Utshovঅধ্যায় 15
15.1
সংজয় উবাচ
তদ্বলং সুমহদ্দীর্ণং ত্বদীয়ং প্রেক্ষ্য বীর্যবান্
দধারৈকো রণে পাণ্ডূন্বৃষসেনোঽস্ত্রমায়য়া
15.2
শরা দশ দিশো মুক্তা বৃষসেনেন মারিষ
বিচেরুস্তে বিনির্ভিদ্য নরবাজিরথদ্বিপান্
15.3
তস্য দীপ্তা মহাবাণা বিনিশ্চেরুঃ সহস্রশঃ
ভানোরিব মহাবাহো গ্রীষ্মকালে মরীচয়ঃ
15.4
তেনার্দিতা মহারাজ রথিনঃ সাদিনস্তথা
নিপেতুরুর্ব্যাং সহসা বাতনুন্না ইব দ্রুমাঃ
15.5
হয়ৌঘাংশ্চ রথৌঘাংশ্চ গজৌঘাংশ্চ সমন্ততঃ
অপাতয়দ্রণে রাজঞ্শতশোঽথ সহস্রশঃ
15.6
দৃষ্ট্বা তমেবং সমরে বিচরন্তমভীতবৎ
সহিতাঃ সর্বরাজানঃ পরিবব্রুঃ সমন্ততঃ
15.7
নাকুলিস্তু শতানীকো বৃষসেনং সমভ্যয়াৎ
বিব্যাধ চৈনং দশভির্নারাচৈর্মর্মভেদিভিঃ
15.8
তস্য কর্ণাত্মজশ্চাপং ছিত্ত্বা কেতুমপাতয়ৎ
তং ভ্রাতরং পরীপ্সন্তো দ্রৌপদেয়াঃ সমভ্যয়ুঃ
15.9
কর্ণাত্মজং শরব্রাতৈশ্চক্রুশ্চাদৃশ্যমঞ্জসা
তান্নদন্তোঽভ্যধাবন্ত দ্রোণপুত্রমুখা রথাঃ
15.10
ছাদয়ন্তো মহারাজ দ্রৌপদেয়ান্মহারথান্
শরৈর্নানাবিধৈস্তূর্ণং পর্বতাঞ্জলদা ইব
15.11
তান্পাণ্ডবাঃ প্রত্যগৃহ্ণংস্ত্বরিতাঃ পুত্রগৃদ্ধিনঃ
পাঞ্চালাঃ কেকয়া মত্স্যাঃ সৃঞ্জয়াশ্চোদ্যতায়ুধাঃ
15.12
তদ্যুদ্ধমভবদ্ঘোরং তুমুলং লোমহর্ষণম্
ত্বদীয়ৈঃ পাণ্ডুপুত্রাণাং দেবানামিব দানবৈঃ
15.13
এবমুত্তমসংরম্ভা যুয়ুধুঃ কুরুপাণ্ডবাঃ
পরস্পরমুদীক্ষন্তঃ পরস্পরকৃতাগসঃ
15.14
তেষাং দদৃশিরে কোপাদ্বপূংষ্যমিততেজসাম্
যুয়ুত্সূনামিবাকাশে পতত্রিবরভোগিনাম্
15.15
ভীমকর্ণকৃপদ্রোণদ্রৌণিপার্ষতসাত্যকৈঃ
বভাসে স রণোদ্দেশঃ কালসূর্যৈরিবোদিতৈঃ
15.16
তদাসীত্তুমুলং যুদ্ধং নিঘ্নতামিতরেতরম্
মহাবলানাং বলিভির্দানবানাং যথা সুরৈঃ
15.17
ততো যুধিষ্ঠিরানীকমুদ্ধূতার্ণবনিস্বনম্
ত্বদীয়মবধীত্সৈন্যং সংপ্রদ্রুতমহারথম্
15.18
তত্প্রভগ্নং বলং দৃষ্ট্বা শত্রুভির্ভৃশমর্দিতম্
অলং দ্রুতেন বঃ শূরা ইতি দ্রোণোঽভ্যভাষত
15.19
