Utshovঅধ্যায় 19
19.1
সংজয় উবাচ
পরিণাম্য নিশাং তাং তু ভারদ্বাজো মহারথঃ
বহূক্ত্বা চ ততো রাজন্রাজানং চ সুয়োধনম্
19.2
বিধায় যোগং পার্থেন সংশপ্তকগণৈঃ সহ
নিষ্ক্রান্তে চ রণাত্পার্থে সংশপ্তকবধং প্রতি
19.3
ব্যূঢানীকস্ততো দ্রোণঃ পাণ্ডবানাং মহাচমূম্
অভ্যয়াদ্ভরতশ্রেষ্ঠ ধর্মরাজজিঘৃক্ষয়া
19.4
ব্যূহং দৃষ্ট্বা সুপর্ণং তু ভারদ্বাজকৃতং তদা
ব্যূহেন মণ্ডলার্ধেন প্রত্যব্যূহদ্যুধিষ্ঠিরঃ
19.5
মুখমাসীত্সুপর্ণস্য ভারদ্বাজো মহারথঃ
শিরো দুর্যোধনো রাজা সোদর্যৈঃ সানুগৈঃ সহ
19.6
চক্ষুষী কৃতবর্মা চ গৌতমশ্চাস্যতাং বরঃ
ভূতবর্মা ক্ষেমশর্মা করকর্ষশ্চ বীর্যবান্
19.7
কলিঙ্গাঃ সিংহলাঃ প্রাচ্যাঃ শূরাভীরা দশেরকাঃ
শকা যবনকাম্বোজাস্তথা হংসপদাশ্চ যে
19.8
গ্রীবায়াং শূরসেনাশ্চ দরদা মদ্রকেকয়াঃ
গজাশ্বরথপত্ত্যৌঘাস্তস্থুঃ শতসহস্রশঃ
19.9
ভূরিশ্রবাঃ শলঃ শল্যঃ সোমদত্তশ্চ বাহ্লিকঃ
অক্ষৌহিণ্যা বৃতা বীরা দক্ষিণং পক্ষমাশ্রিতাঃ
19.10
বিন্দানুবিন্দাবাবন্ত্যৌ কাম্বোজশ্চ সুদক্ষিণঃ
বামং পক্ষং সমাশ্রিত্য দ্রোণপুত্রাগ্রগাঃ স্থিতাঃ
19.11
পৃষ্ঠে কলিঙ্গাঃ সাম্বষ্ঠা মাগধাঃ পৌণ্ড্রমদ্রকাঃ
গান্ধারাঃ শকুনিপ্রাগ্যাঃ পার্বতীয়া বসাতয়ঃ
19.12
পুচ্ছে বৈকর্তনঃ কর্ণঃ সপুত্রজ্ঞাতিবান্ধবঃ
মহত্যা সেনয়া তস্থৌ নানাধ্বজসমুত্থয়া
19.13
জয়দ্রথো ভীমরথঃ সাংয়াত্রিকসভো জয়ঃ
ভূমিংজয়ো বৃষক্রাথো নৈষধশ্চ মহাবলঃ
19.14
বৃতা বলেন মহতা ব্রহ্মলোকপুরস্কৃতাঃ
ব্যূহস্যোপরি তে রাজন্স্থিতা যুদ্ধবিশারদাঃ
19.15
দ্রোণেন বিহিতো ব্যূহঃ পদাত্যশ্বরথদ্বিপৈঃ
বাতোদ্ধূতার্ণবাকারঃ প্রবৃত্ত ইব লক্ষ্যতে
19.16
তস্য পক্ষপ্রপক্ষেভ্যো নিষ্পতন্তি যুয়ুত্সবঃ
সবিদ্যুত্স্তনিতা মেঘাঃ সর্বদিগ্ভ্য ইবোষ্ণগে
19.17
তস্য প্রাগ্জ্যোতিষো মধ্যে বিধিবত্কল্পিতং গজম্
আস্থিতঃ শুশুভে রাজন্নংশুমানুদয়ে যথা
19.18
মাল্যদামবতা রাজা শ্বেতচ্ছত্রেণ ধার্যতা
কৃত্তিকায়োগয়ুক্তেন পৌর্ণমাস্যামিবেন্দুনা
19.19
নীলাঞ্জনচয়প্রখ্যো মদান্ধো দ্বিরদো বভৌ
অভিবৃষ্টো মহামেঘৈর্যথা স্যাত্পর্বতো মহান্
19.20
নানানৃপতিভির্বীরৈর্বিবিধায়ুধভূষণৈঃ
সমন্বিতঃ পার্বতীয়ৈঃ শক্রো দেবগণৈরিব
19.21
ততো যুধিষ্ঠিরঃ প্রেক্ষ্য ব্যূহং তমতিমানুষম্
