Utshovঅধ্যায় 20
20.1
সংজয় উবাচ
ততো যুধিষ্ঠিরো দ্রোণং দৃষ্ট্বান্তিকমুপাগতম্
মহতা শরবর্ষেণ প্রত্যগৃহ্ণাদভীতবৎ
20.2
ততো হলহলাশব্দ আসীদ্যৌধিষ্ঠিরে বলে
জিঘৃক্ষতি মহাসিংহে গজানামিব যূথপম্
20.3
দৃষ্ট্বা দ্রোণং ততঃ শূরঃ সত্যজিত্সত্যবিক্রমঃ
যুধিষ্ঠিরং পরিপ্রেপ্সুমাচার্যং সমুপাদ্রবৎ
20.4
তত আচার্যপাঞ্চাল্যৌ যুয়ুধাতে পরস্পরম্
বিক্ষোভয়ন্তৌ তত্সৈন্যমিন্দ্রবৈরোচনাবিব
20.5
ততঃ সত্যজিতং তীক্ষ্ণৈর্দশভির্মর্মভেদিভিঃ
অবিধ্যচ্ছীঘ্রমাচার্যশ্ছিত্ত্বাস্য সশরং ধনুঃ
20.6
স শীঘ্রতরমাদায় ধনুরন্যত্প্রতাপবান্
দ্রোণং সোঽভিজঘানাশু বিংশদ্ভিঃ কঙ্কপত্রিভিঃ
20.7
জ্ঞাত্বা সত্যজিতা দ্রোণং গ্রস্যমানমিবাহবে
বৃকঃ শরশতৈস্তীক্ষ্ণৈঃ পাঞ্চাল্যো দ্রোণমর্দয়ৎ
20.8
সংছাদ্যমানং সমরে দ্রোণং দৃষ্ট্বা মহারথম্
চুক্রুশুঃ পাণ্ডবা রাজন্বস্ত্রাণি দুধুবুশ্চ হ
20.9
বৃকস্তু পরমক্রুদ্ধো দ্রোণং ষষ্ট্যা স্তনান্তরে
বিব্যাধ বলবান্রাজংস্তদদ্ভুতমিবাভবৎ
20.10
দ্রোণস্তু শরবর্ষেণ ছাদ্যমানো মহারথঃ
বেগং চক্রে মহাবেগঃ ক্রোধাদুদ্বৃত্য চক্ষুষী
20.11
ততঃ সত্যজিতশ্চাপং ছিত্ত্বা দ্রোণো বৃকস্য চ
ষড্ভিঃ সসূতং সহয়ং শরৈর্দ্রোণোঽবধীদ্বৃকম্
20.12
অথান্যদ্ধনুরাদায় সত্যজিদ্বেগবত্তরম্
সাশ্বং সসূতং বিশিখৈর্দ্রোণং বিব্যাধ সধ্বজম্
20.13
স তন্ন মমৃষে দ্রোণঃ পাঞ্চাল্যেনার্দনং মৃধে
ততস্তস্য বিনাশায় সত্বরং ব্যসৃজচ্ছরান্
20.14
হয়ান্ধ্বজং ধনুর্মুষ্টিমুভৌ চ পার্ষ্ণিসারথী
অবাকিরত্ততো দ্রোণঃ শরবর্ষৈঃ সহস্রশঃ
20.15
তথা সংছিদ্যমানেষু কার্মুকেষু পুনঃ পুনঃ
পাঞ্চাল্যঃ পরমাস্ত্রজ্ঞঃ শোণাশ্বং সময়োধয়ৎ
20.16
স সত্যজিতমালক্ষ্য তথোদীর্ণং মহাহবে
অর্ধচন্দ্রেণ চিচ্ছেদ শিরস্তস্য মহাত্মনঃ
20.17
তস্মিন্হতে মহামাত্রে পাঞ্চালানাং রথর্ষভে
অপায়াজ্জবনৈরশ্বৈর্দ্রোণাত্ত্রস্তো যুধিষ্ঠিরঃ
20.18
পাঞ্চালাঃ কেকয়া মত্স্যাশ্চেদিকারূষকোসলাঃ
যুধিষ্ঠিরমুদীক্ষন্তো হৃষ্টা দ্রোণমুপাদ্রবন্
