অধ্যায় 38

38.1

ধৃতরাষ্ট্র উবাচ
দ্বৈধীভবতি মে চিত্তং হ্রিয়া তুষ্ট্যা চ সংজয়
মম পুত্রস্য যত্সৈন্যং সৌভদ্রঃ সমবারয়ৎ

38.2

বিস্তরেণৈব মে শংস সর্বং গাবল্গণে পুনঃ
বিক্রীডিতং কুমারস্য স্কন্দস্যেবাসুরৈঃ সহ

38.3

সংজয় উবাচ
হন্ত তে সংপ্রবক্ষ্যামি বিমর্দমতিদারুণম্
একস্য চ বহূনাং চ যথাসীত্তুমুলো রণঃ

38.4

অভিমন্যুঃ কৃতোত্সাহঃ কৃতোত্সাহানরিংদমান্
রথস্থো রথিনঃ সর্বাংস্তাবকানপ্যহর্ষয়ৎ

38.5

দ্রোণং কর্ণং কৃপং শল্যং দ্রৌণিং ভোজং বৃহদ্বলম্
দুর্যোধনং সৌমদত্তিং শকুনিং চ মহাবলম্

38.6

নানানৃপান্নৃপসুতান্সৈন্যানি বিবিধানি চ
অলাতচক্রবত্সর্বাংশ্চরন্বাণৈঃ সমভ্যয়াৎ

38.7

নিঘ্নন্নমিত্রান্সৌভদ্রঃ পরমাস্ত্রঃ প্রতাপবান্
অদর্শয়ত তেজস্বী দিক্ষু সর্বাসু ভারত

38.8

তদ্দৃষ্ট্বা চরিতং তস্য সৌভদ্রস্যামিতৌজসঃ
সমকম্পন্ত সৈন্যানি ত্বদীয়ানি পুনঃ পুনঃ

38.9

অথাব্রবীন্মহাপ্রাজ্ঞো ভারদ্বাজঃ প্রতাপবান্
হর্ষেণোত্ফুল্লনয়নঃ কৃপমাভাষ্য সত্বরম্

38.10

ঘট্টয়ন্নিব মর্মাণি তব পুত্রস্য মারিষ
অভিমন্যুং রণে দৃষ্ট্বা তদা রণবিশারদম্

38.11

এষ গচ্ছতি সৌভদ্রঃ পার্থানামগ্রতো যুবা
নন্দয়ন্সুহৃদঃ সর্বান্রাজানং চ যুধিষ্ঠিরম্

38.12

নকুলং সহদেবং চ ভীমসেনং চ পাণ্ডবম্
বন্ধূন্সংবন্ধিনশ্চান্যান্মধ্যস্থান্সুহৃদস্তথা

38.13

নাস্য যুদ্ধে সমং মন্যে কংচিদন্যং ধনুর্ধরম্
ইচ্ছন্হন্যাদিমাং সেনাং কিমর্থমপি নেচ্ছতি

38.14

দ্রোণস্য প্রীতিসংয়ুক্তং শ্রুত্বা বাক্যং তবাত্মজঃ
আর্জুনিং প্রতি সংক্রুদ্ধো দ্রোণং দৃষ্ট্বা স্ময়ন্নিব

38.15

অথ দুর্যোধনঃ কর্ণমব্রবীদ্বাহ্লিকং কৃপম্
দুঃসাসনং মদ্ররাজং তাংস্তাংশ্চান্যান্মহারথান্

38.16

সর্বমূর্ধাবসিক্তানামাচার্যো ব্রহ্মবিত্তমঃ
অর্জুনস্য সুতং মূঢং নাভিহন্তুমিহেচ্ছতি

38.17

ন হ্যস্য সমরে মুচ্যেদন্তকোঽপ্যাততায়িনঃ
কিমঙ্গ পুনরেবান্যো মর্ত্যঃ সত্যং ব্রবীমি বঃ

38.18

অর্জুনস্য সুতং ত্বেষ শিষ্যত্বাদভিরক্ষতি
পুত্রাঃ শিষ্যাশ্চ দয়িতাস্তদপত্যং চ ধর্মিণাম্

38.19

সংরক্ষ্যমাণো দ্রোণেন মন্যতে বীর্যমাত্মনঃ
আত্মসংভাবিতো মূঢস্তং প্রমথ্নীত মাচিরম্

38.20

এবমুক্তাস্তু তে রাজ্ঞা সাত্বতীপুত্রমভ্যয়ুঃ
সংরব্ধাস্তং জিঘাংসন্তো ভারদ্বাজস্য পশ্যতঃ

38.21

দুঃশাসনস্তু তচ্ছ্রুত্বা দুর্যোধনবচস্তদা
অব্রবীত্কুরুশার্দূলো দুর্যোধনমিদং বচঃ

38.22

অহমেনং হনিষ্যামি মহারাজ ব্রবীমি তে
মিষতাং পাণ্ডুপুত্রাণাং পাঞ্চালানাং চ পশ্যতাম্
গ্রসিষ্যাম্যদ্য সৌভদ্রং যথা রাহুর্দিবাকরম্

38.23

উত্ক্রুশ্য চাব্রবীদ্বাক্যং কুরুরাজমিদং পুনঃ
শ্রুত্বা কৃষ্ণৌ ময়া গ্রস্তং সৌভদ্রমতিমানিনৌ
গমিষ্যতঃ প্রেতলোকং জীবলোকান্ন সংশয়ঃ

38.24

তৌ চ শ্রুত্বা মৃতৌ ব্যক্তং পাণ্ডোঃ ক্ষেত্রোদ্ভবাঃ সুতাঃ
একাহ্না সসুহৃদ্বর্গাঃ ক্লৈব্যাদ্ধাস্যন্তি জীবিতম্

38.25

তস্মাদস্মিন্হতে শত্রৌ হতাঃ সর্বেঽহিতাস্তব
শিবেন ধ্যাহি মা রাজন্নেষ হন্মি রিপুং তব

38.26

এবমুক্ত্বা নদন্রাজন্পুত্রো দুঃশাসনস্তব
সৌভদ্রমভ্যয়াত্ক্রুদ্ধঃ শরবর্ষৈরবাকিরন্

38.27

তমভিক্রুদ্ধমায়ান্তং তব পুত্রমরিংদমঃ
অভিমন্যুঃ শরৈস্তীক্ষ্ণৈঃ ষড্বিংশত্যা সমর্পয়ৎ

38.28

দুঃশাসনস্তু সংক্রুদ্ধঃ প্রভিন্ন ইব কুঞ্জরঃ
অয়োধয়ত সৌভদ্রমভিমন্যুশ্চ তং রণে

38.29

তৌ মণ্ডলানি চিত্রাণি রথাভ্যাং সব্যদক্ষিণম্
চরমাণাবয়ুধ্যেতাং রথশিক্ষাবিশারদৌ

38.30

অথ পণবমৃদঙ্গদুন্দুভীনাং; কৃকরমহানকভেরিঝর্ঝরাণাম্
নিনদমতিভৃশং নরাঃ প্রচক্রু;র্লবণজলোদ্ভবসিংহনাদমিশ্রম্

Contains text from DharmicData, made available under the Open Database License (ODbL). Simple meanings are written by AI and can contain mistakes.