Utshovঅধ্যায় 9
9.1
বৈশংপায়ন উবাচ
এবং পৃষ্ট্বা সূতপুত্রং হৃচ্ছোকেনার্দিতো ভৃশম্
জয়ে নিরাশঃ পুত্রাণাং ধৃতরাষ্ট্রোঽপতত্ক্ষিতৌ
9.2
তং বিসংজ্ঞং নিপতিতং সিষিচুঃ পরিচারকাঃ
জলেনাত্যর্থশীতেন বীজন্তঃ পুণ্যগন্ধিনা
9.3
পতিতং চৈনমাজ্ঞায় সমন্তাদ্ভরতস্ত্রিয়ঃ
পরিবব্রুর্মহারাজমস্পৃশংশ্চৈব পাণিভিঃ
9.4
উত্থাপ্য চৈনং শনকৈ রাজানং পৃথিবীতলাৎ
আসনং প্রাপয়ামাসুর্বাষ্পকণ্ঠ্যো বরাঙ্গনাঃ
9.5
আসনং প্রাপ্য রাজা তু মূর্ছয়াভিপরিপ্লুতঃ
নিশ্চেষ্টোঽতিষ্ঠত তদা বীজ্যমানঃ সমন্ততঃ
9.6
স লব্ধ্বা শনকৈঃ সংজ্ঞাং বেপমানো মহীপতিঃ
পুনর্গাবল্গণিং সূতং পর্যপৃচ্ছদ্যথাতথম্
9.7
যত্তদুদ্যন্নিবাদিত্যো জ্যোতিষা প্রণুদংস্তমঃ
আয়াদজাতশত্রুর্বৈ কস্তং দ্রোণাদবারয়ৎ
9.8
প্রভিন্নমিব মাতঙ্গং তথা ক্রুদ্ধং তরস্বিনম্
আসক্তমনসং দীপ্তং প্রতিদ্বিরদঘাতিনম্
বাশিতাসংগমে যদ্বদজয্যং প্রতিয়ূথপৈঃ
9.9
অতি চান্যান্রণে যোধান্বীরঃ পুরুষসত্তমঃ
যো হ্যেকো হি মহাবাহুর্নির্দহেদ্ঘোরচক্ষুষা
কৃত্স্নং দুর্যোধনবলং ধৃতিমান্সত্যসংগরঃ
9.10
চক্ষুর্হণং জয়ে সক্তমিষ্বাসবররক্ষিতম্
দান্তং বহুমতং লোকে কে শূরাঃ পর্যবারয়ন্
9.11
কে দুষ্প্রধর্ষং রাজানমিষ্বাসবরমচ্যুতম্
সমাসেদুর্নরব্যাঘ্রং কৌন্তেয়ং তত্র মামকাঃ
9.12
তরসৈবাভিপত্যাথ যো বৈ দ্রোণমুপাদ্রবৎ
তং ভীমসেনমায়ান্তং কে শূরাঃ পর্যবারয়ন্
9.13
যদায়াজ্জলদপ্রখ্যো রথঃ পরমবীর্যবান্
পর্জন্য ইব বীভত্সুস্তুমুলামশনিং সৃজন্
9.14
ববর্ষ শরবর্ষাণি বর্ষাণি মঘবানিব
ইষুসংবাধমাকাশং কুর্বন্কপিবরধ্বজঃ
অবস্ফূর্জন্দিশঃ সর্বাস্তলনেমিস্বনেন চ
9.15
চাপবিদ্যুত্প্রভো ঘোরো রথগুল্মবলাহকঃ
রথনেমিঘোষস্তনিতঃ শরশব্দাতিবন্ধুরঃ
9.16
রোষনির্জিতজীমূতো মনোঽভিপ্রায়শীঘ্রগঃ
মর্মাতিগো বাণধারস্তুমুলঃ শোণিতোদকঃ
9.17
সংপ্লাবয়ন্মহীং সর্বাং মানবৈরাস্তরংস্তদা
গদানিষ্টনিতো রৌদ্রো দুর্যোধনকৃতোদ্যমঃ
9.18
যুদ্ধেঽভ্যষিঞ্চদ্বিজয়ো গার্ধ্রপত্রৈঃ শিলাশিতৈঃ
