Utshovঅধ্যায় 31
31.1
সংজয় উবাচ
প্রতিঘাতং তু সৈন্যস্য নামৃষ্যত বৃকোদরঃ
সোঽভিনদ্বাহ্লিকং ষষ্ট্যা কর্ণং চ দশভিঃ শরৈঃ
31.2
তস্য দ্রোণঃ শিতৈর্বাণৈস্তীক্ষ্ণধারৈরয়স্ময়ৈঃ
জীবিতান্তমভিপ্রেপ্সুর্মর্মণ্যাশু জঘান হ
31.3
কর্ণো দ্বাদশভির্বাণৈরশ্বত্থামা চ সপ্তভিঃ
ষড্ভির্দুর্যোধনো রাজা তত এনমবাকিরৎ
31.4
ভীমসেনোঽপি তান্সর্বান্প্রত্যবিধ্যন্মহাবলঃ
দ্রোণং পঞ্চাশতেষূণাং কর্ণং চ দশভিঃ শরৈঃ
31.5
দুর্যোধনং দ্বাদশভির্দ্রৌণিং চাষ্টাভিরাশুগৈঃ
আরাবং তুমুলং কুর্বন্নভ্যবর্তত তান্রণে
31.6
তস্মিন্সংত্যজতি প্রাণান্মৃত্যুসাধারণীকৃতে
অজাতশত্রুস্তান্যোধান্ভীমং ত্রাতেত্যচোদয়ৎ
31.7
তে যয়ুর্ভীমসেনস্য সমীপমমিতৌজসঃ
যুয়ুধানপ্রভৃতয়ো মাদ্রীপুত্রৌ চ পাণ্ডবৌ
31.8
তে সমেত্য সুসংরব্ধাঃ সহিতাঃ পুরুষর্ষভাঃ
মহেষ্বাসবরৈর্গুপ্তং দ্রোণানীকং বিভিত্সবঃ
31.9
সমাপেতুর্মহাবীর্যা ভীমপ্রভৃতয়ো রথাঃ
তান্প্রত্যগৃহ্ণাদব্যগ্রো দ্রোণোঽপি রথিনাং বরঃ
31.10
মহাবলানতিরথান্বীরান্সমরশোভিনঃ
বাহ্যং মৃত্যুভয়ং কৃত্বা তাবকাঃ পাণ্ডবান্যয়ুঃ
31.11
সাদিনঃ সাদিনোঽভ্যঘ্নংস্তথৈব রথিনো রথান্
আসীচ্ছক্ত্যসিসংপাতো যুদ্ধমাসীত্পরশ্বধৈঃ
31.12
নিকৃষ্টমসিয়ুদ্ধং চ বভূব কটুকোদয়ম্
কুঞ্জরাণাং চ সংঘাতৈর্যুদ্ধমাসীত্সুদারুণম্
31.13
অপতত্কুঞ্জরাদন্যো হয়াদন্যস্ত্ববাক্শিরাঃ
নরো বাণেন নির্ভিন্নো রথাদন্যশ্চ মারিষ
31.14
তত্রান্যস্য চ সংমর্দে পতিতস্য বিবর্মণঃ
শিরঃ প্রধ্বংসয়ামাস বক্ষস্যাক্রম্য কুঞ্জরঃ
31.15
অপরেঽপ্যপরাঞ্জঘ্নুর্বারণাঃ পতিতান্নরান্
বিষাণৈশ্চাবনিং গত্বা ব্যভিন্দন্রথিনো বহূন্
31.16
নরান্ত্রৈঃ কেচিদপরে বিষাণালগ্নসংস্রবৈঃ
বভ্রমুঃ শতশো নাগা মৃদ্নন্তঃ শতশো নরান্
31.17
কাংস্যায়সতনুত্রাণান্নরাশ্বরথকুঞ্জরান্
পতিতান্পোথয়াং চক্রুর্দ্বিপাঃ স্থূলনডানিব
31.18
গৃধ্রপত্রাধিবাসাংসি শয়নানি নরাধিপাঃ
হ্রীমন্তঃ কালসংপক্বাঃ সুদুঃখান্যধিশেরতে
31.19
হন্তি স্মাত্র পিতা পুত্রং রথেনাভ্যতিবর্ততে
পুত্রশ্চ পিতরং মোহান্নির্মর্যাদমবর্তত
31.20
অক্ষো ভগ্নো ধ্বজশ্ছিন্নশ্ছত্রমুর্ব্যাং নিপাতিতম্
