UtshovChapter 89
89.1
धृतराष्ट्र उवाच
एवं बहुविधं सैन्यमेवं प्रविचितं वरम्
व्यूढमेवं यथान्यायमेवं बहु च संजय
Dhritarashtra uvacha
Evam bahuvidham sainyamevam pravichitam varam
Vyudhamevam yathanyayamevam bahu cha sanjaya
89.2
नित्यं पूजितमस्माभिरभिकामं च नः सदा
प्रौढमत्यद्भुताकारं पुरस्ताद्दृढविक्रमम्
Nityam pujitamasmabhirabhikamam cha nah sada
Praudhamatyadbhutakaram purastaddridhavikramam
89.3
नातिवृद्धमबालं च न कृशं नातिपीवरम्
लघुवृत्तायतप्राणं सारगात्रमनामयम्
Nativriddhamabalam cha na krisham natipivaram
Laghuvrittayatapranam saragatramanamayam
89.4
आत्तसंनाहसंपन्नं बहुशस्त्रपरिच्छदम्
शस्त्रग्रहणविद्यासु बह्वीषु परिनिष्ठितम्
Attasannahasampannam bahushastraparichchhadam
Shastragrahanavidyasu bahvishu parinishthitam
89.5
आरोहे पर्यवस्कन्दे सरणे सान्तरप्लुते
सम्यक्प्रहरणे याने व्यपयाने च कोविदम्
Arohe paryavaskande sarane santaraplute
Samyakpraharane yane vyapayane cha kovidam
89.6
नागेष्वश्वेषु बहुशो रथेषु च परीक्षितम्
परीक्ष्य च यथान्यायं वेतनेनोपपादितम्
Nageshvashveshu bahusho ratheshu cha parikshitam
Parikshya cha yathanyayam vetanenopapaditam
89.7
न गोष्ठ्या नोपचारेण न संबन्धनिमित्ततः
नानाहूतो न ह्यभृतो मम सैन्ये बभूव ह
Na goshthya nopacharena na sambandhanimittatah
Nanahuto na hyabhrito mama sainye babhuva ha
89.8
कुलीनार्यजनोपेतं तुष्टपुष्टमनुद्धतम्
कृतमानोपकारं च यशस्वि च मनस्वि च
Kulinaryajanopetam tushtapushtamanuddhatam
Kritamanopakaram cha yashasvi cha manasvi cha
89.9
सचिवैश्चापरैर्मुख्यैर्बहुभिर्मुख्यकर्मभिः
लोकपालोपमैस्तात पालितं नरसत्तमैः
Sachivaishchaparairmukhyairbahubhirmukhyakarmabhih
Lokapalopamaistata palitam narasattamaih
89.10
बहुभिः पार्थिवैर्गुप्तमस्मत्प्रियचिकीर्षुभिः
अस्मानभिसृतैः कामात्सबलैः सपदानुगैः
Bahubhih parthivairguptamasmatpriyachikirshubhih
Asmanabhisritaih kamatsabalaih sapadanugaih
89.11
महोदधिमिवापूर्णमापगाभिः समन्ततः
अपक्षैः पक्षिसंकाशै रथैरश्वैश्च संवृतम्
Mahodadhimivapurnamapagabhih samantatah
Apakshaih pakshisankashai rathairashvaishcha sanvritam
89.12
योधाक्षय्यजलं भीमं वाहनोर्मितरङ्गिणम्
क्षेपण्यसिगदाशक्तिशरप्रासझषाकुलम्
Yodhakshayyajalam bhimam vahanormitaranginam
Kshepanyasigadashaktisharaprasajhashakulam
89.13
ध्वजभूषणसंबाधं रत्नपट्टेन संचितम्
वाहनैरपि धावद्भिर्वायुवेगविकम्पितम्
Dhvajabhushanasambadham ratnapattena sanchitam
Vahanairapi dhavadbhirvayuvegavikampitam
89.14
द्रोणगम्भीरपातालं कृतवर्ममहाह्रदम्
जलसंधमहाग्राहं कर्णचन्द्रोदयोद्धतम्
Dronagambhirapatalam kritavarmamahahradam
Jalasandhamahagraham karnachandrodayoddhatam
89.15
गते सैन्यार्णवं भित्त्वा तरसा पाण्डवर्षभे
संजयैकरथेनैव युयुधाने च मामकम्
Gate sainyarnavam bhittva tarasa pandavarshabhe
Sanjayaikarathenaiva yuyudhane cha mamakam
