UtshovChapter 76
76.1
संजय उवाच
स्रंसन्त इव मज्जानस्तावकानां भयान्नृप
तौ दृष्ट्वा समतिक्रान्तौ वासुदेवधनंजयौ
Sanjaya uvacha
Sransanta iva majjanastavakanam bhayannripa
Tau drishtva samatikrantau vasudevadhananjayau
76.2
सर्वे तु प्रतिसंरब्धा ह्रीमन्तः सत्त्वचोदिताः
स्थिरीबूता महात्मानः प्रत्यगच्छन्धनंजयम्
Sarve tu pratisanrabdha hrimantah sattvachoditah
Sthiributa mahatmanah pratyagachchhandhananjayam
76.3
ये गताः पाण्डवं युद्धे क्रोधामर्षसमन्विताः
तेऽद्यापि न निवर्तन्ते सिन्धवः सागरादिव
Ye gatah pandavam yuddhe krodhamarshasamanvitah
Tedyapi na nivartante sindhavah sagaradiva
76.4
असन्तस्तु न्यवर्तन्त वेदेभ्य इव नास्तिकाः
नरकं भजमानास्ते प्रत्यपद्यन्त किल्बिषम्
Asantastu nyavartanta vedebhya iva nastikah
Narakam bhajamanaste pratyapadyanta kilbisham
76.5
तावतीत्य रथानीकं विमुक्तौ पुरुषर्षभौ
ददृशाते यथा राहोरास्यान्मुक्तौ प्रभाकरौ
Tavatitya rathanikam vimuktau purusharshabhau
Dadrishate yatha rahorasyanmuktau prabhakarau
76.6
मत्स्याविव महाजालं विदार्य विगतज्वरौ
तथा कृष्णावदृश्येतां सेनाजालं विदार्य तत्
Matsyaviva mahajalam vidarya vigatajvarau
Tatha krishnavadrishyetam senajalam vidarya tat
76.7
विमुक्तौ शस्त्रसंबाधाद्द्रोणानीकात्सुदुर्भिदात्
अदृश्येतां महात्मानौ कालसूर्याविवोदितौ
Vimuktau shastrasambadhaddronanikatsudurbhidat
Adrishyetam mahatmanau kalasuryavivoditau
76.8
अस्त्रसंबाधनिर्मुक्तौ विमुक्तौ शस्त्रसंकटात्
अदृश्येतां महात्मानौ शत्रुसंबाधकारिणौ
Astrasambadhanirmuktau vimuktau shastrasankatat
Adrishyetam mahatmanau shatrusambadhakarinau
76.9
विमुक्तौ ज्वलनस्पर्शान्मकरास्याज्झषाविव
व्यक्षोभयेतां सेनां तौ समुद्रं मकराविव
Vimuktau jvalanasparshanmakarasyajjhashaviva
Vyakshobhayetam senam tau samudram makaraviva
76.10
तावकास्तव पुत्राश्च द्रोणानीकस्थयोस्तयोः
नैतौ तरिष्यतो द्रोणमिति चक्रुस्तदा मतिम्
Tavakastava putrashcha dronanikasthayostayoh
Naitau tarishyato dronamiti chakrustada matim
76.11
तौ तु दृष्ट्वा व्यतिक्रान्तौ द्रोणानीकं महाद्युती
नाशशंसुर्महाराज सिन्धुराजस्य जीवितम्
Tau tu drishtva vyatikrantau dronanikam mahadyuti
Nashashansurmaharaja sindhurajasya jivitam
76.12
आशा बलवती राजन्पुत्राणामभवत्तव
द्रोणहार्दिक्ययोः कृष्णौ न मोक्ष्येते इति प्रभो
Asha balavati rajanputranamabhavattava
Dronahardikyayoh krishnau na mokshyete iti prabho
76.13
तामाशां विफलां कृत्वा निस्तीर्णौ तौ परंतपौ
द्रोणानीकं महाराज भोजानीकं च दुस्तरम्
Tamasham viphalam kritva nistirnau tau parantapau
Dronanikam maharaja bhojanikam cha dustaram
76.14
अथ दृष्ट्वा व्यतिक्रान्तौ ज्वलिताविव पावकौ
निराशाः सिन्धुराजस्य जीवितं नाशशंसिरे
Atha drishtva vyatikrantau jvalitaviva pavakau
Nirashah sindhurajasya jivitam nashashansire
