Utshovঅধ্যায় 14
14.1
ধৃতরাষ্ট্র উবাচ
বহূনি সুবিচিত্রাণি দ্বংদ্বয়ুদ্ধানি সংজয়
ত্বয়োক্তানি নিশম্যাহং স্পৃহয়ামি সচক্ষুষাম্
14.2
আশ্চর্যভূতং লোকেষু কথয়িষ্যন্তি মানবাঃ
কুরূণাং পাণ্ডবানাং চ যুদ্ধং দেবাসুরোপমম্
14.3
ন হি মে তৃপ্তিরস্তীহ শৃণ্বতো যুদ্ধমুত্তমম্
তস্মাদার্তায়নের্যুদ্ধং সৌভদ্রস্য চ শংস মে
14.4
সংজয় উবাচ
সাদিতং প্রেক্ষ্য যন্তারং শল্যঃ সর্বায়ষীং গদাম্
সমুত্ক্ষিপ্য নদন্ক্রুদ্ধঃ প্রচস্কন্দ রথোত্তমাৎ
14.5
তং দীপ্তমিব কালাগ্নিং দণ্ডহস্তমিবান্তকম্
জবেনাভ্যপতদ্ভীমঃ প্রগৃহ্য মহতীং গদাম্
14.6
সৌভদ্রোঽপ্যশনিপ্রখ্যাং প্রগৃহ্য মহতীং গদাম্
এহ্যেহীত্যব্রবীচ্ছল্যং যত্নাদ্ভীমেন বারিতঃ
14.7
বারয়িত্বা তু সৌভদ্রং ভীমসেনঃ প্রতাপবান্
শল্যমাসাদ্য সমরে তস্থৌ গিরিরিবাচলঃ
14.8
তথৈব মদ্ররাজোঽপি ভীমং দৃষ্ট্বা মহাবলম্
সসারাভিমুখস্তূর্ণং শার্দূল ইব কুঞ্জরম্
14.9
ততস্তূর্যনিনাদাশ্চ শঙ্খানাং চ সহস্রশঃ
সিংহনাদাশ্চ সংজজ্ঞুর্ভেরীণাং চ মহাস্বনাঃ
14.10
পশ্যতাং শতশো হ্যাসীদন্যোন্যসমচেতসাম্
পাণ্ডবানাং কুরূণাং চ সাধু সাধ্বিতি নিস্বনঃ
14.11
ন হি মদ্রাধিপাদন্যঃ সর্বরাজসু ভারত
সোঢুমুত্সহতে বেগং ভীমসেনস্য সংয়ুগে
14.12
তথা মদ্রাধিপস্যাপি গদাবেগং মহাত্মনঃ
সোঢুমুত্সহতে লোকে কোঽন্যো যুধি বৃকোদরাৎ
14.13
পট্টৈর্জাম্বূনদৈর্বদ্ধা বভূব জনহর্ষিণী
প্রজজ্বাল তথাবিদ্ধা ভীমেন মহতী গদা
14.14
তথৈব চরতো মার্গান্মণ্ডলানি চ ভাগশঃ
মহাবিদ্যুত্প্রতীকাশা শল্যস্য শুশুভে গদা
14.15
তৌ বৃষাবিব নর্দন্তৌ মণ্ডলানি বিচেরতুঃ
আবর্জিতগদাশৃঙ্গাবুভৌ শল্যবৃকোদরৌ
14.16
মণ্ডলাবর্তমার্গেষু গদাবিহরণেষু চ
নির্বিশেষমভূদ্যুদ্ধং তয়োঃ পুরুষসিংহয়োঃ
14.17
তাডিতা ভীমসেনেন শল্যস্য মহতী গদা
সাগ্নিজ্বালা মহারৌদ্রা গদাচূর্ণমশীর্যত
14.18
তথৈব ভীমসেনস্য দ্বিষতাভিহতা গদা
বর্ষাপ্রদোষে খদ্যোতৈর্বৃতো বৃক্ষ ইবাবভৌ
