UtshovChapter 94
94.1
संजय उवाच
द्रोणं स जित्वा पुरुषप्रवीर;स्तथैव हार्दिक्यमुखांस्त्वदीयान्
प्रहस्य सूतं वचनं बभाषे; शिनिप्रवीरः कुरुपुंगवाग्र्य
Sanjaya uvacha
Dronam sa jitva purushapravira;stathaiva hardikyamukhanstvadiyan
Prahasya sutam vachanam babhashe; shinipravirah kurupungavagrya
94.2
निमित्तमात्रं वयमत्र सूत; दग्धारयः केशवफल्गुनाभ्याम्
हतान्निहन्मेह नरर्षभेण; वयं सुरेशात्मसमुद्भवेन
Nimittamatram vayamatra suta; dagdharayah keshavaphalgunabhyam
Hatannihanmeha nararshabhena; vayam sureshatmasamudbhavena
94.3
तमेवमुक्त्वा शिनिपुंगवस्तदा; महामृधे सोऽग्र्यधनुर्धरोऽरिहा
किरन्समन्तात्सहसा शरान्बली; समापतच्छ्येन इवामिषं यथा
Tamevamuktva shinipungavastada; mahamridhe sogryadhanurdharoriha
Kiransamantatsahasa sharanbali; samapatachchhyena ivamisham yatha
94.4
तं यान्तमश्वैः शशिशङ्खवर्णै;र्विगाह्य सैन्यं पुरुषप्रवीरम्
नाशक्नुवन्वारयितुं समन्ता;दादित्यरश्मिप्रतिमं नराग्र्यम्
Tam yantamashvaih shashishankhavarnai;rvigahya sainyam purushapraviram
Nashaknuvanvarayitum samanta;dadityarashmipratimam naragryam
94.5
असह्यविक्रान्तमदीनसत्त्वं; सर्वे गणा भारत दुर्विषह्यम्
सहस्रनेत्रप्रतिमप्रभावं; दिवीव सूर्यं जलदव्यपाये
Asahyavikrantamadinasattvam; sarve gana bharata durvishahyam
Sahasranetrapratimaprabhavam; diviva suryam jaladavyapaye
94.6
अमर्षपूर्णस्त्वतिचित्रयोधी; शरासनी काञ्चनवर्मधारी
सुदर्शनः सात्यकिमापतन्तं; न्यवारयद्राजवरः प्रसह्य
Amarshapurnastvatichitrayodhi; sharasani kanchanavarmadhari
Sudarshanah satyakimapatantam; nyavarayadrajavarah prasahya
94.7
तयोरभूद्भरत संप्रहारः; सुदारुणस्तं समभिप्रशंसन्
योधास्त्वदीयाश्च हि सोमकाश्च; वृत्रेन्द्रयोर्युद्धमिवामरौघाः
Tayorabhudbharata sampraharah; sudarunastam samabhiprashansan
Yodhastvadiyashcha hi somakashcha; vritrendrayoryuddhamivamaraughah
94.8
शरैः सुतीक्ष्णैः शतशोऽभ्यविध्य;त्सुदर्शनः सात्वतमुख्यमाजौ
अनागतानेव तु तान्पृषत्कां;श्चिच्छेद बाणैः शिनिपुंगवोऽपि
Sharaih sutikshnaih shatashobhyavidhya;tsudarshanah satvatamukhyamajau
Anagataneva tu tanprishatkam;shchichchheda banaih shinipungavopi
94.9
तथैव शक्रप्रतिमोऽपि सात्यकिः; सुदर्शने यान्क्षिपति स्म सायकान्
द्विधा त्रिधा तानकरोत्सुदर्शनः; शरोत्तमैः स्यन्दनवर्यमास्थितः
Tathaiva shakrapratimopi satyakih; sudarshane yankshipati sma sayakan
Dvidha tridha tanakarotsudarshanah; sharottamaih syandanavaryamasthitah
94.10
संप्रेक्ष्य बाणान्निहतांस्तदानीं; सुदर्शनः सात्यकिबाणवेगैः
क्रोधाद्दिधक्षन्निव तिग्मतेजाः; शरानमुञ्चत्तपनीयचित्रान्
Samprekshya banannihatanstadanim; sudarshanah satyakibanavegaih
Krodhaddidhakshanniva tigmatejah; sharanamunchattapaniyachitran
94.11
पुनः स बाणैस्त्रिभिरग्निकल्पै;राकर्णपूर्णैर्निशितैः सुपुङ्खैः
विव्याध देहावरणं विभिद्य; ते सात्यकेराविविशुः शरीरम्
Punah sa banaistribhiragnikalpai;rakarnapurnairnishitaih supunkhaih
Vivyadha dehavaranam vibhidya; te satyakeravivishuh shariram
94.12
तथैव तस्यावनिपालपुत्रः; संधाय बाणैरपरैर्ज्वलद्भिः
आजघ्निवांस्तान्रजतप्रकाशां;श्चतुर्भिरश्वांश्चतुरः प्रसह्य
Tathaiva tasyavanipalaputrah; sandhaya banairaparairjvaladbhih
Ajaghnivanstanrajataprakasham;shchaturbhirashvanshchaturah prasahya
94.13
तथा तु तेनाभिहतस्तरस्वी; नप्ता शिनेरिन्द्रसमानवीर्यः
सुदर्शनस्येषुगणैः सुतीक्ष्णै;र्हयान्निहत्याशु ननाद नादम्
Tatha tu tenabhihatastarasvi; napta shinerindrasamanaviryah
Sudarshanasyeshuganaih sutikshnai;rhayannihatyashu nanada nadam
94.14
अथास्य सूतस्य शिरो निकृत्य; भल्लेन वज्राशनिसंनिभेन
सुदर्शनस्यापि शिनिप्रवीरः; क्षुरेण चिच्छेद शिरः प्रसह्य
Athasya sutasya shiro nikritya; bhallena vajrashanisannibhena
Sudarshanasyapi shinipravirah; kshurena chichchheda shirah prasahya
94.15
सकुण्डलं पूर्णशशिप्रकाशं; भ्राजिष्णु वक्त्रं निचकर्त देहात्
यथा पुरा वज्रधरः प्रसह्य; बलस्य संख्येऽतिबलस्य राजन्
Sakundalam purnashashiprakasham; bhrajishnu vaktram nichakarta dehat
Yatha pura vajradharah prasahya; balasya sankhyetibalasya rajan
94.16
निहत्य तं पार्थिवपुत्रपौत्रं; रणे यदूनामृषभस्तरस्वी
मुदा समेतः परया महात्मा; रराज राजन्सुरराजकल्पः
Nihatya tam parthivaputrapautram; rane yadunamrishabhastarasvi
Muda sametah paraya mahatma; raraja rajansurarajakalpah
94.17
ततो ययावर्जुनमेव येन; निवार्य सैन्यं तव मार्गणौघैः
सदश्वयुक्तेन रथेन निर्या;ल्लोकान्विसिस्मापयिषुर्नृवीरः
Tato yayavarjunameva yena; nivarya sainyam tava marganaughaih
Sadashvayuktena rathena nirya;llokanvisismapayishurnrivirah
94.18
तत्तस्य विस्मापयनीयमग्र्य;मपूजयन्योधवराः समेताः
यद्वर्तमानानिषुगोचरेऽरी;न्ददाह बाणैर्हुतभुग्यथैव
Tattasya vismapayaniyamagrya;mapujayanyodhavarah sametah
Yadvartamananishugochareri;ndadaha banairhutabhugyathaiva