ততঃ শোণহয়ঃ ক্রুদ্ধশ্চতুর্দন্ত ইব দ্বিপঃ
প্রবিশ্য পাণ্ডবানীকং যুধিষ্ঠিরমুপাদ্রবৎ
15.20
তমবিধ্যচ্ছিতৈর্বাণৈঃ কঙ্কপত্রৈর্যুধিষ্ঠিরঃ
তস্য দ্রোণো ধনুশ্ছিত্ত্বা তং দ্রুতং সমুপাদ্রবৎ
15.21
চক্ররক্ষঃ কুমারস্তু পাঞ্চালানাং যশস্করঃ
দধার দ্রোণমায়ান্তং বেলেব সরিতাং পতিম্
15.22
দ্রোণং নিবারিতং দৃষ্ট্বা কুমারেণ দ্বিজর্ষভম্
সিংহনাদরবো হ্যাসীত্সাধু সাধ্বিতি ভাষতাম্
15.23
কুমারস্তু ততো দ্রোণং সায়কেন মহাহবে
বিব্যাধোরসি সংক্রুদ্ধঃ সিংহবচ্চানদন্মুহুঃ
15.24
সংবার্য তু রণে দ্রোণঃ কুমারং বৈ মহাবলঃ
শরৈরনেকসাহস্রৈঃ কৃতহস্তো জিতক্লমঃ
15.25
তং শূরমার্যব্রতিনমস্ত্রার্থকৃতনিশ্রমম্
চক্ররক্ষমপামৃদ্নাত্কুমারং দ্বিজসত্তমঃ
15.26
স মধ্যং প্রাপ্য সেনায়াঃ সর্বাঃ পরিচরন্দিশঃ
তব সৈন্যস্য গোপ্তাসীদ্ভারদ্বাজো রথর্ষভঃ
15.27
শিখণ্ডিনং দ্বাদশভির্বিংশত্যা চোত্তমৌজসম্
নকুলং পঞ্চভির্বিদ্ধ্বা সহদেবং চ সপ্তভিঃ
15.28
যুধিষ্ঠিরং দ্বাদশভির্দ্রৌপদেয়াংস্ত্রিভিস্ত্রিভিঃ
সাত্যকিং পঞ্চভির্বিদ্ধ্বা মত্স্যং চ দশভিঃ শরৈঃ
15.29
ব্যক্ষোভয়দ্রণে যোধান্যথামুখ্যানভিদ্রবন্
অভ্যবর্তত সংপ্রেপ্সুঃ কুন্তীপুত্রং যুধিষ্ঠিরম্
15.30
যুগংধরস্ততো রাজন্ভারদ্বাজং মহারথম্
বারয়ামাস সংক্রুদ্ধং বাতোদ্ধূতমিবার্ণবম্
15.31
যুধিষ্ঠিরং স বিদ্ধ্বা তু শরৈঃ সংনতপর্বভিঃ
যুগংধরং চ ভল্লেন রথনীডাদপাহরৎ
15.32
ততো বিরাটদ্রুপদৌ কেকয়াঃ সাত্যকিঃ শিবিঃ
ব্যাঘ্রদত্তশ্চ পাঞ্চাল্যঃ সিংহসেনশ্চ বীর্যবান্
15.33
এতে চান্যে চ বহবঃ পরীপ্সন্তো যুধিষ্ঠিরম্
আবব্রুস্তস্য পন্থানং কিরন্তঃ সায়কান্বহূন্
15.34
ব্যাঘ্রদত্তশ্চ পাঞ্চাল্যো দ্রোণং বিব্যাধ মার্গণৈঃ
পঞ্চাশদ্ভিঃ শিতৈ রাজংস্তত উচ্চুক্রুশুর্জনাঃ
15.35
ত্বরিতং সিংহসেনস্তু দ্রোণং বিদ্ধ্বা মহারথম্
প্রাহসত্সহসা হৃষ্টস্ত্রাসয়ন্বৈ যতব্রতম্
15.36
ততো বিস্ফার্য নয়নে ধনুর্জ্যামবমৃজ্য চ
