Utshovঅধ্যায় 28
28.1
ধৃতরাষ্ট্র উবাচ
তথা ক্রুদ্ধঃ কিমকরোদ্ভগদত্তস্য পাণ্ডবঃ
প্রাগ্জ্যোতিষো বা পার্থস্য তন্মে শংস যথাতথম্
28.2
সংজয় উবাচ
প্রাগ্জ্যোতিষেণ সংসক্তাবুভৌ দাশার্হপাণ্ডবৌ
মৃত্যোরিবান্তিকং প্রাপ্তৌ সর্বভূতানি মেনিরে
28.3
তথা হি শরবর্ষাণি পাতয়ত্যনিশং প্রভো
ভগদত্তো গজস্কন্ধাত্কৃষ্ণয়োঃ স্যন্দনস্থয়োঃ
28.4
অথ কার্ষ্ণায়সৈর্বাণৈঃ পূর্ণকার্মুকনিঃসৃতৈঃ
অবিধ্যদ্দেবকীপুত্রং হেমপুঙ্খৈঃ শিলাশিতৈঃ
28.5
অগ্নিস্পর্শসমাস্তীক্ষ্ণা ভগদত্তেন চোদিতাঃ
নির্ভিদ্য দেবকীপুত্রং ক্ষিতিং জগ্মুঃ শরাস্ততঃ
28.6
তস্য পার্থো ধনুশ্ছিত্ত্বা শরাবাপং নিহত্য চ
লাডয়ন্নিব রাজানং ভগদত্তময়োধয়ৎ
28.7
সোঽর্করশ্মিনিভাংস্তীক্ষ্ণাংস্তোমরান্বৈ চতুর্দশ
প্রেরয়ত্সব্যসাচী তাংস্ত্রিধৈকৈকমথাচ্ছিনৎ
28.8
ততো নাগস্য তদ্বর্ম ব্যধমত্পাকশাসনিঃ
শরজালেন স বভৌ ব্যভ্রঃ পর্বতরাডিব
28.9
ততঃ প্রাগ্জ্যোতিষঃ শক্তিং হেমদণ্ডাময়স্ময়ীম্
ব্যসৃজদ্বাসুদেবায় দ্বিধা তামর্জুনোঽচ্ছিনৎ
28.10
ততশ্ছত্রং ধ্বজং চৈব ছিত্ত্বা রাজ্ঞোঽর্জুনঃ শরৈঃ
বিব্যাধ দশভিস্তূর্ণমুত্স্ময়ন্পর্বতাধিপম্
28.11
সোঽতিবিদ্ধোঽর্জুনশরৈঃ সুপুঙ্খৈঃ কঙ্কপত্রিভিঃ
ভগদত্তস্ততঃ ক্রুদ্ধঃ পাণ্ডবস্য মহাত্মনঃ
28.12
ব্যসৃজত্তোমরান্মূর্ধ্নি শ্বেতাশ্বস্যোন্ননাদ চ
তৈরর্জুনস্য সমরে কিরীটং পরিবর্তিতম্
28.13
পরিবৃত্তং কিরীটং তং যময়ন্নেব ফল্গুনঃ
সুদৃষ্টঃ ক্রিয়তাং লোক ইতি রাজানমব্রবীৎ
28.14
এবমুক্তস্তু সংক্রুদ্ধঃ শরবর্ষেণ পাণ্ডবম্
অভ্যবর্ষত্সগোবিন্দং ধনুরাদায় ভাস্বরম্
28.15
তস্য পার্থো ধনুশ্ছিত্ত্বা তূণীরান্সংনিকৃত্য চ
ত্বরমাণো দ্বিসপ্তত্যা সর্বমর্মস্বতাডয়ৎ
28.16
বিদ্ধস্তথাপ্যব্যথিতো বৈষ্ণবাস্ত্রমুদীরয়ন্
অভিমন্ত্র্যাঙ্কুশং ক্রুদ্ধো ব্যসৃজত্পাণ্ডবোরসি
28.17
বিসৃষ্টং ভগদত্তেন তদস্ত্রং সর্বঘাতকম্
উরসা প্রতিজগ্রাহ পার্থং সংছাদ্য কেশবঃ
28.18
বৈজয়ন্ত্যভবন্মালা তদস্ত্রং কেশবোরসি
ততোঽর্জুনঃ ক্লান্তমনাঃ কেশবং প্রত্যভাষত
28.19
অয়ুধ্যমানস্তুরগান্সংয়ন্তাস্মি জনার্দন
ইত্যুক্ত্বা পুণ্ডরীকাক্ষ প্রতিজ্ঞাং স্বাং ন রক্ষসি
28.20
যদ্যহং ব্যসনী বা স্যামশক্তো বা নিবারণে
ততস্ত্বয়ৈবং কার্যং স্যান্ন তু কার্যং ময়ি স্থিতে
28.21
সবাণঃ সধনুশ্চাহং সসুরাসুরমানবান্
শক্তো লোকানিমাঞ্জেতুং তচ্চাপি বিদিতং তব
28.22
ততোঽর্জুনং বাসুদেবঃ প্রত্যুবাচার্থবদ্বচঃ
