Utshovঅধ্যায় 34
34.1
সংজয় উবাচ
তদনীকমনাধৃষ্যং ভারদ্বাজেন রক্ষিতম্
পার্থাঃ সমভ্যবর্তন্ত ভীমসেনপুরোগমাঃ
34.2
সাত্যকিশ্চেকিতানশ্চ ধৃষ্টদ্যুম্নশ্চ পার্ষতঃ
কুন্তিভোজশ্চ বিক্রান্তো দ্রুপদশ্চ মহারথঃ
34.3
আর্জুনিঃ ক্ষত্রধর্মা চ বৃহত্ক্ষত্রশ্চ বীর্যবান্
চেদিপো ধৃষ্টকেতুশ্চ মাদ্রীপুত্রৌ ঘটোত্কচঃ
34.4
যুধামন্যুশ্চ বিক্রান্তঃ শিখণ্ডী চাপরাজিতঃ
উত্তমৌজাশ্চ দুর্ধর্ষো বিরাটশ্চ মহারথঃ
34.5
দ্রৌপদেয়াশ্চ সংরব্ধাঃ শৈশুপালিশ্চ বীর্যবান্
কেকয়াশ্চ মহাবীর্যাঃ সৃঞ্জয়াশ্চ সহস্রশঃ
34.6
এতে চান্যে চ সগণাঃ কৃতাস্ত্রা যুদ্ধদুর্মদাঃ
সমভ্যধাবন্সহসা ভারদ্বাজং যুয়ুত্সবঃ
34.7
সমবেতাংস্তু তান্সর্বান্ভারদ্বাজোঽপি বীর্যবান্
অসংভ্রান্তঃ শরৌঘেণ মহতা সমবারয়ৎ
34.8
মহৌঘাঃ সলিলস্যেব গিরিমাসাদ্য দুর্ভিদম্
দ্রোণং তে নাভ্যবর্তন্ত বেলামিব জলাশয়াঃ
34.9
পীড্যমানাঃ শরৈ রাজন্দ্রোণচাপবিনিঃসৃতৈঃ
ন শেকুঃ প্রমুখে স্থাতুং ভারদ্বাজস্য পাণ্ডবাঃ
34.10
তদদ্ভুতমপশ্যাম দ্রোণস্য ভুজয়োর্বলম্
যদেনং নাভ্যবর্তন্ত পাঞ্চালাঃ সৃঞ্জয়ৈঃ সহ
34.11
তমায়ান্তমভিক্রুদ্ধং দ্রোণং দৃষ্ট্বা যুধিষ্ঠিরঃ
বহুধা চিন্তয়ামাস দ্রোণস্য প্রতিবারণম্
34.12
অশক্যং তু তমন্যেন দ্রোণং মত্বা যুধিষ্ঠিরঃ
অবিষহ্যং গুরুং ভারং সৌভদ্রে সমবাসৃজৎ
34.13
বাসুদেবাদনবরং ফল্গুনাচ্চামিতৌজসম্
অব্রবীত্পরবীরঘ্নমভিমন্যুমিদং বচঃ
34.14
এত্য নো নার্জুনো গর্হেদ্যথা তাত তথা কুরু
চক্রব্যূহস্য ন বয়ং বিদ্ম ভেদং কথংচন
34.15
ত্বং বার্জুনো বা কৃষ্ণো বা ভিন্দ্যাত্প্রদ্যুম্ন এব বা
চক্রব্যূহং মহাবাহো পঞ্চমোঽন্যো ন বিদ্যতে
34.16
অভিমন্যো বরং তাত যাচতাং দাতুমর্হসি
পিতৄণাং মাতুলানাং চ সৈন্যানাং চৈব সর্বশঃ
34.17
ধনংজয়ো হি নস্তাত গর্হয়েদেত্য সংয়ুগাৎ
ক্ষিপ্রমস্ত্রং সমাদায় দ্রোণানীকং বিশাতয়
34.18
অভিমন্যুরুবাচ
দ্রোণস্য দৃঢমব্যগ্রমনীকপ্রবরং যুধি
পিতৄণাং জয়মাকাঙ্ক্ষন্নবগাহে ভিনদ্মি চ
34.19
উপদিষ্টো হি মে পিত্রা যোগোঽনীকস্য ভেদনে
নোত্সহে তু বিনির্গন্তুমহং কস্যাংচিদাপদি
34.20
যুধিষ্ঠির উবাচ
ভিন্ধ্যনীকং যুধা শ্রেষ্ঠ দ্বারং সংজনয়স্ব নঃ
বয়ং ত্বানুগমিষ্যামো যেন ত্বং তাত যাস্যসি
34.21
ধনংজয়সমং যুদ্ধে ত্বাং বয়ং তাত সংয়ুগে
প্রণিধায়ানুয়াস্যামো রক্ষন্তঃ সর্বতোমুখাঃ
34.22
ভীম উবাচ
অহং ত্বানুগমিষ্যামি ধৃষ্টদ্যুম্নোঽথ সাত্যকিঃ
পাঞ্চালাঃ কেকয়া মত্স্যাস্তথা সর্বে প্রভদ্রকাঃ
34.23
সকৃদ্ভিন্নং ত্বয়া ব্যূহং তত্র তত্র পুনঃ পুনঃ
বয়ং প্রধ্বংসয়িষ্যামো নিঘ্নমানা বরান্বরান্
34.24
অভিমন্যুরুবাচ
অহমেতত্প্রবেক্ষ্যামি দ্রোণানীকং দুরাসদম্
পতংগ ইব সংক্রুদ্ধো জ্বলিতং জাতবেদসম্
34.25
তত্কর্মাদ্য করিষ্যামি হিতং যদ্বংশয়োর্দ্বয়োঃ
মাতুলস্য চ যা প্রীতির্ভবিষ্যতি পিতুশ্চ মে
34.26
শিশুনৈকেন সংগ্রামে কাল্যমানানি সংঘশঃ
অদ্য দ্রক্ষ্যন্তি ভূতানি দ্বিষত্সৈন্যানি বৈ ময়া
34.27
যুধিষ্ঠির উবাচ
এবং তে ভাষমাণস্য বলং সৌভদ্র বর্ধতাম্
যস্ত্বমুত্সহসে ভেত্তুং দ্রোণানীকং সুদুর্ভিদম্
34.28
রক্ষিতং পুরুষব্যাঘ্রৈর্মহেষ্বাসৈঃ প্রহারিভিঃ
সাধ্যরুদ্রমরুত্কল্পৈর্বস্বগ্ন্যাদিত্যবিক্রমৈঃ
34.29
সংজয় উবাচ
তস্য তদ্বচনং শ্রুত্বা স যন্তারমচোদয়ৎ
সুমিত্রাশ্বান্রণে ক্ষিপ্রং দ্রোণানীকায় চোদয়