যুগার্ধং ছিন্নমাদায় প্রদুদ্রাব তথা হয়ঃ
31.21
সাসির্বাহুর্নিপতিতঃ শিরশ্ছিন্নং সকুণ্ডলম্
গজেনাক্ষিপ্য বলিনা রথঃ সংচূর্ণিতঃ ক্ষিতৌ
31.22
রথিনা তাডিতো নাগো নারাচেনাপতদ্ব্যসুঃ
সারোহশ্চাপতদ্বাজী গজেনাতাডিতো ভৃশম্
31.23
নির্মর্যাদং মহদ্যুদ্ধমবর্তত সুদারুণম্
হা তাত হা পুত্র সখে ক্বাসি তিষ্ঠ ক্ব ধাবসি
31.24
প্রহরাহর জহ্যেনং স্মিতক্ষ্বেডিতগর্জিতৈঃ
ইত্যেবমুচ্চরন্ত্যঃ স্ম শ্রূয়ন্তে বিবিধা গিরঃ
31.25
নরস্যাশ্বস্য নাগস্য সমসজ্জত শোণিতম্
উপাশাম্যদ্রজো ভৌমং ভীরূন্কশ্মলমাবিশৎ
31.26
আসীত্কেশপরামর্শো মুষ্টিয়ুদ্ধং চ দারুণম্
নখৈর্দন্তৈশ্চ শূরাণামদ্বীপে দ্বীপমিচ্ছতাম্
31.27
তত্রাচ্ছিদ্যত বীরস্য সখড্গো বাহুরুদ্যতঃ
সধনুশ্চাপরস্যাপি সশরঃ সাঙ্কুশস্তথা
31.28
প্রাক্রোশদন্যমন্যোঽত্র তথান্যো বিমুখোঽদ্রবৎ
অন্যঃ প্রাপ্তস্য চান্যস্য শিরঃ কায়াদপাহরৎ
31.29
শব্দমভ্যদ্রবচ্চান্যঃ শব্দাদন্যোঽদ্রবদ্ভৃশম্
স্বানন্যোঽথ পরানন্যো জঘান নিশিতৈঃ শরৈঃ
31.30
গিরিশৃঙ্গোপমশ্চাত্র নারাচেন নিপাতিতঃ
মাতঙ্গো ন্যপতদ্ভূমৌ নদীরোধ ইবোষ্ণগে
31.31
তথৈব রথিনং নাগঃ ক্ষরন্গিরিরিবারুজৎ
অধ্যতিষ্ঠত্পদা ভূমৌ সহাশ্বং সহসারথিম্
31.32
শূরান্প্রহরতো দৃষ্ট্বা কৃতাস্ত্রান্রুধিরোক্ষিতান্
বহূনপ্যাবিশন্মোহো ভীরূন্হৃদয়দুর্বলান্
31.33
সর্বমাবিগ্নমভবন্ন প্রাজ্ঞায়ত কিংচন
সৈন্যে চ রজসা ধ্বস্তে নির্মর্যাদমবর্তত
31.34
ততঃ সেনাপতিঃ শীঘ্রময়ং কাল ইতি ব্রুবন্
নিত্যাভিত্বরিতানেব ত্বরয়ামাস পাণ্ডবান্
31.35
কুর্বন্তঃ শাসনং তস্য পাণ্ডবেয়া যশস্বিনঃ
সরো হংসা ইবাপেতুর্ঘ্নন্তো দ্রোণরথং প্রতি
31.36
গৃহ্ণীতাদ্রবতান্যোন্যং বিভীতা বিনিকৃন্তত
ইত্যাসীত্তুমুলঃ শব্দো দুর্ধর্ষস্য রথং প্রতি
31.37
ততো দ্রোণঃ কৃপঃ কর্ণো দ্রৌণী রাজা জয়দ্রথঃ
বিন্দানুবিন্দাবাবন্ত্যৌ শল্যশ্চৈনানবারয়ন্
31.38
তে ত্বার্যধর্মসংরব্ধা দুর্নিবার্যা দুরাসদাঃ
শরার্তা ন জহুর্দ্রোণং পাঞ্চালাঃ পাণ্ডবৈঃ সহ
31.39
ততো দ্রোণোঽভিসংক্রুদ্ধো বিসৃজঞ্শতশঃ শরান্
চেদিপাঞ্চালপাণ্ডূনামকরোত্কদনং মহৎ
31.40
তস্য জ্যাতলনির্ঘোষঃ শুশ্রুবে দিক্ষু মারিষ
