Utshovঅধ্যায় 36
36.1
সংজয় উবাচ
তাং প্রভগ্নাং চমূং দৃষ্ট্বা সৌভদ্রেণামিতৌজসা
দুর্যোধনো ভৃশং ক্রুদ্ধঃ স্বয়ং সৌভদ্রমভ্যয়াৎ
36.2
ততো রাজানমাবৃত্তং সৌভদ্রং প্রতি সংয়ুগে
দৃষ্ট্বা দ্রোণোঽব্রবীদ্যোধান্পর্যাপ্নুত নরাধিপম্
36.3
পুরাভিমন্যুর্লক্ষ্যং নঃ পশ্যতাং হন্তি বীর্যবান্
তমাদ্রবত মা ভৈষ্ট ক্ষিপ্রং রক্ষত কৌরবম্
36.4
ততঃ কৃতজ্ঞা বলিনঃ সুহৃদো জিতকাশিনঃ
ত্রাস্যমানা ভয়াদ্বীরং পরিবব্রুস্তবাত্মজম্
36.5
দ্রোণো দ্রৌণিঃ কৃপঃ কর্ণঃ কৃতবর্মা চ সৌবলঃ
বৃহদ্বলো মদ্ররাজো ভূরির্ভূরিশ্রবাঃ শলঃ
36.6
পৌরবো বৃষসেনশ্চ বিসৃজন্তঃ শিতাঞ্শরান্
সৌভদ্রং শরবর্ষেণ মহতা সমবাকিরন্
36.7
সংমোহয়িত্বা তমথ দুর্যোধনমমোচয়ন্
আস্যাদ্গ্রাসমিবাক্ষিপ্তং মমৃষে নার্জুনাত্মজঃ
36.8
তাঞ্শরৌঘেণ মহতা সাশ্বসূতান্মহারথান্
বিমুখীকৃত্য সৌভদ্রঃ সিংহনাদমথানদৎ
36.9
তস্য নাদং ততঃ শ্রুত্বা সিংহস্যেবামিষৈষিণঃ
নামৃষ্যন্ত সুসংরব্ধাঃ পুনর্দ্রোণমুখা রথাঃ
36.10
ত এনং কোষ্ঠকীকৃত্য রথবংশেন মারিষ
ব্যসৃজন্নিষুজালানি নানালিঙ্গানি সংঘশঃ
36.11
তান্যন্তরিক্ষে চিচ্ছেদ পৌত্রস্তব শিতৈঃ শরৈঃ
তাংশ্চৈব প্রতিবিব্যাধ তদদ্ভুতমিবাভবৎ
36.12
ততস্তে কোপিতাস্তেন শরৈরাশীবিষোপমৈঃ
পরিবব্রুর্জিঘাংসন্তঃ সৌভদ্রমপলায়িনম্
36.13
সমুদ্রমিব পর্যস্তং ত্বদীয়ং তদ্বলার্ণবম্
অভিমন্যুর্দধারৈকো বেলেব মকরালয়ম্
36.14
শূরাণাং যুধ্যমানানাং নিঘ্নতামিতরেতরম্
অভিমন্যোঃ পরেষাং চ নাসীত্কশ্চিত্পরাঙ্মুখঃ
36.15
তস্মিংস্তু ঘোরে সংগ্রামে বর্তমানে ভয়ংকরে
দুঃসহো নবভির্বাণৈরভিমন্যুমবিধ্যত
36.16
দুঃশাসনো দ্বাদশভিঃ কৃপঃ শারদ্বতস্ত্রিভিঃ
দ্রোণস্তু সপ্তদশভিঃ শরৈরাশীবিষোপমৈঃ
36.17
বিবিংশতিস্তু বিংশত্যা কৃতবর্মা চ সপ্তভিঃ
বৃহদ্বলস্তথাষ্টাভিরশ্বত্থামা চ সপ্তভিঃ
36.18
ভূরিশ্রবাস্ত্রিভির্বাণৈর্মদ্রেশঃ ষড্ভিরাশুগৈঃ
দ্বাভ্যাং শরাভ্যাং শকুনিস্ত্রিভির্দুর্যোধনো নৃপঃ
36.19
স তু তান্প্রতিবিব্যাধ ত্রিভিস্ত্রিভিরজিহ্মগৈঃ
