ
অন্তকঃ সর্বভূতানাং প্রাণান্কাল ইবাগতে
44.2
স শক্র ইব বিক্রান্তঃ শক্রসূনোঃ সুতো বলী
অভিমন্যুস্তদানীকং লোডয়ন্বহ্বশোভত
44.3
প্রবিশ্যৈব তু রাজেন্দ্র ক্ষত্রিয়েন্দ্রান্তকোপমঃ
সত্যশ্রবসমাদত্ত ব্যাঘ্রো মৃগমিবোল্বণম্
44.4
সত্যশ্রবসি চাক্ষিপ্তে ত্বরমাণা মহারথাঃ
প্রগৃহ্য বিপুলং শস্ত্রমভিমন্যুমুপাদ্রবন্
44.5
অহং পূর্বমহং পূর্বমিতি ক্ষত্রিয়পুংগবাঃ
স্পর্ধমানাঃ সমাজগ্মুর্জিঘাংসন্তোঽর্জুনাত্মজম্
44.6
ক্ষত্রিয়াণামনীকানি প্রদ্রুতান্যভিধাবতাম্
জগ্রাস তিমিরাসাদ্য ক্ষুদ্রমত্স্যানিবার্ণবে
44.7
যে কেচন গতাস্তস্য সমীপমপলায়িনঃ
ন তে প্রতিন্যবর্তন্ত সমুদ্রাদিব সিন্ধবঃ
44.8
মহাগ্রাহগৃহীতেব বাতবেগভয়ার্দিতা
সমকম্পত সা সেনা বিভ্রষ্টা নৌরিবার্ণবে
44.9
অথ রুক্মরথো নাম মদ্রেশ্বরসুতো বলী
ত্রস্তামাশ্বাসয়ন্সেনামত্রস্তো বাক্যমব্রবীৎ
44.10
অলং ত্রাসেন বঃ শূরা নৈষ কশ্চিন্ময়ি স্থিতে
অহমেনং গ্রহীষ্যামি জীবগ্রাহং ন সংশয়ঃ
44.11
এবমুক্ত্বা তু সৌভদ্রমভিদুদ্রাব বীর্যবান্
সুকল্পিতেনোহ্যমানঃ স্যন্দনেন বিরাজতা
44.12
সোঽভিমন্যুং ত্রিভির্বাণৈর্বিদ্ধ্বা বক্ষস্যথানদৎ
ত্রিভিশ্চ দক্ষিণে বাহৌ সব্যে চ নিশিতৈস্ত্রিভিঃ
44.13
স তস্যেষ্বসনং ছিত্ত্বা ফাল্গুণিঃ সব্যদক্ষিণৌ
ভুজৌ শিরশ্চ স্বক্ষিভ্রু ক্ষিতৌ ক্ষিপ্রমপাতয়ৎ
44.14
দৃষ্ট্বা রুক্মরথং রুগ্ণং পুত্রং শল্যস্য মানিনম্
জীবগ্রাহং জিঘৃক্ষন্তং সৌভদ্রেণ যশস্বিনা
44.15
সংগ্রামদুর্মদা রাজন্রাজপুত্রাঃ প্রহারিণঃ
বয়স্যাঃ শল্যপুত্রস্য সুবর্ণবিকৃতধ্বজাঃ
44.16
তালমাত্রাণি চাপানি বিকর্ষন্তো মহারথাঃ
আর্জুনিং শরবর্ষেণ সমন্তাত্পর্যবারয়ন্
44.17
শূরৈঃ শিক্ষাবলোপেতৈস্তরুণৈরত্যমর্ষণৈঃ
দৃষ্ট্বৈকং সমরে শূরং সৌভদ্রমপরাজিতম্
44.18
ছাদ্যমানং শরব্রাতৈর্হৃষ্টো দুর্যোধনোঽভবৎ
বৈবস্বতস্য ভবনং গতমেনমমন্যত
44.19
সুবর্ণপুঙ্খৈরিষুভির্নানালিঙ্গৈস্ত্রিভিস্ত্রিভিঃ
অদৃশ্যমার্জুনিং চক্রুর্নিমেষাত্তে নৃপাত্মজাঃ
44.20
সসূতাশ্বধ্বজং তস্য স্যন্দনং তং চ মারিষ
আচিতং সমপশ্যাম শ্বাবিধং শললৈরিব
44.21
স গাঢবিদ্ধঃ ক্রুদ্ধশ্চ তোত্ত্রৈর্গজ ইবার্দিতঃ
গান্ধর্বমস্ত্রমায়চ্ছদ্রথমায়াং চ যোজয়ৎ
44.22
অর্জুনেন তপস্তপ্ত্বা গন্ধর্বেভ্যো যদাহৃতম্
তুম্বুরুপ্রমুখেভ্যো বৈ তেনামোহয়তাহিতান্
44.23
একঃ স শতধা রাজন্দৃশ্যতে স্ম সহস্রধা
অলাতচক্রবত্সংখ্যে ক্ষিপ্রমস্ত্রাণি দর্শয়ন্
44.24
রথচর্যাস্ত্রমায়াভির্মোহয়িত্বা পরংতপঃ
বিভেদ শতধা রাজঞ্শরীরাণি মহীক্ষিতাম্
44.25
প্রাণাঃ প্রাণভৃতাং সংখ্যে প্রেষিতা নিশিতৈঃ শরৈঃ
রাজন্প্রাপুরমুং লোকং শরীরাণ্যবনিং যয়ুঃ
44.26
ধনূংষ্যশ্বান্নিয়ন্তৄংশ্চ ধ্বজান্বাহূংশ্চ সাঙ্গদান্
শিরাংসি চ শিতৈর্ভল্লৈস্তেষাং চিচ্ছেদ ফাল্গুনিঃ
44.27
চূতারামো যথা ভগ্নঃ পঞ্চবর্ষফলোপগঃ
রাজপুত্রশতং তদ্বত্সৌভদ্রেণাপতদ্ধতম্
44.28
ক্রুদ্ধাশীবিষসংকাশান্সুকুমারান্সুখোচিতান্
একেন নিহতান্দৃষ্ট্বা ভীতো দুর্যোধনোঽভবৎ
44.29
রথিনঃ কুঞ্জরানশ্বান্পদাতীংশ্চাবমর্দিতান্
দৃষ্ট্বা দুর্যোধনঃ ক্ষিপ্রমুপায়াত্তমমর্ষিতঃ
44.30
তয়োঃ ক্ষণমিবাপূর্ণঃ সংগ্রামঃ সমপদ্যত
অথাভবত্তে বিমুখঃ পুত্রঃ শরশতার্দিতঃ