Utshovঅধ্যায় 27
27.1
সংজয় উবাচ
যিয়াসতস্ততঃ কৃষ্ণঃ পার্থস্যাশ্বান্মনোজবান্
অপ্রৈষীদ্ধেমসংছন্নান্দ্রোণানীকায় পাণ্ডুরান্
27.2
তং প্রয়ান্তং কুরুশ্রেষ্ঠং স্বাংস্ত্রাতুং দ্রোণতাপিতান্
সুশর্মা ভ্রাতৃভিঃ সার্ধং যুদ্ধার্থী পৃষ্ঠতোঽন্বয়াৎ
27.3
ততঃ শ্বেতহয়ঃ কৃষ্ণমব্রবীদজিতং জয়ঃ
এষ মাং ভ্রাতৃভিঃ সার্ধং সুশর্মাহ্বয়তেঽচ্যুত
27.4
দীর্যতে চোত্তরেণৈতত্সৈন্যং নঃ শত্রুসূদন
দ্বৈধীভূতং মনো মেঽদ্য কৃতং সংশপ্তকৈরিদম্
27.5
কিং নু সংশপ্তকান্হন্মি স্বান্রক্ষাম্যহিতার্দিতান্
ইতি মে ত্বং মতং বেত্থ তত্র কিং সুকৃতং ভবেৎ
27.6
এবমুক্তস্তু দাশার্হঃ স্যন্দনং প্রত্যবর্তয়ৎ
যেন ত্রিগর্তাধিপতিঃ পাণ্ডবং সমুপাহ্বয়ৎ
27.7
ততোঽর্জুনঃ সুশর্মাণং বিদ্ধ্বা সপ্তভিরাশুগৈঃ
ধ্বজং ধনুশ্চাস্য তথা ক্ষুরাভ্যাং সমকৃন্তত
27.8
ত্রিগর্তাধিপতেশ্চাপি ভ্রাতরং ষড্ভিরায়সৈঃ
সাশ্বং সসূতং ত্বরিতঃ পার্থঃ প্রৈষীদ্যমক্ষয়ম্
27.9
ততো ভুজগসংকাশাং সুশর্মা শক্তিমায়সীম্
চিক্ষেপার্জুনমাদিশ্য বাসুদেবায় তোমরম্
27.10
শক্তিং ত্রিভিঃ শরৈশ্ছিত্ত্বা তোমরং ত্রিভিরর্জুনঃ
সুশর্মাণং শরব্রাতৈর্মোহয়িত্বা ন্যবর্তত
27.11
তং বাসবমিবায়ান্তং ভূরিবর্ষশরৌঘিণম্
রাজংস্তাবকসৈন্যানাং নোগ্রং কশ্চিদবারয়ৎ
27.12
ততো ধনংজয়ো বাণৈস্তত এব মহারথান্
আয়াদ্বিনিঘ্নন্কৌরব্যান্দহন্কক্ষমিবানলঃ
27.13
তস্য বেগমসহ্যং তু কুন্তীপুত্রস্য ধীমতঃ
নাশক্নুবংস্তে সংসোঢুং স্পর্শমগ্নেরিব প্রজাঃ
27.14
সংবেষ্টয়ন্ননীকানি শরবর্ষেণ পাণ্ডবঃ
সুপর্ণপাতবদ্রাজন্নায়াত্প্রাগ্জ্যোতিষং প্রতি
27.15
যত্তদানাময়জ্জিষ্ণুর্ভরতানামপায়িনাম্
ধনুঃ ক্ষেমকরং সংখ্যে দ্বিষতামশ্রুবর্ধনম্
27.16
তদেব তব পুত্রস্য রাজন্দুর্দ্যূতদেবিনঃ
কৃতে ক্ষত্রবিনাশায় ধনুরায়চ্ছদর্জুনঃ
27.17
তথা বিক্ষোভ্যমাণা সা পার্থেন তব বাহিনী
ব্যদীর্যত মহারাজ নৌরিবাসাদ্য পর্বতম্
27.18
ততো দশ সহস্রাণি ন্যবর্তন্ত ধনুষ্মতাম্
মতিং কৃত্বা রণে ক্রুদ্ধা বীরা জয়পরাজয়ে
27.19
ব্যপেতহৃদয়ত্রাস আপদ্ধর্মাতিগো রথঃ
আর্ছত্পার্থো গুরুং ভারং সর্বভারসহো যুধি
27.20
যথা নডবনং ক্রুদ্ধঃ প্রভিন্নঃ ষষ্টিহায়নঃ
মৃদ্নীয়াত্তদ্বদায়স্তঃ পার্থোঽমৃদ্নাচ্চমূং তব
27.21
তস্মিন্প্রমথিতে সৈন্যে ভগদত্তো নরাধিপঃ
তেন নাগেন সহসা ধনংজয়মুপাদ্রবৎ
27.22
তং রথেন নরব্যাঘ্রঃ প্রত্যগৃহ্ণাদভীতবৎ
স সংনিপাতস্তুমুলো বভূব রথনাগয়োঃ
27.23
কল্পিতাভ্যাং যথাশাস্ত্রং রথেন চ গজেন চ
সংগ্রামে চেরতুর্বীরৌ ভগদত্তধনংজয়ৌ
27.24
ততো জীমূতসংকাশান্নাগাদিন্দ্র ইবাভিভূঃ
অভ্যবর্ষচ্ছরৌঘেণ ভগদত্তো ধনংজয়ম্
27.25
স চাপি শরবর্ষং তচ্ছরবর্ষেণ বাসবিঃ
অপ্রাপ্তমেব চিচ্ছেদ ভগদত্তস্য বীর্যবান্
27.26
ততঃ প্রাগ্জ্যোতিষো রাজা শরবর্ষং নিবার্য তৎ
শরৈর্জঘ্নে মহাবাহুং পার্থং কৃষ্ণং চ ভারত
27.27
ততঃ স শরজালেন মহতাভ্যবকীর্য তৌ
চোদয়ামাস তং নাগং বধায়াচ্যুতপার্থয়োঃ
27.28
তমাপতন্তং দ্বিরদং দৃষ্ট্বা ক্রুদ্ধমিবান্তকম্
চক্রেঽপসব্যং ত্বরিতঃ স্যন্দনেন জনার্দনঃ
27.29
সংপ্রাপ্তমপি নেয়েষ পরাবৃত্তং মহাদ্বিপম্
সারোহং মৃত্যুসাত্কর্তুং স্মরন্ধর্মং ধনংজয়ঃ
27.30
স তু নাগো দ্বিপরথান্হয়াংশ্চারুজ্য মারিষ
প্রাহিণোন্মৃত্যুলোকায় ততোঽক্রুধ্যদ্ধনংজয়ঃ