তলশব্দং মহত্কৃত্বা দ্রোণস্তং সমুপাদ্রবৎ
15.37
ততস্তু সিংহসেনস্য শিরঃ কায়াত্সকুণ্ডলম্
ব্যাঘ্রদত্তস্য চাক্রম্য ভল্লাভ্যামহরদ্বলী
15.38
তান্প্রমৃদ্য শরব্রাতৈঃ পাণ্ডবানাং মহারথান্
যুধিষ্ঠিরসমভ্যাশে তস্থৌ মৃত্যুরিবান্তকঃ
15.39
ততোঽভবন্মহাশব্দো রাজন্যৌধিষ্ঠিরে বলে
হৃতো রাজেতি যোধানাং সমীপস্থে যতব্রতে
15.40
অব্রুবন্সৈনিকাস্তত্র দৃষ্ট্বা দ্রোণস্য বিক্রমম্
অদ্য রাজা ধার্তরাষ্ট্রঃ কৃতার্থো বৈ ভবিষ্যতি
আগমিষ্যতি নো নূনং ধার্তরাষ্ট্রস্য সংয়ুগে
15.41
এবং সংজল্পতাং তেষাং তাবকানাং মহারথঃ
আয়াজ্জবেন কৌন্তেয়ো রথঘোষেণ নাদয়ন্
15.42
শোণিতোদাং রথাবর্তাং কৃত্বা বিশসনে নদীম্
শূরাস্থিচয়সংকীর্ণাং প্রেতকূলাপহারিণীম্
15.43
তাং শরৌঘমহাফেনাং প্রাসমত্স্যসমাকুলাম্
নদীমুত্তীর্য বেগেন কুরূন্বিদ্রাব্য পাণ্ডবঃ
15.44
ততঃ কিরীটী সহসা দ্রোণানীকমুপাদ্রবৎ
ছাদয়ন্নিষুজালেন মহতা মোহয়ন্নিব
15.45
শীঘ্রমভ্যস্যতো বাণান্সংদধানস্য চানিশম্
নান্তরং দদৃশে কশ্চিত্কৌন্তেয়স্য যশস্বিনঃ
15.46
ন দিশো নান্তরিক্ষং চ ন দ্যৌর্নৈব চ মেদিনী
অদৃশ্যত মহারাজ বাণভূতমিবাভবৎ
15.47
নাদৃশ্যত তদা রাজংস্তত্র কিংচন সংয়ুগে
বাণান্ধকারে মহতি কৃতে গাণ্ডীবধন্বনা
15.48
সূর্যে চাস্তমনুপ্রাপ্তে রজসা চাভিসংবৃতে
নাজ্ঞায়ত তদা শত্রুর্ন সুহৃন্ন চ কিংচন
15.49
ততোঽবহারং চক্রুস্তে দ্রোণদুর্যোধনাদয়ঃ
তান্বিদিত্বা ভৃশং ত্রস্তানয়ুদ্ধমনসঃ পরান্
15.50
স্বান্যনীকানি বীভত্সুঃ শনকৈরবহারয়ৎ
ততোঽভিতুষ্টুবুঃ পার্থং প্রহৃষ্টাঃ পাণ্ডুসৃঞ্জয়াঃ
পাঞ্চালাশ্চ মনোজ্ঞাভির্বাগ্ভিঃ সূর্যমিবর্ষয়ঃ
15.51
এবং স্বশিবিরং প্রায়াজ্জিত্বা শত্রূন্ধনংজয়ঃ
পৃষ্ঠতঃ সর্বসৈন্যানাং মুদিতো বৈ সকেশবঃ
15.52
মসারগল্বর্কসুবর্ণরূপ্যৈ;র্বজ্রপ্রবালস্ফটিকৈশ্চ মুখ্যৈঃ
চিত্রে রথে পাণ্ডুসুতো বভাসে; নক্ষত্রচিত্রে বিয়তীব চন্দ্রঃ