Utshovঅধ্যায় 12
12.1
সংজয় উবাচ
ততস্তে সৈনিকাঃ শ্রুত্বা তং যুধিষ্ঠিরনিগ্রহম্
সিংহনাদরবাংশ্চক্রুর্বাণশঙ্খরবৈঃ সহ
12.2
তত্তু সর্বং যথা বৃত্তং ধর্মরাজেন ভারত
আপ্তৈরাশু পরিজ্ঞাতং ভারদ্বাজচিকীর্ষিতম্
12.3
ততঃ সর্বান্সমানায্য ভ্রাতৄন্সৈন্যাংশ্চ সর্বশঃ
অব্রবীদ্ধর্মরাজস্তু ধনংজয়মিদং বচঃ
12.4
শ্রুতং তে পুরুষব্যাঘ্র দ্রোণস্যাদ্য চিকীর্ষিতম্
যথা তন্ন ভবেত্সত্যং তথা নীতির্বিধীয়তাম্
12.5
সান্তরং হি প্রতিজ্ঞাতং দ্রোণেনামিত্রকর্শন
তচ্চান্তরমমোঘেষৌ ত্বয়ি তেন সমাহিতম্
12.6
স ত্বমদ্য মহাবাহো যুধ্যস্ব মদনন্তরম্
যথা দুর্যোধনঃ কামং নেমং দ্রোণাদবাপ্নুয়াৎ
12.7
অর্জুন উবাচ
যথা মে ন বধঃ কার্য আচার্যস্য কথংচন
তথা তব পরিত্যাগো ন মে রাজংশ্চিকীর্ষিতঃ
12.8
অপ্যেবং পাণ্ডব প্রাণানুত্সৃজেয়মহং যুধি
প্রতীয়াং নাহমাচার্যং ত্বাং ন জহ্যাং কথংচন
12.9
ত্বাং নিগৃহ্যাহবে রাজন্ধার্তরাষ্ট্রো যমিচ্ছতি
ন স তং জীবলোকেঽস্মিন্কামং প্রাপ্তঃ কথংচন
12.10
প্রপতেদ্দ্যৌঃ সনক্ষত্রা পৃথিবী শকলীভবেৎ
ন ত্বাং দ্রোণো নিগৃহ্ণীয়াজ্জীবমানে ময়ি ধ্রুবম্
12.11
যদি তস্য রণে সাহ্যং কুরুতে বজ্রভৃত্স্বয়ম্
দেবৈর্বা সহিতো দৈত্যৈর্ন ত্বাং প্রাপ্স্যত্যসৌ মৃধে
12.12
ময়ি জীবতি রাজেন্দ্র ন ভয়ং কর্তুমর্হসি
দ্রোণাদস্ত্রভৃতাং শ্রেষ্ঠাত্সর্বশস্ত্রভৃতামপি
12.13
ন স্মরাম্যনৃতাং বাচং ন স্মরামি পরাজয়ম্
ন স্মরামি প্রতিশ্রুত্য কিংচিদপ্যনপাকৃতম্
12.14
সংজয় উবাচ
ততঃ শঙ্খাশ্চ ভের্যশ্চ মৃদঙ্গাশ্চানকৈঃ সহ
প্রাবাদ্যন্ত মহারাজ পাণ্ডবানাং নিবেশনে
12.15
সিংহনাদশ্চ সংজজ্ঞে পাণ্ডবানাং মহাত্মনাম্
ধনুর্জ্যাতলশব্দশ্চ গগনস্পৃক্সুভৈরবঃ
12.16
তং শ্রুত্বা শঙ্খনির্ঘোষং পাণ্ডবস্য মহাত্মনঃ
ত্বদীয়েষ্বপ্যনীকেষু বাদিত্রাণ্যভিজঘ্নিরে
12.17
ততো ব্যূঢান্যনীকানি তব তেষাং চ ভারত
শনৈরুপেয়ুরন্যোন্যং যোত্স্যমানানি সংয়ুগে
12.18
ততঃ প্রববৃতে যুদ্ধং তুমুলং লোমহর্ষণম্
পাণ্ডবানাং কুরূণাং চ দ্রোণপাঞ্চাল্যয়োরপি
12.19
যতমানাঃ প্রয়ত্নেন দ্রোণানীকবিশাতনে
ন শেকুঃ সৃঞ্জয়া রাজংস্তদ্ধি দ্রোণেন পালিতম্
12.20
তথৈব তব পুত্রস্য রথোদারাঃ প্রহারিণঃ
ন শেকুঃ পাণ্ডবীং সেনাং পাল্যমানাং কিরীটিনা
12.21
আস্তাং তে স্তিমিতে সেনে রক্ষ্যমাণে পরস্পরম্
সংপ্রসুপ্তে যথা নক্তং বনরাজ্যৌ সুপুষ্পিতে
12.22
ততো রুক্মরথো রাজন্নর্কেণেব বিরাজতা
বরূথিনা বিনিষ্পত্য ব্যচরত্পৃতনান্তরে
12.23
তমুদ্যতং রথেনৈকমাশুকারিণমাহবে
অনেকমিব সংত্রাসান্মেনিরে পাণ্ডুসৃঞ্জয়াঃ
12.24
তেন মুক্তাঃ শরা ঘোরা বিচেরুঃ সর্বতোদিশম্
ত্রাসয়ন্তো মহারাজ পাণ্ডবেয়স্য বাহিনীম্
12.25
মধ্যং দিনমনুপ্রাপ্তো গভস্তিশতসংবৃতঃ
যথাদৃশ্যত ঘর্মাংশুস্তথা দ্রোণোঽপ্যদৃশ্যত
12.26
ন চৈনং পাণ্ডবেয়ানাং কশ্চিচ্ছক্নোতি মারিষ
বীক্ষিতুং সমরে ক্রুদ্ধং মহেন্দ্রমিব দানবাঃ
12.27
মোহয়িত্বা ততঃ সৈন্যং ভারদ্বাজঃ প্রতাপবান্
ধৃষ্টদ্যুম্নবলং তূর্ণং ব্যধমন্নিশিতৈঃ শরৈঃ
12.28
স দিশঃ সর্বতো রুদ্ধ্বা সংবৃত্য খমজিহ্মগৈঃ
পার্ষতো যত্র তত্রৈব মমৃদে পাণ্ডুবাহিনীম্