Utshovঅধ্যায় 8
8.1
ধৃতরাষ্ট্র উবাচ
কিং কুর্বাণং রণে দ্রোণং জঘ্নুঃ পাণ্ডবসৃঞ্জয়াঃ
তথা নিপুণমস্ত্রেষু সর্বশস্ত্রভৃতামপি
8.2
রথভঙ্গো বভূবাস্য ধনুর্বাশীর্যতাস্যতঃ
প্রমত্তো বাভবদ্দ্রোণস্ততো মৃত্যুমুপেয়িবান্
8.3
কথং নু পার্ষতস্তাত শত্রুভির্দুষ্প্রধর্ষণম্
কিরন্তমিষুসংঘাতান্রুক্মপুঙ্খাননেকশঃ
8.4
ক্ষিপ্রহস্তং দ্বিজশ্রেষ্ঠং কৃতিনং চিত্রয়োধিনম্
দূরেষুপাতিনং দান্তমস্ত্রয়ুদ্ধে চ পারগম্
8.5
পাঞ্চালপুত্রো ন্যবধীদ্দিষ্ট্যা স বরমচ্যুতম্
কুর্বাণং দারুণং কর্ম রণে যত্তং মহারথম্
8.6
ব্যক্তং দিষ্টং হি বলবত্পৌরুষাদিতি মে মতিঃ
যদ্দ্রোণো নিহতঃ শূরঃ পার্ষতেন মহাত্মনা
8.7
অস্ত্রং চতুর্বিধং বীরে যস্মিন্নাসীত্প্রতিষ্ঠিতম্
তমিষ্বস্ত্রবরাচার্যং দ্রোণং শংসসি মে হতম্
8.8
শ্রুত্বা হতং রুক্মরথং বৈয়াঘ্রপরিবারণম্
জাতরূপপরিষ্কারং নাদ্য শোকমপানুদে
8.9
ন নূনং পরদুঃখেন কশ্চিন্ম্রিয়তি সংজয়
যত্র দ্রোণমহং শ্রুত্বা হতং জীবামি ন ম্রিয়ে
8.10
অশ্মসারময়ং নূনং হৃদয়ং সুদৃঢং মম
যচ্ছ্রুত্বা নিহতং দ্রোণং শতধা ন বিদীর্যতে
8.11
ব্রাহ্মে বেদে তথেষ্বস্ত্রে যমুপাসন্গুণার্থিনঃ
ব্রাহ্মণা রাজপুত্রাশ্চ স কথং মৃত্যুনা হতঃ
8.12
শোষণং সাগরস্যেব মেরোরিব বিসর্পণম্
পতনং ভাস্করস্যেব ন মৃষ্যে দ্রোণপাতনম্
8.13
দৃপ্তানাং প্রতিষেদ্ধাসীদ্ধার্মিকানাং চ রক্ষিতা
যোঽত্যাক্ষীত্কৃপণস্যার্থে প্রাণানপি পরংতপঃ
8.14
মন্দানাং মম পুত্রাণাং জয়াশা যস্য বিক্রমে
বৃহস্পত্যুশনস্তুল্যো বুদ্ধ্যা স নিহতঃ কথম্
8.15
তে চ শোণা বৃহন্তোঽশ্বাঃ সৈন্ধবা হেমমালিনঃ
রথে বাতজবা যুক্তাঃ সর্বশব্দাতিগা রণে
8.16
বলিনো ঘোষিণো দান্তাঃ সৈন্ধবাঃ সাধুবাহিনঃ
দৃঢাঃ সংগ্রামমধ্যেষু কচ্চিদাসন্ন বিহ্বলাঃ
8.17
করিণাং বৃংহতাং যুদ্ধে শঙ্খদুন্দুভিনিস্বনম্
জ্যাক্ষেপশরবর্ষাণাং শস্ত্রাণাং চ সহিষ্ণবঃ
8.18
আশংসন্তঃ পরাঞ্জেতুং জিতশ্বাসা জিতব্যথাঃ
হয়াঃ প্রজবিতাঃ শীঘ্রা ভারদ্বাজরথোদ্বহাঃ
8.19
তে স্ম রুক্মরথে যুক্তা নরবীরসমাহিতাঃ
কথং নাভ্যতরংস্তাত পাণ্ডবানামনীকিনীম্
8.20
জাতরূপপরিষ্কারমাস্থায় রথমুত্তমম্
ভারদ্বাজঃ কিমকরোচ্ছূরঃ সংক্রন্দনো যুধি
