UtshovChapter 114
114.1
संजय उवाच
ततः कर्णो महाराज भीमं विद्ध्वा त्रिभिः शरैः
मुमोच शरवर्षाणि चित्राणि च बहूनि च
Sanjaya uvacha
Tatah karno maharaja bhimam viddhva tribhih sharaih
Mumocha sharavarshani chitrani cha bahuni cha
114.2
वध्यमानो महाराज सूतपुत्रेण पाण्डवः
न विव्यथे भीमसेनो भिद्यमान इवाचलः
Vadhyamano maharaja sutaputrena pandavah
Na vivyathe bhimaseno bhidyamana ivachalah
114.3
स कर्णं कर्णिना कर्णे पीतेन निशितेन च
विव्याध युधि राजेन्द्र भीमसेनः पतत्रिणा
Sa karnam karnina karne pitena nishitena cha
Vivyadha yudhi rajendra bhimasenah patatrina
114.4
स कुण्डलं महत्कर्णात्कर्णस्यापातयद्भुवि
तपनीयं महाराज दीप्तं ज्योतिरिवाम्बरात्
Sa kundalam mahatkarnatkarnasyapatayadbhuvi
Tapaniyam maharaja diptam jyotirivambarat
114.5
अथापरेण भल्लेन सूतपुत्रं स्तनान्तरे
आजघान भृशं भीमः स्मयन्निव महाबलः
Athaparena bhallena sutaputram stanantare
Ajaghana bhrisham bhimah smayanniva mahabalah
114.6
पुनरस्य त्वरन्भीमो नाराचान्दश भारत
रणे प्रैषीन्महावेगान्यमदण्डोपमांस्तथा
Punarasya tvaranbhimo narachandasha bharata
Rane praishinmahaveganyamadandopamanstatha
114.7
ते ललाटं समासाद्य सूतपुत्रस्य मारिष
विविशुश्चोदितास्तेन वल्मीकमिव पन्नगाः
Te lalatam samasadya sutaputrasya marisha
Vivishushchoditastena valmikamiva pannagah
114.8
ललाटस्थैस्तु तैर्बाणैः सूतपुत्रो व्यरोचत
नीलोत्पलमयीं मालां धारयन्स पुरा यथा
Lalatasthaistu tairbanaih sutaputro vyarochata
Nilotpalamayim malam dharayansa pura yatha
114.9
ततः क्रुद्धो रणे कर्णः पीडितो दृढधन्वना
वेगं चक्रे महावेगो भीमसेनवधं प्रति
Tatah kruddho rane karnah pidito dridhadhanvana
Vegam chakre mahavego bhimasenavadham prati
114.10
तस्मै कर्णः शतं राजन्निषूणां गार्ध्रवाससाम्
अमर्षी बलवान्क्रुद्धः प्रेषयामास भारत
Tasmai karnah shatam rajannishunam gardhravasasam
Amarshi balavankruddhah preshayamasa bharata
114.11
ततः प्रासृजदुग्राणि शरवर्षाणि पाण्डवः
समरे तमनादृत्य नास्य वीर्यमचिन्तयत्
Tatah prasrijadugrani sharavarshani pandavah
Samare tamanadritya nasya viryamachintayat
114.12
ततः कर्णो महाराज पाण्डवं निशितैः शरैः
आजघानोरसि क्रुद्धः क्रुद्धरूपं परंतपः
Tatah karno maharaja pandavam nishitaih sharaih
Ajaghanorasi kruddhah kruddharupam parantapah
114.13
जीमूताविव चान्योन्यं तौ ववर्षतुराहवे
तलशब्दरवैश्चैव त्रासयन्तौ परस्परम्
Jimutaviva chanyonyam tau vavarshaturahave
Talashabdaravaishchaiva trasayantau parasparam
114.14
शरजालैश्च विविधैश्छादयामासतुर्मृधे
अन्योन्यं समरे क्रुद्धौ कृतप्रतिकृतैषिणौ
Sharajalaishcha vividhaishchhadayamasaturmridhe
Anyonyam samare kruddhau kritapratikritaishinau
114.15
ततो भीमो महाबाहू राधेयस्य महात्मनः
क्षुरप्रेण धनुश्छित्त्वा कर्णं विव्याध पत्रिणा
Tato bhimo mahabahu radheyasya mahatmanah
Kshuraprena dhanushchhittva karnam vivyadha patrina
114.16
तदपास्य धनुश्छिन्नं सूतपुत्रो महामनाः
अन्यत्कार्मुकमादत्त वेगघ्नं भारसाधनम्
Tadapasya dhanushchhinnam sutaputro mahamanah
Anyatkarmukamadatta vegaghnam bharasadhanam
114.17
