Utshovঅধ্যায় 40
40.1
সংজয় উবাচ
সোঽভিগর্জন্ধনুষ্পাণির্জ্যাং বিকর্ষন্পুনঃ পুনঃ
তয়োর্মহাত্মনোস্তূর্ণং রথান্তরমবাপতৎ
40.2
সোঽবিধ্যদ্দশভির্বাণৈরভিমন্যুং দুরাসদম্
সচ্ছত্রধ্বজয়ন্তারং সাশ্বমাশু স্ময়ন্নিব
40.3
পিতৃপৈতামহং কর্ম কুর্বাণমতিমানুষম্
দৃষ্ট্বার্দিতং শরৈঃ কার্ষ্ণিং ত্বদীয়া হৃষিতাভবন্
40.4
তস্যাভিমন্যুরায়ম্য স্ময়ন্নেকেন পত্রিণা
শিরঃ প্রচ্যাবয়ামাস স রথাত্প্রাপতদ্ভুবি
40.5
কর্ণিকারমিবোদ্ধূতং বাতেন মথিতং নগাৎ
ভ্রাতরং নিহতং দৃষ্ট্বা রাজন্কর্ণো ব্যথাং যয়ৌ
40.6
বিমুখীকৃত্য কর্ণং তু সৌভদ্রঃ কঙ্কপত্রিভিঃ
অন্যানপি মহেষ্বাসাংস্তূর্ণমেবাভিদুদ্রুবে
40.7
ততস্তদ্বিততং জালং হস্ত্যশ্বরথপত্তিমৎ
ঝষঃ ক্রুদ্ধ ইবাভিন্দদভিমন্যুর্মহায়শাঃ
40.8
কর্ণস্তু বহুভির্বাণৈরর্দ্যমানোঽভিমন্যুনা
অপায়াজ্জবনৈরশ্বৈস্ততোঽনীকমভিদ্যত
40.9
শলভৈরিব চাকাশে ধারাভিরিব চাবৃতে
অভিমন্যোঃ শরৈ রাজন্ন প্রাজ্ঞায়ত কিংচন
40.10
তাবকানাং তু যোধানাং বধ্যতাং নিশিতৈঃ শরৈঃ
অন্যত্র সৈন্ধবাদ্রাজন্ন স্ম কশ্চিদতিষ্ঠত
40.11
সৌভদ্রস্তু ততঃ শঙ্খং প্রধ্মাপ্য পুরুষর্ষভঃ
শীঘ্রমভ্যপতত্সেনাং ভারতীং ভরতর্ষভ
40.12
স কক্ষেঽগ্নিরিবোত্সৃষ্টো নির্দহংস্তরসা রিপূন্
মধ্যে ভারতসৈন্যানামার্জুনিঃ পর্যবর্তত
40.13
রথনাগাশ্বমনুজানর্দয়ন্নিশিতৈঃ শরৈঃ
স প্রবিশ্যাকরোদ্ভূমিং কবন্ধগণসংকুলাম্
40.14
সৌভদ্রচাপপ্রভবৈর্নিকৃত্তাঃ পরমেষুভিঃ
স্বানেবাভিমুখান্ঘ্নন্তঃ প্রাদ্রবঞ্জীবিতার্থিনঃ
40.15
তে ঘোরা রৌদ্রকর্মাণো বিপাঠাঃ পৃথবঃ শিতাঃ
নিঘ্নন্তো রথনাগাশ্বাঞ্জগ্মুরাশু বসুংধরাম্
40.16
সায়ুধাঃ সাঙ্গুলিত্রাণাঃ সখড্গাঃ সাঙ্গদা রণে
দৃশ্যন্তে বাহবশ্ছিন্না হেমাভরণভূষিতাঃ
40.17
শরাশ্চাপানি খড্গাশ্চ শরীরাণি শিরাংসি চ
সকুণ্ডলানি স্রগ্বীণি ভূমাবাসন্সহস্রশঃ
40.18
অপস্করৈরধিষ্ঠানৈরীষাদণ্ডকবন্ধুরৈঃ
অক্ষৈর্বিমথিতৈশ্চক্রৈর্ভগ্নৈশ্চ বহুধা রথৈঃ
শক্তিচাপায়ুধৈশ্চাপি পতিতৈশ্চ মহাধ্বজৈঃ
40.19
নিহতৈঃ ক্ষত্রিয়ৈরশ্বৈর্বারণৈশ্চ বিশাং পতে
অগম্যকল্পা পৃথিবী ক্ষণেনাসীত্সুদারুণা
40.20
বধ্যতাং রাজপুত্রাণাং ক্রন্দতামিতরেতরম্
প্রাদুরাসীন্মহাশব্দো ভীরূণাং ভয়বর্ধনঃ
স শব্দো ভরতশ্রেষ্ঠ দিশঃ সর্বা ব্যনাদয়ৎ
40.21
সৌভদ্রশ্চাদ্রবত্সেনাং নিঘ্নন্নশ্বরথদ্বিপান্
ব্যচরত্স দিশঃ সর্বাঃ প্রদিশশ্চাহিতান্রুজন্
40.22
তং তদা নানুপশ্যাম সৈন্যেন রজসাবৃতম্
আদদানং গজাশ্বানাং নৃণাং চায়ূংষি ভারত
40.23
ক্ষণেন ভূয়োঽপশ্যাম সূর্যং মধ্যংদিনে যথা
অভিমন্যুং মহারাজ প্রতপন্তং দ্বিষদ্গণান্
40.24
স বাসবসমঃ সংখ্যে বাসবস্যাত্মজাত্মজঃ
অভিমন্যুর্মহারাজ সৈন্যমধ্যে ব্যরোচত