Utshovঅধ্যায় 21
21.1
ধৃতরাষ্ট্র উবাচ
ভারদ্বাজেন ভগ্নেষু পাণ্ডবেষু মহামৃধে
পাঞ্চালেষু চ সর্বেষু কশ্চিদন্যোঽভ্যবর্তত
21.2
আর্যাং যুদ্ধে মতিং কৃত্বা ক্ষত্রিয়াণাং যশস্করীম্
অসেবিতাং কাপুরুষৈঃ সেবিতাং পুরুষর্ষভৈঃ
21.3
স হি বীরো নরঃ সূত যো ভগ্নেষু নিবর্ততে
অহো নাসীত্পুমান্কশ্চিদ্দৃষ্ট্বা দ্রোণং ব্যবস্থিতম্
21.4
জৃম্ভমাণমিব ব্যাঘ্রং প্রভিন্নমিব কুঞ্জরম্
ত্যজন্তমাহবে প্রাণান্সংনদ্ধং চিত্রয়োধিনম্
21.5
মহেষ্বাসং নরব্যাঘ্রং দ্বিষতামঘবর্ধনম্
কৃতজ্ঞং সত্যনিরতং দুর্যোধনহিতৈষিণম্
21.6
ভারদ্বাজং তথানীকে দৃষ্ট্বা শূরমবস্থিতম্
কে বীরাঃ সংন্যবর্তন্ত তন্মমাচক্ষ্ব সংজয়
21.7
সংজয় উবাচ
তান্দৃষ্ট্বা চলিতান্সংখ্যে প্রণুন্নান্দ্রোণসায়কৈঃ
পাঞ্চালান্পাণ্ডবান্মত্স্যান্সৃঞ্জয়াংশ্চেদিকেকয়ান্
21.8
দ্রোণচাপবিমুক্তেন শরৌঘেণাসুহারিণা
সিন্ধোরিব মহৌঘেন হ্রিয়মাণান্যথা প্লবান্
21.9
কৌরবাঃ সিংহনাদেন নানাবাদ্যস্বনেন চ
রথদ্বিপনরাশ্বৈশ্চ সর্বতঃ পর্যবারয়ন্
21.10
তান্পশ্যন্সৈন্যমধ্যস্থো রাজা স্বজনসংবৃতঃ
দুর্যোধনোঽব্রবীত্কর্ণং প্রহৃষ্টঃ প্রহসন্নিব
21.11
পশ্য রাধেয় পাঞ্চালান্প্রণুন্নান্দ্রোণসায়কৈঃ
সিংহেনেব মৃগান্বন্যাংস্ত্রাসিতান্দৃঢধন্বনা
21.12
নৈতে জাতু পুনর্যুদ্ধমীহেয়ুরিতি মে মতিঃ
যথা তু ভগ্না দ্রোণেন বাতেনেব মহাদ্রুমাঃ
21.13
অর্দ্যমানাঃ শরৈরেতে রুক্মপুঙ্খৈর্মহাত্মনা
পথা নৈকেন গচ্ছন্তি ঘূর্ণমানাস্ততস্ততঃ
21.14
সংনিরুদ্ধাশ্চ কৌরব্যৈর্দ্রোণেন চ মহাত্মনা
এতেঽন্যে মণ্ডলীভূতাঃ পাবকেনেব কুঞ্জরাঃ
21.15
ভ্রমরৈরিব চাবিষ্টা দ্রোণস্য নিশিতৈঃ শরৈঃ
অন্যোন্যং সমলীয়ন্ত পলায়নপরায়ণাঃ
21.16
এষ ভীমো দৃঢক্রোধো হীনঃ পাণ্ডবসৃঞ্জয়ৈঃ
মদীয়ৈরাবৃতো যোধৈঃ কর্ণ তর্জয়তীব মাম্
21.17
ব্যক্তং দ্রোণময়ং লোকমদ্য পশ্যতি দুর্মতিঃ
নিরাশো জীবিতান্নূনমদ্য রাজ্যাচ্চ পাণ্ডবঃ
21.18
কর্ণ উবাচ
নৈষ জাতু মহাবাহুর্জীবন্নাহবমুত্সৃজেৎ
ন চেমান্পুরুষব্যাঘ্র সিংহনাদান্বিশক্ষ্যতে
21.19
ন চাপি পাণ্ডবা যুদ্ধে ভজ্যেরন্নিতি মে মতিঃ
শূরাশ্চ বলবন্তশ্চ কৃতাস্ত্রা যুদ্ধদুর্মদাঃ
21.20
বিষাগ্নিদ্যূতসংক্লেশান্বনবাসং চ পাণ্ডবাঃ
স্মরমাণা ন হাস্যন্তি সংগ্রামমিতি মে মতিঃ
21.21
নিকৃতো হি মহাবাহুরমিতৌজা বৃকোদরঃ
বরান্বরান্হি কৌন্তেয়ো রথোদারান্হনিষ্যতি
21.22
অসিনা ধনুষা শক্ত্যা হয়ৈর্নাগৈর্নরৈ রথৈঃ
আয়সেন চ দণ্ডেন ব্রাতান্ব্রাতান্হনিষ্যতি
21.23
তমেতে চানুবর্তন্তে সাত্যকিপ্রমুখা রথাঃ
পাঞ্চালাঃ কেকয়া মত্স্যাঃ পাণ্ডবাশ্চ বিশেষতঃ
21.24
শূরাশ্চ বলবন্তশ্চ বিক্রান্তাশ্চ মহারথাঃ
বিশেষতশ্চ ভীমেন সংরব্ধেনাভিচোদিতাঃ
21.25
তে দ্রোণমভিবর্তন্তে সর্বতঃ কুরুপুংগবাঃ
বৃকোদরং পরীপ্সন্তঃ সূর্যমভ্রগণা ইব
21.26
একায়নগতা হ্যেতে পীডয়েয়ুর্যতব্রতম্
অরক্ষ্যমাণং শলভা যথা দীপং মুমূর্ষবঃ
অসংশয়ং কৃতাস্ত্রাশ্চ পর্যাপ্তাশ্চাপি বারণে
21.27
অতিভারং ত্বহং মন্যে ভারদ্বাজে সমাহিতম্
তে শীঘ্রমনুগচ্ছামো যত্র দ্রোণো ব্যবস্থিতঃ
কাকা ইব মহানাগং মা বৈ হন্যুর্যতব্রতম্
21.28
সংজয় উবাচ
রাধেয়স্য বচঃ শ্রুত্বা রাজা দুর্যোধনস্তদা
ভ্রাতৃভিঃ সহিতো রাজন্প্রায়াদ্দ্রোণরথং প্রতি
21.29
তত্রারাবো মহানাসীদেকং দ্রোণং জিঘাংসতাম্
পাণ্ডবানাং নিবৃত্তানাং নানাবর্ণৈর্হয়োত্তমৈঃ