UtshovChapter 12
12.1
संजय उवाच
ततस्ते सैनिकाः श्रुत्वा तं युधिष्ठिरनिग्रहम्
सिंहनादरवांश्चक्रुर्बाणशङ्खरवैः सह
Sanjaya uvacha
Tataste sainikah shrutva tam yudhishthiranigraham
Sinhanadaravanshchakrurbanashankharavaih saha
12.2
तत्तु सर्वं यथा वृत्तं धर्मराजेन भारत
आप्तैराशु परिज्ञातं भारद्वाजचिकीर्षितम्
Tattu sarvam yatha vrittam dharmarajena bharata
Aptairashu parigyatam bharadvajachikirshitam
12.3
ततः सर्वान्समानाय्य भ्रातॄन्सैन्यांश्च सर्वशः
अब्रवीद्धर्मराजस्तु धनंजयमिदं वचः
Tatah sarvansamanayya bhratrinsainyanshcha sarvashah
Abraviddharmarajastu dhananjayamidam vachah
12.4
श्रुतं ते पुरुषव्याघ्र द्रोणस्याद्य चिकीर्षितम्
यथा तन्न भवेत्सत्यं तथा नीतिर्विधीयताम्
Shrutam te purushavyaghra dronasyadya chikirshitam
Yatha tanna bhavetsatyam tatha nitirvidhiyatam
12.5
सान्तरं हि प्रतिज्ञातं द्रोणेनामित्रकर्शन
तच्चान्तरममोघेषौ त्वयि तेन समाहितम्
Santaram hi pratigyatam dronenamitrakarshana
Tachchantaramamogheshau tvayi tena samahitam
12.6
स त्वमद्य महाबाहो युध्यस्व मदनन्तरम्
यथा दुर्योधनः कामं नेमं द्रोणादवाप्नुयात्
Sa tvamadya mahabaho yudhyasva madanantaram
Yatha duryodhanah kamam nemam dronadavapnuyat
12.7
अर्जुन उवाच
यथा मे न वधः कार्य आचार्यस्य कथंचन
तथा तव परित्यागो न मे राजंश्चिकीर्षितः
Arjuna uvacha
Yatha me na vadhah karya acharyasya kathanchana
Tatha tava parityago na me rajanshchikirshitah
12.8
अप्येवं पाण्डव प्राणानुत्सृजेयमहं युधि
प्रतीयां नाहमाचार्यं त्वां न जह्यां कथंचन
Apyevam pandava prananutsrijeyamaham yudhi
Pratiyam nahamacharyam tvam na jahyam kathanchana
12.9
त्वां निगृह्याहवे राजन्धार्तराष्ट्रो यमिच्छति
न स तं जीवलोकेऽस्मिन्कामं प्राप्तः कथंचन
Tvam nigrihyahave rajandhartarashtro yamichchhati
Na sa tam jivalokesminkamam praptah kathanchana
12.10
प्रपतेद्द्यौः सनक्षत्रा पृथिवी शकलीभवेत्
न त्वां द्रोणो निगृह्णीयाज्जीवमाने मयि ध्रुवम्
Prapateddyauh sanakshatra prithivi shakalibhavet
Na tvam drono nigrihniyajjivamane mayi dhruvam
12.11
यदि तस्य रणे साह्यं कुरुते वज्रभृत्स्वयम्
देवैर्वा सहितो दैत्यैर्न त्वां प्राप्स्यत्यसौ मृधे
Yadi tasya rane sahyam kurute vajrabhritsvayam
Devairva sahito daityairna tvam prapsyatyasau mridhe
12.12
मयि जीवति राजेन्द्र न भयं कर्तुमर्हसि
द्रोणादस्त्रभृतां श्रेष्ठात्सर्वशस्त्रभृतामपि
Mayi jivati rajendra na bhayam kartumarhasi
Dronadastrabhritam shreshthatsarvashastrabhritamapi
12.13
न स्मराम्यनृतां वाचं न स्मरामि पराजयम्
न स्मरामि प्रतिश्रुत्य किंचिदप्यनपाकृतम्
Na smaramyanritam vacham na smarami parajayam
Na smarami pratishrutya kinchidapyanapakritam
12.14
संजय उवाच
ततः शङ्खाश्च भेर्यश्च मृदङ्गाश्चानकैः सह
प्रावाद्यन्त महाराज पाण्डवानां निवेशने
Sanjaya uvacha
