Utshovঅধ্যায় 25
25.1
ধৃতরাষ্ট্র উবাচ
তেষ্বেবং সংনিবৃত্তেষু প্রত্যুদ্যাতেষু ভাগশঃ
কথং যুয়ুধিরে পার্থা মামকাশ্চ তরস্বিনঃ
25.2
কিমর্জুনশ্চাপ্যকরোত্সংশপ্তকবলং প্রতি
সংশপ্তকা বা পার্থস্য কিমকুর্বত সংজয়
25.3
সংজয় উবাচ
তথা তেষু নিবৃত্তেষু প্রত্যুদ্যাতেষু ভাগশঃ
স্বয়মভ্যদ্রবদ্ভীমং নাগানীকেন তে সুতঃ
25.4
স নাগ ইব নাগেন গোবৃষেণেব গোবৃষঃ
সমাহূতঃ স্বয়ং রাজ্ঞা নাগানীকমুপাদ্রবৎ
25.5
স যুদ্ধকুশলঃ পার্থো বাহুবীর্যেণ চান্বিতঃ
অভিনত্কুঞ্জরানীকমচিরেণৈব মারিষ
25.6
তে গজা গিরিসংকাশাঃ ক্ষরন্তঃ সর্বতো মদম্
ভীমসেনস্য নারাচৈর্বিমুখা বিমদীকৃতাঃ
25.7
বিধমেদভ্রজালানি যথা বায়ুঃ সমন্ততঃ
ব্যধমত্তান্যনীকানি তথৈব পবনাত্মজঃ
25.8
স তেষু বিসৃজন্বাণান্ভীমো নাগেষ্বশোভত
ভুবনেষ্বিব সর্বেষু গভস্তীনুদিতো রবিঃ
25.9
তে ভীমবাণৈঃ শতশঃ সংস্যূতা বিবভুর্গজাঃ
গভস্তিভিরিবার্কস্য ব্যোম্নি নানাবলাহকাঃ
25.10
তথা গজানাং কদনং কুর্বাণমনিলাত্মজম্
ক্রুদ্ধো দুর্যোধনোঽভ্যেত্য প্রত্যবিধ্যচ্ছিতৈঃ শরৈঃ
25.11
ততঃ ক্ষণেন ক্ষিতিপং ক্ষতজপ্রতিমেক্ষণঃ
ক্ষয়ং নিনীষুর্নিশিতৈর্ভীমো বিব্যাধ পত্রিভিঃ
25.12
স শরার্পিতসর্বাঙ্গঃ ক্রুদ্ধো বিব্যাধ পাণ্ডবম্
নারাচৈরর্করশ্ম্যাভৈর্ভীমসেনং স্ময়ন্নিব
25.13
তস্য নাগং মণিময়ং রত্নচিত্রং ধ্বজে স্থিতম্
ভল্লাভ্যাং কার্মুকং চৈব ক্ষিপ্রং চিচ্ছেদ পাণ্ডবঃ
25.14
দুর্যোধনং পীড্যমানং দৃষ্ট্বা ভীমেন মারিষ
চুক্ষোভয়িষুরভ্যাগাদঙ্গো মাতঙ্গমাস্থিতঃ
25.15
তমাপতন্তং মাতঙ্গমম্বুদপ্রতিমস্বনম্
কুম্ভান্তরে ভীমসেনো নারাচেনার্দয়দ্ভৃশম্
25.16
তস্য কায়ং বিনির্ভিদ্য মমজ্জ ধরণীতলে
ততঃ পপাত দ্বিরদো বজ্রাহত ইবাচলঃ
25.17
তস্যাবর্জিতনাগস্য ম্লেচ্ছস্যাবপতিষ্যতঃ
শিরশ্চিচ্ছেদ ভল্লেন ক্ষিপ্রকারী বৃকোদরঃ
25.18
তস্মিন্নিপতিতে বীরে সংপ্রাদ্রবত সা চমূঃ
সংভ্রান্তাশ্বদ্বিপরথা পদাতীনবমৃদ্নতী
25.19
তেষ্বনীকেষু সর্বেষু বিদ্রবত্সু সমন্ততঃ
প্রাগ্জ্যোতিষস্ততো ভীমং কুঞ্জরেণ সমাদ্রবৎ
25.20
যেন নাগেন মঘবানজয়দ্দৈত্যদানবান্
স নাগপ্রবরো ভীমং সহসা সমুপাদ্রবৎ
25.21