শৃণু গুহ্যমিদং পার্থ যথা বৃত্তং পুরানঘ
28.23
চতুর্মূর্তিরহং শশ্বল্লোকত্রাণার্থমুদ্যতঃ
আত্মানং প্রবিভজ্যেহ লোকানাং হিতমাদধে
28.24
একা মূর্তিস্তপশ্চর্যাং কুরুতে মে ভুবি স্থিতা
অপরা পশ্যতি জগত্কুর্বাণং সাধ্বসাধুনী
28.25
অপরা কুরুতে কর্ম মানুষং লোকমাশ্রিতা
শেতে চতুর্থী ত্বপরা নিদ্রাং বর্ষসহস্রিকাম্
28.26
যাসৌ বর্ষসহস্রান্তে মূর্তিরুত্তিষ্ঠতে মম
বরার্হেভ্যো বরাঞ্শ্রেষ্ঠাংস্তস্মিন্কালে দদাতি সা
28.27
তং তু কালমনুপ্রাপ্তং বিদিত্বা পৃথিবী তদা
প্রায়াচত বরং যং মাং নরকার্থায় তং শৃণু
28.28
দেবানামসুরাণাং চ অবধ্যস্তনয়োঽস্তু মে
উপেতো বৈষ্ণবাস্ত্রেণ তন্মে ত্বং দাতুমর্হসি
28.29
এবং বরমহং শ্রুত্বা জগত্যাস্তনয়ে তদা
অমোঘমস্ত্রমদদং বৈষ্ণবং তদহং পুরা
28.30
অবোচং চৈতদস্ত্রং বৈ হ্যমোঘং ভবতু ক্ষমে
নরকস্যাভিরক্ষার্থং নৈনং কশ্চিদ্বধিষ্যতি
28.31
অনেনাস্ত্রেণ তে গুপ্তঃ সুতঃ পরবলার্দনঃ
ভবিষ্যতি দুরাধর্ষঃ সর্বলোকেষু সর্বদা
28.32
তথেত্যুক্ত্বা গতা দেবী কৃতকামা মনস্বিনী
স চাপ্যাসীদ্দুরাধর্ষো নরকঃ শত্রুতাপনঃ
28.33
তস্মাত্প্রাগ্জ্যোতিষং প্রাপ্তং তদস্ত্রং পার্থ মামকম্
নাস্যাবধ্যোঽস্তি লোকেষু সেন্দ্ররুদ্রেষু মারিষ
28.34
তন্ময়া ত্বত্কৃতেনৈতদন্যথা ব্যপনাশিতম্
বিয়ুক্তং পরমাস্ত্রেণ জহি পার্থ মহাসুরম্
28.35
বৈরিণং যুধি দুর্ধর্ষং ভগদত্তং সুরদ্বিষম্
যথাহং জঘ্নিবান্পূর্বং হিতার্থং নরকং তথা
28.36
এবমুক্তস্ততঃ পার্থঃ কেশবেন মহাত্মনা
ভগদত্তং শিতৈর্বাণৈঃ সহসা সমবাকিরৎ
28.37
ততঃ পার্থো মহাবাহুরসংভ্রান্তো মহামনাঃ
কুম্ভয়োরন্তরে নাগং নারাচেন সমার্পয়ৎ
28.38
সমাসাদ্য তু তং নাগং বাণো বজ্র ইবাচলম্
অভ্যগাত্সহ পুঙ্খেন বল্মীকমিব পন্নগঃ
28.39
স তু বিষ্টভ্য গাত্রাণি দন্তাভ্যামবনিং যয়ৌ
নদন্নার্তস্বরং প্রাণানুত্সসর্জ মহাদ্বিপঃ
28.40
ততশ্চন্দ্রার্ধবিম্বেন শরেণ নতপর্বণা
বিভেদ হৃদয়ং রাজ্ঞো ভগদত্তস্য পাণ্ডবঃ
28.41
স ভিন্নহৃদয়ো রাজা ভগদত্তঃ কিরীটিনা
শরাসনং শরাংশ্চৈব গতাসুঃ প্রমুমোচ হ
28.42
শিরসস্তস্য বিভ্রষ্টঃ পপাত চ বরাঙ্কুশঃ
নালতাডনবিভ্রষ্টং পলাশং নলিনাদিব
28.43
স হেমমালী তপনীয়ভাণ্ডা;ত্পপাত নাগাদ্গিরিসংনিকাশাৎ
সুপুষ্পিতো মারুতবেগরুগ্ণো; মহীধরাগ্রাদিব কর্ণিকারঃ
28.44
নিহত্য তং নরপতিমিন্দ্রবিক্রমং; সখায়মিন্দ্রস্য তথৈন্দ্রিরাহবে
ততোঽপরাংস্তব জয়কাঙ্ক্ষিণো নরা;ন্বভঞ্জ বায়ুর্বলবান্দ্রুমানিব