Tatah shankhashcha bheryashcha mridangashchanakaih saha
Pravadyanta maharaja pandavanam niveshane
12.15
सिंहनादश्च संजज्ञे पाण्डवानां महात्मनाम्
धनुर्ज्यातलशब्दश्च गगनस्पृक्सुभैरवः
Sinhanadashcha sanjagye pandavanam mahatmanam
Dhanurjyatalashabdashcha gaganaspriksubhairavah
12.16
तं श्रुत्वा शङ्खनिर्घोषं पाण्डवस्य महात्मनः
त्वदीयेष्वप्यनीकेषु वादित्राण्यभिजघ्निरे
Tam shrutva shankhanirghosham pandavasya mahatmanah
Tvadiyeshvapyanikeshu vaditranyabhijaghnire
12.17
ततो व्यूढान्यनीकानि तव तेषां च भारत
शनैरुपेयुरन्योन्यं योत्स्यमानानि संयुगे
Tato vyudhanyanikani tava tesham cha bharata
Shanairupeyuranyonyam yotsyamanani sanyuge
12.18
ततः प्रववृते युद्धं तुमुलं लोमहर्षणम्
पाण्डवानां कुरूणां च द्रोणपाञ्चाल्ययोरपि
Tatah pravavrite yuddham tumulam lomaharshanam
Pandavanam kurunam cha dronapanchalyayorapi
12.19
यतमानाः प्रयत्नेन द्रोणानीकविशातने
न शेकुः सृञ्जया राजंस्तद्धि द्रोणेन पालितम्
Yatamanah prayatnena dronanikavishatane
Na shekuh srinjaya rajanstaddhi dronena palitam
12.20
तथैव तव पुत्रस्य रथोदाराः प्रहारिणः
न शेकुः पाण्डवीं सेनां पाल्यमानां किरीटिना
Tathaiva tava putrasya rathodarah praharinah
Na shekuh pandavim senam palyamanam kiritina
12.21
आस्तां ते स्तिमिते सेने रक्ष्यमाणे परस्परम्
संप्रसुप्ते यथा नक्तं वनराज्यौ सुपुष्पिते
Astam te stimite sene rakshyamane parasparam
Samprasupte yatha naktam vanarajyau supushpite
12.22
ततो रुक्मरथो राजन्नर्केणेव विराजता
वरूथिना विनिष्पत्य व्यचरत्पृतनान्तरे
Tato rukmaratho rajannarkeneva virajata
Varuthina vinishpatya vyacharatpritanantare
12.23
तमुद्यतं रथेनैकमाशुकारिणमाहवे
अनेकमिव संत्रासान्मेनिरे पाण्डुसृञ्जयाः
Tamudyatam rathenaikamashukarinamahave
Anekamiva santrasanmenire pandusrinjayah
12.24
तेन मुक्ताः शरा घोरा विचेरुः सर्वतोदिशम्
त्रासयन्तो महाराज पाण्डवेयस्य वाहिनीम्
Tena muktah shara ghora vicheruh sarvatodisham
Trasayanto maharaja pandaveyasya vahinim
12.25
मध्यं दिनमनुप्राप्तो गभस्तिशतसंवृतः
यथादृश्यत घर्मांशुस्तथा द्रोणोऽप्यदृश्यत
Madhyam dinamanuprapto gabhastishatasanvritah
Yathadrishyata gharmanshustatha dronopyadrishyata
12.26
न चैनं पाण्डवेयानां कश्चिच्छक्नोति मारिष
वीक्षितुं समरे क्रुद्धं महेन्द्रमिव दानवाः
Na chainam pandaveyanam kashchichchhaknoti marisha
Vikshitum samare kruddham mahendramiva danavah
12.27
मोहयित्वा ततः सैन्यं भारद्वाजः प्रतापवान्
धृष्टद्युम्नबलं तूर्णं व्यधमन्निशितैः शरैः
Mohayitva tatah sainyam bharadvajah pratapavan
Dhrishtadyumnabalam turnam vyadhamannishitaih sharaih
12.28
स दिशः सर्वतो रुद्ध्वा संवृत्य खमजिह्मगैः
पार्षतो यत्र तत्रैव ममृदे पाण्डुवाहिनीम्
Sa dishah sarvato ruddhva sanvritya khamajihmagaih
Parshato yatra tatraiva mamride panduvahinim