Utshovঅধ্যায় 22
22.1
ধৃতরাষ্ট্র উবাচ
সর্বেষামেব মে ব্রূহি রথচিহ্নানি সংজয়
যে দ্রোণমভ্যবর্তন্ত ক্রুদ্ধা ভীমপুরোগমাঃ
22.2
সংজয় উবাচ
ঋশ্যবর্ণৈর্হয়ৈর্দৃষ্ট্বা ব্যায়চ্ছন্তং বৃকোদরম্
রজতাশ্বস্ততঃ শূরঃ শৈনেয়ঃ সংন্যবর্তত
22.3
দর্শনীয়াস্তু কাম্বোজাঃ শুকপত্রপরিচ্ছদাঃ
বহন্তো নকুলং শীঘ্রং তাবকানভিদুদ্রুবুঃ
22.4
কৃষ্ণাস্তু মেঘসংকাশাঃ সহদেবমুদায়ুধম্
ভীমবেগা নরব্যাঘ্রমবহন্বাতরংহসঃ
22.5
হেমোত্তমপ্রতিচ্ছন্নৈর্হয়ৈর্বাতসমৈর্জবে
অভ্যবর্তন্ত সৈন্যানি সর্বাণ্যেব যুধিষ্ঠিরম্
22.6
রাজ্ঞস্ত্বনন্তরং রাজা পাঞ্চাল্যো দ্রুপদোঽভবৎ
জাতরূপময়চ্ছত্রঃ সর্বৈঃ স্বৈরভিরক্ষিতঃ
22.7
ললামৈর্হরিভির্যুক্তৈঃ সর্বশব্দক্ষমৈর্যুধি
রাজ্ঞাং মধ্যে মহেষ্বাসঃ শান্তভীরভ্যবর্তত
22.8
তং বিরাটোঽন্বয়াত্পশ্চাত্সহ শূরৈর্মহারথৈঃ
কেকয়াশ্চ শিখণ্ডী চ ধৃষ্টকেতুস্তথৈব চ
স্বৈঃ স্বৈঃ সৈন্যৈঃ পরিবৃতা মত্স্যরাজানমন্বয়ুঃ
22.9
তে তু পাটলপুষ্পাণাং সমবর্ণা হয়োত্তমাঃ
বহমানা ব্যরাজন্ত মত্স্যস্যামিত্রঘাতিনঃ
22.10
হারিদ্রসমবর্ণাস্তু জবনা হেমমালিনঃ
পুত্রং বিরাটরাজস্য সত্বরাঃ সমুদাবহন্
22.11
ইন্দ্রগোপকবর্ণৈস্তু ভ্রাতরঃ পঞ্চ কেকয়াঃ
জাতরূপসমাভাসঃ সর্বে লোহিতকধ্বজাঃ
22.12
তে হেমমালিনঃ শূরাঃ সর্বে যুদ্ধবিশারদাঃ
বর্ষন্ত ইব জীমূতাঃ প্রত্যদৃশ্যন্ত দংশিতাঃ
22.13
আমপাত্রনিভাকারাঃ পাঞ্চাল্যমমিতৌজসম্
দান্তাস্তাম্রারুণা যুক্তাঃ শিখণ্ডিনমুদাবহন্
22.14
তথা দ্বাদশসাহস্রাঃ পাঞ্চালানাং মহারথাঃ
তেষাং তু ষট্সহস্রাণি যে শিখণ্ডিনমন্বয়ুঃ
22.15
পুত্রং তু শিশুপালস্য নরসিংহস্য মারিষ
আক্রীডন্তো বহন্তি স্ম সারঙ্গশবলা হয়াঃ
22.16
ধৃষ্টকেতুশ্চ চেদীনামৃষভোঽতিবলোদিতঃ
কাম্বোজৈঃ শবলৈরশ্বৈরভ্যবর্তত দুর্জয়ঃ
22.17
বৃহত্ক্ষত্রং তু কৈকেয়ং সুকুমারং হয়োত্তমাঃ
পলালধূমবর্ণাভাঃ সৈন্ধবাঃ শীঘ্রমাবহন্
22.18
মল্লিকাক্ষাঃ পদ্মবর্ণা বাহ্লিজাতাঃ স্বলংকৃতাঃ
শূরং শিখণ্ডিনঃ পুত্রং ক্ষত্রদেবমুদাবহন্
22.19
যুবানমবহন্যুদ্ধে ক্রৌঞ্চবর্ণা হয়োত্তমাঃ
কাশ্যস্যাভিভুবঃ পুত্রং সুকুমারং মহারথম্
22.20
শ্বেতাস্তু প্রতিবিন্ধ্যং তং কৃষ্ণগ্রীবা মনোজবাঃ
যন্তুঃ প্রেষ্যকরা রাজন্রাজপুত্রমুদাবহন্
22.21
সুতসোমং তু যং ধৌম্যাত্পার্থঃ পুত্রময়াচত