89.16
तत्र शेषं न पश्यामि प्रविष्टे सव्यसाचिनि
सात्वते च रथोदारे मम सैन्यस्य संजय
Tatra shesham na pashyami pravishte savyasachini
Satvate cha rathodare mama sainyasya sanjaya
89.17
तौ तत्र समतिक्रान्तौ दृष्ट्वाभीतौ तरस्विनौ
सिन्धुराजं च संप्रेक्ष्य गाण्डीवस्येषुगोचरे
Tau tatra samatikrantau drishtvabhitau tarasvinau
Sindhurajam cha samprekshya gandivasyeshugochare
89.18
किं तदा कुरवः कृत्यं विदधुः कालचोदिताः
दारुणैकायने काले कथं वा प्रतिपेदिरे
Kim tada kuravah krityam vidadhuh kalachoditah
Darunaikayane kale katham va pratipedire
89.19
ग्रस्तान्हि कौरवान्मन्ये मृत्युना तात संगतान्
विक्रमो हि रणे तेषां न तथा दृश्यतेऽद्य वै
Grastanhi kauravanmanye mrityuna tata sangatan
Vikramo hi rane tesham na tatha drishyatedya vai
89.20
अक्षतौ संयुगे तत्र प्रविष्टौ कृष्णपाण्डवौ
न च वारयिता कश्चित्तयोरस्तीह संजय
Akshatau sanyuge tatra pravishtau krishnapandavau
Na cha varayita kashchittayorastiha sanjaya
89.21
भृताश्च बहवो योधाः परीक्ष्यैव महारथाः
वेतनेन यथायोग्यं प्रियवादेन चापरे
Bhritashcha bahavo yodhah parikshyaiva maharathah
Vetanena yathayogyam priyavadena chapare
89.22
अकारणभृतस्तात मम सैन्ये न विद्यते
कर्मणा ह्यनुरूपेण लभ्यते भक्तवेतनम्
Akaranabhritastata mama sainye na vidyate
Karmana hyanurupena labhyate bhaktavetanam
89.23
न च योधोऽभवत्कश्चिन्मम सैन्ये तु संजय
अल्पदानभृतस्तात न कुप्यभृतको नरः
Na cha yodhobhavatkashchinmama sainye tu sanjaya
Alpadanabhritastata na kupyabhritako narah
89.24
पूजिता हि यथाशक्त्या दानमानासनैर्मया
तथा पुत्रैश्च मे तात ज्ञातिभिश्च सबान्धवैः
Pujita hi yathashaktya danamanasanairmaya
Tatha putraishcha me tata gyatibhishcha sabandhavaih
89.25
ते च प्राप्यैव संग्रामे निर्जिताः सव्यसाचिना
शैनेयेन परामृष्टाः किमन्यद्भागधेयतः
Te cha prapyaiva sangrame nirjitah savyasachina
Shaineyena paramrishtah kimanyadbhagadheyatah
89.26
रक्ष्यते यश्च संग्रामे ये च संजय रक्षिणः
एकः साधारणः पन्था रक्ष्यस्य सह रक्षिभिः
Rakshyate yashcha sangrame ye cha sanjaya rakshinah
Ekah sadharanah pantha rakshyasya saha rakshibhih
89.27
अर्जुनं समरे दृष्ट्वा सैन्धवस्याग्रतः स्थितम्
पुत्रो मम भृशं मूढः किं कार्यं प्रत्यपद्यत
Arjunam samare drishtva saindhavasyagratah sthitam
Putro mama bhrisham mudhah kim karyam pratyapadyata
89.28
सात्यकिं च रणे दृष्ट्वा प्रविशन्तमभीतवत्
किं नु दुर्योधनः कृत्यं प्राप्तकालममन्यत
Satyakim cha rane drishtva pravishantamabhitavat
Kim nu duryodhanah krityam praptakalamamanyata
89.29
सर्वशस्त्रातिगौ सेनां प्रविष्टौ रथसत्तमौ
दृष्ट्वा कां वै धृतिं युद्धे प्रत्यपद्यन्त मामकाः
Sarvashastratigau senam pravishtau rathasattamau
Drishtva kam vai dhritim yuddhe pratyapadyanta mamakah
89.30
दृष्ट्वा कृष्णं तु दाशार्हमर्जुनार्थे व्यवस्थितम्
