Utshovঅধ্যায় 16
16.1
সংজয় উবাচ
তে সেনে শিবিরং গত্বা ন্যবিশেতাং বিশাং পতে
যথাভাগং যথান্যায়ং যথাগুল্মং চ সর্বশঃ
16.2
কৃত্বাবহারং সৈন্যানাং দ্রোণঃ পরমদুর্মনাঃ
দুর্যোধনমভিপ্রেক্ষ্য সব্রীডমিদমব্রবীৎ
16.3
উক্তমেতন্ময়া পূর্বং ন তিষ্ঠতি ধনংজয়ে
শক্যো গ্রহীতুং সংগ্রামে দেবৈরপি যুধিষ্ঠিরঃ
16.4
ইতি তদ্বঃ প্রয়ততাং কৃতং পার্থেন সংয়ুগে
মাতিশঙ্কীর্বচো মহ্যমজেয়ৌ কৃষ্ণপাণ্ডবৌ
16.5
অপনীতে তু যোগেন কেনচিচ্ছ্বেতবাহনে
তত এষ্যতি তে রাজন্বশমদ্য যুধিষ্ঠিরঃ
16.6
কশ্চিদাহ্বয়তাং সংখ্যে দেশমন্যং প্রকর্ষতু
তমজিত্বা তু কৌন্তেয়ো ন নিবর্তেত্কথংচন
16.7
এতস্মিন্নন্তরে শূন্যে ধর্মরাজমহং নৃপ
গ্রহীষ্যামি চমূং ভিত্ত্বা ধৃষ্টদ্যুম্নস্য পশ্যতঃ
16.8
অর্জুনেন বিহীনস্তু যদি নোত্সৃজতে রণম্
মামুপায়ান্তমালোক্য গৃহীতমিতি বিদ্ধি তম্
16.9
এবং তে সহসা রাজন্ধর্মপুত্রং যুধিষ্ঠিরম্
সমানেষ্যামি সগণং বশমদ্য ন সংশয়ঃ
16.10
যদি তিষ্ঠতি সংগ্রামে মুহূর্তমপি পাণ্ডবঃ
অথাপয়াতি সংগ্রামাদ্বিজয়াত্তদ্বিশিষ্যতে
16.11
দ্রোণস্য তু বচঃ শ্রুত্বা ত্রিগর্তাধিপতিস্ততঃ
ভ্রাতৃভিঃ সহিতো রাজন্নিদং বচনমব্রবীৎ
16.12
বয়ং বিনিকৃতা রাজন্সদা গাণ্ডীবধন্বনা
অনাগঃস্বপি চাগস্কৃদস্মাসু ভরতর্ষভ
16.13
তে বয়ং স্মরমাণাস্তান্বিনিকারান্পৃথগ্বিধান্
ক্রোধাগ্নিনা দহ্যমানা ন শেমহি সদা নিশাঃ
16.14
স নো দিব্যাস্ত্রসংপন্নশ্চক্ষুর্বিষয়মাগতঃ
কর্তারঃ স্ম বয়ং সর্বং যচ্চিকীর্ষাম হৃদ্গতম্
16.15
ভবতশ্চ প্রিয়ং যত্স্যাদস্মাকং চ যশস্করম্
বয়মেনং হনিষ্যামো নিকৃষ্যায়োধনাদ্বহিঃ
16.16
অদ্যাস্ত্বনর্জুনা ভূমিরত্রিগর্তাথ বা পুনঃ
সত্যং তে প্রতিজানীমো নৈতন্মিথ্যা ভবিষ্যতি
16.17
এবং সত্যরথশ্চোক্ত্বা সত্যধর্মা চ ভারত
সত্যবর্মা চ সত্যেষুঃ সত্যকর্মা তথৈব চ
16.18
সহিতা ভ্রাতরঃ পঞ্চ রথানাময়ুতেন চ
ন্যবর্তন্ত মহারাজ কৃত্বা শপথমাহবে
16.19
মালবাস্তুণ্ডিকেরাশ্চ রথানাময়ুতৈস্ত্রিভিঃ
সুশর্মা চ নরব্যাঘ্রস্ত্রিগর্তঃ প্রস্থলাধিপঃ
16.20
মাচেল্লকৈর্ললিত্থৈশ্চ সহিতো মদ্রকৈরপি
রথানাময়ুতেনৈব সোঽশপদ্ভ্রাতৃভিঃ সহ
16.21
নানাজনপদেভ্যশ্চ রথানাময়ুতং পুনঃ
সমুত্থিতং বিশিষ্টানাং সংশপার্থমুপাগতম্
16.22
ততো জ্বলনমাদায় হুত্বা সর্বে পৃথক্পৃথক্
জগৃহুঃ কুশচীরাণি চিত্রাণি কবচানি চ
16.23
তে চ বদ্ধতনুত্রাণা ঘৃতাক্তাঃ কুশচীরিণঃ
মৌর্বীমেখলিনো বীরাঃ সহস্রশতদক্ষিণাঃ
16.24
যজ্বানঃ পুত্রিণো লোক্যাঃ কৃতকৃত্যাস্তনুত্যজঃ
যোক্ষ্যমাণাস্তদাত্মানং যশসা বিজয়েন চ
16.25
ব্রহ্মচর্যশ্রুতিমুখৈঃ ক্রতুভিশ্চাপ্তদক্ষিণৈঃ
প্রাপ্য লোকান্সুয়ুদ্ধেন ক্ষিপ্রমেব যিয়াসবঃ
