Utshovঅধ্যায় 39
39.1
সংজয় উবাচ
শরবিক্ষতগাত্রস্তু প্রত্যমিত্রমবস্থিতম্
অভিমন্যুঃ স্ময়ন্ধীমান্দুঃশাসনমথাব্রবীৎ
39.2
দিষ্ট্যা পশ্যামি সংগ্রামে মানিনং শত্রুমাগতম্
নিষ্ঠুরং ত্যক্তধর্মাণমাক্রোশনপরায়ণম্
39.3
যত্সভায়াং ত্বয়া রাজ্ঞো ধৃতরাষ্ট্রস্য শৃণ্বতঃ
কোপিতঃ পরুষৈর্বাক্যৈর্ধর্মরাজো যুধিষ্ঠিরঃ
জয়োন্মত্তেন ভীমশ্চ বহ্ববদ্ধং প্রভাষতা
39.4
পরবিত্তাপহারস্য ক্রোধস্যাপ্রশমস্য চ
লোভস্য জ্ঞাননাশস্য দ্রোহস্যাত্যাহিতস্য চ
39.5
পিতৄণাং মম রাজ্যস্য হরণস্যোগ্রধন্বিনাম্
তত্ত্বামিদমনুপ্রাপ্তং তত্কোপাদ্বৈ মহাত্মনাম্
39.6
সদ্যশ্চোগ্রমধর্মস্য ফলং প্রাপ্নুহি দুর্মতে
শাসিতাস্ম্যদ্য তে বাণৈঃ সর্বসৈন্যস্য পশ্যতঃ
39.7
অদ্যাহমনৃণস্তস্য কোপস্য ভবিতা রণে
অমর্ষিতায়াঃ কৃষ্ণায়াঃ কাঙ্ক্ষিতস্য চ মে পিতুঃ
39.8
অদ্য কৌরব্য ভীমস্য ভবিতাস্ম্যনৃণো যুধি
ন হি মে মোক্ষ্যসে জীবন্যদি নোত্সৃজসে রণম্
39.9
এবমুক্ত্বা মহাবাহুর্বাণং দুঃশাসনান্তকম্
সংদধে পরবীরঘ্নঃ কালাগ্ন্যনিলবর্চসম্
39.10
তস্যোরস্তূর্ণমাসাদ্য জত্রুদেশে বিভিদ্য তম্
অথৈনং পঞ্চবিংশত্যা পুনশ্চৈব সমর্পয়ৎ
39.11
স গাঢবিদ্ধো ব্যথিতো রথোপস্থ উপাবিশৎ
দুঃশাসনো মহারাজ কশ্মলং চাবিশন্মহৎ
39.12
সারথিস্ত্বরমাণস্তু দুঃশাসনমচেতসম্
রণমধ্যাদপোবাহ সৌভদ্রশরপীডিতম্
39.13
পাণ্ডবা দ্রৌপদেয়াশ্চ বিরাটশ্চ সমীক্ষ্য তম্
পাঞ্চালাঃ কেকয়াশ্চৈব সিংহনাদমথানদন্
39.14
বাদিত্রাণি চ সর্বাণি নানালিঙ্গানি সর্বশঃ
প্রাবাদয়ন্ত সংহৃষ্টাঃ পাণ্ডূনাং তত্র সৈনিকাঃ
39.15
পশ্যন্তঃ স্ময়মানাশ্চ সৌভদ্রস্য বিচেষ্টিতম্
অত্যন্তবৈরিণং দৃপ্তং দৃষ্ট্বা শত্রুং পরাজিতম্
39.16
ধর্মমারুতশক্রাণামাশ্বিনোঃ প্রতিমাস্তথা
ধারয়ন্তো ধ্বজাগ্রেষু দ্রৌপদেয়া মহারথাঃ
39.17
সাত্যকিশ্চেকিতানশ্চ ধৃষ্টদ্যুম্নশিখণ্ডিনৌ
কেকয়া ধৃষ্টকেতুশ্চ মত্স্যপাঞ্চালসৃংজয়াঃ
39.18
পাণ্ডবাশ্চ মুদা যুক্তা যুধিষ্ঠিরপুরোগমাঃ
অভ্যবর্তন্ত সহিতা দ্রোণানীকং বিভিত্সবঃ
39.19
ততোঽভবন্মহদ্যুদ্ধং ত্বদীয়ানাং পরৈঃ সহ
জয়মাকাঙ্ক্ষমাণানাং শূরাণামনিবর্তিনাম্
39.20
দুর্যোধনো মহারাজ রাধেয়মিদমব্রবীৎ
পশ্য দুঃশাসনং বীরমভিমন্যুবশং গতম্
39.21
প্রতপন্তমিবাদিত্যং নিঘ্নন্তং শাত্রবান্রণে
সৌভদ্রমুদ্যতাস্ত্রাতুমভিধাবন্তি পাণ্ডবাঃ
39.22
ততঃ কর্ণঃ শরৈস্তীক্ষ্ণৈরভিমন্যুং দুরাসদম্
অভ্যবর্ষত সংক্রুদ্ধঃ পুত্রস্য হিতকৃত্তব
39.23
তস্য চানুচরাংস্তীক্ষ্ণৈর্বিব্যাধ পরমেষুভিঃ
অবজ্ঞাপূর্বকং বীরঃ সৌভদ্রস্য রণাজিরে
39.24
অভিমন্যুস্তু রাধেয়ং ত্রিসপ্তত্যা শিলীমুখৈঃ
অবিধ্যত্ত্বরিতো রাজন্দ্রোণং প্রেপ্সুর্মহামনাঃ
39.25
তং তদা নাশকত্কশ্চিদ্দ্রোণাদ্বারয়িতুং রণে
আরুজন্তং রথশ্রেষ্ঠান্বজ্রহস্তমিবাসুরান্
39.26
ততঃ কর্ণো জয়প্রেপ্সুর্মানী সর্বধনুর্ভৃতাম্
সৌভদ্রং শতশোঽবিধ্যদুত্তমাস্ত্রাণি দর্শয়ন্
39.27
সোঽস্ত্রৈরস্ত্রবিদাং শ্রেষ্ঠো রামশিষ্যঃ প্রতাপবান্
সমরে শত্রুদুর্ধর্ষমভিমন্যুমপীডয়ৎ
39.28
স তথা পীড্যমানস্তু রাধেয়েনাস্ত্রবৃষ্টিভিঃ
সমরেঽমরসংকাশঃ সৌভদ্রো ন ব্যষীদত
39.29
ততঃ শিলাশিতৈস্তীক্ষ্ণৈর্ভল্লৈঃ সংনতপর্বভিঃ
ছিত্ত্বা ধনূংষি শূরাণামার্জুনিঃ কর্ণমার্দয়ৎ
স ধ্বজং কার্মুকং চাস্য ছিত্ত্বা ভূমৌ ন্যপাতয়ৎ
39.30
ততঃ কৃচ্ছ্রগতং কর্ণং দৃষ্ট্বা কর্ণাদনন্তরঃ
সৌভদ্রমভ্যয়াত্তূর্ণং দৃঢমুদ্যম্য কার্মুকম্
39.31
তত উচ্চুক্রুশুঃ পার্থাস্তেষাং চানুচরা জনাঃ
বাদিত্রাণি চ সংজঘ্নুঃ সৌভদ্রং চাপি তুষ্টুবুঃ