Utshovঅধ্যায় 24
24.1
সংজয় উবাচ
মহদ্ভৈরবমাসীন্নঃ সংনিবৃত্তেষু পাণ্ডুষু
দৃষ্ট্বা দ্রোণং ছাদ্যমানং তৈর্ভাস্করমিবাম্বুদৈঃ
24.2
তৈশ্চোদ্ধূতং রজস্তীব্রমবচক্রে চমূং তব
ততো হতমমন্যাম দ্রোণং দৃষ্টিপথে হতে
24.3
তাংস্তু শূরান্মহেষ্বাসান্ক্রূরং কর্ম চিকীর্ষতঃ
দৃষ্ট্বা দুর্যোধনস্তূর্ণং স্বসৈন্যং সমচূচুদৎ
24.4
যথাশক্তি যথোত্সাহং যথাসত্ত্বং নরাধিপাঃ
বারয়ধ্বং যথায়োগং পাণ্ডবানামনীকিনীম্
24.5
ততো দুর্মর্ষণো ভীমমভ্যগচ্ছত্সুতস্তব
আরাদ্দৃষ্ট্বা কিরন্বাণৈরিচ্ছন্দ্রোণস্য জীবিতম্
24.6
তং বাণৈরবতস্তার ক্রুদ্ধো মৃত্যুমিবাহবে
তং চ ভীমোঽতুদদ্বাণৈস্তদাসীত্তুমুলং মহৎ
24.7
ত ঈশ্বরসমাদিষ্টাঃ প্রাজ্ঞাঃ শূরাঃ প্রহারিণঃ
বাহ্যং মৃত্যুভয়ং কৃত্বা প্রত্যতিষ্ঠন্পরান্যুধি
24.8
কৃতবর্মা শিনেঃ পুত্রং দ্রোণপ্রেপ্সুং বিশাং পতে
পর্যবারয়দায়ান্তং শূরং সমিতিশোভনম্
24.9
তং শৈনেয়ঃ শরব্রাতৈঃ ক্রুদ্ধঃ ক্রুদ্ধমবারয়ৎ
কৃতবর্মা চ শৈনেয়ং মত্তো মত্তমিব দ্বিপম্
24.10
সৈন্ধবঃ ক্ষত্রধর্মাণমাপতন্তং শরৌঘিণম্
উগ্রধন্বা মহেষ্বাসং যত্তো দ্রোণাদবারয়ৎ
24.11
ক্ষত্রধর্মা সিন্ধুপতেশ্ছিত্ত্বা কেতনকার্মুকে
নারাচৈর্বহুভিঃ ক্রুদ্ধঃ সর্বমর্মস্বতাডয়ৎ
24.12
অথান্যদ্ধনুরাদায় সৈন্ধবঃ কৃতহস্তবৎ
বিব্যাধ ক্ষত্রধর্মাণং রণে সর্বায়সৈঃ শরৈঃ
24.13
যুয়ুত্সুং পাণ্ডবার্থায় যতমানং মহারথম্
সুবাহুর্ভ্রাতরং শূরং যত্তো দ্রোণাদবারয়ৎ
24.14
সুবাহোঃ সধনুর্বাণাবস্যতঃ পরিঘোপমৌ
যুয়ুত্সুঃ শিতপীতাভ্যাং ক্ষুরাভ্যামচ্ছিনদ্ভুজৌ
24.15
রাজানং পাণ্ডবশ্রেষ্ঠং ধর্মাত্মানং যুধিষ্ঠিরম্
বেলেব সাগরং ক্ষুব্ধং মদ্ররাট্সমবারয়ৎ
24.16
তং ধর্মরাজো বহুভির্মর্মভিদ্ভিরবাকিরৎ
মদ্রেশস্তং চতুঃষষ্ট্যা শরৈর্বিদ্ধ্বানদদ্ভৃশম্
24.17
তস্য নানদতঃ কেতুমুচ্চকর্ত সকার্মুকম্
ক্ষুরাভ্যাং পাণ্ডবশ্রেষ্ঠস্তত উচ্চুক্রুশুর্জনাঃ
24.18
তথৈব রাজা বাহ্লীকো রাজানং দ্রুপদং শরৈঃ
আদ্রবন্তং সহানীকং সহানীকো ন্যবারয়ৎ
24.19
তদ্যুদ্ধমভবদ্ঘোরং বৃদ্ধয়োঃ সহসেনয়োঃ
যথা মহায়ূথপয়োর্দ্বিপয়োঃ সংপ্রভিন্নয়োঃ
24.20
বিন্দানুবিন্দাবাবন্ত্যৌ বিরাটং মত্স্যমার্চ্ছতাম্
সহসৈন্যৌ সহানীকং যথেন্দ্রাগ্নী পুরা বলিম্
