Utshovঅধ্যায় 18
18.1
সংজয় উবাচ
দৃষ্ট্বা তু সংনিবৃত্তাংস্তান্সংশপ্তকগণান্পুনঃ
বাসুদেবং মহাত্মানমর্জুনঃ সমভাষত
18.2
চোদয়াশ্বান্হৃষীকেশ সংশপ্তকগণান্প্রতি
নৈতে হাস্যন্তি সংগ্রামং জীবন্ত ইতি মে মতিঃ
18.3
পশ্য মেঽস্ত্রবলং ঘোরং বাহ্বোরিষ্বসনস্য চ
অদ্যৈতান্পাতয়িষ্যামি ক্রুদ্ধো রুদ্রঃ পশূনিব
18.4
ততঃ কৃষ্ণঃ স্মিতং কৃত্বা পরিণন্দ্য শিবেন তম্
প্রাবেশয়ত দুর্ধর্ষো যত্র যত্রৈচ্ছদর্জুনঃ
18.5
বভ্রাজে স রথোঽত্যর্থমুহ্যমানো রণে তদা
উহ্যমানমিবাকাশে বিমানং পাণ্ডুরৈর্হয়ৈঃ
18.6
মণ্ডলানি ততশ্চক্রে গতপ্রত্যাগতানি চ
যথা শক্ররথো রাজন্যুদ্ধে দেবাসুরে পুরা
18.7
অথ নারায়ণাঃ ক্রুদ্ধা বিবিধায়ুধপাণয়ঃ
ছাদয়ন্তঃ শরব্রাতৈঃ পরিবব্রুর্ধনংজয়ম্
18.8
অদৃশ্যং চ মুহূর্তেন চক্রুস্তে ভরতর্ষভ
কৃষ্ণেন সহিতং যুদ্ধে কুন্তীপুত্রং ধনংজয়ম্
18.9
ক্রুদ্ধস্তু ফল্গুনঃ সংখ্যে দ্বিগুণীকৃতবিক্রমঃ
গাণ্ডীবমুপসংমৃজ্য তূর্ণং জগ্রাহ সংয়ুগে
18.10
বদ্ধ্বা চ ভৃকুটীং বক্ত্রে ক্রোধস্য প্রতিলক্ষণম্
দেবদত্তং মহাশঙ্খং পূরয়ামাস পাণ্ডবঃ
18.11
অথাস্ত্রমরিসংঘঘ্নং ত্বাষ্ট্রমভ্যস্যদর্জুনঃ
ততো রূপসহস্রাণি প্রাদুরাসন্পৃথক্পৃথক্
18.12
আত্মনঃ প্রতিরূপৈস্তৈর্নানারূপৈর্বিমোহিতাঃ
অন্যোন্যমর্জুনং মত্বা স্বমাত্মানং চ জঘ্নিরে
18.13
অয়মর্জুনোঽয়ং গোবিন্দ ইমৌ যাদবপাণ্ডবৌ
ইতি ব্রুবাণাঃ সংমূঢা জঘ্নুরন্যোন্যমাহবে
18.14
মোহিতাঃ পরমাস্ত্রেণ ক্ষয়ং জগ্মুঃ পরস্পরম্
অশোভন্ত রণে যোধাঃ পুষ্পিতা ইব কিংশুকাঃ
18.15
ততঃ শরসহস্রাণি তৈর্বিমুক্তানি ভস্মসাৎ
কৃত্বা তদস্ত্রং তান্বীরাননয়দ্যমসাদনম্
18.16
অথ প্রহস্য বীভত্সুর্ললিত্থান্মালবানপি
মাচেল্লকাংস্ত্রিগর্তাংশ্চ যৌধেয়াংশ্চার্দয়চ্ছরৈঃ
18.17
তে বধ্যমানা বীরেণ ক্ষত্রিয়াঃ কালচোদিতাঃ
ব্যসৃজঞ্শরবর্ষাণি পার্থে নানাবিধানি চ
18.18
ততো নৈবার্জুনস্তত্র ন রথো ন চ কেশবঃ
প্রত্যদৃশ্যত ঘোরেণ শরবর্ষেণ সংবৃতঃ
18.19
ততস্তে লব্ধলক্ষ্যত্বাদন্যোন্যমভিচুক্রুশুঃ
হতৌ কৃষ্ণাবিতি প্রীতা বাসাংস্যাদুধুবুস্তদা
18.20
ভেরীমৃদঙ্গশঙ্খাংশ্চ দধ্মুর্বীরাঃ সহস্রশঃ