মাষপুষ্পসবর্ণাস্তমবহন্বাজিনো রণে
22.22
সহস্রসোমপ্রতিমা বভূবুঃ; পুরে কুরূণামুদয়েন্দুনাম্নি
তস্মিঞ্জাতঃ সোমসংক্রন্দমধ্যে; যস্মাত্তস্মাত্সুতসোমোঽভবত্সঃ
22.23
নাকুলিং তু শতানীকং শালপুষ্পনিভা হয়াঃ
আদিত্যতরুণপ্রখ্যাঃ শ্লাঘনীয়মুদাবহন্
22.24
কাঞ্চনপ্রতিমৈর্যোক্ত্রৈর্ময়ূরগ্রীবসংনিভাঃ
দ্রৌপদেয়ং নরব্যাঘ্রং শ্রুতকর্মাণমাবহন্
22.25
শ্রুতকীর্তিং শ্রুতনিধিং দ্রৌপদেয়ং হয়োত্তমাঃ
ঊহুঃ পার্থসমং যুদ্ধে চাষপত্রনিভা হয়াঃ
22.26
যমাহুরধ্যর্ধগুণং কৃষ্ণাত্পার্থাচ্চ সংয়ুগে
অভিমন্যুং পিশঙ্গাস্তং কুমারমবহন্রণে
22.27
একস্তু ধার্তরাষ্ট্রেভ্যঃ পাণ্ডবান্যঃ সমাশ্রিতঃ
তং বৃহন্তো মহাকায়া যুয়ুত্সুমবহন্রণে
22.28
পলালকাণ্ডবর্ণাস্তু বার্ধক্ষেমিং তরস্বিনম্
ঊহুঃ সুতুমুলে যুদ্ধে হয়া হৃষ্টাঃ স্বলংকৃতাঃ
22.29
কুমারং শিতিপাদাস্তু রুক্মপত্রৈরুরশ্ছদৈঃ
সৌচিত্তিমবহন্যুদ্ধে যন্তুঃ প্রেষ্যকরা হয়াঃ
22.30
রুক্মপৃষ্ঠাবকীর্ণাস্তু কৌশেয়সদৃশা হয়াঃ
সুবর্ণমালিনঃ ক্ষান্তাঃ শ্রেণিমন্তমুদাবহন্
22.31
রুক্মমালাধরাঃ শূরা হেমবর্ণাঃ স্বলংকৃতাঃ
কাশিরাজং হয়শ্রেষ্ঠাঃ শ্লাঘনীয়মুদাবহন্
22.32
অস্ত্রাণাং চ ধনুর্বেদে ব্রাহ্মে বেদে চ পারগম্
তং সত্যধৃতিমায়ান্তমরুণাঃ সমুদাবহন্
22.33
যঃ স পাঞ্চালসেনানীর্দ্রোণমংশমকল্পয়ৎ
পারাবতসবর্ণাশ্বা ধৃষ্টদ্যুম্নমুদাবহন্
22.34
তমন্বয়াত্সত্যধৃতিঃ সৌচিত্তির্যুদ্ধদুর্মদঃ
শ্রেণিমান্বসুদানশ্চ পুত্রঃ কাশ্যস্য চাভিভো
22.35
যুক্তৈঃ পরমকাম্বোজৈর্জবনৈর্হেমমালিভিঃ
ভীষয়ন্তো দ্বিষত্সৈন্যং যমবৈশ্রবণোপমাঃ
22.36
প্রভদ্রকাস্তু পাঞ্চালাঃ ষট্সহস্রাণ্যুদায়ুধাঃ
নানাবর্ণৈর্হয়শ্রেষ্ঠৈর্হেমচিত্ররথধ্বজাঃ
22.37
শরব্রাতৈর্বিধুন্বন্তঃ শত্রূন্বিততকার্মুকাঃ
সমানমৃত্যবো ভূত্বা ধৃষ্টদ্যুম্নং সমন্বয়ুঃ
22.38
বভ্রুকৌশেয়বর্ণাস্তু সুবর্ণবরমালিনঃ
ঊহুরগ্লানমনসশ্চেকিতানং হয়োত্তমাঃ
22.39
ইন্দ্রায়ুধসবর্ণৈস্তু কুন্তিভোজো হয়োত্তমৈঃ
আয়াত্সুবশ্যৈঃ পুরুজিন্মাতুলঃ সব্যসাচিনঃ
22.40
অন্তরিক্ষসবর্ণাস্তু তারকাচিত্রিতা ইব
রাজানং রোচমানং তে হয়াঃ সংখ্যে সমাবহন্
22.41
কর্বুরাঃ শিতিপাদাস্তু স্বর্ণজালপরিচ্ছদাঃ
জারাসংধিং হয়শ্রেষ্ঠাঃ সহদেবমুদাবহন্
22.42
যে তু পুষ্করনালস্য সমবর্ণা হয়োত্তমাঃ
