Utshovঅধ্যায় 35
35.1
সংজয় উবাচ
সৌভদ্রস্তু বচঃ শ্রুত্বা ধর্মরাজস্য ধীমতঃ
অচোদয়ত যন্তারং দ্রোণানীকায় ভারত
35.2
তেন সংচোদ্যমানস্তু যাহি যাহীতি সারথিঃ
প্রত্যুবাচ ততো রাজন্নভিমন্যুমিদং বচঃ
35.3
অতিভারোঽয়মায়ুষ্মন্নাহিতস্ত্বয়ি পাণ্ডবৈঃ
সংপ্রধার্য ক্ষমং বুদ্ধ্যা ততস্ত্বং যোদ্ধুমর্হসি
35.4
আচার্যো হি কৃতী দ্রোণঃ পরমাস্ত্রে কৃতশ্রমঃ
অত্যন্তসুখসংবৃদ্ধস্ত্বং চ যুদ্ধবিশারদঃ
35.5
ততোঽভিমন্যুঃ প্রহসন্সারথিং বাক্যমব্রবীৎ
সারথে কো ন্বয়ং দ্রোণঃ সমগ্রং ক্ষত্রমেব বা
35.6
ঐরাবতগতং শক্রং সহামরগণৈরহম্
যোধয়েয়ং রণমুখে ন মে ক্ষত্রেঽদ্য বিস্ময়ঃ
ন মমৈতদ্দ্বিষত্সৈন্যং কলামর্হতি ষোডশীম্
35.7
অপি বিশ্বজিতং বিষ্ণুং মাতুলং প্রাপ্য সূতজ
পিতরং চার্জুনং সংখ্যে ন ভীর্মামুপয়াস্যতি
35.8
ততোঽভিমন্যুস্তাং বাচং কদর্থীকৃত্য সারথেঃ
যাহীত্যেবাব্রবীদেনং দ্রোণানীকায় মাচিরম্
35.9
ততঃ সংচোদয়ামাস হয়ানস্য ত্রিহায়নান্
নাতিহৃষ্টমনাঃ সূতো হেমভাণ্ডপরিচ্ছদান্
35.10
তে প্রেষিতাঃ সুমিত্রেণ দ্রোণানীকায় বাজিনঃ
দ্রোণমভ্যদ্রবন্রাজন্মহাবেগপরাক্রমাঃ
35.11
তমুদীক্ষ্য তথায়ান্তং সর্বে দ্রোণপুরোগমাঃ
অভ্যবর্তন্ত কৌরব্যাঃ পাণ্ডবাশ্চ তমন্বয়ুঃ
35.12
স কর্ণিকারপ্রবরোচ্ছ্রিতধ্বজঃ; সুবর্ণবর্মার্জুনিরর্জুনাদ্বরঃ
যুয়ুত্সয়া দ্রোণমুখান্মহারথা;ন্সমাসদত্সিংহশিশুর্যথা গজান্
35.13
তে বিংশতিপদে যত্তাঃ সংপ্রহারং প্রচক্রিরে
আসীদ্গাঙ্গ ইবাবর্তো মুহূর্তমুদধেরিব
35.14
শূরাণাং যুধ্যমানানাং নিঘ্নতামিতরেতরম্
সংগ্রামস্তুমুলো রাজন্প্রাবর্তত সুদারুণঃ
35.15
প্রবর্তমানে সংগ্রামে তস্মিন্নতিভয়ংকরে
দ্রোণস্য মিষতো ব্যূহং ভিত্ত্বা প্রাবিশদার্জুনিঃ
35.16
তং প্রবিষ্টং পরান্ঘ্নন্তং শত্রুমধ্যে মহাবলম্
হস্ত্যশ্বরথপত্ত্যৌঘাঃ পরিবব্রুরুদায়ুধাঃ
35.17
নানাবাদিত্রনিনদৈঃ ক্ষ্বেডিতোত্ক্রুষ্টগর্জিতৈঃ
হুংকারৈঃ সিংহনাদৈশ্চ তিষ্ঠ তিষ্ঠেতি নিস্বনৈঃ
35.18
ঘোরৈর্হলহলাশব্দৈর্মা গাস্তিষ্ঠৈহি মামিতি
অসাবহমমুত্রেতি প্রবদন্তো মুহুর্মুহুঃ
35.19
বৃংহিতৈঃ শিঞ্জিতৈর্হাসৈঃ খুরনেমিস্বনৈরপি
সংনাদয়ন্তো বসুধামভিদুদ্রুবুরার্জুনিম্
35.20
তেষামাপততাং বীরঃ পূর্বং শীঘ্রমথো দৃঢম্
ক্ষিপ্রাস্ত্রো ন্যবধীদ্ব্রাতান্মর্মজ্ঞো মর্মভেদিভিঃ
35.21
তে হন্যমানাশ্চ তথা নানালিঙ্গৈঃ শিতৈঃ শরৈঃ
অভিপেতুস্তমেবাজৌ শলভা ইব পাবকম্
35.22
ততস্তেষাং শরীরৈশ্চ শরীরাবয়বৈশ্চ সঃ
সংতস্তার ক্ষিতিং ক্ষিপ্রং কুশৈর্বেদিমিবাধ্বরে