शिनीनामृषभं चैव मन्ये शोचन्ति पुत्रकाः
Drishtva krishnam tu dasharhamarjunarthe vyavasthitam
Shininamrishabham chaiva manye shochanti putrakah
89.31
दृष्ट्वा सेनां व्यतिक्रान्तां सात्वतेनार्जुनेन च
पलायमानांश्च कुरून्मन्ये शोचन्ति पुत्रकाः
Drishtva senam vyatikrantam satvatenarjunena cha
Palayamananshcha kurunmanye shochanti putrakah
89.32
विद्रुतान्रथिनो दृष्ट्वा निरुत्साहान्द्विषज्जये
पलायने कृतोत्साहान्मन्ये शोचन्ति पुत्रकाः
Vidrutanrathino drishtva nirutsahandvishajjaye
Palayane kritotsahanmanye shochanti putrakah
89.33
शून्यान्कृतान्रथोपस्थान्सात्वतेनार्जुनेन च
हतांश्च योधान्संदृश्य मन्ये शोचन्ति पुत्रकाः
Shunyankritanrathopasthansatvatenarjunena cha
Hatanshcha yodhansandrishya manye shochanti putrakah
89.34
व्यश्वनागरथान्दृष्ट्वा तत्र वीरान्सहस्रशः
धावमानान्रणे व्यग्रान्मन्ये शोचन्ति पुत्रकाः
Vyashvanagarathandrishtva tatra viransahasrashah
Dhavamananrane vyagranmanye shochanti putrakah
89.35
विवीरांश्च कृतानश्वान्विरथांश्च कृतान्नरान्
तत्र सात्यकिपार्थाभ्यां मन्ये शोचन्ति पुत्रकाः
Viviranshcha kritanashvanvirathanshcha kritannaran
Tatra satyakiparthabhyam manye shochanti putrakah
89.36
पत्तिसंघान्रणे दृष्ट्वा धावमानांश्च सर्वशः
निराशा विजये सर्वे मन्ये शोचन्ति पुत्रकाः
Pattisanghanrane drishtva dhavamananshcha sarvashah
Nirasha vijaye sarve manye shochanti putrakah
89.37
द्रोणस्य समतिक्रान्तावनीकमपराजितौ
क्षणेन दृष्ट्वा तौ वीरौ मन्ये शोचन्ति पुत्रकाः
Dronasya samatikrantavanikamaparajitau
Kshanena drishtva tau virau manye shochanti putrakah
89.38
संमूढोऽस्मि भृशं तात श्रुत्वा कृष्णधनंजयौ
प्रविष्टौ मामकं सैन्यं सात्वतेन सहाच्युतौ
Sammudhosmi bhrisham tata shrutva krishnadhananjayau
Pravishtau mamakam sainyam satvatena sahachyutau
89.39
तस्मिन्प्रविष्टे पृतनां शिनीनां प्रवरे रथे
भोजानीकं व्यतिक्रान्ते कथमासन्हि कौरवाः
Tasminpravishte pritanam shininam pravare rathe
Bhojanikam vyatikrante kathamasanhi kauravah
89.40
तथा द्रोणेन समरे निगृहीतेषु पाण्डुषु
कथं युद्धमभूत्तत्र तन्ममाचक्ष्व संजय
Tatha dronena samare nigrihiteshu pandushu
Katham yuddhamabhuttatra tanmamachakshva sanjaya
89.41
द्रोणो हि बलवाञ्शूरः कृतास्त्रो दृढविक्रमः
पाञ्चालास्तं महेष्वासं प्रत्ययुध्यन्कथं रणे
Drono hi balavanshurah kritastro dridhavikramah
Panchalastam maheshvasam pratyayudhyankatham rane
89.42
बद्धवैरास्तथा द्रोणे धर्मराजजयैषिणः
भारद्वाजस्तथा तेषु कृतवैरो महारथः
Baddhavairastatha drone dharmarajajayaishinah
Bharadvajastatha teshu kritavairo maharathah
89.43
अर्जुनश्चापि यच्चक्रे सिन्धुराजवधं प्रति
तन्मे सर्वं समाचक्ष्व कुशलो ह्यसि संजय
Arjunashchapi yachchakre sindhurajavadham prati
Tanme sarvam samachakshva kushalo hyasi sanjaya