জবে শ্যেনসমাশ্চিত্রাঃ সুদামানমুদাবহন্
22.43
শশলোহিতবর্ণাস্তু পাণ্ডুরোদ্গতরাজয়ঃ
পাঞ্চাল্যং গোপতেঃ পুত্রং সিংহসেনমুদাবহন্
22.44
পাঞ্চালানাং নরব্যাঘ্রো যঃ খ্যাতো জনমেজয়ঃ
তস্য সর্ষপপুষ্পাণাং তুল্যবর্ণা হয়োত্তমাঃ
22.45
মাষবর্ণাস্তু জবনা বৃহন্তো হেমমালিনঃ
দধিপৃষ্ঠাশ্চন্দ্রমুখাঃ পাঞ্চাল্যমবহন্দ্রুতম্
22.46
শূরাশ্চ ভদ্রকাশ্চৈব শরকাণ্ডনিভা হয়াঃ
পদ্মকিঞ্জল্কবর্ণাভা দণ্ডধারমুদাবহন্
22.47
বিভ্রতো হেমমালাশ্চ চক্রবাকোদরা হয়াঃ
কোসলাধিপতেঃ পুত্রং সুক্ষত্রং বাজিনোঽবহন্
22.48
শবলাস্তু বৃহন্তোঽশ্বা দান্তা জাম্বূনদস্রজঃ
যুদ্ধে সত্যধৃতিং ক্ষৈমিমবহন্প্রাংশবঃ শুভাঃ
22.49
একবর্ণেন সর্বেণ ধ্বজেন কবচেন চ
অশ্বৈশ্চ ধনুষা চৈব শুক্লৈঃ শুক্লো ন্যবর্তত
22.50
সমুদ্রসেনপুত্রং তু সামুদ্রা রুদ্রতেজসম্
অশ্বাঃ শশাঙ্কসদৃশাশ্চন্দ্রদেবমুদাবহন্
22.51
নীলোত্পলসবর্ণাস্তু তপনীয়বিভূষিতাঃ
শৈব্যং চিত্ররথং যুদ্ধে চিত্রমাল্যাবহন্হয়াঃ
22.52
কলায়পুষ্পবর্ণাস্তু শ্বেতলোহিতরাজয়ঃ
রথসেনং হয়শ্রেষ্ঠাঃ সমূহুর্যুদ্ধদুর্মদম্
22.53
যং তু সর্বমনুষ্যেভ্যঃ প্রাহুঃ শূরতরং নৃপম্
তং পটচ্চরহন্তারং শুকবর্ণাবহন্হয়াঃ
22.54
চিত্রায়ুধং চিত্রমাল্যং চিত্রবর্মায়ুধধ্বজম্
ঊহুঃ কিংশুকপুষ্পাণাং তুল্যবর্ণা হয়োত্তমাঃ
22.55
একবর্ণেন সর্বেণ ধ্বজেন কবচেন চ
ধনুষা রথবাহৈশ্চ নীলৈর্নীলোঽভ্যবর্তত
22.56
নানারূপৈ রত্নচিত্রৈর্বরূথধ্বজকার্মুকৈঃ
বাজিধ্বজপতাকাভিশ্চিত্রৈশ্চিত্রোঽভ্যবর্তত
22.57
যে তু পুষ্করপত্রস্য তুল্যবর্ণা হয়োত্তমাঃ
তে রোচমানস্য সুতং হেমবর্ণমুদাবহন্
22.58
যোধাশ্চ ভদ্রকারাশ্চ শরদণ্ডানুদণ্ডজাঃ
শ্বেতাণ্ডাঃ কুক্কুটাণ্ডাভা দণ্ডকেতুমুদাবহন্
22.59
আটরূষকপুষ্পাভা হয়াঃ পাণ্ড্যানুয়ায়িনাম্
অবহন্রথমুখ্যানাময়ুতানি চতুর্দশ
22.60
নানারূপেণ বর্ণেন নানাকৃতিমুখা হয়াঃ
রথচক্রধ্বজং বীরং ঘটোত্কচমুদাবহন্
22.61
সুবর্ণবর্ণা ধর্মজ্ঞমনীকস্থং যুধিষ্ঠিরম্
রাজশ্রেষ্ঠং হয়শ্রেষ্ঠাঃ সর্বতঃ পৃষ্ঠতোঽন্বয়ুঃ
বর্ণৈশ্চোচ্চাবচৈর্দিব্যৈঃ সদশ্বানাং প্রভদ্রকাঃ
22.62
তে যত্তা ভীমসেনেন সহিতাঃ কাঞ্চনধ্বজাঃ
প্রত্যদৃশ্যন্ত রাজেন্দ্র সেন্দ্রা ইব দিবৌকসঃ
22.63
অত্যরোচত তান্সর্বান্ধৃষ্টদ্যুম্নঃ সমাগতান্
সর্বাণ্যপি চ সৈন্যানি ভারদ্বাজোঽত্যরোচত