Utshovঅধ্যায় 13
13.1
সংজয় উবাচ
ততঃ স পাণ্ডবানীকে জনয়ংস্তুমুলং মহৎ
ব্যচরত্পাণ্ডবান্দ্রোণো দহন্কক্ষমিবানলঃ
13.2
নির্দহন্তমনীকানি সাক্ষাদগ্নিমিবোত্থিতম্
দৃষ্ট্বা রুক্মরথং যুদ্ধে সমকম্পন্ত সৃঞ্জয়াঃ
13.3
প্রততং চাস্যমানস্য ধনুষোঽস্যাশুকারিণঃ
জ্যাঘোষঃ শ্রূয়তেঽত্যর্থং বিস্ফূর্জিতমিবাশনেঃ
13.4
রথিনঃ সাদিনশ্চৈব নাগানশ্বান্পদাতিনঃ
রৌদ্রা হস্তবতা মুক্তাঃ প্রমথ্নন্তি স্ম সায়কাঃ
13.5
নানদ্যমানঃ পর্জন্যঃ সানিলঃ শুচিসংক্ষয়ে
অশ্মবর্ষমিবাবর্ষত্পরেষামাবহদ্ভয়ম্
13.6
ব্যচরত্স তদা রাজন্সেনাং বিক্ষোভয়ন্প্রভুঃ
বর্ধয়ামাস সংত্রাসং শাত্রবাণামমানুষম্
13.7
তস্য বিদ্যুদিবাভ্রেষু চাপং হেমপরিষ্কৃতম্
ভ্রমদ্রথাম্বুদে তস্মিন্দৃশ্যতে স্ম পুনঃ পুনঃ
13.8
স বীরঃ সত্যবান্প্রাজ্ঞো ধর্মনিত্যঃ সুদারুণঃ
যুগান্তকালে যন্তেব রৌদ্রাং প্রাস্কন্দয়ন্নদীম্
13.9
অমর্ষবেগপ্রভবাং ক্রব্যাদগণসংকুলাম্
বলৌঘৈঃ সর্বতঃ পূর্ণাং বীরবৃক্ষাপহারিণীম্
13.10
শোণিতোদাং রথাবর্তাং হস্ত্যশ্বকৃতরোধসম্
কবচোডুপসংয়ুক্তাং মাংসপঙ্কসমাকুলাম্
13.11
মেদোমজ্জাস্থিসিকতামুষ্ণীষবরফেনিলাম্
সংগ্রামজলদাপূর্ণাং প্রাসমত্স্যসমাকুলাম্
13.12
নরনাগাশ্বসংভূতাং শরবেগৌঘবাহিনীম্
শরীরদারুশৃঙ্গাটাং ভুজনাগসমাকুলাম্
13.13
উত্তমাঙ্গোপলতলাং নিস্ত্রিংশঝষসেবিতাম্
রথনাগহ্রদোপেতাং নানাভরণনীরজাম্
13.14
মহারথশতাবর্তাং ভূমিরেণূর্মিমালিনীম্
মহাবীর্যবতাং সংখ্যে সুতরাং ভীরুদুস্তরাম্
13.15
শূরব্যালসমাকীর্ণাং প্রাণিবাণিজসেবিতাম্
ছিন্নচ্ছত্রমহাহংসাং মুকুটাণ্ডজসংকুলাম্
13.16
চক্রকূর্মাং গদানক্রাং শরক্ষুদ্রঝষাকুলাম্
বডগৃধ্রসৃগালানাং ঘোরসংঘৈর্নিষেবিতাম্
13.17
নিহতান্প্রাণিনঃ সংখ্যে দ্রোণেন বলিনা শরৈঃ
বহন্তীং পিতৃলোকায় শতশো রাজসত্তম
13.18
শরীরশতসংবাধাং কেশশৈবলশাদ্বলাম্
নদীং প্রাবর্তয়দ্রাজন্ভীরূণাং ভয়বর্ধিনীম্
13.19
তং জয়ন্তমনীকানি তানি তান্যেব ভারত
সর্বতোঽভ্যদ্রবন্দ্রোণং যুধিষ্ঠিরপুরোগমাঃ
13.20
তানভিদ্রবতঃ শূরাংস্তাবকা দৃঢকার্মুকাঃ
সর্বতঃ প্রত্যগৃহ্ণন্ত তদভূল্লোমহর্ষণম্
13.21
শতমায়স্তু শকুনিঃ সহদেবং সমাদ্রবৎ