दृष्ट्वा च कुरुसौवीरसैन्धवानां बलक्षयम्
सवर्मध्वजशस्त्रैश्च पतितैः संवृतां महीम्
Drishtva cha kurusauvirasaindhavanam balakshayam
Savarmadhvajashastraishcha patitaih sanvritam mahim
114.18
हस्त्यश्वनरदेहांश्च गतासून्प्रेक्ष्य सर्वतः
सूतपुत्रस्य संरम्भाद्दीप्तं वपुरजायत
Hastyashvanaradehanshcha gatasunprekshya sarvatah
Sutaputrasya sanrambhaddiptam vapurajayata
114.19
स विस्फार्य महच्चापं कार्तस्वरविभूषितम्
भीमं प्रैक्षत राधेयो राजन्घोरेण चक्षुषा
Sa vispharya mahachchapam kartasvaravibhushitam
Bhimam praikshata radheyo rajanghorena chakshusha
114.20
ततः क्रुद्धः शरानस्यन्सूतपुत्रो व्यरोचत
मध्यंदिनगतोऽर्चिष्माञ्शरदीव दिवाकरः
Tatah kruddhah sharanasyansutaputro vyarochata
Madhyandinagatorchishmansharadiva divakarah
114.21
मरीचिविकचस्येव राजन्भानुमतो वपुः
आसीदाधिरथेर्घोरं वपुः शरशतार्चिषः
Marichivikachasyeva rajanbhanumato vapuh
Asidadhiratherghoram vapuh sharashatarchishah
114.22
कराभ्यामाददानस्य संदधानस्य चाशुगान्
विकर्षतो मुञ्चतो वा नान्तरं ददृशू रणे
Karabhyamadadanasya sandadhanasya chashugan
Vikarshato munchato va nantaram dadrishu rane
114.23
अग्निचक्रोपमं घोरं मण्डलीकृतमायुधम्
कर्णस्यासीन्महाराज सव्यदक्षिणमस्यतः
Agnichakropamam ghoram mandalikritamayudham
Karnasyasinmaharaja savyadakshinamasyatah
114.24
स्वर्णपुङ्खाः सुनिशिताः कर्णचापच्युताः शराः
प्राच्छादयन्महाराज दिशः सूर्यस्य च प्रभाम्
Svarnapunkhah sunishitah karnachapachyutah sharah
Prachchhadayanmaharaja dishah suryasya cha prabham
114.25
ततः कनकपुङ्खानां शराणां नतपर्वणाम्
धनुश्च्युतानां वियति ददृशे बहुधा व्रजः
Tatah kanakapunkhanam sharanam nataparvanam
Dhanushchyutanam viyati dadrishe bahudha vrajah
114.26
शरासनादाधिरथेः प्रभवन्तः स्म सायकाः
श्रेणीकृता व्यराजन्त राजन्क्रौञ्चा इवाम्बरे
Sharasanadadhiratheh prabhavantah sma sayakah
Shrenikrita vyarajanta rajankrauncha ivambare
114.27
गार्ध्रपत्राञ्शिलाधौतान्कार्तस्वरविभूषितान्
महावेगान्प्रदीप्ताग्रान्मुमोचाधिरथिः शरान्
Gardhrapatranshiladhautankartasvaravibhushitan
Mahaveganpradiptagranmumochadhirathih sharan
114.28
ते तु चापबलोद्धूताः शातकुम्भविभूषिताः
अजस्रमन्वकीर्यन्त शराः पार्थरथं प्रति
Te tu chapabaloddhutah shatakumbhavibhushitah
Ajasramanvakiryanta sharah partharatham prati
114.29
ते व्योम्नि रत्नविकृता व्यकाशन्त सहस्रशः
शलभानामिव व्राताः शराः कर्णसमीरिताः
Te vyomni ratnavikrita vyakashanta sahasrashah
Shalabhanamiva vratah sharah karnasamiritah
114.30
चापादाधिरथेर्मुक्ताः प्रपतन्तः स्म सायकाः
एको दीर्घ इव प्रांशुः प्रभवन्दृश्यते शरः
Chapadadhirathermuktah prapatantah sma sayakah
Eko dirgha iva pranshuh prabhavandrishyate sharah
114.31
पर्वतं वारिधाराभिश्छादयन्निव तोयदः
कर्णः प्राच्छादयत्क्रुद्धो भीमं सायकवृष्टिभिः
Parvatam varidharabhishchhadayanniva toyadah
Karnah prachchhadayatkruddho bhimam sayakavrishtibhih
114.32
तत्र भारत भीमस्य बलवीर्यपराक्रमम्
व्यवसायं च पुत्रास्ते प्रैक्षन्त कुरुभिः सह
Tatra bharata bhimasya balaviryaparakramam