গাণ্ডীবং ধারয়ন্ধীমান্কীদৃশং বো মনস্তদা
9.19
কচ্চিদ্গাণ্ডীবশব্দেন ন প্রণশ্যত বৈ বলম্
যদ্বঃ স ভৈরবং কুর্বন্নর্জুনো ভৃশমভ্যগাৎ
9.20
কচ্চিন্নাপানুদদ্দ্রোণাদিষুভির্বো ধনংজয়ঃ
বাতো মেঘানিবাবিধ্যন্প্রবাঞ্শরবনানিলঃ
কো হি গাণ্ডীবধন্বানং নরঃ সোঢুং রণেঽর্হতি
9.21
যত্সেনাঃ সমকম্পন্ত যদ্বীরানস্পৃশদ্ভয়ম্
কে তত্র নাজহুর্দ্রোণং কে ক্ষুদ্রাঃ প্রাদ্রবন্ভয়াৎ
9.22
কে বা তত্র তনূস্ত্যক্ত্বা প্রতীপং মৃত্যুমাব্রজন্
অমানুষাণাং জেতারং যুদ্ধেষ্বপি ধনংজয়ম্
9.23
ন চ বেগং সিতাশ্বস্য বিশক্ষ্যন্তীহ মামকাঃ
গাণ্ডীবস্য চ নির্ঘোষং প্রাবৃড্জলদনিস্বনম্
9.24
বিষ্বক্সেনো যস্য যন্তা যোদ্ধা চৈব ধনংজয়ঃ
অশক্যঃ স রথো জেতুং মন্যে দেবাসুরৈরপি
9.25
সুকুমারো যুবা শূরো দর্শনীয়শ্চ পাণ্ডবঃ
মেধাবী নিপুণো ধীমান্যুধি সত্যপরাক্রমঃ
9.26
আরাবং বিপুলং কুর্বন্ব্যথয়ন্সর্বকৌরবান্
যদায়ান্নকুলো ধীমান্কে শূরাঃ পর্যবারয়ন্
9.27
আশীবিষ ইব ক্রুদ্ধঃ সহদেবো যদাভ্যয়াৎ
শত্রূণাং কদনং কুর্বঞ্জেতাসৌ দুর্জয়ো যুধি
9.28
আর্যব্রতমমোঘেষুং হ্রীমন্তমপরাজিতম্
দ্রোণায়াভিমুখং যান্তং কে শূরাঃ পর্যবারয়ন্
9.29
যঃ স সৌবীররাজস্য প্রমথ্য মহতীং চমূম্
আদত্ত মহিষীং ভোজ্যাং কাম্যাং সর্বাঙ্গশোভনাম্
9.30
সত্যং ধৃতিশ্চ শৌর্যং চ ব্রহ্মচর্যং চ কেবলম্
সর্বাণি যুয়ুধানেঽস্মিন্নিত্যানি পুরুষর্ষভে
9.31
বলিনং সত্যকর্মাণমদীনমপরাজিতম্
বাসুদেবসমং যুদ্ধে বাসুদেবাদনন্তরম্
9.32
যুক্তং ধনংজয়প্রেষ্যে শূরমাচার্যকর্মণি
পার্থেন সমমস্ত্রেষু কস্তং দ্রোণাদবারয়ৎ
9.33
বৃষ্ণীনাং প্রবরং বীরং শূরং সর্বধনুষ্মতাম্
রামেণ সমমস্ত্রেষু যশসা বিক্রমেণ চ
9.34
সত্যং ধৃতির্দমঃ শৌর্যং ব্রহ্মচর্যমনুত্তমম্
সাত্বতে তানি সর্বাণি ত্রৈলোক্যমিব কেশবে
9.35
তমেবংগুণসংপন্নং দুর্বারমপি দৈবতৈঃ
সমাসাদ্য মহেষ্বাসং কে বীরাঃ পর্যবারয়ন্
9.36
পাঞ্চালেষূত্তমং শূরমুত্তমাভিজনপ্রিয়ম্
নিত্যমুত্তমকর্মাণমুত্তমৌজসমাহবে
9.37