সনিয়ন্তৃধ্বজরথং বিব্যাধ নিশিতৈঃ শরৈঃ
13.22
তস্য মাদ্রীসুতঃ কেতুং ধনুঃ সূতং হয়ানপি
নাতিক্রুদ্ধঃ শরৈশ্ছিত্ত্বা ষষ্ট্যা বিব্যাধ মাতুলম্
13.23
সৌবলস্তু গদাং গৃহ্য প্রচস্কন্দ রথোত্তমাৎ
স তস্য গদয়া রাজন্রথাত্সূতমপাতয়ৎ
13.24
ততস্তৌ বিরথৌ রাজন্গদাহস্তৌ মহাবলৌ
চিক্রীডতূ রণে শূরৌ সশৃঙ্গাবিব পর্বতৌ
13.25
দ্রোণঃ পাঞ্চালরাজানং বিদ্ধ্বা দশভিরাশুগৈঃ
বহুভিস্তেন চাভ্যস্তস্তং বিব্যাধ শতাধিকৈঃ
13.26
বিবিংশতিং ভীমসেনো বিংশত্যা নিশিতৈঃ শরৈঃ
বিদ্ধ্বা নাকম্পয়দ্বীরস্তদদ্ভুতমিবাভবৎ
13.27
বিবিংশতিস্তু সহসা ব্যশ্বকেতুশরাসনম্
ভীমং চক্রে মহারাজ ততঃ সৈন্যান্যপূজয়ন্
13.28
স তন্ন মমৃষে বীরঃ শত্রোর্বিজয়মাহবে
ততোঽস্য গদয়া দান্তান্হয়ান্সর্বানপাতয়ৎ
13.29
শল্যস্তু নকুলং বীরঃ স্বস্রীয়ং প্রিয়মাত্মনঃ
বিব্যাধ প্রহসন্বাণৈর্লাডয়ন্কোপয়ন্নিব
13.30
তস্যাশ্বানাতপত্রং চ ধ্বজং সূতমথো ধনুঃ
নিপাত্য নকুলঃ সংখ্যে শঙ্খং দধ্মৌ প্রতাপবান্
13.31
ধৃষ্টকেতুঃ কৃপেনাস্তাঞ্ছিত্ত্বা বহুবিধাঞ্শরান্
কৃপং বিব্যাধ সপ্তত্যা লক্ষ্ম চাস্যাহরত্ত্রিভিঃ
13.32
তং কৃপঃ শরবর্ষেণ মহতা সমবাকিরৎ
নিবার্য চ রণে বিপ্রো ধৃষ্টকেতুময়োধয়ৎ
13.33
সাত্যকিঃ কৃতবর্মাণং নারাচেন স্তনান্তরে
বিদ্ধ্বা বিব্যাধ সপ্তত্যা পুনরন্যৈঃ স্ময়ন্নিব
13.34
সপ্তসপ্ততিভির্ভোজস্তং বিদ্ধ্বা নিশিতৈঃ শরৈঃ
নাকম্পয়ত শৈনেয়ং শীঘ্রো বায়ুরিবাচলম্
13.35
সেনাপতিঃ সুশর্মাণং শীঘ্রং মর্মস্বতাডয়ৎ
স চাপি তং তোমরেণ জত্রুদেশে অতাডয়ৎ
13.36
বৈকর্তনং তু সমরে বিরাটঃ প্রত্যবারয়ৎ
সহ মত্স্যৈর্মহাবীর্যৈস্তদদ্ভুতমিবাভবৎ
13.37
তত্পৌরুষমভূত্তত্র সূতপুত্রস্য দারুণম্
যত্সৈন্যং বারয়ামাস শরৈঃ সংনতপর্বভিঃ
13.38
দ্রুপদস্তু স্বয়ং রাজা ভগদত্তেন সংগতঃ
তয়োর্যুদ্ধং মহারাজ চিত্ররূপমিবাভবৎ
ভূতানাং ত্রাসজননং চক্রাতেঽস্ত্রবিশারদৌ
13.39
ভূরিশ্রবা রণে রাজন্যাজ্ঞসেনিং মহারথম্
মহতা সায়কৌঘেন ছাদয়ামাস বীর্যবান্
13.40
শিখণ্ডী তু ততঃ ক্রুদ্ধঃ সৌমদত্তিং বিশাং পতে
নবত্যা সায়কানাং তু কম্পয়ামাস ভারত
13.41