24.21
তদুত্পিঞ্জলকং যুদ্ধমাসীদ্দেবাসুরোপমম্
মত্স্যানাং কেকয়ৈঃ সার্ধমভীতাশ্বরথদ্বিপম্
24.22
নাকুলিং তু শতানীকং ভূতকর্মা সভাপতিঃ
অস্যন্তমিষুজালানি যান্তং দ্রোণাদবারয়ৎ
24.23
ততো নকুলদায়াদস্ত্রিভির্ভল্লৈঃ সুসংশিতৈঃ
চক্রে বিবাহুশিরসং ভূতকর্মাণমাহবে
24.24
সুতসোমং তু বিক্রান্তমাপতন্তং শরৌঘিণম্
দ্রোণায়াভিমুখং বীরং বিবিংশতিরবারয়ৎ
24.25
সুতসোমস্তু সংক্রুদ্ধঃ স্বপিতৃব্যমজিহ্মগৈঃ
বিবিংশতিং শরৈর্বিদ্ধ্বা নাভ্যবর্তত দংশিতঃ
24.26
অথ ভীমরথঃ শাল্বমাশুগৈরায়সৈঃ শিতৈঃ
ষড্ভিঃ সাশ্বনিয়ন্তারমনয়দ্যমসাদনম্
24.27
শ্রুতকর্মাণমায়ান্তং ময়ূরসদৃশৈর্হয়ৈঃ
চৈত্রসেনির্মহারাজ তব পৌত্রো ন্যবারয়ৎ
24.28
তৌ পৌত্রৌ তব দুর্ধর্ষৌ পরস্পরবধৈষিণৌ
পিতৄণামর্থসিদ্ধ্যর্থং চক্রতুর্যুদ্ধমুত্তমম্
24.29
তিষ্ঠন্তমগ্রতো দৃষ্ট্বা প্রতিবিন্ধ্যং তমাহবে
দ্রৌণির্মানং পিতুঃ কুর্বন্মার্গণৈঃ সমবারয়ৎ
24.30
তং ক্রুদ্ধঃ প্রতিবিব্যাধ প্রতিবিন্ধ্যঃ শিতৈঃ শরৈঃ
সিংহলাঙ্গূললক্ষ্মাণং পিতুরর্থে ব্যবস্থিতম্
24.31
প্রবপন্নিব বীজানি বীজকালে নরর্ষভ
দ্রৌণায়নির্দ্রৌপদেয়ং শরবর্ষৈরবাকিরৎ
24.32
যস্তু শূরতমো রাজন্সেনয়োরুভয়োর্মতঃ
তং পটচ্চরহন্তারং লক্ষ্মণঃ সমবারয়ৎ
24.33
স লক্ষ্মণস্যেষ্বসনং ছিত্ত্বা লক্ষ্ম চ ভারত
লক্ষ্মণে শরজালানি বিসৃজন্বহ্বশোভত
24.34
বিকর্ণস্তু মহাপ্রাজ্ঞো যাজ্ঞসেনিং শিখণ্ডিনম্
পর্যবারয়দায়ান্তং যুবানং সমরে যুবা
24.35
ততস্তমিষুজালেন যাজ্ঞসেনিঃ সমাবৃণোৎ
বিধূয় তদ্বাণজালং বভৌ তব সুতো বলী
24.36
অঙ্গদোঽভিমুখঃ শূরমুত্তমৌজসমাহবে
দ্রোণায়াভিমুখং যান্তং বত্সদন্তৈরবারয়ৎ
24.37
স সংপ্রহারস্তুমুলস্তয়োঃ পুরুষসিংহয়োঃ
সৈনিকানাং চ সর্বেষাং তয়োশ্চ প্রীতিবর্ধনঃ
24.38
দুর্মুখস্তু মহেষ্বাসো বীরং পুরুজিতং বলী
দ্রোণায়াভিমুখং যান্তং কুন্তিভোজমবারয়ৎ
24.39
স দুর্মুখং ভ্রুবোর্মধ্যে নারাচেন ব্যতাডয়ৎ
তস্য তদ্বিবভৌ বক্ত্রং সনালমিব পঙ্কজম্
24.40
কর্ণস্তু কেকয়ান্ভ্রাতৄন্পঞ্চ লোহিতকধ্বজান্
দ্রোণায়াভিমুখং যাতাঞ্শরবর্ষৈরবারয়ৎ
24.41
তে চৈনং ভৃশসংক্রুদ্ধাঃ শরব্রাতৈরবাকিরন্
স চ তাংশ্ছাদয়ামাস শরজালৈঃ পুনঃ পুনঃ