16.26
ব্রাহ্মণাংস্তর্পয়িত্বা চ নিষ্কান্দত্ত্বা পৃথক্পৃথক্
গাশ্চ বাসাংসি চ পুনঃ সমাভাষ্য পরস্পরম্
16.27
প্রজ্বাল্য কৃষ্ণবর্ত্মানমুপাগম্য রণে ব্রতম্
তস্মিন্নগ্নৌ তদা চক্রুঃ প্রতিজ্ঞাং দৃঢনিশ্চয়াঃ
16.28
শৃণ্বতাং সর্বভূতানামুচ্চৈর্বাচঃ স্ম মেনিরে
ধৃত্বা ধনংজয়বধে প্রতিজ্ঞাং চাপি চক্রিরে
16.29
যে বৈ লোকাশ্চানৃতানাং যে চৈব ব্রহ্মঘাতিনাম্
পানপস্য চ যে লোকা গুরুদাররতস্য চ
16.30
ব্রহ্মস্বহারিণশ্চৈব রাজপিণ্ডাপহারিণঃ
শরণাগতং চ ত্যজতো যাচমানং তথা ঘ্নতঃ
16.31
অগারদাহিনাং যে চ যে চ গাং নিঘ্নতামপি
অপচারিণাং চ যে লোকা যে চ ব্রহ্মদ্বিষামপি
16.32
জায়াং চ ঋতুকালে বৈ যে মোহাদভিগচ্ছতাম্
শ্রাদ্ধসংগতিকানাং চ যে চাপ্যাত্মাপহারিণাম্
16.33
ন্যাসাপহারিণাং যে চ শ্রুতং নাশয়তাং চ যে
কোপেন যুধ্যমানানাং যে চ নীচানুসারিণাম্
16.34
নাস্তিকানাং চ যে লোকা যেঽগ্নিহোরাপিতৃত্যজাম্
তানাপ্নুয়ামহে লোকান্যে চ পাপকৃতামপি
16.35
যদ্যহত্বা বয়ং যুদ্ধে নিবর্তেম ধনংজয়ম্
তেন চাভ্যর্দিতাস্ত্রাসাদ্ভবেম হি পরাঙ্মুখাঃ
16.36
যদি ত্বসুকরং লোকে কর্ম কুর্যাম সংয়ুগে
ইষ্টান্পুণ্যকৃতাং লোকান্প্রাপ্নুয়াম ন সংশয়ঃ
16.37
এবমুক্ত্বা ততো রাজংস্তেঽভ্যবর্তন্ত সংয়ুগে
আহ্বয়ন্তোঽর্জুনং বীরাঃ পিতৃজুষ্টাং দিশং প্রতি
16.38
আহূতস্তৈর্নরব্যাঘ্রৈঃ পার্থঃ পরপুরংজয়ঃ
ধর্মরাজমিদং বাক্যমপদান্তরমব্রবীৎ
16.39
আহূতো ন নিবর্তেয়মিতি মে ব্রতমাহিতম্
সংশপ্তকাশ্চ মাং রাজন্নাহ্বয়ন্তি পুনঃ পুনঃ
16.40
এষ চ ভ্রাতৃভিঃ সার্ধং সুশর্মাহ্বয়তে রণে
বধায় সগণস্যাস্য মামনুজ্ঞাতুমর্হসি
16.41
নৈতচ্ছক্নোমি সংসোঢুমাহ্বানং পুরুষর্ষভ
সত্যং তে প্রতিজানামি হতান্বিদ্ধি পরান্যুধি
16.42
যুধিষ্ঠির উবাচ
শ্রুতমেতত্ত্বয়া তাত যদ্দ্রোণস্য চিকীর্ষিতম্
যথা তদনৃতং তস্য ভবেত্তদ্বত্সমাচর
16.43
দ্রোণো হি বলবাঞ্শূরঃ কৃতাস্ত্রশ্চ জিতশ্রমঃ
প্রতিজ্ঞাতং চ তেনৈতদ্গ্রহণং মে মহারথ
16.44
অর্জুন উবাচ
অয়ং বৈ সত্যজিদ্রাজন্নদ্য তে রক্ষিতা যুধি
ধ্রিয়মাণে হি পাঞ্চাল্যে নাচার্যঃ কামমাপ্স্যতি
16.45
হতে তু পুরুষব্যাঘ্রে রণে সত্যজিতি প্রভো
সর্বৈরপি সমেতৈর্বা ন স্থাতব্যং কথংচন
16.46
সংজয় উবাচ
অনুজ্ঞাতস্ততো রাজ্ঞা পরিষ্বক্তশ্চ ফল্গুনঃ
প্রেম্ণা দৃষ্টশ্চ বহুধা আশিষা চ প্রয়োজিতঃ
16.47
বিহায়ৈনং ততঃ পার্থস্ত্রিগর্তান্প্রত্যয়াদ্বলী
ক্ষুধিতঃ ক্ষুদ্বিঘাতার্থং সিংহো মৃগগণানিব
16.48
ততো দৌর্যোধনং সৈন্যং মুদা পরময়া যুতম্
গতেঽর্জুনে ভৃশং ক্রুদ্ধং ধর্মরাজস্য নিগ্রহে
16.49
ততোঽন্যোন্যেন তে সেনে সমাজগ্মতুরোজসা
গঙ্গাসরয্বোর্বেগেন প্রাবৃষীবোল্বণোদকে