বজ্রসংঘাতসংকাশস্ত্রাসয়ন্পাণ্ডবান্বহূন্
31.41
এতস্মিন্নন্তরে জিষ্ণুর্হত্বা সংশপ্তকান্বলী
অভ্যয়াত্তত্র যত্র স্ম দ্রোণঃ পাণ্ডূন্প্রমর্দতি
31.42
তং শরৌঘমহাবর্তং শোণিতোদং মহাহ্রদম্
তীর্ণঃ সংশপ্তকান্হত্বা প্রত্যদৃশ্যত ফল্গুনঃ
31.43
তস্য কীর্তিমতো লক্ষ্ম সূর্যপ্রতিমতেজসঃ
দীপ্যমানমপশ্যাম তেজসা বানরধ্বজম্
31.44
সংশপ্তকসমুদ্রং তমুচ্ছোষ্যাস্ত্রগভস্তিভিঃ
স পাণ্ডবয়ুগান্তার্কঃ কুরূনপ্যভ্যতীতপৎ
31.45
প্রদদাহ কুরূন্সর্বানর্জুনঃ শস্ত্রতেজসা
যুগান্তে সর্বভূতানি ধূমকেতুরিবোত্থিতঃ
31.46
তেন বাণসহস্রৌঘৈর্গজাশ্বরথয়োধিনঃ
তাড্যমানাঃ ক্ষিতিং জগ্মুর্মুক্তশস্ত্রাঃ শরার্দিতাঃ
31.47
কেচিদার্তস্বরং চক্রুর্বিনেদুরপরে পুনঃ
পার্থবাণহতাঃ কেচিন্নিপেতুর্বিগতাসবঃ
31.48
তেষামুত্পততাং কাংশ্চিত্পতিতাংশ্চ পরাঙ্মুখান্
ন জঘানার্জুনো যোধান্যোধব্রতমনুস্মরন্
31.49
তে বিশীর্ণরথাশ্বেভাঃ প্রায়শশ্চ পরাঙ্মুখাঃ
কুরবঃ কর্ণ কর্ণেতি হা হেতি চ বিচুক্রুশুঃ
31.50
তমাধিরথিরাক্রন্দং বিজ্ঞায় শরণৈষিণাম্
মা ভৈষ্টেতি প্রতিশ্রুত্য যয়াবভিমুখোঽর্জুনম্
31.51
স ভারতরথশ্রেষ্ঠঃ সর্বভারতহর্ষণঃ
প্রাদুশ্চক্রে তদাগ্নেয়মস্ত্রমস্ত্রবিদাং বরঃ
31.52
তস্য দীপ্তশরৌঘস্য দীপ্তচাপধরস্য চ
শরৌঘাঞ্শরজালেন বিদুধাব ধনংজয়ঃ
অস্ত্রমস্ত্রেণ সংবার্য প্রাণদদ্বিসৃজঞ্শরান্
31.53
ধৃষ্টদ্যুম্নশ্চ ভীমশ্চ সাত্যকিশ্চ মহারথঃ
বিব্যধুঃ কর্ণমাসাদ্য ত্রিভিস্ত্রিভিরজিহ্মগৈঃ
31.54
অর্জুনাস্ত্রং তু রাধেয়ঃ সংবার্য শরবৃষ্টিভিঃ
তেষাং ত্রয়াণাং চাপানি চিচ্ছেদ বিশিখৈস্ত্রিভিঃ
31.55
তে নিকৃত্তায়ুধাঃ শূরা নির্বিষা ভুজগা ইব
রথশক্তীঃ সমুত্ক্ষিপ্য ভৃশং সিংহা ইবানদন্
31.56
তা ভুজাগ্রৈর্মহাবেগা বিসৃষ্টা ভুজগোপমাঃ
দীপ্যমানা মহাশক্ত্যো জগ্মুরাধিরথিং প্রতি
31.57
তা নিকৃত্য শিতৈর্বাণৈস্ত্রিভিস্ত্রিভিরজিহ্মগৈঃ
ননাদ বলবান্কর্ণঃ পার্থায় বিসৃজঞ্শরান্
31.58
অর্জুনশ্চাপি রাধেয়ং বিদ্ধ্বা সপ্তভিরাশুগৈঃ
কর্ণাদবরজং বাণৈর্জঘান নিশিতৈস্ত্রিভিঃ
31.59
ততঃ শত্রুংজয়ং হত্বা পার্থঃ ষড্ভিরজিহ্মগৈঃ
জহার সদ্যো ভল্লেন বিপাটস্য শিরো রথাৎ
31.60