অজয্যমরিভিঃ সংখ্যে পার্ষতং বাক্যমব্রবীৎ
19.22
ব্রাহ্মণস্য বশং নাহমিয়ামদ্য যথা প্রভো
পারাবতসবর্ণাশ্ব তথা নীতির্বিধীয়তাম্
19.23
ধৃষ্টদ্যুম্ন উবাচ
দ্রোণস্য যতমানস্য বশং নৈষ্যসি সুব্রত
অহমাবারয়িষ্যামি দ্রোণমদ্য সহানুগম্
19.24
ময়ি জীবতি কৌরব্য নোদ্বেগং কর্তুমর্হসি
ন হি শক্তো রণে দ্রোণো বিজেতুং মাং কথংচন
19.25
সংজয় উবাচ
এবমুক্ত্বা কিরন্বাণান্দ্রুপদস্য সুতো বলী
পারাবতসবর্ণাশ্বঃ স্বয়ং দ্রোণমুপাদ্রবৎ
19.26
অনিষ্টদর্শনং দৃষ্ট্বা ধৃষ্টদ্যুম্নমবস্থিতম্
ক্ষণেনৈবাভবদ্দ্রোণো নাতিহৃষ্টমনা ইব
19.27
তং তু সংপ্রেক্ষ্য পুত্রস্তে দুর্মুখঃ শত্রুকর্শনঃ
প্রিয়ং চিকীর্ষন্দ্রোণস্য ধৃষ্টদ্যুম্নমবারয়ৎ
19.28
স সংপ্রহারস্তুমুলঃ সমরূপ ইবাভবৎ
পার্ষতস্য চ শূরস্য দুর্মুখস্য চ ভারত
19.29
পার্ষতঃ শরজালেন ক্ষিপ্রং প্রচ্ছাদ্য দুর্মুখম্
ভারদ্বাজং শরৌঘেণ মহতা সমবারয়ৎ
19.30
দ্রোণমাবারিতং দৃষ্ট্বা ভৃশায়স্তস্তবাত্মজঃ
নানালিঙ্গৈঃ শরব্রাতৈঃ পার্ষতং সমমোহয়ৎ
19.31
তয়োর্বিষক্তয়োঃ সংখ্যে পাঞ্চাল্যকুরুমুখ্যয়োঃ
দ্রোণো যৌধিষ্ঠিরং সৈন্যং বহুধা ব্যধমচ্ছরৈঃ
19.32
অনিলেন যথাভ্রাণি বিচ্ছিন্নানি সমন্ততঃ
তথা পার্থস্য সৈন্যানি বিচ্ছিন্নানি ক্বচিত্ক্বচিৎ
19.33
মুহূর্তমিব তদ্যুদ্ধমাসীন্মধুরদর্শনম্
তত উন্মত্তবদ্রাজন্নির্মর্যাদমবর্তত
19.34
নৈব স্বে ন পরে রাজন্নজ্ঞায়ন্ত পরস্পরম্
অনুমানেন সংজ্ঞাভির্যুদ্ধং তত্সমবর্তত
19.35
চূডামণিষু নিষ্কেষু ভূষণেষ্বসিচর্মসু
তেষামাদিত্যবর্ণাভা মরীচ্যঃ প্রচকাশিরে
19.36
তত্প্রকীর্ণপতাকানাং রথবারণবাজিনাম্
বলাকাশবলাভ্রাভং দদৃশে রূপমাহবে
19.37
নরানেব নরা জঘ্নুরুদগ্রাশ্চ হয়া হয়ান্
রথাংশ্চ রথিনো জঘ্নুর্বারণা বরবারণান্
19.38
সমুচ্ছ্রিতপতাকানাং গজানাং পরমদ্বিপৈঃ
ক্ষণেন তুমুলো ঘোরঃ সংগ্রামঃ সমবর্তত
19.39
তেষাং সংসক্তগাত্রাণাং কর্ষতামিতরেতরম্
দন্তসংঘাতসংঘর্ষাত্সধূমোঽগ্নিরজায়ত
19.40
বিপ্রকীর্ণপতাকাস্তে বিষাণজনিতাগ্নয়ঃ
বভূবুঃ খং সমাসাদ্য সবিদ্যুত ইবাম্বুদাঃ
19.41
বিক্ষরদ্ভির্নদদ্ভিশ্চ নিপতদ্ভিশ্চ বারণৈঃ
সংবভূব মহী কীর্ণা মেঘৈর্দ্যৌরিব শারদী
19.42
তেষামাহন্যমানানাং বাণতোমরবৃষ্টিভিঃ
বারণানাং রবো জজ্ঞে মেঘানামিব সংপ্লবে