14.19
গদা ক্ষিপ্তা তু সমরে মদ্ররাজেন ভারত
ব্যোম সংদীপয়ানা সা সসৃজে পাবকং বহু
14.20
তথৈব ভীমসেনেন দ্বিষতে প্রেষিতা গদা
তাপয়ামাস তত্সৈন্যং মহোল্কা পততী যথা
14.21
তে চৈবোভে গদে শ্রেষ্ঠে সমাসাদ্য পরস্পরম্
শ্বসন্ত্যৌ নাগকন্যেব সসৃজাতে বিভাবসুম্
14.22
নখৈরিব মহাব্যাঘ্রৌ দন্তৈরিব মহাগজৌ
তৌ বিচেরতুরাসাদ্য গদাভ্যাং চ পরস্পরম্
14.23
ততো গদাগ্রাভিহতৌ ক্ষণেন রুধিরোক্ষিতৌ
দদৃশাতে মহাত্মানৌ পুষ্পিতাবিব কিংশুকৌ
14.24
শুশ্রুবে দিক্ষু সর্বাসু তয়োঃ পুরুষসিংহয়োঃ
গদাভিঘাতসংহ্রাদঃ শক্রাশনিরবোপমঃ
14.25
গদয়া মদ্ররাজেন সব্যদক্ষিণমাহতঃ
নাকম্পত তদা ভীমো ভিদ্যমান ইবাচলঃ
14.26
তথা ভীমগদাবেগৈস্তাড্যমানো মহাবলঃ
ধৈর্যান্মদ্রাধিপস্তস্থৌ বজ্রৈর্গিরিরিবাহতঃ
14.27
আপেততুর্মহাবেগৌ সমুচ্ছ্রিতমহাগদৌ
পুনরন্তরমার্গস্থৌ মণ্ডলানি বিচেরতুঃ
14.28
অথাপ্লুত্য পদান্যষ্টৌ সংনিপত্য গজাবিব
সহসা লোহদণ্ডাভ্যামন্যোন্যমভিজঘ্নতুঃ
14.29
তৌ পরস্পরবেগাচ্চ গদাভ্যাং চ ভৃশাহতৌ
যুগপত্পেততুর্বীরৌ ক্ষিতাবিন্দ্রধ্বজাবিব
14.30
ততো বিহ্বলমানং তং নিঃশ্বসন্তং পুনঃ পুনঃ
শল্যমভ্যপতত্তূর্ণং কৃতবর্মা মহারথঃ
14.31
দৃষ্ট্বা চৈনং মহারাজ গদয়াভিনিপীডিতম্
বিচেষ্টন্তং যথা নাগং মূর্ছয়াভিপরিপ্লুতম্
14.32
ততঃ সগদমারোপ্য মদ্রাণামধিপং রথম্
অপোবাহ রণাত্তূর্ণং কৃতবর্মা মহারথঃ
14.33
ক্ষীববদ্বিহ্বলো বীরো নিমেষাত্পুনরুত্থিতঃ
ভীমোঽপি সুমহাবাহুর্গদাপাণিরদৃশ্যত
14.34
ততো মদ্রাধিপং দৃষ্ট্বা তব পুত্রাঃ পরাঙ্মুখম্
সনাগরথপত্ত্যশ্বাঃ সমকম্পন্ত মারিষ
14.35
তে পাণ্ডবৈরর্দ্যমানাস্তাবকা জিতকাশিভিঃ
ভীতা দিশোঽন্বপদ্যন্ত বাতনুন্না ঘনা ইব
14.36
নির্জিত্য ধার্তরাষ্ট্রাংস্তু পাণ্ডবেয়া মহারথাঃ
ব্যরোচন্ত রণে রাজন্দীপ্যমানা যশস্বিনঃ
14.37
সিংহনাদান্ভৃশং চক্রুঃ শঙ্খান্দধ্মুশ্চ হর্ষিতাঃ
ভেরীশ্চ বাদয়ামাসুর্মৃদঙ্গাংশ্চানকৈঃ সহ