যুক্তং ধনংজয়হিতে মমানর্থায় চোত্তমম্
যমবৈশ্রবণাদিত্যমহেন্দ্রবরুণোপমম্
9.38
মহারথসমাখ্যাতং দ্রোণায়োদ্যন্তমাহবে
ত্যজন্তং তুমুলে প্রাণান্কে শূরাঃ পর্যবারয়ন্
9.39
একোঽপসৃত্য চেদিভ্যঃ পাণ্ডবান্যঃ সমাশ্রিতঃ
ধৃষ্টকেতুং তমায়ান্তং দ্রোণাত্কঃ সমবারয়ৎ
9.40
যোঽবধীত্কেতুমাঞ্শূরো রাজপুত্রং সুদর্শনম্
অপরান্তগিরিদ্বারে কস্তং দ্রোণাদবারয়ৎ
9.41
স্ত্রীপূর্বো যো নরব্যাঘ্রো যঃ স বেদ গুণাগুণান্
শিখণ্ডিনং যাজ্ঞসেনিমম্লানমনসং যুধি
9.42
দেবব্রতস্য সমরে হেতুং মৃত্যোর্মহাত্মনঃ
দ্রোণায়াভিমুখং যান্তং কে বীরাঃ পর্যবারয়ন্
9.43
যস্মিন্নভ্যধিকা বীরে গুণাঃ সর্বে ধনংজয়াৎ
যস্মিন্নস্ত্রাণি সত্যং চ ব্রহ্মচর্যং চ নিত্যদা
9.44
বাসুদেবসমং বীর্যে ধনংজয়সমং বলে
তেজসাদিত্যসদৃশং বৃহস্পতিসমং মতৌ
9.45
অভিমন্যুং মহাত্মানং ব্যাত্তাননমিবান্তকম্
দ্রোণায়াভিমুখং যান্তং কে বীরাঃ পর্যবারয়ন্
9.46
তরুণস্ত্বরুণপ্রখ্যঃ সৌভদ্রঃ পরবীরহা
যদাভ্যাদ্রবত দ্রোণং তদাসীদ্বো মনঃ কথম্
9.47
দ্রৌপদেয়া নরব্যাঘ্রাঃ সমুদ্রমিব সিন্ধবঃ
যদ্দ্রোণমাদ্রবন্সংখ্যে কে বীরাস্তানবারয়ন্
9.48
যে তে দ্বাদশবর্ষাণি ক্রীডামুত্সৃজ্য বালকাঃ
অস্ত্রার্থমবসন্ভীষ্মে বিভ্রতো ব্রতমুত্তমম্
9.49
ক্ষত্রংজয়ঃ ক্ষত্রদেবঃ ক্ষত্রধর্মা চ মানিনঃ
ধৃষ্টদ্যুম্নাত্মজা বীরাঃ কে তান্দ্রোণাদবারয়ন্
9.50
শতাদ্বিশিষ্টং যং যুদ্ধে সমপশ্যন্ত বৃষ্ণয়ঃ
চেকিতানং মহেষ্বাসং কস্তং দ্রোণাদবারয়ৎ
9.51
বার্ধক্ষেমিঃ কলিঙ্গানাং যঃ কন্যামাহরদ্যুধি
অনাধৃষ্টিরদীনাত্মা কস্তং দ্রোণাদবারয়ৎ
9.52
ভ্রাতরঃ পঞ্চ কৈকেয়া ধার্মিকাঃ সত্যবিক্রমাঃ
ইন্দ্রগোপকবর্ণাশ্চ রক্তবর্মায়ুধধ্বজাঃ
9.53
মাতৃষ্বসুঃ সুতা বীরাঃ পাণ্ডবানাং জয়ার্থিনঃ
তান্দ্রোণং হন্তুমায়াতান্কে বীরাঃ পর্যবারয়ন্
9.54
যং যোধয়ন্তো রাজানো নাজয়ন্বারণাবতে
ষণ্মাসানভিসংরব্ধা জিঘাংসন্তো যুধাং পতিম্
9.55
ধনুষ্মতাং বরং শূরং সত্যসংধং মহাবলম্
