অধ্যায় 43

43.1

সংজয় উবাচ
সৈন্ধবেন নিরুদ্ধেষু জয়গৃদ্ধিষু পাণ্ডুষু
সুঘোরমভবদ্যুদ্ধং ত্বদীয়ানাং পরৈঃ সহ

প্রবিশ্য ত্বার্জুনিঃ সেনাং সত্যসংধো দুরাসদাম্
ব্যক্ষোভয়ত তেজস্বী মকরঃ সাগরং যথা

তং তথা শরবর্ষেণ ক্ষোভয়ন্তমরিংদমম্
যথাপ্রধানাঃ সৌভদ্রমভ্যয়ুঃ কুরুসত্তমাঃ

তেষাং তস্য চ সংমর্দো দারুণঃ সমপদ্যত
সৃজতাং শরবর্ষাণি প্রসক্তমমিতৌজসাম্

রথব্রজেন সংরুদ্ধস্তৈরমিত্রৈরথার্জুনিঃ
বৃষসেনস্য যন্তারং হত্বা চিচ্ছেদ কার্মুকম্

তস্য বিব্যাধ বলবাঞ্শরৈরশ্বানজিহ্মগৈঃ
বাতায়মানৈরথ তৈরশ্বৈরপহৃতো রণাৎ

তেনান্তরেণাভিমন্যোর্যন্তাপাসারয়দ্রথম্
রথব্রজাস্ততো হৃষ্টাঃ সাধু সাধ্বিতি চুক্রুশুঃ

তং সিংহমিব সংক্রুদ্ধং প্রমথ্নন্তং শরৈররীন্
আরাদায়ান্তমভ্যেত্য বসাতীয়োঽভ্যয়াদ্দ্রুতম্

সোঽভিমন্যুং শরৈঃ ষষ্ট্যা রুক্মপুঙ্খৈরবাকিরৎ
অব্রবীচ্চ ন মে জীবঞ্জীবতো যুধি মোক্ষ্যসে

তময়স্ময়বর্মাণমিষুণা আশুপাতিনা
বিব্যাধ হৃদি সৌভদ্রঃ স পপাত ব্যসুঃ ক্ষিতৌ

বসাত্যং নিহতং দৃষ্ট্বা ক্রুদ্ধাঃ ক্ষত্রিয়পুংগবাঃ
পরিবব্রুস্তদা রাজংস্তব পৌত্রং জিঘাংসবঃ

বিস্ফারয়ন্তশ্চাপানি নানারূপাণ্যনেকশঃ
তদ্যুদ্ধমভবদ্রৌদ্রং সৌভদ্রস্যারিভিঃ সহ

তেষাং শরান্সেষ্বসনাঞ্শরীরাণি শিরাংসি চ
সকুণ্ডলানি স্রগ্বীণি ক্রুদ্ধশ্চিচ্ছেদ ফাল্গুনিঃ

সখড্গাঃ সাঙ্গুলিত্রাণাঃ সপট্টিশপরশ্বধাঃ
অদৃশ্যন্ত ভুজাশ্ছিন্না হেমাভরণভূষিতাঃ

স্রগ্ভিরাভরণৈর্বস্ত্রৈঃ পতিতৈশ্চ মহাধ্বজৈঃ
বর্মভিশ্চর্মভির্হারৈর্মুকুটৈশ্ছত্রচামরৈঃ

অপস্করৈরধিষ্ঠানৈরীষাদণ্ডকবন্ধুরৈঃ
অক্ষৈর্বিমথিতৈশ্চক্রৈর্ভগ্নৈশ্চ বহুধা যুগৈঃ

অনুকর্ষৈঃ পতাকাভিস্তথা সারথিবাজিভিঃ
রথৈশ্চ ভগ্নৈর্নাগৈশ্চ হতৈঃ কীর্ণাভবন্মহী

নিহতৈঃ ক্ষত্রিয়ৈঃ শূরৈর্নানাজনপদেশ্বরৈঃ
জয়গৃদ্ধৈর্বৃতা ভূমির্দারুণা সমপদ্যত

দিশো বিচরতস্তস্য সর্বাশ্চ প্রদিশস্তথা
রণেঽভিমন্যোঃ ক্রুদ্ধস্য রূপমন্তরধীয়ত

কাঞ্চনং যদ্যদস্যাসীদ্বর্ম চাভরণানি চ
ধনুষশ্চ শরাণাং চ তদপশ্যাম কেবলম্

তং তদা নাশকত্কশ্চিচ্চক্ষুর্ভ্যামভিবীক্ষিতুম্
আদদানং শরৈর্যোধান্মধ্যে সূর্যমিব স্থিতম্