19.43
তোমরাভিহতাঃ কেচিদ্বাণৈশ্চ পরমদ্বিপাঃ
বিত্রেসুঃ সর্বভূতানাং শব্দমেবাপরেঽব্রজন্
19.44
বিষাণাভিহতাশ্চাপি কেচিত্তত্র গজা গজৈঃ
চক্রুরার্তস্বরং ঘোরমুত্পাতজলদা ইব
19.45
প্রতীপং হ্রিয়মাণাশ্চ বারণা বরবারণৈঃ
উন্মথ্য পুনরাজহ্রুঃ প্রেরিতাঃ পরমাঙ্কুশৈঃ
19.46
মহামাত্রা মহামাত্রৈস্তাডিতাঃ শরতোমরৈঃ
গজেভ্যঃ পৃথিবীং জগ্মুর্মুক্তপ্রহরণাঙ্কুশাঃ
19.47
নির্মনুষ্যাশ্চ মাতঙ্গা বিনদন্তস্ততস্ততঃ
ছিন্নাভ্রাণীব সংপেতুঃ সংপ্রবিশ্য পরস্পরম্
19.48
হতান্পরিবহন্তশ্চ যন্ত্রিতাঃ পরমায়ুধৈঃ
দিশো জগ্মুর্মহানাগাঃ কেচিদেকচরা ইব
19.49
তাডিতাস্তাড্যমানাশ্চ তোমরর্ষ্টিপরশ্বধৈঃ
পেতুরার্তস্বরং কৃত্বা তদা বিশসনে গজাঃ
19.50
তেষাং শৈলোপমৈঃ কায়ৈর্নিপতদ্ভিঃ সমন্ততঃ
আহতা সহসা ভূমিশ্চকম্পে চ ননাদ চ
19.51
সাদিতৈঃ সগজারোহৈঃ সপতাকৈঃ সমন্ততঃ
মাতঙ্গৈঃ শুশুভে ভূমির্বিকীর্ণৈরিব পর্বতৈঃ
19.52
গজস্থাশ্চ মহামাত্রা নির্ভিন্নহৃদয়া রণে
রথিভিঃ পাতিতা ভল্লৈর্বিকীর্ণাঙ্কুশতোমরাঃ
19.53
ক্রৌঞ্চবদ্বিনদন্তোঽন্যে নারাচাভিহতা গজাঃ
পরান্স্বাংশ্চাপি মৃদ্নন্তঃ পরিপেতুর্দিশো দশ
19.54
গজাশ্বরথসংঘানাং শরীরৌঘসমাবৃতা
বভূব পৃথিবী রাজন্মাংসশোণিতকর্দমা
19.55
প্রমথ্য চ বিষাণাগ্রৈঃ সমুত্ক্ষিপ্য চ বারণৈঃ
সচক্রাশ্চ বিচক্রাশ্চ রথৈরেব মহারথাঃ
19.56
রথাশ্চ রথিভির্হীনা নির্মনুষ্যাশ্চ বাজিনঃ
হতারোহাশ্চ মাতঙ্গা দিশো জগ্মুঃ শরাতুরাঃ
19.57
জঘানাত্র পিতা পুত্রং পুত্রশ্চ পিতরং তথা
ইত্যাসীত্তুমুলং যুদ্ধং ন প্রজ্ঞায়ত কিংচন
19.58
আ গুল্ফেভ্যোঽবসীদন্ত নরাঃ শোণিতকর্দমে
দীপ্যমানৈঃ পরিক্ষিপ্তা দাবৈরিব মহাদ্রুমাঃ
19.59
শোণিতৈঃ সিচ্যমানানি বস্ত্রাণি কবচানি চ
ছত্রাণি চ পতাকাশ্চ সর্বং রক্তমদৃশ্যত
19.60
হয়ৌঘাশ্চ রথৌঘাশ্চ নরৌঘাশ্চ নিপাতিতাঃ
সংবৃত্তাঃ পুনরাবৃত্তা বহুধা রথনেমিভিঃ
19.61
স গজৌঘমহাবেগঃ পরাসুনরশৈবলঃ
রথৌঘতুমুলাবর্তঃ প্রবভৌ সৈন্যসাগরঃ
19.62
তং বাহনমহানৌভির্যোধা জয়ধনৈষিণঃ
অবগাহ্যাবমজ্জন্তো নৈব মোহং প্রচক্রিরে
19.63
শরবর্ষাভিবৃষ্টেষু যোধেষ্বজিতলক্ষ্মসু
ন হি স্বচিত্ততাং লেভে কশ্চিদাহতলক্ষণঃ
19.64
বর্তমানে তথা যুদ্ধে ঘোররূপে ভয়ংকরে
মোহয়িত্বা পরান্দ্রোণো যুধিষ্ঠিরমুপাদ্রবৎ