অধ্যায় 42

42.1

সংজয় উবাচ
যন্মা পৃচ্ছসি রাজেন্দ্র সিন্ধুরাজস্য বিক্রমম্
শৃণু তত্সর্বমাখ্যাস্যে যথা পাণ্ডূনয়োধয়ৎ

তমূহুঃ সারথের্বশ্যাঃ সৈন্ধবাঃ সাধুবাহিনঃ
বিকুর্বাণা বৃহন্তোঽশ্বাঃ শ্বসনোপমরংহসঃ

গন্ধর্বনগরাকারং বিধিবত্কল্পিতং রথম্
তস্যাভ্যশোভয়ত্কেতুর্বারাহো রাজতো মহান্

শ্বেতচ্ছত্রপতাকাভিশ্চামরব্যজনেন চ
স বভৌ রাজলিঙ্গৈস্তৈস্তারাপতিরিবাম্বরে

মুক্তাবজ্রমণিস্বর্ণৈর্ভূষিতং তদয়স্ময়ম্
বরূথং বিবভৌ তস্য জ্যোতির্ভিঃ খমিবাবৃতম্

স বিস্ফার্য মহচ্চাপং কিরন্নিষুগণান্বহূন্
তত্খণ্ডং পূরয়ামাস যদ্ব্যদারয়দার্জুনিঃ

স সাত্যকিং ত্রিভির্বাণৈরষ্টভিশ্চ বৃকোদরম্
ধৃষ্টদ্যুম্নং তথা ষষ্ট্যা বিরাটং দশভিঃ শরৈঃ

দ্রুপদং পঞ্চভিস্তীক্ষ্ণৈর্দশভিশ্চ শিখণ্ডিনম্
কেকয়ান্পঞ্চবিংশত্যা দ্রৌপদেয়াংস্ত্রিভিস্ত্রিভিঃ

যুধিষ্ঠিরং চ সপ্তত্যা ততঃ শেষানপানুদৎ
ইষুজালেন মহতা তদদ্ভুতমিবাভবৎ

অথাস্য শিতপীতেন ভল্লেনাদিশ্য কার্মুকম্
চিচ্ছেদ প্রহসন্রাজা ধর্মপুত্রঃ প্রতাপবান্

অক্ষ্ণোর্নিমেষমাত্রেণ সোঽন্যদাদায় কার্মুকম্
বিব্যাধ দশভিঃ পার্থ তাংশ্চৈবান্যাংস্ত্রিভিস্ত্রিভিঃ

তস্য তল্লাঘবং জ্ঞাত্বা ভীমো ভল্লৈস্ত্রিভিঃ পুনঃ
ধনুর্ধ্বজং চ ছত্রং চ ক্ষিতৌ ক্ষিপ্রমপাতয়ৎ

সোঽন্যদাদায় বলবান্সজ্যং কৃত্বা চ কার্মুকম্
ভীমস্যাপোথয়ত্কেতুং ধনুরশ্বাংশ্চ মারিষ

স হতাশ্বাদবপ্লুত্য ছিন্নধন্বা রথোত্তমাৎ
সাত্যকেরাপ্লুতো যানং গির্যগ্রমিব কেসরী

ততস্ত্বদীয়াঃ সংহৃষ্টাঃ সাধু সাধ্বিতি চুক্রুশুঃ
সিন্ধুরাজস্য তত্কর্ম প্রেক্ষ্যাশ্রদ্ধেয়মুত্তমম্

সংক্রুদ্ধান্পাণ্ডবানেকো যদ্দধারাস্ত্রতেজসা
তত্তস্য কর্ম ভূতানি সর্বাণ্যেবাভ্যপূজয়ন্

সৌভদ্রেণ হতৈঃ পূর্বং সোত্তরায়ুধিভির্দ্বিপৈঃ
পাণ্ডূনাং দর্শিতঃ পন্থাঃ সৈন্ধবেন নিবারিতঃ

যতমানাস্তু তে বীরা মত্স্যপাঞ্চালকেকয়াঃ
পাণ্ডবাশ্চান্বপদ্যন্ত প্রত্যৈকশ্যেন সৈন্ধবম্

যো যো হি যততে ভেত্তুং দ্রোণানীকং তবাহিতঃ
তং তং দেববরপ্রাপ্ত্যা সৈন্ধবঃ প্রত্যবারয়ৎ