Utshovঅধ্যায় 26
26.1
সংজয় উবাচ
যন্মাং পার্থস্য সংগ্রামে কর্মাণি পরিপৃচ্ছসি
তচ্ছৃণুষ্ব মহারাজ পার্থো যদকরোন্মৃধে
26.2
রজো দৃষ্ট্বা সমুদ্ভূতং শ্রুত্বা চ গজনিস্বনম্
ভজ্যতাং ভগদত্তেন কৌন্তেয়ঃ কৃষ্ণমব্রবীৎ
26.3
যথা প্রাগ্জ্যোতিষো রাজা গজেন মধুসূদন
ত্বরমাণোঽভ্যতিক্রান্তো ধ্রুবং তস্যৈষ নিস্বনঃ
26.4
ইন্দ্রাদনবরঃ সংখ্যে গজয়ানবিশারদঃ
প্রথমো বা দ্বিতীয়ো বা পৃথিব্যামিতি মে মতিঃ
26.5
স চাপি দ্বিরদশ্রেষ্ঠঃ সদাপ্রতিগজো যুধি
সর্বশব্দাতিগঃ সংখ্যে কৃতকর্মা জিতক্লমঃ
26.6
সহঃ শস্ত্রনিপাতানামগ্নিস্পর্শস্য চানঘ
স পাণ্ডববলং ব্যক্তমদ্যৈকো নাশয়িষ্যতি
26.7
ন চাবাভ্যামৃতেঽন্যোঽস্তি শক্তস্তং প্রতিবাধিতুম্
ত্বরমাণস্ততো যাহি যতঃ প্রাগ্জ্যোতিষাধিপঃ
26.8
শক্রসখ্যাদ্দ্বিপবলৈর্বয়সা চাপি বিস্মিতম্
অদ্যৈনং প্রেষয়িষ্যামি বলহন্তুঃ প্রিয়াতিথিম্
26.9
বচনাদথ কৃষ্ণস্তু প্রয়য়ৌ সব্যসাচিনঃ
দার্যতে ভগদত্তেন যত্র পাণ্ডববাহিনী
26.10
তং প্রয়ান্তং ততঃ পশ্চাদাহ্বয়ন্তো মহারথাঃ
সংশপ্তকাঃ সমারোহন্সহস্রাণি চতুর্দশ
26.11
দশৈব তু সহস্রাণি ত্রিগর্তানাং নরাধিপ
চত্বারি তু সহস্রাণি বাসুদেবস্য যেঽনুগাঃ
26.12
দার্যমাণাং চমূং দৃষ্ট্বা ভগদত্তেন মারিষ
আহূয়মানস্য চ তৈরভবদ্ধৃদয়ং দ্বিধা
26.13
কিং নু শ্রেয়স্করং কর্ম ভবেদিতি বিচিন্তয়ন্
ইতো বা বিনিবর্তেয়ং গচ্ছেয়ং বা যুধিষ্ঠিরম্
26.14
তস্য বুদ্ধ্যা বিচার্যৈতদর্জুনস্য কুরূদ্বহ
অভবদ্ভূয়সী বুদ্ধিঃ সংশপ্তকবধে স্থিরা
26.15
স সংনিবৃত্তঃ সহসা কপিপ্রবরকেতনঃ
একো রথসহস্রাণি নিহন্তুং বাসবী রণে
26.16
সা হি দুর্যোধনস্যাসীন্মতিঃ কর্ণস্য চোভয়োঃ
অর্জুনস্য বধোপায়ে তেন দ্বৈধমকল্পয়ৎ
26.17
স তু সংবর্তয়ামাস দ্বৈধীভাবেন পাণ্ডবঃ
রথেন তু রথাগ্র্যাণামকরোত্তাং মৃষা তদা
26.18
ততঃ শতসহস্রাণি শরাণাং নতপর্বণাম্
ব্যসৃজন্নর্জুনে রাজন্সংশপ্তকমহারথাঃ
26.19
নৈব কুন্তীসুতঃ পার্থো নৈব কৃষ্ণো জনার্দনঃ
ন হয়া ন রথো রাজন্দৃশ্যন্তে স্ম শরৈশ্চিতাঃ
26.20
যদা মোহমনুপ্রাপ্তঃ সস্বেদশ্চ জনার্দনঃ
ততস্তান্প্রায়শঃ পার্থো বজ্রাস্ত্রেণ নিজঘ্নিবান্
26.21
শতশঃ পাণয়শ্ছিন্নাঃ সেষুজ্যাতলকার্মুকাঃ
কেতবো বাজিনঃ সূতা রথিনশ্চাপতন্ক্ষিতৌ
26.22
দ্রুমাচলাগ্রাম্বুধরৈঃ সমরূপাঃ সুকল্পিতাঃ
হতারোহাঃ ক্ষিতৌ পেতুর্দ্বিপাঃ পার্থশরাহতাঃ
26.23
বিপ্রবিদ্ধকুথাবল্গাশ্ছিন্নভাণ্ডাঃ পরাসবঃ
সারোহাস্তুরগাঃ পেতুর্মথিতাঃ পার্থমার্গণৈঃ
26.24
সর্ষ্টিচর্মাসিনখরাঃ সমুদ্গরপরশ্বধাঃ
সংছিন্না বাহবঃ পেতুর্নৃণাং ভল্লৈঃ কিরীটিনা
26.25
বালাদিত্যাম্বুজেন্দূনাং তুল্যরূপাণি মারিষ
সংছিন্নান্যর্জুনশরৈঃ শিরাংস্যুর্বীং প্রপেদিরে
26.26
জজ্বালালংকৃতৈঃ সেনা পত্রিভিঃ প্রাণভোজনৈঃ
নানালিঙ্গৈস্তদামিত্রান্ক্রুদ্ধে নিঘ্নতি ফল্গুনে
26.27
ক্ষোভয়ন্তং তদা সেনাং দ্বিরদং নলিনীমিব
ধনংজয়ং ভূতগণাঃ সাধু সাধ্বিত্যপূজয়ন্
26.28
দৃষ্ট্বা তত্কর্ম পার্থস্য বাসবস্যেব মাধবঃ
বিস্ময়ং পরমং গত্বা তলমাহত্য পূজয়ৎ
26.29
ততঃ সংশপ্তকান্হত্বা ভূয়িষ্ঠং যে ব্যবস্থিতাঃ
ভগদত্তায় যাহীতি পার্থঃ কৃষ্ণমচোদয়ৎ