অধ্যায় 32

32.1

সংজয় উবাচ
পূর্বমস্মাসু ভগ্নেষু ফল্গুনেনামিতৌজসা
দ্রোণে চ মোঘসংকল্পে রক্ষিতে চ যুধিষ্ঠিরে

32.2

সর্বে বিধ্বস্তকবচাস্তাবকা যুধি নির্জিতাঃ
রজস্বলা ভৃশোদ্বিগ্না বীক্ষমাণা দিশো দশ

32.3

অবহারং ততঃ কৃত্বা ভারদ্বাজস্য সংমতে
লব্ধলক্ষ্যৈঃ পরৈর্দীনা ভৃশাবহসিতা রণে

32.4

শ্লাঘমানেষু ভূতেষু ফল্গুনস্যামিতান্গুণান্
কেশবস্য চ সৌহার্দে কীর্ত্যমানেঽর্জুনং প্রতি
অভিশস্তা ইবাভূবন্ধ্যানমূকত্বমাস্থিতাঃ

32.5

ততঃ প্রভাতসময়ে দ্রোণং দুর্যোধনোঽব্রবীৎ
প্রণয়াদভিমানাচ্চ দ্বিষদ্বৃদ্ধ্যা চ দুর্মনাঃ
শৃণ্বতাং সর্বভূতানাং সংরব্ধো বাক্যকোবিদঃ

32.6

নূনং বয়ং বধ্যপক্ষে ভবতো ব্রহ্মবিত্তম
তথা হি নাগ্রহীঃ প্রাপ্তং সমীপেঽদ্য যুধিষ্ঠিরম্

32.7

ইচ্ছতস্তে ন মুচ্যেত চক্ষুঃপ্রাপ্তো রণে রিপুঃ
জিঘৃক্ষতো রক্ষ্যমাণঃ সামরৈরপি পাণ্ডবৈঃ

32.8

বরং দত্ত্বা মম প্রীতঃ পশ্চাদ্বিকৃতবানসি
আশাভঙ্গং ন কুর্বন্তি ভক্তস্যার্যাঃ কথংচন

32.9

ততোঽপ্রীতস্তথোক্তঃ স ভারদ্বাজোঽব্রবীন্নৃপম্
নার্হসে মান্যথা জ্ঞাতুং ঘটমানং তব প্রিয়ে

32.10

সসুরাসুরগন্ধর্বাঃ সয়ক্ষোরগরাক্ষসাঃ
নালং লোকা রণে জেতুং পাল্যমানং কিরীটিনা

32.11

বিশ্বসৃগ্যত্র গোবিন্দঃ পৃতনারিস্তথার্জুনঃ
তত্র কস্য বলং ক্রামেদন্যত্র ত্র্যম্বকাত্প্রভোঃ

32.12

সত্যং তু তে ব্রবীম্যদ্য নৈতজ্জাত্বন্যথা ভবেৎ
অদ্যৈষাং প্রবরং বীরং পাতয়িষ্যে মহারথম্

32.13

তং চ ব্যূহং বিধাস্যামি যোঽভেদ্যস্ত্রিদশৈরপি
যোগেন কেনচিদ্রাজন্নর্জুনস্ত্বপনীয়তাম্

32.14

ন হ্যজ্ঞাতমসাধ্যং বা তস্য সংখ্যেঽস্তি কিংচন
তেন হ্যুপাত্তং বলবত্সর্বজ্ঞানমিতস্ততঃ

32.15

দ্রোণেন ব্যাহৃতে ত্বেবং সংশপ্তকগণাঃ পুনঃ
আহ্বয়ন্নর্জুনং সংখ্যে দক্ষিণামভিতো দিশম্

32.16

তত্রার্জুনস্যাথ পরৈঃ সার্ধং সমভবদ্রণঃ
তাদৃশো যাদৃশো নান্যঃ শ্রুতো দৃষ্টোঽপি বা ক্বচিৎ

32.17

ততো দ্রোণেন বিহিতো রাজন্ব্যূহো ব্যরোচত
চরন্মধ্যংদিনে সূর্যঃ প্রতপন্নিব দুর্দৃশঃ

32.18

তং চাভিমন্যুর্বচনাত্পিতুর্জ্যেষ্ঠস্য ভারত
বিভেদ দুর্ভিদং সংখ্যে চক্রব্যূহমনেকধা

32.19

স কৃত্বা দুষ্করং কর্ম হত্বা বীরান্সহস্রশঃ
ষট্সু বীরেষু সংসক্তো দৌঃশাসনিবশং গতঃ

32.20

বয়ং পরমসংহৃষ্টাঃ পাণ্ডবাঃ শোককর্শিতাঃ
সৌভদ্রে নিহতে রাজন্নবহারমকুর্বত

32.21

ধৃতরাষ্ট্র উবাচ
পুত্রং পুরুষসিংহস্য সংজয়াপ্রাপ্তয়ৌবনম্
রণে বিনিহতং শ্রুত্বা ভৃশং মে দীর্যতে মনঃ

32.22

দারুণঃ ক্ষত্রধর্মোঽয়ং বিহিতো ধর্মকর্তৃভিঃ
যত্র রাজ্যেপ্সবঃ শূরা বালে শস্ত্রমপাতয়ন্

32.23

বালমত্যন্তসুখিনং বিচরন্তমভীতবৎ
কৃতাস্ত্রা বহবো জঘ্নুর্ব্রূহি গাবল্গণে কথম্

32.24

বিভিত্সতা রথানীকং সৌভদ্রেণামিতৌজসা
বিক্রীডিতং যথা সংখ্যে তন্মমাচক্ষ্ব সংজয়

32.25

সংজয় উবাচ
যন্মাং পৃচ্ছসি রাজেন্দ্র সৌভদ্রস্য নিপাতনম্
তত্তে কার্ত্স্ন্যেন বক্ষ্যামি শৃণু রাজন্সমাহিতঃ
বিক্রীডিতং কুমারেণ যথানীকং বিভিত্সতা

32.26

দাবাগ্ন্যভিপরীতানাং ভূরিগুল্মতৃণদ্রুমে
বনৌকসামিবারণ্যে ত্বদীয়ানামভূদ্ভয়ম্

Contains text from DharmicData, made available under the Open Database License (ODbL). Simple meanings are written by AI and can contain mistakes.