সিংহনাদরবাংশ্চোগ্রাংশ্চক্রিরে তত্র মারিষ
18.21
ততঃ প্রসিষ্বিদে কৃষ্ণঃ খিন্নশ্চার্জুনমব্রবীৎ
ক্বাসি পার্থ ন পশ্যে ত্বাং কচ্চিজ্জীবসি শত্রুহন্
18.22
তস্য তং মানুষং ভাবং ভাবজ্ঞোঽঽজ্ঞায় পাণ্ডবঃ
বায়ব্যাস্ত্রেণ তৈরস্তাং শরবৃষ্টিমপাহরৎ
18.23
ততঃ সংশপ্তকব্রাতান্সাশ্বদ্বিপরথায়ুধান্
উবাহ ভগবান্বায়ুঃ শুষ্কপর্ণচয়ানিব
18.24
উহ্যমানাস্তু তে রাজন্বহ্বশোভন্ত বায়ুনা
প্রডীনাঃ পক্ষিণঃ কালে বৃক্ষেভ্য ইব মারিষ
18.25
তাংস্তথা ব্যাকুলীকৃত্য ত্বরমাণো ধনংজয়ঃ
জঘান নিশিতৈর্বাণৈঃ সহস্রাণি শতানি চ
18.26
শিরাংসি ভল্লৈরহরদ্বাহূনপি চ সায়ুধান্
হস্তিহস্তোপমাংশ্চোরূঞ্শরৈরুর্ব্যামপাতয়ৎ
18.27
পৃষ্ঠচ্ছিন্নান্বিচরণান্বিমস্তিষ্কেক্ষণাঙ্গুলীন্
নানাঙ্গাবয়বৈর্হীনাংশ্চকারারীন্ধনংজয়ঃ
18.28
গন্ধর্বনগরাকারান্বিধিবত্কল্পিতান্রথান্
শরৈর্বিশকলীকুর্বংশ্চক্রে ব্যশ্বরথদ্বিপান্
18.29
মুণ্ডতালবনানীব তত্র তত্র চকাশিরে
ছিন্নধ্বজরথব্রাতাঃ কেচিত্কেচিত্ক্বচিত্ক্বচিৎ
18.30
সোত্তরায়ুধিনো নাগাঃ সপতাকাঙ্কুশায়ুধাঃ
পেতুঃ শক্রাশনিহতা দ্রুমবন্ত ইবাচলাঃ
18.31
চামরাপীডকবচাঃ স্রস্তান্ত্রনয়নাসবঃ
সারোহাস্তুরগাঃ পেতুঃ পার্থবাণহতাঃ ক্ষিতৌ
18.32
বিপ্রবিদ্ধাসিনখরাশ্ছিন্নবর্মর্ষ্টিশক্তয়ঃ
পত্তয়শ্ছিন্নবর্মাণঃ কৃপণং শেরতে হতাঃ
18.33
তৈর্হতৈর্হন্যমানৈশ্চ পতদ্ভিঃ পতিতৈরপি
ভ্রমদ্ভির্নিষ্টনদ্ভিশ্চ ঘোরমায়োধনং বভৌ
18.34
রজশ্চ মহদুদ্ভূতং শান্তং রুধিরবৃষ্টিভিঃ
মহী চাপ্যভবদ্দুর্গা কবন্ধশতসংকুলা
18.35
তদ্বভৌ রৌদ্রবীভত্সং বীভত্সোর্যানমাহবে
আক্রীড ইব রুদ্রস্য ঘ্নতঃ কালাত্যয়ে পশূন্
18.36
তে বধ্যমানাঃ পার্থেন ব্যাকুলাশ্বরথদ্বিপাঃ
তমেবাভিমুখাঃ ক্ষীণাঃ শক্রস্যাতিথিতাং গতাঃ
18.37
সা ভূমির্ভরতশ্রেষ্ঠ নিহতৈস্তৈর্মহারথৈঃ
আস্তীর্ণা সংবভৌ সর্বা প্রেতীভূতৈঃ সমন্ততঃ
18.38
এতস্মিন্নন্তরে চৈব প্রমত্তে সব্যসাচিনি
ব্যূঢানীকস্ততো দ্রোণো যুধিষ্ঠিরমুপাদ্রবৎ
18.39
তং প্রত্যগৃহ্ণংস্ত্বরিতা ব্যূঢানীকাঃ প্রহারিণঃ
যুধিষ্ঠিরং পরীপ্সন্তস্তদাসীত্তুমুলং মহৎ