Utshovঅধ্যায় 30
30.1
ধৃতরাষ্ট্র উবাচ
তেষ্বনীকেষু ভগ্নেষু পাণ্ডুপুত্রেণ সংজয়
চলিতানাং দ্রুতানাং চ কথমাসীন্মনো হি বঃ
30.2
অনীকানাং প্রভগ্নানাং ব্যবস্থানমপশ্যতাম্
দুষ্করং প্রতিসংধানং তন্মমাচক্ষ্ব সংজয়
30.3
সংজয় উবাচ
তথাপি তব পুত্রস্য প্রিয়কামা বিশাং পতে
যশঃ প্রবীরা লোকেষু রক্ষন্তো দ্রোণমন্বয়ুঃ
30.4
সমুদ্যতেষু শস্ত্রেষু সংপ্রাপ্তে চ যুধিষ্ঠিরে
অকুর্বন্নার্যকর্মাণি ভৈরবে সত্যভীতবৎ
30.5
অন্তরং ভীমসেনস্য প্রাপতন্নমিতৌজসঃ
সাত্যকেশ্চৈব শূরস্য ধৃষ্টদ্যুম্নস্য চাভিভো
30.6
দ্রোণং দ্রোণমিতি ক্রূরাঃ পাঞ্চালাঃ সমচোদয়ন্
মা দ্রোণমিতি পুত্রাস্তে কুরূন্সর্বানচোদয়ন্
30.7
দ্রোণং দ্রোণমিতি হ্যেকে মা দ্রোণমিতি চাপরে
কুরূণাং পাণ্ডবানাং চ দ্রোণদ্যূতমবর্তত
30.8
যং যং স্ম ভজতে দ্রোণঃ পাঞ্চালানাং রথব্রজম্
তত্র তত্র স্ম পাঞ্চাল্যো ধৃষ্টদ্যুম্নোঽথ ধীয়তে
30.9
যথাভাগবিপর্যাসে সংগ্রামে ভৈরবে সতি
বীরাঃ সমাসদন্বীরানগচ্ছন্ভীরবঃ পরান্
30.10
অকম্পনীয়াঃ শত্রূণাং বভূবুস্তত্র পাণ্ডবাঃ
অকম্পয়ংস্ত্বনীকানি স্মরন্তঃ ক্লেশমাত্মনঃ
30.11
তে ত্বমর্ষবশং প্রাপ্তা হ্রীমন্তঃ সত্ত্বচোদিতাঃ
ত্যক্ত্বা প্রাণান্ন্যবর্তন্ত ঘ্নন্তো দ্রোণং মহাহবে
30.12
অয়সামিব সংপাতঃ শিলানামিব চাভবৎ
দীব্যতাং তুমুলে যুদ্ধে প্রাণৈরমিততেজসাম্
30.13
ন তু স্মরন্তি সংগ্রামমপি বৃদ্ধাস্তথাবিধম্
দৃষ্টপূর্বং মহারাজ শ্রুতপূর্বমথাপি বা
30.14
প্রাকম্পতেব পৃথিবী তস্মিন্বীরাবসাদনে
প্রবর্ততা বলৌঘেন মহতা ভারপীডিতা
30.15
ঘূর্ণতো হি বলৌঘস্য দিবং স্তব্ধ্বেব নিস্বনঃ
অজাতশত্রোঃ ক্রুদ্ধস্য পুত্রস্য তব চাভবৎ
30.16
সমাসাদ্য তু পাণ্ডূনামনীকানি সহস্রশঃ
দ্রোণেন চরতা সংখ্যে প্রভগ্নানি শিতৈঃ শরৈঃ
30.17
তেষু প্রমথ্যমানেষু দ্রোণেনাদ্ভুতকর্মণা
পর্যবারয়দাসাদ্য দ্রোণং সেনাপতিঃ স্বয়ম্
30.18
তদদ্ভুতমভূদ্যুদ্ধং দ্রোণপাঞ্চাল্যয়োস্তদা
নৈব তস্যোপমা কাচিত্সংভবেদিতি মে মতিঃ
30.19
ততো নীলোঽনলপ্রখ্যো দদাহ কুরুবাহিনীম্
শরস্ফুলিঙ্গশ্চাপার্চির্দহন্কক্ষমিবানলঃ
30.20
তং দহন্তমনীকানি দ্রোণপুত্রঃ প্রতাপবান্
পূর্বাভিভাষী সুশ্লক্ষ্ণং স্ময়মানোঽভ্যভাষত
30.21
নীল কিং বহুভির্দগ্ধৈস্তব যোধৈঃ শরার্চিষা
ময়ৈকেন হি যুধ্যস্ব ক্রুদ্ধঃ প্রহর চাশুগৈঃ
30.22
তং পদ্মনিকরাকারং পদ্মপত্রনিভেক্ষণম্
ব্যাকোশপদ্মাভমুখং নীলো বিব্যাধ সায়কৈঃ
30.23
তেনাতিবিদ্ধঃ সহসা দ্রৌণির্ভল্লৈঃ শিতৈস্ত্রিভিঃ
ধনুর্ধ্বজং চ ছত্রং চ দ্বিষতঃ স ন্যকৃন্তত
30.24
সোত্প্লুত্য স্যন্দনাত্তস্মান্নীলশ্চর্মবরাসিধৃক্
দ্রোণায়নেঃ শিরঃ কায়াদ্ধর্তুমৈচ্ছত্পতত্রিবৎ
30.25
তস্যোদ্যতাসেঃ সুনসং শিরঃ কায়াত্সকুণ্ডলম্
ভল্লেনাপাহরদ্দ্রৌণিঃ স্ময়মান ইবানঘ
30.26
সংপূর্ণচন্দ্রাভমুখঃ পদ্মপত্রনিভেক্ষণঃ
প্রাংশুরুত্পলগর্ভাভো নিহতো ন্যপতত্ক্ষিতৌ
30.27
ততঃ প্রবিব্যথে সেনা পাণ্ডবী ভৃশমাকুলা
আচার্যপুত্রেণ হতে নীলে জ্বলিততেজসি
30.28
অচিন্তয়ংশ্চ তে সর্বে পাণ্ডবানাং মহারথাঃ
কথং নো বাসবিস্ত্রায়াচ্ছত্রুভ্য ইতি মারিষ
30.29
দক্ষিণেন তু সেনায়াঃ কুরুতে কদনং বলী
সংশপ্তকাবশেষস্য নারায়ণবলস্য চ