Utshovঅধ্যায় 29
29.1
সংজয় উবাচ
প্রিয়মিন্দ্রস্য সততং সখায়মমিতৌজসম্
হত্বা প্রাগ্জ্যোতিষং পার্থঃ প্রদক্ষিণমবর্তত
29.2
ততো গান্ধাররাজস্য সুতৌ পরপুরংজয়ৌ
আর্ছেতামর্জুনং সংখ্যে ভ্রাতরৌ বৃষকাচলৌ
29.3
তৌ সমেত্যার্জুনং বীরৌ পুরঃ পশ্চাচ্চ ধন্বিনৌ
অবিধ্যেতাং মহাবেগৈর্নিশিতৈরাশুগৈর্ভৃশম্
29.4
বৃষকস্য হয়ান্সূতং ধনুশ্ছত্রং রথং ধ্বজম্
তিলশো ব্যধমত্পার্থঃ সৌবলস্য শিতৈঃ শরৈঃ
29.5
ততোঽর্জুনঃ শরব্রাতৈর্নানাপ্রহরণৈরপি
গান্ধারান্ব্যাকুলাংশ্চক্রে সৌবলপ্রমুখান্পুনঃ
29.6
ততঃ পঞ্চশতান্বীরান্গান্ধারানুদ্যতায়ুধান্
প্রাহিণোন্মৃত্যুলোকায় ক্রুদ্ধো বাণৈর্ধনংজয়ঃ
29.7
হতাশ্বাত্তু রথাত্তূর্ণমবতীর্য মহাভুজঃ
আরুরোহ রথং ভ্রাতুরন্যচ্চ ধনুরাদদে
29.8
তাবেকরথমারূঢৌ ভ্রাতরৌ বৃষকাচলৌ
শরবর্ষেণ বীভত্সুমবিধ্যেতাং পুনঃ পুনঃ
29.9
স্যালৌ তব মহাত্মানৌ রাজানৌ বৃষকাচলৌ
ভৃশং নিজঘ্নতুঃ পার্থমিন্দ্রং বৃত্রবলাবিব
29.10
লব্ধলক্ষ্যৌ তু গান্ধারাবহতাং পাণ্ডবং পুনঃ
নিদাঘবার্ষিকৌ মাসৌ লোকং ঘর্মাম্বুভির্যথা
29.11
তৌ রথস্থৌ নরব্যাঘ্রৌ রাজানৌ বৃষকাচলৌ
সংশ্লিষ্টাঙ্গৌ স্থিতৌ রাজঞ্জঘানৈকেষুণার্জুনঃ
29.12
তৌ রথাত্সিংহসংকাশৌ লোহিতাক্ষৌ মহাভুজৌ
গতাসূ পেততুর্বীরৌ সোদর্যাবেকলক্ষণৌ
29.13
তয়োর্দেহৌ রথাদ্ভূমিং গতৌ বন্ধুজনপ্রিয়ৌ
যশো দশ দিশঃ পুণ্যং গময়িত্বা ব্যবস্থিতৌ
29.14
দৃষ্ট্বা বিনিহতৌ সংখ্যে মাতুলাবপলায়িনৌ
ভৃশং মুমুচুরশ্রূণি পুত্রাস্তব বিশাং পতে
29.15
নিহতৌ ভ্রাতরৌ দৃষ্ট্বা মায়াশতবিশারদঃ
কৃষ্ণৌ সংমোহয়ন্মায়াং বিদধে শকুনিস্ততঃ
29.16
লগুডায়োগুডাশ্মানঃ শতঘ্ন্যশ্চ সশক্তয়ঃ
গদাপরিঘনিস্ত্রিংশশূলমুদ্গরপট্টিশাঃ
29.17
সকম্পনর্ষ্টিনখরা মুসলানি পরশ্বধাঃ
ক্ষুরাঃ ক্ষুরপ্রনালীকা বত্সদন্তাস্ত্রিসংধিনঃ
29.18
চক্রাণি বিশিখাঃ প্রাসা বিবিধান্যায়ুধানি চ
প্রপেতুঃ সর্বতো দিগ্ভ্যঃ প্রদিগ্ভ্যশ্চার্জুনং প্রতি
29.19
খরোষ্ট্রমহিষাঃ সিংহা ব্যাঘ্রাঃ সৃমরচিল্লিকাঃ
ঋক্ষাঃ সালাবৃকা গৃধ্রাঃ কপয়োঽথ সরীসৃপাঃ
29.20
বিবিধানি চ রক্ষাংসি ক্ষুধিতান্যর্জুনং প্রতি
সংক্রুদ্ধান্যভ্যধাবন্ত বিবিধানি বয়াংসি চ
29.21
ততো দিব্যাস্ত্রবিচ্ছূরঃ কুন্তীপুত্রো ধনংজয়ঃ
বিসৃজন্নিষুজালানি সহসা তান্যতাডয়ৎ