Vyavasayam cha putraste praikshanta kurubhih saha
114.33
तां समुद्रमिवोद्धूतां शरवृष्टिं समुत्थिताम्
अचिन्तयित्वा भीमस्तु क्रुद्धः कर्णमुपाद्रवत्
Tam samudramivoddhutam sharavrishtim samutthitam
Achintayitva bhimastu kruddhah karnamupadravat
114.34
रुक्मपृष्ठं महच्चापं भीमस्यासीद्विशां पते
आकर्षान्मण्डलीभूतं शक्रचापमिवापरम्
तस्माच्छराः प्रादुरासन्पूरयन्त इवाम्बरम्
Rukmaprishtham mahachchapam bhimasyasidvisham pate
Akarshanmandalibhutam shakrachapamivaparam
Tasmachchharah pradurasanpurayanta ivambaram
114.35
सुवर्णपुङ्खैर्भीमेन सायकैर्नतपर्वभिः
गगने रचिता माला काञ्चनीव व्यराजत
Suvarnapunkhairbhimena sayakairnataparvabhih
Gagane rachita mala kanchaniva vyarajata
114.36
ततो व्योम्नि विषक्तानि शरजालानि भागशः
आहतानि व्यशीर्यन्त भीमसेनस्य पत्रिभिः
Tato vyomni vishaktani sharajalani bhagashah
Ahatani vyashiryanta bhimasenasya patribhih
114.37
कर्णस्य शरजालौघैर्भीमसेनस्य चोभयोः
अग्निस्फुलिङ्गसंस्पर्शैरञ्जोगतिभिराहवे
तैस्तैः कनकपुङ्खानां द्यौरासीत्संवृता व्रजैः
Karnasya sharajalaughairbhimasenasya chobhayoh
Agnisphulingasansparshairanjogatibhirahave
Taistaih kanakapunkhanam dyaurasitsanvrita vrajaih
114.38
स भीमं छादयन्बाणैः सूतपुत्रः पृथग्विधैः
उपारोहदनादृत्य तस्य वीर्यं महात्मनः
Sa bhimam chhadayanbanaih sutaputrah prithagvidhaih
Uparohadanadritya tasya viryam mahatmanah
114.39
तयोर्विसृजतोस्तत्र शरजालानि मारिष
वायुभूतान्यदृश्यन्त संसक्तानीतरेतरम्
Tayorvisrijatostatra sharajalani marisha
Vayubhutanyadrishyanta sansaktanitaretaram
114.40
तस्मै कर्णः शितान्बाणान्कर्मारपरिमार्जितान्
सुवर्णविकृतान्क्रुद्धः प्राहिणोद्वधकाङ्क्षया
Tasmai karnah shitanbanankarmaraparimarjitan
Suvarnavikritankruddhah prahinodvadhakankshaya
114.41
तानन्तरिक्षे विशिखैस्त्रिधैकैकमशातयत्
विशेषयन्सूतपुत्रं भीमस्तिष्ठेति चाब्रवीत्
Tanantarikshe vishikhaistridhaikaikamashatayat
Visheshayansutaputram bhimastishtheti chabravit
114.42
पुनश्चासृजदुग्राणि शरवर्षाणि पाण्डवः
अमर्षी बलवान्क्रुद्धो दिधक्षन्निव पावकः
Punashchasrijadugrani sharavarshani pandavah
Amarshi balavankruddho didhakshanniva pavakah
114.43
तस्य तान्याददे कर्णः सर्वाण्यस्त्राण्यभीतवत्
युध्यतः पाण्डुपुत्रस्य सूतपुत्रोऽस्त्रमायया
Tasya tanyadade karnah sarvanyastranyabhitavat
Yudhyatah panduputrasya sutaputrostramayaya
114.44
तस्येषुधी धनुर्ज्यां च बाणैः संनतपर्वभिः
रश्मीन्योक्त्राणि चाश्वानां कर्णो वैकर्तनोऽच्छिनत्
Tasyeshudhi dhanurjyam cha banaih sannataparvabhih
Rashminyoktrani chashvanam karno vaikartanochchhinat
114.45
अथास्याश्वान्पुनर्हत्वा त्रिभिर्विव्याध सारथिम्
सोऽवप्लुत्य द्रुतं सूतो युयुधानरथं ययौ
Athasyashvanpunarhatva tribhirvivyadha sarathim
Sovaplutya drutam suto yuyudhanaratham yayau
114.46
उत्स्मयन्निव भीमस्य क्रुद्धः कालानलप्रभः
ध्वजं चिच्छेद राधेयः पताकाश्च न्यपातयत्
Utsmayanniva bhimasya kruddhah kalanalaprabhah
Dhvajam chichchheda radheyah patakashcha nyapatayat
114.47
स विधन्वा महाराज रथशक्तिं परामृशत्
तामवासृजदाविध्य क्रुद्धः कर्णरथं प्रति