রাক্ষসৌ ভীমকর্মাণৌ হৈডিম্বালম্বুসাবুভৌ
চক্রাতেঽত্যদ্ভুতং যুদ্ধং পরস্পরবধৈষিণৌ
13.42
মায়াশতসৃজৌ দৃপ্তৌ মায়াভিরিতরেতরম্
অন্তর্হিতৌ চেরতুস্তৌ ভৃশং বিস্ময়কারিণৌ
13.43
চেকিতানোঽনুবিন্দেন যুয়ুধে ত্বতিভৈরবম্
যথা দেবাসুরে যুদ্ধে বলশক্রৌ মহাবলৌ
13.44
লক্ষ্মণঃ ক্ষত্রদেবেন বিমর্দমকরোদ্ভৃশম্
যথা বিষ্ণুঃ পুরা রাজন্হিরণ্যাক্ষেণ সংয়ুগে
13.45
ততঃ প্রজবিতাশ্বেন বিধিবত্কল্পিতেন চ
রথেনাভ্যপতদ্রাজন্সৌভদ্রং পৌরবো নদন্
13.46
ততোঽভিয়ায় ত্বরিতো যুদ্ধাকাঙ্ক্ষী মহাবলঃ
তেন চক্রে মহদ্যুদ্ধমভিমন্যুররিংদমঃ
13.47
পৌরবস্ত্বথ সৌভদ্রং শরব্রাতৈরবাকিরৎ
তস্যার্জুনির্ধ্বজং ছত্রং ধনুশ্চোর্ব্যামপাতয়ৎ
13.48
সৌভদ্রঃ পৌরবং ত্বন্যৈর্বিদ্ধ্বা সপ্তভিরাশুগৈঃ
পঞ্চভিস্তস্য বিব্যাধ হয়ান্সূতং চ সায়কৈঃ
13.49
ততঃ সংহর্ষয়ন্সেনাং সিংহবদ্বিনদন্মুহুঃ
সমাদত্তার্জুনিস্তূর্ণং পৌরবান্তকরং শরম্
13.50
দ্বাভ্যাং শরাভ্যাং হার্দিক্যশ্চকর্ত সশরং ধনুঃ
তদুত্সৃজ্য ধনুশ্ছিন্নং সৌভদ্রঃ পরবীরহা
উদ্ববর্হ সিতং খড্গমাদদানঃ শরাবরম্
13.51
স তেনানেকতারেণ চর্মণা কৃতহস্তবৎ
ভ্রান্তাসিরচরন্মার্গান্দর্শয়ন্বীর্যমাত্মনঃ
13.52
ভ্রামিতং পুনরুদ্ভ্রান্তমাধূতং পুনরুচ্ছ্রিতম্
চর্মনিস্ত্রিংশয়ো রাজন্নির্বিশেষমদৃশ্যত
13.53
স পৌরবরথস্যেষামাপ্লুত্য সহসা নদন্
পৌরবং রথমাস্থায় কেশপক্ষে পরামৃশৎ
13.54
জঘানাস্য পদা সূতমসিনাপাতয়দ্ধ্বজম্
বিক্ষোভ্যাম্ভোনিধিং তার্ক্ষ্যস্তং নাগমিব চাক্ষিপৎ
13.55
তমাকলিতকেশান্তং দদৃশুঃ সর্বপার্থিবাঃ
উক্ষাণমিব সিংহেন পাত্যমানমচেতনম্
13.56
তমার্জুনিবশং প্রাপ্তং কৃষ্যমাণমনাথবৎ
পৌরবং পতিতং দৃষ্ট্বা নামৃষ্যত জয়দ্রথঃ
13.57
স বর্হিণমহাবাজং কিঙ্কিণীশতজালবৎ
চর্ম চাদায় খড্গং চ নদন্পর্যপতদ্রথাৎ
13.58
ততঃ সৈন্ধবমালোক্য কার্ষ্ণিরুত্সৃজ্য পৌরবম্
উত্পপাত রথাত্তূর্ণং শ্যেনবন্নিপপাত চ
13.59
প্রাসপট্টিশনিস্ত্রিংশাঞ্শত্রুভিঃ সংপ্রবেরিতান্
চিচ্ছেদাথাসিনা কার্ষ্ণিশ্চর্মণা সংরুরোধ চ
13.60
স দর্শয়িত্বা সৈন্যানাং স্ববাহুবলমাত্মনঃ
তমুদ্যম্য মহাখড্গং চর্ম চাথ পুনর্বলী
13.61