শ্রবণাভ্যামথো পদ্ভ্যাং সংহতেন করেণ চ
ব্যাবৃত্তনয়নঃ ক্রুদ্ধঃ প্রদহন্নিব পাণ্ডবম্
25.22
ততঃ সর্বস্য সৈন্যস্য নাদঃ সমভবন্মহান্
হা হা বিনিহতো ভীমঃ কুঞ্জরেণেতি মারিষ
25.23
তেন নাদেন বিত্রস্তা পাণ্ডবানামনীকিনী
সহসাভ্যদ্রবদ্রাজন্যত্র তস্থৌ বৃকোদরঃ
25.24
ততো যুধিষ্ঠিরো রাজা হতং মত্বা বৃকোদরম্
ভগদত্তং সপাঞ্চালঃ সর্বতঃ সমবারয়ৎ
25.25
তং রথৈ রথিনাং শ্রেষ্ঠাঃ পরিবার্য সমন্ততঃ
অবাকিরঞ্শরৈস্তীক্ষ্ণৈঃ শতশোঽথ সহস্রশঃ
25.26
স বিঘাতং পৃষত্কানামঙ্কুশেন সমাচরন্
গজেন পাণ্ডুপাঞ্চালান্ব্যধমত্পর্বতেশ্বরঃ
25.27
তদদ্ভুতমপশ্যাম ভগদত্তস্য সংয়ুগে
তথা বৃদ্ধস্য চরিতং কুঞ্জরেণ বিশাং পতে
25.28
ততো রাজা দশার্ণানাং প্রাগ্জ্যোতিষমুপাদ্রবৎ
তির্যগ্যাতেন নাগেন সমদেনাশুগামিনা
25.29
তয়োর্যুদ্ধং সমভবন্নাগয়োর্ভীমরূপয়োঃ
সপক্ষয়োঃ পর্বতয়োর্যথা সদ্রুময়োঃ পুরা
25.30
প্রাগ্জ্যোতিষপতের্নাগঃ সংনিপত্যাপবৃত্য চ
পার্শ্বে দশার্ণাধিপতের্ভিত্ত্বা নাগমপাতয়ৎ
25.31
তোমরৈঃ সূর্যরশ্ম্যাভৈর্ভগদত্তোঽথ সপ্তভিঃ
জঘান দ্বিরদস্থং তং শত্রুং প্রচলিতাসনম্
25.32
উপসৃত্য তু রাজানং ভগদত্তং যুধিষ্ঠিরঃ
রথানীকেন মহতা সর্বতঃ পর্যবারয়ৎ
25.33
স কুঞ্জরস্থো রথিভিঃ শুশুভে সর্বতো বৃতঃ
পর্বতে বনমধ্যস্থো জ্বলন্নিব হুতাশনঃ
25.34
মণ্ডলং সর্বতঃ শ্লিষ্টং রথিনামুগ্রধন্বিনাম্
কিরতাং শরবর্ষাণি স নাগঃ পর্যবর্তত
25.35
ততঃ প্রাগ্জ্যোতিষো রাজা পরিগৃহ্য দ্বিপর্ষভম্
প্রেষয়ামাস সহসা যুয়ুধানরথং প্রতি
25.36
শিনেঃ পৌত্রস্য তু রথং পরিগৃহ্য মহাদ্বিপঃ
অভিচিক্ষেপ বেগেন যুয়ুধানস্ত্বপাক্রমৎ
25.37
বৃহতঃ সৈন্ধবানশ্বান্সমুত্থাপ্য তু সারথিঃ
তস্থৌ সাত্যকিমাসাদ্য সংপ্লুতস্তং রথং পুনঃ
25.38
স তু লব্ধ্বান্তরং নাগস্ত্বরিতো রথমণ্ডলাৎ
নিশ্চক্রাম ততঃ সর্বান্পরিচিক্ষেপ পার্থিবান্
25.39
তে ত্বাশুগতিনা তেন ত্রাস্যমানা নরর্ষভাঃ
তমেকং দ্বিরদং সংখ্যে মেনিরে শতশো নৃপাঃ
25.40
তে গজস্থেন কাল্যন্তে ভগদত্তেন পাণ্ডবাঃ
ঐরাবতস্থেন যথা দেবরাজেন দানবাঃ
25.41
তেষাং প্রদ্রবতাং ভীমঃ পাঞ্চালানামিতস্ততঃ
গজবাজিকৃতঃ শব্দঃ সুমহান্সমজায়ত
