Utshovঅধ্যায় 10
10.1
ধৃতরাষ্ট্র উবাচ
শৃণু দিব্যানি কর্মাণি বাসুদেবস্য সংজয়
কৃতবান্যানি গোবিন্দো যথা নান্যঃ পুমান্ক্বচিৎ
10.2
সংবর্ধতা গোপকুলে বালেনৈব মহাত্মনা
বিখ্যাপিতং বলং বাহ্বোস্ত্রিষু লোকেষু সংজয়
10.3
উচ্চৈঃশ্রবস্তুল্যবলং বায়ুবেগসমং জবে
জঘান হয়রাজং যো যমুনাবনবাসিনম্
10.4
দানবং ঘোরকর্মাণং গবাং মৃত্যুমিবোত্থিতম্
বৃষরূপধরং বাল্যে ভুজাভ্যাং নিজঘান হ
10.5
প্রলম্বং নরকং জম্ভং পীঠং চাপি মহাসুরম্
মুরুং চাচলসংকাশমবধীত্পুষ্করেক্ষণঃ
10.6
তথা কংসো মহাতেজা জরাসংধেন পালিতঃ
বিক্রমেণৈব কৃষ্ণেন সগণঃ শাতিতো রণে
10.7
সুনামা নাম বিক্রান্তঃ সমগ্রাক্ষৌহিণীপতিঃ
ভোজরাজস্য মধ্যস্থো ভ্রাতা কংসস্য বীর্যবান্
10.8
বলদেবদ্বিতীয়েন কৃষ্ণেনামিত্রঘাতিনা
তরস্বী সমরে দগ্ধঃ সসৈন্যঃ শূরসেনরাট্
10.9
দুর্বাসা নাম বিপ্রর্ষিস্তথা পরমকোপনঃ
আরাধিতঃ সদারেণ স চাস্মৈ প্রদদৌ বরান্
10.10
তথা গান্ধাররাজস্য সুতাং বীরঃ স্বয়ংবরে
নির্জিত্য পৃথিবীপালানবহত্পুষ্করেক্ষণঃ
10.11
অমৃষ্যমাণা রাজানো যস্য জাত্যা হয়া ইব
রথে বৈবাহিকে যুক্তাঃ প্রতোদেন কৃতব্রণাঃ
10.12
জরাসংধং মহাবাহুমুপায়েন জনার্দনঃ
পরেণ ঘাতয়ামাস পৃথগক্ষৌহিণীপতিম্
10.13
চেদিরাজং চ বিক্রান্তং রাজসেনাপতিং বলী
অর্ঘে বিবদমানং চ জঘান পশুবত্তদা
10.14
সৌভং দৈত্যপুরং স্বস্থং শাল্বগুপ্তং দুরাসদম্
সমুদ্রকুক্ষৌ বিক্রম্য পাতয়ামাস মাধবঃ
10.15
অঙ্গান্বঙ্গান্কলিঙ্গাংশ্চ মাগধান্কাশিকোসলান্
বত্সগর্গকরূষাংশ্চ পুণ্ড্রাংশ্চাপ্যজয়দ্রণে
10.16
আবন্ত্যান্দাক্ষিণাত্যাংশ্চ পার্বতীয়ান্দশেরকান্
কাশ্মীরকানৌরসকান্পিশাচাংশ্চ সমন্দরান্
10.17
কাম্বোজান্বাটধানাংশ্চ চোলান্পাণ্ড্যাংশ্চ সংজয়
ত্রিগর্তান্মালবাংশ্চৈব দরদাংশ্চ সুদুর্জয়ান্
10.18
নানাদিগ্ভ্যশ্চ সংপ্রাপ্তান্ব্রাতানশ্বশকান্প্রতি
জিতবান্পুণ্ডরীকাক্ষো যবনাংশ্চ সহানুগান্
10.19
প্রবিশ্য মকরাবাসং যাদোভিরভিসংবৃতম্
জিগায় বরুণং যুদ্ধে সলিলান্তর্গতং পুরা
10.20
যুধি পঞ্চজনং হত্বা পাতালতলবাসিনম্
পাঞ্চজন্যং হৃষীকেশো দিব্যং শঙ্খমবাপ্তবান্
10.21
খাণ্ডবে পার্থসহিতস্তোষয়িত্বা হুতাশনম্
আগ্নেয়মস্ত্রং দুর্ধর্ষং চক্রং লেভে মহাবলঃ
10.22
বৈনতেয়ং সমারুহ্য ত্রাসয়িত্বামরাবতীম্
মহেন্দ্রভবনাদ্বীরঃ পারিজাতমুপানয়ৎ
10.23
তচ্চ মর্ষিতবাঞ্শক্রো জানংস্তস্য পরাক্রমম্
রাজ্ঞাং চাপ্যজিতং কংচিত্কৃষ্ণেনেহ ন শুশ্রুম
10.24
যচ্চ তন্মহদাশ্চর্যং সভায়াং মম সংজয়
কৃতবান্পুণ্ডরীকাক্ষঃ কস্তদন্য ইহার্হতি
10.25
যচ্চ ভক্ত্যা প্রপন্নোঽহমদ্রাক্ষং কৃষ্ণমীশ্বরম্
তন্মে সুবিদিতং সর্বং প্রত্যক্ষমিব চাগমৎ
10.26
নান্তো বিক্রময়ুক্তস্য বুদ্ধ্যা যুক্তস্য বা পুনঃ
