অধ্যায় 33

33.1

সংজয় উবাচ
সমরেঽত্যুগ্রকর্মাণঃ কর্মভির্ব্যঞ্জিতশ্রমাঃ
সকৃষ্ণাঃ পাণ্ডবাঃ পঞ্চ দেবৈরপি দুরাসদাঃ

সত্ত্বকর্মান্বয়ৈর্বুদ্ধ্যা প্রকৃত্যা যশসা শ্রিয়া
নৈব ভূতো ন ভবিতা কৃষ্ণতুল্যগুণঃ পুমান্

সত্যধর্মপরো দাতা বিপ্রপূজাদিভির্গুণৈঃ
সদৈব ত্রিদিবং প্রাপ্তো রাজা কিল যুধিষ্ঠিরঃ

যুগান্তে চান্তকো রাজঞ্জামদগ্ন্যশ্চ বীর্যবান্
রণস্থো ভীমসেনশ্চ কথ্যন্তে সদৃশাস্ত্রয়ঃ

প্রতিজ্ঞাকর্মদক্ষস্য রণে গাণ্ডীবধন্বনঃ
উপমাং নাধিগচ্ছামি পার্থস্য সদৃশীং ক্ষিতৌ

গুরুবাত্সল্যমত্যন্তং নৈভৃত্যং বিনয়ো দমঃ
নকুলেঽপ্রাতিরূপ্যং চ শৌর্যং চ নিয়তানি ষট্

শ্রুতগাম্ভীর্যমাধুর্যসত্ত্ববীর্যপরাক্রমৈঃ
সদৃশো দেবয়োর্বীরঃ সহদেবঃ কিলাশ্বিনোঃ

যে চ কৃষ্ণে গুণাঃ স্ফীতাঃ পাণ্ডবেষু চ যে গুণাঃ
অভিমন্যৌ কিলৈকস্থা দৃশ্যন্তে গুণসংচয়াঃ

যুধিষ্ঠিরস্য ধৈর্যেণ কৃষ্ণস্য চরিতেন চ
কর্মভির্ভীমসেনস্য সদৃশো ভীমকর্মণঃ

ধনংজয়স্য রূপেণ বিক্রমেণ শ্রুতেন চ
বিনয়াত্সহদেবস্য সদৃশো নকুলস্য চ

ধৃতরাষ্ট্র উবাচ
অভিমন্যুমহং সূত সৌভদ্রমপরাজিতম্
শ্রোতুমিচ্ছামি কার্ত্স্ন্যেন কথমায়োধনে হতঃ

সংজয় উবাচ
চক্রব্যূহো মহারাজ আচার্যেণাভিকল্পিতঃ
তত্র শক্রোপমাঃ সর্বে রাজানো বিনিবেশিতাঃ

সংঘাতো রাজপুত্রাণাং সর্বেষামভবত্তদা
কৃতাভিসময়াঃ সর্বে সুবর্ণবিকৃতধ্বজাঃ

রক্তাম্বরধরাঃ সর্বে সর্বে রক্তবিভূষণাঃ
সর্বে রক্তপতাকাশ্চ সর্বে বৈ হেমমালিনঃ

তেষাং দশসহস্রাণি বভূবুর্দৃঢধন্বিনাম্
পৌত্রং তব পুরস্কৃত্য লক্ষ্মণং প্রিয়দর্শনম্

অন্যোন্যসমদুঃখাস্তে অন্যোন্যসমসাহসাঃ
অন্যোন্যং স্পর্ধমানাশ্চ অন্যোন্যস্য হিতে রতাঃ

কর্ণদুঃশাসনকৃপৈর্বৃতো রাজা মহারথৈঃ
দেবরাজোপমঃ শ্রীমাঞ্শ্বেতচ্ছত্রাভিসংবৃতঃ
চামরব্যজনাক্ষেপৈরুদয়ন্নিব ভাস্করঃ

প্রমুখে তস্য সৈন্যস্য দ্রোণোঽবস্থিতনায়কে
সিন্ধুরাজস্তথাতিষ্ঠচ্ছ্রীমান্মেরুরিবাচলঃ

সিন্ধুরাজস্য পার্শ্বস্থা অশ্বত্থামপুরোগমাঃ
সুতাস্তব মহারাজ ত্রিংশত্ত্রিদশসংনিভাঃ

গান্ধাররাজঃ কিতবঃ শল্যো ভূরিশ্রবাস্তথা
পার্শ্বতঃ সিন্ধুরাজস্য ব্যরাজন্ত মহারথাঃ