25.42
ভগদত্তেন সমরে কাল্যমানেষু পাণ্ডুষু
প্রাগ্জ্যোতিষমভিক্রুদ্ধঃ পুনর্ভীমঃ সমভ্যয়াৎ
25.43
তস্যাভিদ্রবতো বাহান্হস্তমুক্তেন বারিণা
সিক্ত্বা ব্যত্রাসয়ন্নাগস্তে পার্থমহরংস্ততঃ
25.44
ততস্তমভ্যয়াত্তূর্ণং রুচিপর্বাকৃতীসুতঃ
সমুক্ষঞ্শরবর্ষেণ রথস্থোঽন্তকসংনিভঃ
25.45
ততো রুচিরপর্বাণং শরেণ নতপর্বণা
সুপর্বা পর্বতপতির্নিন্যে বৈবস্বতক্ষয়ম্
25.46
তস্মিন্নিপতিতে বীরে সৌভদ্রো দ্রৌপদীসুতাঃ
চেকিতানো ধৃষ্টকেতুর্যুয়ুত্সুশ্চার্দয়ন্দ্বিপম্
25.47
ত এনং শরধারাভির্ধারাভিরিব তোয়দাঃ
সিষিচুর্ভৈরবান্নাদান্বিনদন্তো জিঘাংসবঃ
25.48
ততঃ পার্ষ্ণ্যঙ্কুশাঙ্গুষ্ঠৈঃ কৃতিনা চোদিতো দ্বিপঃ
প্রসারিতকরঃ প্রায়াত্স্তব্ধকর্ণেক্ষণো দ্রুতম্
25.49
সোঽধিষ্ঠায় পদা বাহান্যুয়ুত্সোঃ সূতমারুজৎ
পুত্রস্তু তব সংভ্রান্তঃ সৌভদ্রস্যাপ্লুতো রথম্
25.50
স কুঞ্জরস্থো বিসৃজন্নিষূনরিষু পার্থিবঃ
বভৌ রশ্মীনিবাদিত্যো ভুবনেষু সমুত্সৃজন্
25.51
তমার্জুনির্দ্বাদশভির্যুয়ুত্সুর্দশভিঃ শরৈঃ
ত্রিভিস্ত্রিভির্দ্রৌপদেয়া ধৃষ্টকেতুশ্চ বিব্যধুঃ
25.52
সোঽরিয়ত্নার্পিতৈর্বাণৈরাচিতো দ্বিরদো বভৌ
সংস্যূত ইব সূর্যস্য রশ্মিভির্জলদো মহান্
25.53
নিয়ন্তুঃ শিল্পয়ত্নাভ্যাং প্রেষিতোঽরিশরার্দিতঃ
পরিচিক্ষেপ তান্নাগঃ স রিপূন্সব্যদক্ষিণম্
25.54
গোপাল ইব দণ্ডেন যথা পশুগণান্বনে
আবেষ্টয়ত তাং সেনাং ভগদত্তস্তথা মুহুঃ
25.55
ক্ষিপ্রং শ্যেনাভিপন্নানাং বায়সানামিব স্বনঃ
বভূব পাণ্ডবেয়ানাং ভৃশং বিদ্রবতাং স্বনঃ
25.56
স নাগরাজঃ প্রবরাঙ্কুশাহতঃ; পুরা সপক্ষোঽদ্রিবরো যথা নৃপ
ভয়ং তথা রিপুষু সমাদধদ্ভৃশং; বণিগ্গণানাং ক্ষুভিতো যথার্ণবঃ
25.57
ততো ধ্বনির্দ্বিরদরথাশ্বপার্থিবৈ;র্ভয়াদ্দ্রবদ্ভির্জনিতোঽতিভৈরবঃ
ক্ষিতিং বিয়দ্দ্যাং বিদিশো দিশস্তথা; সমাবৃণোত্পার্থিব সংয়ুগে তদা
25.58
স তেন নাগপ্রবরেণ পার্থিবো; ভৃশং জগাহে দ্বিষতামনীকিনীম্
পুরা সুগুপ্তাং বিবুধৈরিবাহবে; বিরোচনো দেববরূথিনীমিব
25.59
ভৃশং ববৌ জ্বলনসখো বিয়দ্রজঃ; সমাবৃণোন্মুহুরপি চৈব সৈনিকান্
তমেকনাগং গণশো যথা গজাঃ; সমন্ততো দ্রুতমিব মেনিরে জনাঃ