অধ্যায় 23

23.1

ধৃতরাষ্ট্র উবাচ
ব্যথয়েয়ুরিমে সেনাং দেবানামপি সংয়ুগে
আহবে যে ন্যবর্তন্ত বৃকোদরমুখা রথাঃ

সংপ্রয়ুক্তঃ কিলৈবায়ং দিষ্টৈর্ভবতি পূরুষঃ
তস্মিন্নেব তু সর্বার্থা দৃশ্যন্তে বৈ পৃথগ্বিধাঃ

দীর্ঘং বিপ্রোষিতঃ কালমরণ্যে জটিলোঽজিনী
অজ্ঞাতশ্চৈব লোকস্য বিজহার যুধিষ্ঠিরঃ

স এব মহতীং সেনাং সমাবর্তয়দাহবে
কিমন্যদ্দৈবসংয়োগান্মম পুত্রস্য চাভবৎ

যুক্ত এব হি ভাগ্যেন ধ্রুবমুত্পদ্যতে নরঃ
স তথাকৃষ্যতে তেন ন যথা স্বয়মিচ্ছতি

দ্যূতব্যসনমাসাদ্য ক্লেশিতো হি যুধিষ্ঠিরঃ
স পুনর্ভাগধেয়েন সহায়ানুপলব্ধবান্

অর্ধং মে কেকয়া লব্ধাঃ কাশিকাঃ কোসলাশ্চ যে
চেদয়শ্চাপরে বঙ্গা মামেব সমুপাশ্রিতাঃ

পৃথিবী ভূয়সী তাত মম পার্থস্য নো তথা
ইতি মামব্রবীত্সূত মন্দো দুর্যোধনস্তদা

তস্য সেনাসমূহস্য মধ্যে দ্রোণঃ সুরক্ষিতঃ
নিহতঃ পার্ষতেনাজৌ কিমন্যদ্ভাগধেয়তঃ

মধ্যে রাজ্ঞাং মহাবাহুং সদা যুদ্ধাভিনন্দিনম্
সর্বাস্ত্রপারগং দ্রোণং কথং মৃত্যুরুপেয়িবান্

সমনুপ্রাপ্তকৃচ্ছ্রোঽহং সংমোহং পরমং গতঃ
ভীষ্মদ্রোণৌ হতৌ শ্রুত্বা নাহং জীবিতুমুত্সহে

যন্মা ক্ষত্তাব্রবীত্তাত প্রপশ্যন্পুত্রগৃদ্ধিনম্
দুর্যোধনেন তত্সর্বং প্রাপ্তং সূত ময়া সহ

নৃশংসং তু পরং তত্স্যাত্ত্যক্ত্বা দুর্যোধনং যদি
পুত্রশেষং চিকীর্ষেয়ং কৃচ্ছ্রং ন মরণং ভবেৎ

যো হি ধর্মং পরিত্যজ্য ভবত্যর্থপরো নরঃ
সোঽস্মাচ্চ হীয়তে লোকাত্ক্ষুদ্রভাবং চ গচ্ছতি

অদ্য চাপ্যস্য রাষ্ট্রস্য হতোত্সাহস্য সংজয়
অবশেষং ন পশ্যামি ককুদে মৃদিতে সতি

কথং স্যাদবশেষং হি ধুর্যয়োরভ্যতীতয়োঃ
যৌ নিত্যমনুজীবামঃ ক্ষমিণৌ পুরুষর্ষভৌ

ব্যক্তমেব চ মে শংস যথা যুদ্ধমবর্তত
কেঽয়ুধ্যন্কে ব্যপাকর্ষন্কে ক্ষুদ্রাঃ প্রাদ্রবন্ভয়াৎ

ধনংজয়ং চ মে শংস যদ্যচ্চক্রে রথর্ষভঃ
তস্মাদ্ভয়ং নো ভূয়িষ্ঠং ভ্রাতৃব্যাচ্চ বিশেষতঃ

যথাসীচ্চ নিবৃত্তেষু পাণ্ডবেষু চ সংজয়
মম সৈন্যাবশেষস্য সংনিপাতঃ সুদারুণঃ
মামকানাং চ যে শূরাঃ কাংস্তত্র সমবারয়ন্