29.22
তে হন্যমানাঃ শূরেণ প্রবরৈঃ সায়কৈর্দৃঢৈঃ
বিরুবন্তো মহারাবান্বিনেশুঃ সর্বতো হতাঃ
29.23
ততস্তমঃ প্রাদুরভূদর্জুনস্য রথং প্রতি
তস্মাচ্চ তমসো বাচঃ ক্রূরাঃ পার্থমভর্ত্সয়ন্
29.24
তত্তমোঽস্ত্রেণ মহতা জ্যোতিষেণার্জুনোঽবধীৎ
হতে তস্মিঞ্জলৌঘাস্তু প্রাদুরাসন্ভয়ানকাঃ
29.25
অম্ভসস্তস্য নাশার্থমাদিত্যাস্ত্রমথার্জুনঃ
প্রায়ুঙ্ক্তাম্ভস্ততস্তেন প্রায়শোঽস্ত্রেণ শোষিতম্
29.26
এবং বহুবিধা মায়াঃ সৌবলস্য কৃতাঃ কৃতাঃ
জঘানাস্ত্রবলেনাশু প্রহসন্নর্জুনস্তদা
29.27
তথা হতাসু মায়াসু ত্রস্তোঽর্জুনশরাহতঃ
অপায়াজ্জবনৈরশ্বৈঃ শকুনিঃ প্রাকৃতো যথা
29.28
ততোঽর্জুনোঽস্ত্রবিচ্ছ্রৈষ্ঠ্যং দর্শয়ন্নাত্মনোঽরিষু
অভ্যবর্ষচ্ছরৌঘেণ কৌরবাণামনীকিনীম্
29.29
সা হন্যমানা পার্থেন পুত্রস্য তব বাহিনী
দ্বৈধীভূতা মহারাজ গঙ্গেবাসাদ্য পর্বতম্
29.30
দ্রোণমেবান্বপদ্যন্ত কেচিত্তত্র মহারথাঃ
কেচিদ্দুর্যোধনং রাজন্নর্দ্যমানাঃ কিরীটিনা
29.31
নাপশ্যাম ততস্ত্বেতত্সৈন্যং বৈ তমসাবৃতম্
গাণ্ডীবস্য চ নির্ঘোষঃ শ্রুতো দক্ষিণতো ময়া
29.32
শঙ্খদুন্দুভিনির্ঘোষং বাদিত্রাণাং চ নিস্বনম্
গাণ্ডীবস্য চ নির্ঘোষো ব্যতিক্রম্যাস্পৃশদ্দিবম্
29.33
ততঃ পুনর্দক্ষিণতঃ সংগ্রামশ্চিত্রয়োধিনাম্
সুয়ুদ্ধমর্জুনস্যাসীদহং তু দ্রোণমন্বগাম্
29.34
নানাবিধান্যনীকানি পুত্রাণাং তব ভারত
অর্জুনো ব্যধমত্কালে দিবীবাভ্রাণি মারুতঃ
29.35
তং বাসবমিবায়ান্তং ভূরিবর্ষশরৌঘিণম্
মহেষ্বাসং নরব্যাঘ্রং নোগ্রং কশ্চিদবারয়ৎ
29.36
তে হন্যমানাঃ পার্থেন ত্বদীয়া ব্যথিতা ভৃশম্
স্বানেব বহবো জঘ্নুর্বিদ্রবন্তস্ততস্ততঃ
29.37
তেঽর্জুনেন শরা মুক্তাঃ কঙ্কপত্রাস্তনুচ্ছিদঃ
শলভা ইব সংপেতুঃ সংবৃণ্বানা দিশো দশ
29.38
তুরগং রথিনং নাগং পদাতিমপি মারিষ
বিনির্ভিদ্য ক্ষিতিং জগ্মুর্বল্মীকমিব পন্নগাঃ
29.39
ন চ দ্বিতীয়ং ব্যসৃজত্কুঞ্জরাশ্বনরেষু সঃ
পৃথগেকশরারুগ্ণা নিপেতুস্তে গতাসবঃ
29.40
হতৈর্মনুষ্যৈস্তুরগৈশ্চ সর্বতঃ; শরাভিবৃষ্টৈর্দ্বিরদৈশ্চ পাতিতৈঃ
তদা শ্বগোমায়ুবডাভিনাদিতং; বিচিত্রমায়োধশিরো বভূব হ
29.41
পিতা সুতং ত্যজতি সুহৃদ্বরং সুহৃ;ত্তথৈব পুত্রঃ পিতরং শরাতুরঃ
স্বরক্ষণে কৃতমতয়স্তদা জনা;স্ত্যজন্তি বাহানপি পার্থপীডিতাঃ