35.23
বদ্ধগোধাঙ্গুলিত্রাণান্সশরাবরকার্মুকান্
সাসিচর্মাঙ্কুশাভীশূন্সতোমরপরশ্বধান্
35.24
সগুডায়োমুখপ্রাসান্সর্ষ্টিতোমরপট্টিশান্
সভিণ্ডিপালপরিঘান্সশক্তিবরকম্পনান্
35.25
সপ্রতোদমহাশঙ্খান্সকুন্তান্সকচগ্রহান্
সমুদ্গরক্ষেপণীয়ান্সপাশপরিঘোপলান্
35.26
সকেয়ূরাঙ্গদান্বাহূন্হৃদ্যগন্ধানুলেপনান্
সংচিচ্ছেদার্জুনির্বৃত্তাংস্ত্বদীয়ানাং সহস্রশঃ
35.27
তৈঃ স্ফুরদ্ভির্মহারাজ শুশুভে লোহিতোক্ষিতৈঃ
পঞ্চাস্যৈঃ পন্নগৈশ্ছিন্নৈর্গরুডেনেব মারিষ
35.28
সুনাসাননকেশান্তৈরব্রণৈশ্চারুকুণ্ডলৈঃ
সংদষ্টৌষ্ঠপুটৈঃ ক্রোধাত্ক্ষরদ্ভিঃ শোণিতং বহু
35.29
চারুস্রঙ্মুকুটোষ্ণীষৈর্মণিরত্নবিরাজিতৈঃ
বিনালনলিনাকারৈর্দিবাকরশশিপ্রভৈঃ
35.30
হিতপ্রিয়ংবদৈঃ কালে বহুভিঃ পুণ্যগন্ধিভিঃ
দ্বিষচ্ছিরোভিঃ পৃথিবীমবতস্তার ফাল্গুণিঃ
35.31
গন্ধর্বনগরাকারান্বিধিবত্কল্পিতান্রথান্
বীষামুখান্বিত্রিবেণূন্ব্যস্তদণ্ডকবন্ধুরান্
35.32
বিজঙ্ঘকূবরাক্ষাংশ্চ বিনেমীননরানপি
বিচক্রোপস্করোপস্থান্ভগ্নোপকরণানপি
35.33
প্রশাতিতোপকরণান্হতয়োধান্সহস্রশঃ
শরৈর্বিশকলীকুর্বন্দিক্ষু সর্বাস্বদৃশ্যত
35.34
পুনর্দ্বিপান্দ্বিপারোহান্বৈজয়ন্ত্যঙ্কুশধ্বজান্
তূণান্বর্মাণ্যথো কক্ষ্যা গ্রৈবেয়ানথ কম্বলান্
35.35
ঘণ্টাঃ শুণ্ডান্বিষাণাগ্রান্ক্ষুরপালান্পদানুগান্
শরৈর্নিশিতধারাগ্রৈঃ শাত্রবাণামশাতয়ৎ
35.36
বনায়ুজান্পার্বতীয়ান্কাম্বোজারট্টবাহ্লিকান্
স্থিরবালধিকর্ণাক্ষাঞ্জবনান্সাধুবাহিনঃ
35.37
স্বারূঢাঞ্শিক্ষিতৈর্যোধৈঃ শক্ত্যৃষ্টিপ্রাসয়োধিভিঃ
বিধ্বস্তচামরকুথান্বিপ্রকীর্ণপ্রকীর্ণকান্
35.38
নিরস্তজিহ্বানয়নান্নিষ্কীর্ণান্ত্রয়কৃদ্ঘনান্
হতারোহান্ভিন্নভাণ্ডান্ক্রব্যাদগণমোদনান্
35.39
নিকৃত্তবর্মকবচাঞ্শকৃন্মূত্রাসৃগাপ্লুতান্
নিপাতয়ন্নশ্ববরাংস্তাবকান্সোঽভ্যরোচত
35.40
একো বিষ্ণুরিবাচিন্ত্যঃ কৃত্বা প্রাক্কর্ম দুষ্করম্
তথা বিমথিতং তেন ত্র্যঙ্গং তব বলং মহৎ
ব্যহনত্স পদাত্যোঘাংস্ত্বদীয়ানেব ভারত
35.41
এবমেকেন তাং সেনাং সৌভদ্রেণ শিতৈঃ শরৈঃ
ভৃশং বিপ্রহতাং দৃষ্ট্বা স্কন্দেনেবাসুরীং চমূম্
35.42
ত্বদীয়াস্তব পুত্রাশ্চ বীক্ষমাণা দিশো দশ
সংশুষ্কাস্যাশ্চলন্নেত্রাঃ প্রস্বিন্না লোমহর্ষণাঃ
35.43
পলায়নকৃতোত্সাহা নিরুত্সাহা দ্বিষজ্জয়ে
গোত্রনামভিরন্যোন্যং ক্রন্দন্তো জীবিতৈষিণঃ
35.44
হতান্পুত্রাংস্তথা পিতৄন্সুহৃত্সংবন্ধিবান্ধবান্
প্রাতিষ্ঠন্ত সমুত্সৃজ্য ত্বরয়ন্তো হয়দ্বিপান্