76.15
मिथश्च समभाषेतामभीतौ भयवर्धनौ
जयद्रथवधे वाचस्तास्ताः कृष्णधनंजयौ
Mithashcha samabhashetamabhitau bhayavardhanau
Jayadrathavadhe vachastastah krishnadhananjayau
76.16
असौ मध्ये कृतः षड्भिर्धार्तराष्ट्रैर्महारथैः
चक्षुर्विषयसंप्राप्तो न नौ मोक्ष्यति सैन्धवः
Asau madhye kritah shadbhirdhartarashtrairmaharathaih
Chakshurvishayasamprapto na nau mokshyati saindhavah
76.17
यद्यस्य समरे गोप्ता शक्रो देवगणैः सह
तथाप्येनं हनिष्याव इति कृष्णावभाषताम्
Yadyasya samare gopta shakro devaganaih saha
Tathapyenam hanishyava iti krishnavabhashatam
76.18
इति कृष्णौ महाबाहू मिथः कथयतां तदा
सिन्धुराजमवेक्षन्तौ तत्पुत्रास्तव शुश्रुवुः
Iti krishnau mahabahu mithah kathayatam tada
Sindhurajamavekshantau tatputrastava shushruvuh
76.19
अतीत्य मरुधन्वेव प्रयान्तौ तृषितौ गजौ
पीत्वा वारि समाश्वस्तौ तथैवास्तामरिंदमौ
Atitya marudhanveva prayantau trishitau gajau
Pitva vari samashvastau tathaivastamarindamau
76.20
व्याघ्रसिंहगजाकीर्णानतिक्रम्येव पर्वतान्
अदृश्येतां महाबाहू यथा मृत्युजरातिगौ
Vyaghrasinhagajakirnanatikramyeva parvatan
Adrishyetam mahabahu yatha mrityujaratigau
76.21
तथा हि मुखवर्णोऽयमनयोरिति मेनिरे
तावका दृश्य मुक्तौ तौ विक्रोशन्ति स्म सर्वतः
Tatha hi mukhavarnoyamanayoriti menire
Tavaka drishya muktau tau vikroshanti sma sarvatah
76.22
द्रोणादाशीविषाकाराज्ज्वलितादिव पावकात्
अन्येभ्यः पार्थिवेभ्यश्च भास्वन्ताविव भास्करौ
Dronadashivishakarajjvalitadiva pavakat
Anyebhyah parthivebhyashcha bhasvantaviva bhaskarau
76.23
तौ मुक्तौ सागरप्रख्याद्द्रोणानीकादरिंदमौ
अदृश्येतां मुदा युक्तौ समुत्तीर्यार्णवं यथा
Tau muktau sagaraprakhyaddronanikadarindamau
Adrishyetam muda yuktau samuttiryarnavam yatha
76.24
शस्त्रौघान्महतो मुक्तौ द्रोणहार्दिक्यरक्षितान्
रोचमानावदृश्येतामिन्द्राग्न्योः सदृशौ रणे
Shastraughanmahato muktau dronahardikyarakshitan
Rochamanavadrishyetamindragnyoh sadrishau rane
76.25
उद्भिन्नरुधिरौ कृष्णौ भारद्वाजस्य सायकैः
शितैश्चितौ व्यरोचेतां कर्णिकारैरिवाचलौ
Udbhinnarudhirau krishnau bharadvajasya sayakaih
Shitaishchitau vyarochetam karnikarairivachalau
76.26
द्रोणग्राहह्रदान्मुक्तौ शक्त्याशीविषसंकटात्
अयःशरोग्रमकरात्क्षत्रियप्रवराम्भसः
Dronagrahahradanmuktau shaktyashivishasankatat
Ayahsharogramakaratkshatriyapravarambhasah
76.27
ज्याघोषतलनिर्ह्रादाद्गदानिस्त्रिंशविद्युतः
द्रोणास्त्रमेघान्निर्मुक्तौ सूर्येन्दू तिमिरादिव
Jyaghoshatalanirhradadgadanistrinshavidyutah
Dronastrameghannirmuktau suryendu timiradiva
76.28
बाहुभ्यामिव संतीर्णौ सिन्धुषष्ठाः समुद्रगाः
तपान्ते सरितः पूर्णा महाग्राहसमाकुलाः
Bahubhyamiva santirnau sindhushashthah samudragah
Tapante saritah purna mahagrahasamakulah