24.42
নৈব কর্ণো ন তে পঞ্চ দদৃশুর্বাণসংবৃতাঃ
সাশ্বসূতধ্বজরথাঃ পরস্পরশরাচিতাঃ
24.43
পুত্রস্তে দুর্জয়শ্চৈব জয়শ্চ বিজয়শ্চ হ
নীলং কাশ্যং জয়ং শূরাস্ত্রয়স্ত্রীন্প্রত্যবারয়ন্
24.44
তদ্যুদ্ধমভবদ্ঘোরমীক্ষিতৃপ্রীতিবর্ধনম্
সিংহব্যাঘ্রতরক্ষূণাং যথেভমহিষর্ষভৈঃ
24.45
ক্ষেমধূর্তিবৃহন্তৌ তৌ ভ্রাতরৌ সাত্বতং যুধি
দ্রোণায়াভিমুখং যান্তং শরৈস্তীক্ষ্ণৈস্ততক্ষতুঃ
24.46
তয়োস্তস্য চ তদ্যুদ্ধমত্যদ্ভুতমিবাভবৎ
সিংহস্য দ্বিপমুখ্যাভ্যাং প্রভিন্নাভ্যাং যথা বনে
24.47
রাজানং তু তথাম্বষ্ঠমেকং যুদ্ধাভিনন্দিনম্
চেদিরাজঃ শরানস্যন্ক্রুদ্ধো দ্রোণাদবারয়ৎ
24.48
তমম্বষ্ঠোঽস্থিভেদিন্যা নিরবিধ্যচ্ছলাকয়া
স ত্যক্ত্বা সশরং চাপং রথাদ্ভূমিমথাপতৎ
24.49
বার্ধক্ষেমিং তু বার্ষ্ণেয়ং কৃপঃ শারদ্বতঃ শরৈঃ
অক্ষুদ্রঃ ক্ষুদ্রকৈর্দ্রোণাত্ক্রুদ্ধরূপমবারয়ৎ
24.50
যুধ্যন্তৌ কৃপবার্ষ্ণেয়ৌ যেঽপশ্যংশ্চিত্রয়োধিনৌ
তে যুদ্ধসক্তমনসো নান্যা বুবুধিরে ক্রিয়াঃ
24.51
সৌমদত্তিস্তু রাজানং মণিমন্তমতন্দ্রিতম্
পর্যবারয়দায়ান্তং যশো দ্রোণস্য বর্ধয়ন্
24.52
স সৌমদত্তেস্ত্বরিতশ্ছিত্ত্বেষ্বসনকেতনে
পুনঃ পতাকাং সূতং চ ছত্রং চাপাতয়দ্রথাৎ
24.53
অথাপ্লুত্য রথাত্তূর্ণং যূপকেতুরমিত্রহা
সাশ্বসূতধ্বজরথং তং চকর্ত বরাসিনা
24.54
রথং চ স্বং সমাস্থায় ধনুরাদায় চাপরম্
স্বয়ং যচ্ছন্হয়ান্রাজন্ব্যধমত্পাণ্ডবীং চমূম্
24.55
মুসলৈর্মুদ্গরৈশ্চক্রৈর্ভিণ্ডিপালৈঃ পরশ্বধৈঃ
পাংসুবাতাগ্নিসলিলৈর্ভস্মলোষ্ঠতৃণদ্রুমৈঃ
24.56
আরুজন্প্ররুজন্ভঞ্জন্নিঘ্নন্বিদ্রাবয়ন্ক্ষিপন্
সেনাং বিভীষয়ন্নায়াদ্দ্রোণপ্রেপ্সুর্ঘটোত্কচঃ
24.57
তং তু নানাপ্রহরণৈর্নানায়ুদ্ধবিশেষণৈঃ
রাক্ষসং রাক্ষসঃ ক্রুদ্ধঃ সমাজঘ্নে হ্যলম্বুসঃ
24.58
তয়োস্তদভবদ্যুদ্ধং রক্ষোগ্রামণিমুখ্যয়োঃ
তাদৃগ্যাদৃক্পুরা বৃত্তং শম্বরামররাজয়োঃ
24.59
এবং দ্বংদ্বশতান্যাসন্রথবারণবাজিনাম্
পদাতীনাং চ ভদ্রং তে তব তেষাং চ সংকুলম্
24.60
নৈতাদৃশো দৃষ্টপূর্বঃ সংগ্রামো নৈব চ শ্রুতঃ
দ্রোণস্যাভাবভাবেষু প্রসক্তানাং যথাভবৎ
24.61
ইদং ঘোরমিদং চিত্রমিদং রৌদ্রমিতি প্রভো
তত্র যুদ্ধান্যদৃশ্যন্ত প্রততানি বহূনি চ