দ্রোণাত্কস্তং নরব্যাঘ্রং যুয়ুত্সুং প্রত্যবারয়ৎ
9.56
যঃ পুত্রং কাশিরাজস্য বারাণস্যাং মহারথম্
সমরে স্ত্রীষু গৃধ্যন্তং ভল্লেনাপহরদ্রথাৎ
9.57
ধৃষ্টদ্যুম্নং মহেষ্বাসং পার্থানাং মন্ত্রধারিণম্
যুক্তং দুর্যোধনানর্থে সৃষ্টং দ্রোণবধায় চ
9.58
নির্দহন্তং রণে যোধান্দারয়ন্তং চ সর্বশঃ
দ্রোণায়াভিমুখং যান্তং কে বীরাঃ পর্যবারয়ন্
9.59
উত্সঙ্গ ইব সংবৃদ্ধং দ্রুপদস্যাস্ত্রবিত্তমম্
শৈখণ্ডিনং ক্ষত্রদেবং কে তং দ্রোণাদবারয়ন্
9.60
য ইমাং পৃথিবীং কৃত্স্নাং চর্মবত্সমবেষ্টয়ৎ
মহতা রথবংশেন মুখ্যারিঘ্নো মহারথঃ
9.61
দশাশ্বমেধানাজহ্রে স্বন্নপানাপ্তদক্ষিণান্
নিরর্গলান্সর্বমেধান্পুত্রবত্পালয়ন্প্রজাঃ
9.62
পিবন্ত্যো দক্ষিণাং যস্য গঙ্গাস্রোতঃ সমাপিবন্
তাবতীর্গা দদৌ বীর উশীনরসুতোঽধ্বরে
9.63
ন পূর্বে নাপরে চক্রুরিদং কেচন মানবাঃ
ইতি সংচুক্রুশুর্দেবাঃ কৃতে কর্মণি দুষ্করে
9.64
পশ্যামস্ত্রিষু লোকেষু ন তং সংস্থাস্নুচারিষু
জাতং বাপি জনিষ্যং বা দ্বিতীয়ং বাপি সংপ্রতি
9.65
অন্যমৌশীনরাচ্ছৈব্যাদ্ধুরো বোঢারমিত্যুত
গতিং যস্য ন যাস্যন্তি মানুষা লোকবাসিনঃ
9.66
তস্য নপ্তারমায়ান্তং শৈব্যং কঃ সমবারয়ৎ
দ্রোণায়াভিমুখং যান্তং ব্যাত্তাননমিবান্তকম্
9.67
বিরাটস্য রথানীকং মত্স্যস্যামিত্রঘাতিনঃ
প্রেপ্সন্তং সমরে দ্রোণং কে বীরাঃ পর্যবারয়ন্
9.68
সদ্যো বৃকোদরাজ্জাতো মহাবলপরাক্রমঃ
মায়াবী রাক্ষসো ঘোরো যস্মান্মম মহদ্ভয়ম্
9.69
পার্থানাং জয়কামং তং পুত্রাণাং মম কণ্টকম্
ঘটোত্কচং মহাবাহুং কস্তং দ্রোণাদবারয়ৎ
9.70
এতে চান্যে চ বহবো যেষামর্থায় সংজয়
ত্যক্তারঃ সংয়ুগে প্রাণান্কিং তেষামজিতং যুধি
9.71
যেষাং চ পুরুষব্যাঘ্রঃ শার্ঙ্গধন্বা ব্যপাশ্রয়ঃ
হিতার্থী চাপি পার্থানাং কথং তেষাং পরাজয়ঃ
9.72
লোকানাং গুরুরত্যন্তং লোকনাথঃ সনাতনঃ
নারায়ণো রণে নাথো দিব্যো দিব্যাত্মবান্প্রভুঃ
9.73
যস্য দিব্যানি কর্মাণি প্রবদন্তি মনীষিণঃ
তান্যহং কীর্তয়িষ্যামি ভক্ত্যা স্থৈর্যার্থমাত্মনঃ