Utshovঅধ্যায় 11
11.1
সংজয় উবাচ
হন্ত তে বর্ণয়িষ্যামি সর্বং প্রত্যক্ষদর্শিবান্
যথা স ন্যপতদ্দ্রোণঃ সাদিতঃ পাণ্ডুসৃঞ্জয়ৈঃ
11.2
সেনাপতিত্বং সংপ্রাপ্য ভারদ্বাজো মহারথঃ
মধ্যে সর্বস্য সৈন্যস্য পুত্রং তে বাক্যমব্রবীৎ
11.3
যত্কৌরবাণামৃষভাদাপগেয়াদনন্তরম্
সেনাপত্যেন মাং রাজন্নদ্য সত্কৃতবানসি
11.4
সদৃশং কর্মণস্তস্য ফলং প্রাপ্নুহি পার্থিব
করোমি কামং কং তেঽদ্য প্রবৃণীষ্ব যমিচ্ছসি
11.5
ততো দুর্যোধনশ্চিন্ত্য কর্ণদুঃশাসনাদিভিঃ
তমথোবাচ দুর্ধর্ষমাচার্যং জয়তাং বরম্
11.6
দদাসি চেদ্বরং মহ্যং জীবগ্রাহং যুধিষ্ঠিরম্
গৃহীত্বা রথিনাং শ্রেষ্ঠং মত্সমীপমিহানয়
11.7
ততঃ কুরূণামাচার্যঃ শ্রুত্বা পুত্রস্য তে বচঃ
সেনাং প্রহর্ষয়ন্সর্বামিদং বচনমব্রবীৎ
11.8
ধন্যঃ কুন্তীসুতো রাজা যস্য গ্রহণমিচ্ছসি
ন বধার্থং সুদুর্ধর্ষ বরমদ্য প্রয়াচসি
11.9
কিমর্থং চ নরব্যাঘ্র ন বধং তস্য কাঙ্ক্ষসি
নাশংসসি ক্রিয়ামেতাং মত্তো দুর্যোধন ধ্রুবম্
11.10
আহোস্বিদ্ধর্মপুত্রস্য দ্বেষ্টা তস্য ন বিদ্যতে
যদিচ্ছসি ত্বং জীবন্তং কুলং রক্ষসি চাত্মনি
11.11
অথ বা ভরতশ্রেষ্ঠ নির্জিত্য যুধি পাণ্ডবান্
রাজ্যাংশং প্রতিদত্ত্বা চ সৌভ্রাত্রং কর্তুমিচ্ছসি
11.12
ধন্যঃ কুন্তীসুতো রাজা সুজাতা চাস্য ধীমতঃ
অজাতশত্রুতা সত্যা তস্য যত্স্নিহ্যতে ভবান্
11.13
দ্রোণেন ত্বেবমুক্তস্য তব পুত্রস্য ভারত
সহসা নিঃসৃতো ভাবো যোঽস্য নিত্যং প্রবর্ততে
11.14
নাকারো গূহিতুং শক্যো বৃহস্পতিসমৈরপি
তস্মাত্তব সুতো রাজন্প্রহৃষ্টো বাক্যমব্রবীৎ
11.15
বধে কুন্তীসুতস্যাজৌ নাচার্য বিজয়ো মম
হতে যুধিষ্ঠিরে পার্থো হন্যাত্সর্বান্হি নো ধ্রুবম্
11.16
ন চ শক্যো রণে সর্বৈর্নিহন্তুমমরৈরপি
য এব চৈষাং শেষঃ স্যাত্স এবাস্মান্ন শেষয়েৎ
11.17
সত্যপ্রতিজ্ঞে ত্বানীতে পুনর্দ্যূতেন নির্জিতে
পুনর্যাস্যন্ত্যরণ্যায় কৌন্তেয়াস্তমনুব্রতাঃ
11.18
সোঽয়ং মম জয়ো ব্যক্তং দীর্ঘকালং ভবিষ্যতি
অতো ন বধমিচ্ছামি ধর্মরাজস্য কর্হিচিৎ
11.19
তস্য জিহ্মমভিপ্রায়ং জ্ঞাত্বা দ্রোণোঽর্থতত্ত্ববিৎ
তং বরং সান্তরং তস্মৈ দদৌ সংচিন্ত্য বুদ্ধিমান্
11.20
দ্রোণ উবাচ
ন চেদ্যুধিষ্ঠিরং বীর পালয়েদর্জুনো যুধি
মন্যস্ব পাণ্ডবং জ্যেষ্ঠমানীতং বশমাত্মনঃ
11.21
ন হি পার্থো রণে শক্যঃ সেন্দ্রৈর্দেবাসুরৈরপি
প্রত্যুদ্যাতুমতস্তাত নৈতদামর্ষয়াম্যহম্
11.22
অসংশয়ং স শিষ্যো মে মত্পূর্বশ্চাস্ত্রকর্মণি
তরুণঃ কীর্তিয়ুক্তশ্চ একায়নগতশ্চ সঃ
11.23
অস্ত্রাণীন্দ্রাচ্চ রুদ্রাচ্চ ভূয়াংসি সমবাপ্তবান্
অমর্ষিতশ্চ তে রাজংস্তেন নামর্ষয়াম্যহম্
11.24
স চাপক্রম্যতাং যুদ্ধাদ্যেনোপায়েন শক্যতে
অপনীতে ততঃ পার্থে ধর্মরাজো জিতস্ত্বয়া
11.25
গ্রহণং চেজ্জয়ং তস্য মন্যসে পুরুষর্ষভ
এতেন চাভ্যুপায়েন ধ্রুবং গ্রহণমেষ্যতি
11.26
অহং গৃহীত্বা রাজানং সত্যধর্মপরায়ণম্
আনয়িষ্যামি তে রাজন্বশমদ্য ন সংশয়ঃ
11.27
যদি স্থাস্যতি সংগ্রামে মুহূর্তমপি মেঽগ্রতঃ
অপনীতে নরব্যাঘ্রে কুন্তীপুত্রে ধনংজয়ে
11.28
ফল্গুনস্য সমক্ষং তু ন হি পার্থো যুধিষ্ঠিরঃ
গ্রহীতুং সমরে শক্যঃ সেন্দ্রৈরপি সুরাসুরৈঃ
11.29
সংজয় উবাচ
সান্তরং তু প্রতিজ্ঞাতে রাজ্ঞো দ্রোণেন নিগ্রহে
গৃহীতং তমমন্যন্ত তব পুত্রাঃ সুবালিশাঃ
11.30
পাণ্ডবেষু হি সাপেক্ষং দ্রোণং জানাতি তে সুতঃ
ততঃ প্রতিজ্ঞাস্থৈর্যার্থং স মন্ত্রো বহুলীকৃতঃ
11.31
ততো দুর্যোধনেনাপি গ্রহণং পাণ্ডবস্য তৎ
সৈন্যস্থানেষু সর্বেষু ব্যাঘোষিতমরিংদম