পশ্যতাং ধার্তরাষ্ট্রাণামেকেনৈব কিরীটিনা
প্রমুখে সূতপুত্রস্য সোদর্যা নিহতাস্ত্রয়ঃ
31.61
ততো ভীমঃ সমুত্পত্য স্বরথাদ্বৈনতেয়বৎ
বরাসিনা কর্ণপক্ষাঞ্জঘান দশ পঞ্চ চ
31.62
পুনঃ স্বরথমাস্থায় ধনুরাদায় চাপরম্
বিব্যাধ দশভিঃ কর্ণং সূতমশ্বাংশ্চ পঞ্চভিঃ
31.63
ধৃষ্টদ্যুম্নোঽপ্যসিবরং চর্ম চাদায় ভাস্বরম্
জঘান চন্দ্রবর্মাণং বৃহত্ক্ষত্রং চ পৌরবম্
31.64
ততঃ স্বরথমাস্থায় পাঞ্চাল্যোঽন্যচ্চ কার্মুকম্
আদায় কর্ণং বিব্যাধ ত্রিসপ্তত্যা নদন্রণে
31.65
শৈনেয়োঽপ্যন্যদাদায় ধনুরিন্দ্রায়ুধদ্যুতি
সূতপুত্রং চতুঃষষ্ট্যা বিদ্ধ্বা সিংহ ইবানদৎ
31.66
ভল্লভ্যাং সাধুমুক্তাভ্যাং ছিত্ত্বা কর্ণস্য কার্মুকম্
পুনঃ কর্ণং ত্রিভির্বাণৈর্বাহ্বোরুরসি চার্পয়ৎ
31.67
ততো দুর্যোধনো দ্রোণো রাজা চৈব জয়দ্রথঃ
নিমজ্জমানং রাধেয়মুজ্জহ্রুঃ সাত্যকার্ণবাৎ
31.68
ধৃষ্টদ্যুম্নশ্চ ভীমশ্চ সৌভদ্রোঽর্জুন এব চ
নকুলঃ সহদেবশ্চ সাত্যকিং জুগুপূ রণে
31.69
এবমেষ মহারৌদ্রঃ ক্ষয়ার্থং সর্বধন্বিনাম্
তাবকানাং পরেষাং চ ত্যক্ত্বা প্রাণানভূদ্রণঃ
31.70
পদাতিরথনাগাশ্বৈর্গজাশ্বরথপত্তয়ঃ
রথিনো নাগপত্ত্যশ্বৈ রথপত্তী রথদ্বিপৈঃ
31.71
অশ্বৈরশ্বা গজৈর্নাগা রথিনো রথিভিঃ সহ
সংসক্তাঃ সমদৃশ্যন্ত পত্তয়শ্চাপি পত্তিভিঃ
31.72
এবং সুকলিলং যুদ্ধমাসীত্ক্রব্যাদহর্ষণম্
মহদ্ভিস্তৈরভীতানাং যমরাষ্ট্রবিবর্ধনম্
31.73
ততো হতা নররথবাজিকুঞ্জরৈ;রনেকশো দ্বিপরথবাজিপত্তয়ঃ
গজৈর্গজা রথিভিরুদায়ুধা রথা; হয়ৈর্হয়াঃ পত্তিগণৈশ্চ পত্তয়ঃ
31.74
রথৈর্দ্বিপা দ্বিরদবরৈর্মহাহয়া; হয়ৈর্নরা বররথিভিশ্চ বাজিনঃ
নিরস্তজিহ্বাদশনেক্ষণাঃ ক্ষিতৌ; ক্ষয়ং গতাঃ প্রমথিতবর্মভূষণাঃ
31.75
তথা পরৈর্বহুকরণৈর্বরায়ুধৈ;র্হতা গতাঃ প্রতিভয়দর্শনাঃ ক্ষিতিম্
বিপোথিতা হয়গজপাদতাডিতা; ভৃশাকুলা রথখুরনেমিভির্হতাঃ
31.76
প্রমোদনে শ্বাপদপক্ষিরক্ষসাং; জনক্ষয়ে বর্ততি তত্র দারুণে
মহাবলাস্তে কুপিতাঃ পরস্পরং; নিষূদয়ন্তঃ প্রবিচেরুরোজসা
31.77
ততো বলে ভৃশলুলিতে পরস্পরং; নিরীক্ষমাণে রুধিরৌঘসংপ্লুতে
দিবাকরেঽস্তংগিরিমাস্থিতে শনৈ;রুভে প্রয়াতে শিবিরায় ভারত