নৃত্যন্নিব মহারাজ চাপহস্তঃ প্রতাপবান্
36.20
ততোঽভিমন্যুঃ সংক্রুদ্ধস্তাপ্যমানস্তবাত্মজৈঃ
বিদর্শয়ন্বৈ সুমহচ্ছিক্ষৌরসকৃতং বলম্
36.21
গরুডানিলরংহোভির্যন্তুর্বাক্যকরৈর্হয়ৈঃ
দান্তৈরশ্মকদায়াদং ত্বরমাণোঽভ্যহারয়ৎ
বিব্যাধ চৈনং দশভির্বাণৈস্তিষ্ঠেতি চাব্রবীৎ
36.22
তস্যাভিমন্যুর্দশভির্বাণৈঃ সূতং হয়ান্ধ্বজম্
বাহূ ধনুঃ শিরশ্চোর্ব্যাং স্ময়মানোঽভ্যপাতয়ৎ
36.23
ততস্তস্মিন্হতে বীরে সৌভদ্রেণাশ্মকেশ্বরে
সংচচাল বলং সর্বং পলায়নপরায়ণম্
36.24
ততঃ কর্ণঃ কৃপো দ্রোণো দ্রৌণির্গান্ধাররাট্শলঃ
শল্যো ভূরিশ্রবাঃ ক্রাথঃ সোমদত্তো বিবিংশতিঃ
36.25
বৃষসেনঃ সুষেণশ্চ কুণ্ডভেদী প্রতর্দনঃ
বৃন্দারকো ললিত্থশ্চ প্রবাহুর্দীর্ঘলোচনঃ
দুর্যোধনশ্চ সংক্রুদ্ধঃ শরবর্ষৈরবাকিরন্
36.26
সোঽতিক্রুদ্ধো মহেষ্বাসৈরভিমন্যুরজিহ্মগৈঃ
শরমাদত্ত কর্ণায় পরকায়াবভেদনম্
36.27
তস্য ভিত্ত্বা তনুত্রাণং দেহং নির্ভিদ্য চাশুগঃ
প্রাবিশদ্ধরণীং রাজন্বল্মীকমিব পন্নগঃ
36.28
স তেনাতিপ্রহারেণ ব্যথিতো বিহ্বলন্নিব
সংচচাল রণে কর্ণঃ ক্ষিতিকম্পে যথাচলঃ
36.29
অথান্যৈর্নিশিতৈর্বাণৈঃ সুষেণং দীর্ঘলোচনম্
কুণ্ডভেদিং চ সংক্রুদ্ধস্ত্রিভিস্ত্রীনবধীদ্বলী
36.30
কর্ণস্তং পঞ্চবিংশত্যা নারাচানাং সমর্পয়ৎ
অশ্বত্থামা চ বিংশত্যা কৃতবর্মা চ সপ্তভিঃ
36.31
স শরার্দিতসর্বাঙ্গঃ ক্রুদ্ধঃ শক্রাত্মজাত্মজঃ
বিচরন্দৃশ্যতে সৈন্যে পাশহস্ত ইবান্তকঃ
36.32
শল্যং চ বাণবর্ষেণ সমীপস্থমবাকিরৎ
উদক্রোশন্মহাবাহুস্তব সৈন্যানি ভীষয়ন্
36.33
ততঃ স বিদ্ধোঽস্ত্রবিদা মর্মভিদ্ভিরজিহ্মগৈঃ
শল্যো রাজন্রথোপস্থে নিষসাদ মুমোহ চ
36.34
তং হি বিদ্ধং তথা দৃষ্ট্বা সৌভদ্রেণ যশস্বিনা
সংপ্রাদ্রবচ্চমূঃ সর্বা ভারদ্বাজস্য পশ্যতঃ
36.35
প্রেক্ষন্তস্তং মহাবাহুং রুক্মপুঙ্খৈঃ সমাবৃতম্
ত্বদীয়াশ্চ পলায়ন্তে মৃগাঃ সিংহার্দিতা ইব
36.36
স তু রণয়শসাভিপূজ্যমানঃ; পিতৃসুরচারণসিদ্ধয়ক্ষসংঘৈঃ
অবনিতলগতৈশ্চ ভূতসংঘৈ;রতিবিবভৌ হুতভুগ্যথাজ্যসিক্তঃ