অধ্যায় 37

37.1

ধৃতরাষ্ট্র উবাচ
তথা প্রমথমানং তং মহেষ্বাসমজিহ্মগৈঃ
আর্জুনিং মামকাঃ সর্বে কে ত্বেনং সমবাকিরন্

সংজয় উবাচ
শৃণু রাজন্কুমারস্য রণে বিক্রীডিতং মহৎ
বিভিত্সতো রথানীকং ভারদ্বাজেন রক্ষিতম্

মদ্রেশং সাদিতং দৃষ্ট্বা সৌভাদ্রেণাশুগৈ রণে
শল্যাদবরজঃ ক্রুদ্ধঃ কিরন্বাণান্সমভ্যয়াৎ

স বিদ্ধ্বা দশভির্বাণৈঃ সাশ্বয়ন্তারমার্জুনিম্
উদক্রোশন্মহাশব্দং তিষ্ঠ তিষ্ঠেতি চাব্রবীৎ

তস্যার্জুনিঃ শিরোগ্রীবং পাণিপাদং ধনুর্হয়ান্
ছত্রং ধ্বজং নিয়ন্তারং ত্রিবেণুং শম্যুপস্করম্

চক্রে যুগেষাং তূণীরাননুকর্ষং চ সায়কৈঃ
পতাকাং চক্রগোপ্তারৌ সর্বোপকরণানি চ
ব্যধমল্লাঘবাত্তচ্চ দদৃশে নাস্য কশ্চন

স পপাত ক্ষিতৌ ক্ষীণঃ প্রবিদ্ধাভরণাম্বরঃ
বায়ুনেব মহাচৈত্যঃ সংভগ্নোঽমিততেজসা
অনুগাশ্চাস্য বিত্রস্তাঃ প্রাদ্রবন্সর্বতোদিশম্

আর্জুনেঃ কর্ম তদ্দৃষ্ট্ব প্রণেদুশ্চ সমন্ততঃ
নাদেন সর্বভূতানি সাধু সাধ্বিতি ভারত

শল্যভ্রাতর্যথারুগ্ণে বহুশস্তস্য সৈনিকাঃ
কুলাধিবাসনামানি শ্রাবয়ন্তোঽর্জুনাত্মজম্

অভ্যবর্তন্ত সংক্রুদ্ধা বিবিধায়ুধপাণয়ঃ
রথৈরশ্বৈর্গজৈশ্চান্যে পাদাতৈশ্চ বলোত্কটাঃ

বাণশব্দেন মহতা খুরনেমিস্বনেন চ
হুংকারৈঃ ক্ষ্বেডিতোত্ক্রুষ্টৈঃ সিংহনাদৈঃ সগর্জিতৈঃ

জ্যাতলত্রস্বনৈরন্যে গর্জন্তোঽর্জুননন্দনম্
ব্রুবন্তশ্চ ন নো জীবন্মোক্ষ্যসে জীবতামিতি

তাংস্তথা ব্রুবতো দৃষ্ট্বা সৌভদ্রঃ প্রহসন্নিব
যো যঃ স্ম প্রাহরত্পূর্বং তং তং বিব্যাধ পত্রিভিঃ

সংদর্শয়িষ্যন্নস্ত্রাণি চিত্রাণি চ লঘূনি চ
আর্জুনিঃ সমরে শূরো মৃদুপূর্বময়ুধ্যত

বাসুদেবাদুপাত্তং যদ্যদস্ত্রং চ ধনংজয়াৎ
অদর্শয়ত তত্কার্ষ্ণিঃ কৃষ্ণাভ্যামবিশেষয়ন্

দূরমস্যন্গুরুং ভারং সাধয়ংশ্চ পুনঃ পুনঃ
সংদধদ্বিসৃজংশ্চেষূন্নির্বিশেষমদৃশ্যত

চাপমণ্ডলমেবাস্য বিস্ফুরদ্দিক্ষ্বদৃশ্যত
তমো ঘ্নতঃ সুদীপ্তস্য সবিতুর্মণ্ডলং যথা

জ্যাশব্দঃ শুশ্রুবে তস্য তলশব্দশ্চ দারুণঃ
মহাশনিমুচঃ কালে পয়োদস্যেব নিস্বনঃ

হ্রীমানমর্ষী সৌভদ্রো মানকৃত্প্রিয়দর্শনঃ
সংমিমানয়িষুর্বীরানিষ্বাসাংশ্চাপ্যয়ুধ্যত

মৃদুর্ভূত্বা মহারাজ দারুণঃ সমপদ্যত
বর্ষাভ্যতীতো ভগবাঞ্শরদীব দিবাকরঃ

শরান্বিচিত্রান্মহতো রুক্মপুঙ্খাঞ্শিলাশিতান্
মুমোচ শতশঃ ক্রুদ্ধো গভস্তীনিব ভাস্করঃ

ক্ষুরপ্রৈর্বত্সদন্তৈশ্চ বিপাঠৈশ্চ মহায়শাঃ
নারাচৈরর্ধনারাচৈর্ভল্লৈরজ্ঞলিকৈরপি

অবাকিরদ্রথানীকং ভারদ্বাজস্য পশ্যতঃ
ততস্তত্সৈন্যমভবদ্বিমুখং শরপীডিতম্