বৃদ্ধক্ষত্রস্য দায়াদং পিতুরত্যন্তবৈরিণম্
সসারাভিমুখঃ শূরঃ শার্দূল ইব কুঞ্জরম্
13.62
তৌ পরস্পরমাসাদ্য খড্গদন্তনখায়ুধৌ
হৃষ্টবত্সংপ্রজহ্রাতে ব্যাঘ্রকেসরিণাবিব
13.63
সংপাতেষ্বভিপাতেষু নিপাতেষ্বসিচর্মণোঃ
ন তয়োরন্তরং কশ্চিদ্দদর্শ নরসিংহয়োঃ
13.64
অবক্ষেপোঽসিনির্হ্রাদঃ শস্ত্রান্তরনিদর্শনম্
বাহ্যান্তরনিপাতশ্চ নির্বিশেষমদৃশ্যত
13.65
বাহ্যমাভ্যন্তরং চৈব চরন্তৌ মার্গমুত্তমম্
দদৃশাতে মহাত্মানৌ সপক্ষাবিব পর্বতৌ
13.66
ততো বিক্ষিপতঃ খড্গং সৌভদ্রস্য যশস্বিনঃ
শরাবরণপক্ষান্তে প্রজহার জয়দ্রথঃ
13.67
রুক্মপক্ষান্তরে সক্তস্তস্মিংশ্চর্মণি ভাস্বরে
সিন্ধুরাজবলোদ্ধূতঃ সোঽভজ্যত মহানসিঃ
13.68
ভগ্নমাজ্ঞায় নিস্ত্রিংশমবপ্লুত্য পদানি ষট্
সোঽদৃশ্যত নিমেষেণ স্বরথং পুনরাস্থিতঃ
13.69
তং কার্ষ্ণিং সমরান্মুক্তমাস্থিতং রথমুত্তমম্
সহিতাঃ সর্বরাজানঃ পরিবব্রুঃ সমন্ততঃ
13.70
ততশ্চর্ম চ খড্গং চ সমুত্ক্ষিপ্য মহাবলঃ
ননাদার্জুনদায়াদঃ প্রেক্ষমাণো জয়দ্রথম্
13.71
সিন্ধুরাজং পরিত্যজ্য সৌভদ্রঃ পরবীরহা
তাপয়ামাস তত্সৈন্যং ভুবনং ভাস্করো যথা
13.72
তস্য সর্বায়সীং শক্তিং শল্যঃ কনকভূষণাম্
চিক্ষেপ সমরে ঘোরাং দীপ্তামগ্নিশিখামিব
13.73
তামবপ্লুত্য জগ্রাহ সকোশং চাকরোদসিম্
বৈনতেয়ো যথা কার্ষ্ণিঃ পতন্তমুরগোত্তমম্
13.74
তস্য লাঘবমাজ্ঞায় সত্ত্বং চামিততেজসঃ
সহিতাঃ সর্বরাজানঃ সিংহনাদমথানদন্
13.75
ততস্তামেব শল্যস্য সৌভদ্রঃ পরবীরহা
মুমোচ ভুজবীর্যেণ বৈডূর্যবিকৃতাজিরাম্
13.76
সা তস্য রথমাসাদ্য নির্মুক্তভুজগোপমা
জঘান সূতং শল্যস্য রথাচ্চৈনমপাতয়ৎ
13.77
ততো বিরাটদ্রুপদৌ ধৃষ্টকেতুর্যুধিষ্ঠিরঃ
সাত্যকিঃ কেকয়া ভীমো ধৃষ্টদ্যুম্নশিখণ্ডিনৌ
যমৌ চ দ্রৌপদেয়াশ্চ সাধু সাধ্বিতি চুক্রুশুঃ
13.78
বাণশব্দাশ্চ বিবিধাঃ সিংহনাদাশ্চ পুষ্কলাঃ
প্রাদুরাসন্হর্ষয়ন্তঃ সৌভদ্রমপলায়িনম্
তন্নামৃষ্যন্ত পুত্রাস্তে শত্রোর্বিজয়লক্ষণম্
13.79
অথৈনং সহসা সর্বে সমন্তান্নিশিতৈঃ শরৈঃ
অভ্যাকিরন্মহারাজ জলদা ইব পর্বতম্
13.80
তেষাং চ প্রিয়মন্বিচ্ছন্সূতস্য চ পরাভবাৎ
আর্তায়নিরমিত্রঘ্নঃ ক্রুদ্ধঃ সৌভদ্রমভ্যয়াৎ