কর্মণঃ শক্যতে গন্তুং হৃষীকেশস্য সংজয়
10.27
তথা গদশ্চ সাম্বশ্চ প্রদ্যুম্নোঽথ বিদূরথঃ
আগাবহোঽনিরুদ্ধশ্চ চারুদেষ্ণশ্চ সারণঃ
10.28
উল্মুকো নিশঠশ্চৈব ঝল্লী বভ্রুশ্চ বীর্যবান্
পৃথুশ্চ বিপৃথুশ্চৈব সমীকোঽথারিমেজয়ঃ
10.29
এতে বৈ বলবন্তশ্চ বৃষ্ণিবীরাঃ প্রহারিণঃ
কথংচিত্পাণ্ডবানীকং শ্রয়েয়ুঃ সমরে স্থিতাঃ
10.30
আহূতা বৃষ্ণিবীরেণ কেশবেন মহাত্মনা
ততঃ সংশয়িতং সর্বং ভবেদিতি মতির্মম
10.31
নাগায়ুতবলো বীরঃ কৈলাসশিখরোপমঃ
বনমালী হলী রামস্তত্র যত্র জনার্দনঃ
10.32
যমাহুঃ সর্বপিতরং বাসুদেবং দ্বিজাতয়ঃ
অপি বা হ্যেষ পাণ্ডূনাং যোত্স্যতেঽর্থায় সংজয়
10.33
স যদা তাত সংনহ্যেত্পাণ্ডবার্থায় কেশবঃ
ন তদা প্রত্যনীকেষু ভবিতা তস্য কশ্চন
10.34
যদি স্ম কুরবঃ সর্বে জয়েয়ুঃ সর্বপাণ্ডবান্
বার্ষ্ণেয়োঽর্থায় তেষাং বৈ গৃহ্ণীয়াচ্ছস্ত্রমুত্তমম্
10.35
ততঃ সর্বান্নরব্যাঘ্রো হত্বা নরপতীন্রণে
কৌরবাংশ্চ মহাবাহুঃ কুন্ত্যৈ দদ্যাত্স মেদিনীম্
10.36
যস্য যন্তা হৃষীকেশো যোদ্ধা যস্য ধনংজয়ঃ
রথস্য তস্য কঃ সংখ্যে প্রত্যনীকো ভবেদ্রথঃ
10.37
ন কেনচিদুপায়েন কুরূণাং দৃশ্যতে জয়ঃ
তস্মান্মে সর্বমাচক্ষ্ব যথা যুদ্ধমবর্তত
10.38
অর্জুনঃ কেশবস্যাত্মা কৃষ্ণোঽপ্যাত্মা কিরীটিনঃ
অর্জুনে বিজয়ো নিত্যং কৃষ্ণে কীর্তিশ্চ শাশ্বতী
10.39
প্রাধান্যেন হি ভূয়িষ্ঠমমেয়াঃ কেশবে গুণাঃ
মোহাদ্দুর্যোধনঃ কৃষ্ণং যন্ন বেত্তীহ মাধবম্
10.40
মোহিতো দৈবয়োগেন মৃত্যুপাশপুরস্কৃতঃ
ন বেদ কৃষ্ণং দাশার্হমর্জুনং চৈব পাণ্ডবম্
10.41
পূর্বদেবৌ মহাত্মানৌ নরনারায়ণাবুভৌ
একাত্মানৌ দ্বিধাভূতৌ দৃশ্যেতে মানবৈর্ভুবি
10.42
মনসাপি হি দুর্ধর্ষৌ সেনামেতাং যশস্বিনৌ
নাশয়েতামিহেচ্ছন্তৌ মানুষত্বাত্তু নেচ্ছতঃ
10.43
যুগস্যেব বিপর্যাসো লোকানামিব মোহনম্
ভীষ্মস্য চ বধস্তাত দ্রোণস্য চ মহাত্মনঃ
10.44
ন হ্যেব ব্রহ্মচর্যেণ ন বেদাধ্যয়নেন চ
ন ক্রিয়াভির্ন শস্ত্রেণ মৃত্যোঃ কশ্চিদ্বিমুচ্যতে
10.45
লোকসংভাবিতৌ বীরৌ কৃতাস্ত্রৌ যুদ্ধদুর্মদৌ
ভীষ্মদ্রোণৌ হতৌ শ্রুত্বা কিং নু জীবামি সংজয়
10.46
যাং তাং শ্রিয়মসূয়ামঃ পুরা যাতাং যুধিষ্ঠিরে
অদ্য তামনুজানীমো ভীষ্মদ্রোণবধেন চ
10.47
তথা চ মত্কৃতে প্রাপ্তঃ কুরূণামেষ সংক্ষয়ঃ
পক্বানাং হি বধে সূত বজ্রায়ন্তে তৃণান্যপি
10.48
অনন্যমিদমৈশ্বর্যং লোকে প্রাপ্তো যুধিষ্ঠিরঃ
যস্য কোপান্মহেষ্বাসৌ ভীষ্মদ্রোণৌ নিপাতিতৌ
10.49
প্রাপ্তঃ প্রকৃতিতো ধর্মো নাধর্মো মানবান্প্রতি
ক্রূরঃ সর্ববিনাশায় কালঃ সমতিবর্ততে
10.50
অন্যথা চিন্তিতা হ্যর্থা নরৈস্তাত মনস্বিভিঃ
অন্যথৈব হি গচ্ছন্তি দৈবাদিতি মতির্মম
10.51
তস্মাদপরিহার্যেঽর্থে সংপ্রাপ্তে কৃচ্ছ্র উত্তমে
অপারণীয়ে দুশ্চিন্ত্যে যথাভূতং প্রচক্ষ্ব মে