Utshovঅধ্যায় 17
17.1
সংজয় উবাচ
ততঃ সংশপ্তকা রাজন্সমে দেশে ব্যবস্থিতাঃ
ব্যূহ্যানীকং রথৈরেব চন্দ্রার্ধাখ্যং মুদান্বিতাঃ
17.2
তে কিরীটিনমায়ান্তং দৃষ্ট্বা হর্ষেণ মারিষ
উদক্রোশন্নরব্যাঘ্রাঃ শব্দেন মহতা তদা
17.3
স শব্দঃ প্রদিশঃ সর্বা দিশঃ খং চ সমাবৃণোৎ
আবৃতত্বাচ্চ লোকস্য নাসীত্তত্র প্রতিস্বনঃ
17.4
অতীব সংপ্রহৃষ্টাংস্তানুপলভ্য ধনংজয়ঃ
কিংচিদভ্যুত্স্ময়ন্কৃষ্ণমিদং বচনমব্রবীৎ
17.5
পশ্যৈতান্দেবকীমাতর্মুমূর্ষূনদ্য সংয়ুগে
ভ্রাতৄংস্ত্রৈগর্তকানেবং রোদিতব্যে প্রহর্ষিতান্
17.6
অথ বা হর্ষকালোঽয়ং ত্রৈগর্তানামসংশয়ম্
কুনরৈর্দুরবাপান্হি লোকান্প্রাপ্স্যন্ত্যনুত্তমান্
17.7
এবমুক্ত্বা মহাবাহুর্হৃষীকেশং ততোঽর্জুনঃ
আসসাদ রণে ব্যূঢাং ত্রৈগর্তানামনীকিনীম্
17.8
স দেবদত্তমাদায় শঙ্খং হেমপরিষ্কৃতম্
দধ্মৌ বেগেন মহতা ফল্গুনঃ পূরয়ন্দিশঃ
17.9
তেন শব্দেন বিত্রস্তা সংশপ্তকবরূথিনী
নিশ্চেষ্টাবস্থিতা সংখ্যে অশ্মসারময়ী যথা
17.10
বাহাস্তেষাং বিবৃত্তাক্ষাঃ স্তব্ধকর্ণশিরোধরাঃ
বিষ্টব্ধচরণা মূত্রং রুধিরং চ প্রসুস্রুবুঃ
17.11
উপলভ্য চ তে সংজ্ঞামবস্থাপ্য চ বাহিনীম্
যুগপত্পাণ্ডুপুত্রায় চিক্ষিপুঃ কঙ্কপত্রিণঃ
17.12
তান্যর্জুনঃ সহস্রাণি দশ পঞ্চৈব চাশুগৈঃ
অনাগতান্যেব শরৈশ্চিচ্ছেদাশুপরাক্রমঃ
17.13
ততোঽর্জুনং শিতৈর্বাণৈর্দশভির্দশভিঃ পুনঃ
প্রত্যবিধ্যংস্ততঃ পার্থস্তানবিধ্যত্ত্রিভিস্ত্রিভিঃ
17.14
একৈকস্তু ততঃ পার্থং রাজন্বিব্যাধ পঞ্চভিঃ
স চ তান্প্রতিবিব্যাধ দ্বাভ্যাং দ্বাভ্যাং পরাক্রমী
17.15
ভূয় এব তু সংরব্ধাস্তেঽর্জুনং সহকেশবম্
আপূরয়ঞ্শরৈস্তীক্ষ্ণৈস্তটাকমিব বৃষ্টিভিঃ
17.16
ততঃ শরসহস্রাণি প্রাপতন্নর্জুনং প্রতি
ভ্রমরাণামিব ব্রাতাঃ ফুল্লদ্রুমগণে বনে
17.17
ততঃ সুবাহুস্ত্রিংশদ্ভিরদ্রিসারময়ৈর্দৃঢৈঃ
অবিধ্যদিষুভির্গাঢং কিরীটে সব্যসাচিনম্
17.18
তৈঃ কিরীটী কিরীটস্থৈর্হেমপুঙ্খৈরজিহ্মগৈঃ
শাতকুম্ভময়াপীডো বভৌ যূপ ইবোচ্ছ্রিতঃ
17.19
হস্তাবাপং সুবাহোস্তু ভল্লেন যুধি পাণ্ডবঃ
চিচ্ছেদ তং চৈব পুনঃ শরবর্ষৈরবাকিরৎ
17.20
ততঃ সুশর্মা দশভিঃ সুরথশ্চ কিরীটিনম্
সুধর্মা সুধনুশ্চৈব সুবাহুশ্চ সমর্পয়ন্
17.21
তাংস্তু সর্বান্পৃথগ্বাণৈর্বানরপ্রবরধ্বজঃ
প্রত্যবিধ্যদ্ধ্বজাংশ্চৈষাং ভল্লৈশ্চিচ্ছেদ কাঞ্চনান্
17.22
সুধন্বনো ধনুশ্ছিত্ত্বা হয়ান্বৈ ন্যবধীচ্ছরৈঃ
অথাস্য সশিরস্ত্রাণং শিরঃ কায়াদপাহরৎ
17.23
তস্মিংস্তু পতিতে বীরে ত্রস্তাস্তস্য পদানুগাঃ
ব্যদ্রবন্ত ভয়াদ্ভীতা যেন দৌর্যোধনং বলম্
17.24
ততো জঘান সংক্রুদ্ধো বাসবিস্তাং মহাচমূম্
শরজালৈরবিচ্ছিন্নৈস্তমঃ সূর্য ইবাংশুভিঃ
17.25
ততো ভগ্নে বলে তস্মিন্বিপ্রয়াতে সমন্ততঃ
সব্যসাচিনি সংক্রুদ্ধে ত্রৈগর্তান্ভয়মাবিশৎ
17.26
তে বধ্যমানাঃ পার্থেন শরৈঃ সংনতপর্বভিঃ
অমুহ্যংস্তত্র তত্রৈব ত্রস্তা মৃগগণা ইব
17.27
ততস্ত্রিগর্তরাট্ক্রুদ্ধস্তানুবাচ মহারথান্
অলং দ্রুতেন বঃ শূরা ন ভয়ং কর্তুমর্হথ
17.28
শপ্ত্বা তু শপথান্ঘোরান্সর্বসৈন্যস্য পশ্যতঃ
গত্বা দৌর্যোধনং সৈন্যং কিং বৈ বক্ষ্যথ মুখ্যগাঃ
17.29
নাবহাস্যাঃ কথং লোকে কর্মণানেন সংয়ুগে
ভবেম সহিতাঃ সর্বে নিবর্তধ্বং যথাবলম্
17.30
এবমুক্তাস্তু তে রাজন্নুদক্রোশন্মুহুর্মুহুঃ
শঙ্খাংশ্চ দধ্মিরে বীরা হর্ষয়ন্তঃ পরস্পরম্
17.31
ততস্তে সংন্যবর্তন্ত সংশপ্তকগণাঃ পুনঃ
নারায়ণাশ্চ গোপালাঃ কৃত্বা মৃত্যুং নিবর্তনম্