8.21
বিদ্যাং যস্যোপজীবন্তি সর্বলোকধনুর্ভৃতঃ
স সত্যসংধো বলবান্দ্রোণঃ কিমকরোদ্যুধি
8.22
দিবি শক্রমিব শ্রেষ্ঠং মহামাত্রং ধনুর্ভৃতাম্
কে নু তং রৌদ্রকর্মাণং যুদ্ধে প্রত্যুদ্যয়ূ রথাঃ
8.23
ননু রুক্মরথং দৃষ্ট্বা প্রদ্রবন্তি স্ম পাণ্ডবাঃ
দিব্যমস্ত্রং বিকুর্বাণং সেনাং ক্ষিণ্বন্তমব্যয়ম্
8.24
উতাহো সর্বসৈন্যেন ধর্মরাজঃ সহানুজঃ
পাঞ্চাল্যপ্রগ্রহো দ্রোণং সর্বতঃ সমবারয়ৎ
8.25
নূনমাবারয়ত্পার্থো রথিনোঽন্যানজিহ্মগৈঃ
ততো দ্রোণং সমারোহত্পার্ষতঃ পাপকর্মকৃৎ
8.26
ন হ্যন্যং পরিপশ্যামি বধে কংচন শুষ্মিণঃ
ধৃষ্টদ্যুম্নাদৃতে রৌদ্রাত্পাল্যমানাত্কিরীটিনা
8.27
তৈর্বৃতঃ সর্বতঃ শূরৈঃ পাঞ্চাল্যাপসদস্ততঃ
কেকয়ৈশ্চেদিকারূষৈর্মত্স্যৈরন্যৈশ্চ ভূমিপৈঃ
8.28
ব্যাকুলীকৃতমাচার্যং পিপীলৈরুরগং যথা
কর্মণ্যসুকরে সক্তং জঘানেতি মতির্মম
8.29
যোঽধীত্য চতুরো বেদান্সর্বানাখ্যানপঞ্চমান্
ব্রাহ্মণানাং প্রতিষ্ঠাসীত্স্রোতসামিব সাগরঃ
স কথং ব্রাহ্মণো বৃদ্ধঃ শস্ত্রেণ বধমাপ্তবান্
8.30
অমর্ষণো মর্ষিতবান্ক্লিশ্যমানঃ সদা ময়া
অনর্হমাণঃ কৌন্তেয়ঃ কর্মণস্তস্য তত্ফলম্
8.31
যস্য কর্মানুজীবন্তি লোকে সর্বধনুর্ভৃতঃ
স সত্যসংধঃ সুকৃতী শ্রীকামৈর্নিহতঃ কথম্
8.32
দিবি শক্র ইব শ্রেষ্ঠো মহাসত্ত্বো মহাবলঃ
স কথং নিহতঃ পার্থৈঃ ক্ষুদ্রমত্স্যৈর্যথা তিমিঃ
8.33
ক্ষিপ্রহস্তশ্চ বলবান্দৃঢধন্বারিমর্দনঃ
ন যস্য জীবিতাকাঙ্ক্ষী বিষয়ং প্রাপ্য জীবতি
8.34
যং দ্বৌ ন জহতঃ শব্দৌ জীবমানং কদাচন
ব্রাহ্মশ্চ বেদকামানাং জ্যাঘোষশ্চ ধনুর্ভৃতাম্
8.35
নাহং মৃষ্যে হতং দ্রোণং সিংহদ্বিরদবিক্রমম্
কথং সংজয় দুর্ধর্ষমনাধৃষ্যয়শোবলম্
8.36
কেঽরক্ষন্দক্ষিণং চক্রং সব্যং কে চ মহাত্মনঃ
পুরস্তাত্কে চ বীরস্য যুধ্যমানস্য সংয়ুগে
8.37
কে চ তত্র তনুং ত্যক্ত্বা প্রতীপং মৃত্যুমাব্রজন্
দ্রোণস্য সমরে বীরাঃ কেঽকুর্বন্ত পরাং ধৃতিম্
8.38
এতদার্যেণ কর্তব্যং কৃচ্ছ্রাস্বাপত্সু সংজয়
পরাক্রমেদ্যথাশক্ত্যা তচ্চ তস্মিন্প্রতিষ্ঠিতম্
8.39
মুহ্যতে মে মনস্তাত কথা তাবন্নিবর্ত্যতাম্
ভূয়স্তু লব্ধসংজ্ঞস্ত্বা পরিপ্রক্ষ্যামি সংজয়