76.29
इति कृष्णौ महेष्वासौ यशसा लोकविश्रुतौ
सर्वभूतान्यमन्यन्त द्रोणास्त्रबलविस्मयात्
Iti krishnau maheshvasau yashasa lokavishrutau
Sarvabhutanyamanyanta dronastrabalavismayat
76.30
जयद्रथं समीपस्थमवेक्षन्तौ जिघांसया
रुरुं निपाने लिप्सन्तौ व्याघ्रवत्तावतिष्ठताम्
Jayadratham samipasthamavekshantau jighansaya
Rurum nipane lipsantau vyaghravattavatishthatam
76.31
यथा हि मुखवर्णोऽयमनयोरिति मेनिरे
तव योधा महाराज हतमेव जयद्रथम्
Yatha hi mukhavarnoyamanayoriti menire
Tava yodha maharaja hatameva jayadratham
76.32
लोहिताक्षौ महाबाहू संयत्तौ कृष्णपाण्डवौ
सिन्धुराजमभिप्रेक्ष्य हृष्टौ व्यनदतां मुहुः
Lohitakshau mahabahu sanyattau krishnapandavau
Sindhurajamabhiprekshya hrishtau vyanadatam muhuh
76.33
शौरेरभीशुहस्तस्य पार्थस्य च धनुष्मतः
तयोरासीत्प्रतिभ्राजः सूर्यपावकयोरिव
Shaurerabhishuhastasya parthasya cha dhanushmatah
Tayorasitpratibhrajah suryapavakayoriva
76.34
हर्ष एव तयोरासीद्द्रोणानीकप्रमुक्तयोः
समीपे सैन्धवं दृष्ट्वा श्येनयोरामिषं यथा
Harsha eva tayorasiddronanikapramuktayoh
Samipe saindhavam drishtva shyenayoramisham yatha
76.35
तौ तु सैन्धवमालोक्य वर्तमानमिवान्तिके
सहसा पेततुः क्रुद्धौ क्षिप्रं श्येनाविवामिषे
Tau tu saindhavamalokya vartamanamivantike
Sahasa petatuh kruddhau kshipram shyenavivamishe
76.36
तौ तु दृष्ट्वा व्यतिक्रान्तौ हृषीकेशधनंजयौ
सिन्धुराजस्य रक्षार्थं पराक्रान्तः सुतस्तव
Tau tu drishtva vyatikrantau hrishikeshadhananjayau
Sindhurajasya rakshartham parakrantah sutastava
76.37
द्रोणेनाबद्धकवचो राजा दुर्योधनस्तदा
ययावेकरथेनाजौ हयसंस्कारवित्प्रभो
Dronenabaddhakavacho raja duryodhanastada
Yayavekarathenajau hayasanskaravitprabho
76.38
कृष्णपार्थौ महेष्वासौ व्यतिक्रम्याथ ते सुतः
अग्रतः पुण्डरीकाक्षं प्रतीयाय नराधिप
Krishnaparthau maheshvasau vyatikramyatha te sutah
Agratah pundarikaksham pratiyaya naradhipa
76.39
ततः सर्वेषु सैन्येषु वादित्राणि प्रहृष्टवत्
प्रावाद्यन्समतिक्रान्ते तव पुत्रे धनंजयम्
Tatah sarveshu sainyeshu vaditrani prahrishtavat
Pravadyansamatikrante tava putre dhananjayam
76.40
सिंहनादरवाश्चासञ्शङ्खदुन्दुभिमिश्रिताः
दृष्ट्वा दुर्योधनं तत्र कृष्णयोः प्रमुखे स्थितम्
Sinhanadaravashchasanshankhadundubhimishritah
Drishtva duryodhanam tatra krishnayoh pramukhe sthitam
76.41
ये च ते सिन्धुराजस्य गोप्तारः पावकोपमाः
ते प्रहृष्यन्त समरे दृष्ट्वा पुत्रं तवाभिभो
Ye cha te sindhurajasya goptarah pavakopamah
Te prahrishyanta samare drishtva putram tavabhibho
76.42
दृष्ट्वा दुर्योधनं कृष्णस्त्वतिक्रान्तं सहानुगम्
अब्रवीदर्जुनं राजन्प्राप्तकालमिदं वचः
Drishtva duryodhanam krishnastvatikrantam sahanugam
Abravidarjunam rajanpraptakalamidam vachah