20.19
ততো যুধিষ্ঠিরপ্রেপ্সুরাচার্যঃ শত্রুপূগহা
ব্যধমত্তান্যনীকানি তূলরাশিমিবানিলঃ
20.20
নির্দহন্তমনীকানি তানি তানি পুনঃ পুনঃ
দ্রোণং মত্স্যাদবরজঃ শতানীকোঽভ্যবর্তত
20.21
সূর্যরশ্মিপ্রতীকাশৈঃ কর্মারপরিমার্জিতৈঃ
ষড্ভিঃ সসূতং সহয়ং দ্রোণং বিদ্ধ্বানদদ্ভৃশম্
20.22
তস্য নানদতো দ্রোণঃ শিরঃ কায়াত্সকুণ্ডলম্
ক্ষুরেণাপাহরত্তূর্ণং ততো মত্স্যাঃ প্রদুদ্রুবুঃ
20.23
মত্স্যাঞ্জিত্বাজয়চ্চেদীন্কারূষান্কেকয়ানপি
পাঞ্চালান্সৃঞ্জয়ান্পাণ্ডূন্ভারদ্বাজঃ পুনঃ পুনঃ
20.24
তং দহন্তমনীকানি ক্রুদ্ধমগ্নিং যথা বনম্
দৃষ্ট্বা রুক্মরথং ক্রুদ্ধং সমকম্পন্ত সৃঞ্জয়াঃ
20.25
উত্তমং হ্যাদধানস্য ধনুরস্যাশুকারিণঃ
জ্যাঘোষো নিঘ্নতোঽমিত্রান্দিক্ষু সর্বাসু শুশ্রুবে
20.26
নাগানশ্বান্পদাতীংশ্চ রথিনো গজসাদিনঃ
রৌদ্রা হস্তবতা মুক্তাঃ প্রমথ্নন্তি স্ম সায়কাঃ
20.27
নানদ্যমানঃ পর্জন্যো মিশ্রবাতো হিমাত্যয়ে
অশ্মবর্ষমিবাবর্ষত্পরেষাং ভয়মাদধৎ
20.28
সর্বা দিশঃ সমচরত্সৈন্যং বিক্ষোভয়ন্নিব
বলী শূরো মহেষ্বাসো মিত্রাণামভয়ংকরঃ
20.29
তস্য বিদ্যুদিবাভ্রেষু চাপং হেমপরিষ্কৃতম্
দিক্ষু সর্বাস্বপশ্যাম দ্রোণস্যামিততেজসঃ
20.30
দ্রোণস্তু পাণ্ডবানীকে চকার কদনং মহৎ
যথা দৈত্যগণে বিষ্ণুঃ সুরাসুরনমস্কৃতঃ
20.31
স শূরঃ সত্যবাক্প্রাজ্ঞো বলবান্সত্যবিক্রমঃ
মহানুভাবঃ কালান্তে রৌদ্রীং ভীরুবিভীষণাম্
20.32
কবচোর্মিধ্বজাবর্তাং মর্ত্যকূলাপহারিণীম্
গজবাজিমহাগ্রাহামসিমীনাং দুরাসদাম্
20.33
বীরাস্থিশর্করাং রৌদ্রাং ভেরীমুরজকচ্ছপাম্
চর্মবর্মপ্লবাং ঘোরাং কেশশৈবলশাড্বলাম্
20.34
শরৌঘিণীং ধনুঃস্রোতাং বাহুপন্নগসংকুলাম্
রণভূমিবহাং ঘোরাং কুরুসৃঞ্জয়বাহিনীম্
মনুষ্যশীর্ষপাষাণাং শক্তিমীনাং গদোডুপাম্
20.35
উষ্ণীষফেনবসনাং নিষ্কীর্ণান্ত্রসরীসৃপাম্
বীরাপহারিণীমুগ্রাং মাংসশোণিতকর্দমাম্
20.36
হস্তিগ্রাহাং কেতুবৃক্ষাং ক্ষত্রিয়াণাং নিমজ্জনীম্
