অধ্যায় 41

41.1

ধৃতরাষ্ট্র উবাচ
বালমত্যন্তসুখিনমবার্যবলদর্পিতম্
যুদ্ধেষু কুশলং বীরং কুলপুত্রং তনুত্যজম্

গাহমানমনীকানি সদশ্বৈস্তং ত্রিহায়নৈঃ
অপি যৌধিষ্ঠিরাত্সৈন্যাত্কশ্চিদন্বপতদ্রথী

সংজয় উবাচ
যুধিষ্ঠিরো ভীমসেনঃ শিখণ্ডী সাত্যকির্যমৌ
ধৃষ্টদ্যুম্নো বিরাটশ্চ দ্রুপদশ্চ সকেকয়ঃ
ধৃষ্টকেতুশ্চ সংরব্ধো মত্স্যাশ্চান্বপতন্রণে

অভ্যদ্রবন্পরীপ্সন্তো ব্যূঢানীকাঃ প্রহারিণঃ
তান্দৃষ্ট্বা দ্রবতঃ শূরাংস্ত্বদীয়া বিমুখাভবন্

ততস্তদ্বিমুখং দৃষ্ট্বা তব সূনোর্মহদ্বলম্
জামাতা তব তেজস্বী বিষ্টম্ভয়িষুরাদ্রবৎ

সৈন্ধবস্য মহারাজ পুত্রো রাজা জয়দ্রথঃ
স পুত্রগৃদ্ধিনঃ পার্থান্সহসৈন্যানবারয়ৎ

উগ্রধন্বা মহেষ্বাসো দিব্যমস্ত্রমুদীরয়ন্
বার্ধক্ষত্রিরুপাসেধত্প্রবণাদিব কুঞ্জরান্

ধৃতরাষ্ট্র উবাচ
অতিভারমহং মন্যে সৈন্ধবে সংজয়াহিতম্
যদেকঃ পাণ্ডবান্ক্রুদ্ধান্পুত্রগৃদ্ধীনবারয়ৎ

অত্যদ্ভুতমিদং মন্যে বলং শৌর্যং চ সৈন্ধবে
তদস্য ব্রূহি মে বীর্যং কর্ম চাগ্র্যং মহাত্মনঃ

কিং দত্তং হুতমিষ্টং বা সুতপ্তমথ বা তপঃ
সিন্ধুরাজেন যেনৈকঃ ক্রুদ্ধান্পার্থানবারয়ৎ

সংজয় উবাচ
দ্রৌপদীহরণে যত্তদ্ভীমসেনেন নির্জিতঃ
মানাত্স তপ্তবান্রাজা বরার্থী সুমহত্তপঃ

ইন্দ্রিয়াণীন্দ্রিয়ার্থেভ্যঃ প্রিয়েভ্যঃ সংনিবর্ত্য সঃ
ক্ষুত্পিপাসাতপসহঃ কৃশো ধমনিসংততঃ
দেবমারাধয়চ্ছর্বং গৃণন্ব্রহ্ম সনাতনম্

ভক্তানুকম্পী ভগবাংস্তস্য চক্রে ততো দয়াম্
স্বপ্নান্তেঽপ্যথ চৈবাহ হরঃ সিন্ধুপতেঃ সুতম্
বরং বৃণীষ্ব প্রীতোঽস্মি জয়দ্রথ কিমিচ্ছসি

এবমুক্তস্তু শর্বেণ সিন্ধুরাজো জয়দ্রথঃ
উবাচ প্রণতো রুদ্রং প্রাঞ্জলির্নিয়তাত্মবান্

পাণ্ডবেয়ানহং সংখ্যে ভীমবীর্যপরাক্রমান্
একো রণে ধারয়েয়ং সমস্তানিতি ভারত

এবমুক্তস্তু দেবেশো জয়দ্রথমথাব্রবীৎ
দদামি তে বরং সৌম্য বিনা পার্থং ধনংজয়ম্

ধারয়িষ্যসি সংগ্রামে চতুরঃ পাণ্ডুনন্দনান্
এবমস্ত্বিতি দেবেশমুক্ত্বাবুধ্যত পার্থিবঃ

স তেন বরদানেন দিব্যেনাস্ত্রবলেন চ
একঃ সংধারয়ামাস পাণ্ডবানামনীকিনীম্

তস্য জ্যাতলঘোষেণ ক্ষত্রিয়ান্ভয়মাবিশৎ
পরাংস্তু তব সৈন্যস্য হর্ষঃ পরমকোঽভবৎ

দৃষ্ট্বা তু ক্ষত্রিয়া ভারং সৈন্ধবে সর্বমর্পিতম্
উত্ক্রুশ্যাভ্যদ্রবন্রাজন্যেন যৌধিষ্ঠিরং বলম্