ক্রূরাং শরীরসংঘাটাং সাদিনক্রাং দুরত্যয়াম্
দ্রোণঃ প্রাবর্তয়ত্তত্র নদীমন্তকগামিনীম্
20.37
ক্রব্যাদগণসংঘুষ্টাং শ্বশৃগালগণায়ুতাম্
নিষেবিতাং মহারৌদ্রৈঃ পিশিতাশৈঃ সমন্ততঃ
20.38
তং দহন্তমনীকানি রথোদারং কৃতান্তবৎ
সর্বতোঽভ্যদ্রবন্দ্রোণং কুন্তীপুত্রপুরোগমাঃ
20.39
তাংস্তু শূরান্মহেষ্বাসাংস্তাবকাভ্যুদ্যতায়ুধাঃ
রাজানো রাজপুত্রাশ্চ সমন্তাত্পর্যবারয়ন্
20.40
ততো দ্রোণঃ সত্যসংধঃ প্রভিন্ন ইব কুঞ্জরঃ
অভ্যতীত্য রথানীকং দৃঢসেনমপাতয়ৎ
20.41
ততো রাজানমাসাদ্য প্রহরন্তমভীতবৎ
অবিধ্যন্নবভিঃ ক্ষেমং স হতঃ প্রাপতদ্রথাৎ
20.42
স মধ্যং প্রাপ্য সৈন্যানাং সর্বাঃ প্রবিচরন্দিশঃ
ত্রাতা হ্যভবদন্যেষাং ন ত্রাতব্যঃ কথংচন
20.43
শিখণ্ডিনং দ্বাদশভির্বিংশত্যা চোত্তমৌজসম্
বসুদানং চ ভল্লেন প্রেষয়দ্যমসাদনম্
20.44
অশীত্যা ক্ষত্রবর্মাণং ষড্বিংশত্যা সুদক্ষিণম্
ক্ষত্রদেবং তু ভল্লেন রথনীডাদপাহরৎ
20.45
যুধামন্যুং চতুঃষষ্ট্যা ত্রিংশতা চৈব সাত্যকিম্
বিদ্ধ্বা রুক্মরথস্তূর্ণং যুধিষ্ঠিরমুপাদ্রবৎ
20.46
ততো যুধিষ্ঠিরঃ ক্ষিপ্রং কিতবো রাজসত্তমঃ
অপায়াজ্জবনৈরশ্বৈঃ পাঞ্চাল্যো দ্রোণমভ্যয়াৎ
20.47
তং দ্রোণঃ সধনুষ্কং তু সাশ্বয়ন্তারমক্ষিণোৎ
স হতঃ প্রাপতদ্ভূমৌ রথাজ্জ্যোতিরিবাম্বরাৎ
20.48
তস্মিন্হতে রাজপুত্রে পাঞ্চালানাং যশস্করে
হত দ্রোণং হত দ্রোণমিত্যাসীত্তুমুলং মহৎ
20.49
তাংস্তথা ভৃশসংক্রুদ্ধান্পাঞ্চালান্মত্স্যকেকয়ান্
সৃঞ্জয়ান্পাণ্ডবাংশ্চৈব দ্রোণো ব্যক্ষোভয়দ্বলী
20.50
সাত্যকিং চেকিতানং চ ধৃষ্টদ্যুম্নশিখণ্ডিনৌ
বার্ধক্ষেমিং চিত্রসেনং সেনাবিন্দুং সুবর্চসম্
20.51
এতাংশ্চান্যাংশ্চ সুবহূন্নানাজনপদেশ্বরান্
সর্বান্দ্রোণোঽজয়দ্যুদ্ধে কুরুভিঃ পরিবারিতঃ
20.52
তাবকাস্তু মহারাজ জয়ং লব্ধ্বা মহাহবে
পাণ্ডবেয়ান্রণে জঘ্নুর্দ্রবমাণান্সমন্ততঃ
20.53
তে দানবা ইবেন্দ্রেণ বধ্যমানা মহাত্মনা
পাঞ্চালাঃ কেকয়া মত্স্যাঃ সমকম্পন্ত ভারত