Sa vidhanva maharaja rathashaktim paramrishat
Tamavasrijadavidhya kruddhah karnaratham prati
114.48
तामाधिरथिरायस्तः शक्तिं हेमपरिष्कृताम्
आपतन्तीं महोल्काभां चिच्छेद दशभिः शरैः
Tamadhirathirayastah shaktim hemaparishkritam
Apatantim maholkabham chichchheda dashabhih sharaih
114.49
सापतद्दशधा राजन्निकृत्ता कर्णसायकैः
अस्यतः सूतपुत्रस्य मित्रार्थे चित्रयोधिनः
Sapataddashadha rajannikritta karnasayakaih
Asyatah sutaputrasya mitrarthe chitrayodhinah
114.50
स चर्मादत्त कौन्तेयो जातरूपपरिष्कृतम्
खड्गं चान्यतरप्रेप्सुर्मृत्योरग्रे जयस्य वा
तदस्य सहसा कर्णो व्यधमत्प्रहसन्निव
Sa charmadatta kaunteyo jatarupaparishkritam
Khadgam chanyataraprepsurmrityoragre jayasya va
Tadasya sahasa karno vyadhamatprahasanniva
114.51
स विचर्मा महाराज विरथः क्रोधमूर्छितः
असिं प्रासृजदाविध्य त्वरन्कर्णरथं प्रति
Sa vicharma maharaja virathah krodhamurchhitah
Asim prasrijadavidhya tvarankarnaratham prati
114.52
स धनुः सूतपुत्रस्य छित्त्वा ज्यां च सुसंशितः
अपतद्भुवि निस्त्रिंशश्च्युतः सर्प इवाम्बरात्
Sa dhanuh sutaputrasya chhittva jyam cha susanshitah
Apatadbhuvi nistrinshashchyutah sarpa ivambarat
114.53
ततः प्रहस्याधिरथिरन्यदादत्त कार्मुकम्
शत्रुघ्नं समरे क्रुद्धो दृढज्यं वेगवत्तरम्
Tatah prahasyadhirathiranyadadatta karmukam
Shatrughnam samare kruddho dridhajyam vegavattaram
114.54
स भीमसेनः कुपितो बलवान्सत्यविक्रमः
विहायसं प्राक्रमद्वै कर्णस्य व्यथयन्मनः
Sa bhimasenah kupito balavansatyavikramah
Vihayasam prakramadvai karnasya vyathayanmanah
114.55
तस्य तच्चरितं दृष्ट्वा संग्रामे विजयैषिणः
लयमास्थाय राधेयो भीमसेनमवञ्चयत्
Tasya tachcharitam drishtva sangrame vijayaishinah
Layamasthaya radheyo bhimasenamavanchayat
114.56
तमदृष्ट्वा रथोपस्थे निलीनं व्यथितेन्द्रियम्
ध्वजमस्य समासाद्य तस्थौ स धरणीतले
Tamadrishtva rathopasthe nilinam vyathitendriyam
Dhvajamasya samasadya tasthau sa dharanitale
114.57
तदस्य कुरवः सर्वे चारणाश्चाभ्यपूजयन्
यदियेष रथात्कर्णं हन्तुं तार्क्ष्य इवोरगम्
Tadasya kuravah sarve charanashchabhyapujayan
Yadiyesha rathatkarnam hantum tarkshya ivoragam
114.58
स छिन्नधन्वा विरथः स्वधर्ममनुपालयन्
स्वरथं पृष्ठतः कृत्वा युद्धायैव व्यवस्थितः
Sa chhinnadhanva virathah svadharmamanupalayan
Svaratham prishthatah kritva yuddhayaiva vyavasthitah
114.59
तद्विहत्यास्य राधेयस्तत एनं समभ्ययात्
संरब्धः पाण्डवं संख्ये युद्धाय समुपस्थितम्
Tadvihatyasya radheyastata enam samabhyayat
Sanrabdhah pandavam sankhye yuddhaya samupasthitam
114.60
तौ समेतौ महारङ्गे स्पर्धमानौ महाबलौ
जीमूताविव घर्मान्ते गर्जमानौ नभस्तले
Tau sametau maharange spardhamanau mahabalau
Jimutaviva gharmante garjamanau nabhastale
114.61
तयोरासीत्संप्रहारः क्रुद्धयोर्नरसिंहयोः
अमृष्यमाणयोः संख्ये देवदानवयोरिव
Tayorasitsampraharah kruddhayornarasinhayoh
Amrishyamanayoh sankhye devadanavayoriva
114.62
क्षीणशस्त्रस्तु कौन्तेयः कर्णेन समभिद्रुतः
दृष्ट्वार्जुनहतान्नागान्पतितान्पर्वतोपमान्
रथमार्गविघातार्थं व्यायुधः प्रविवेश ह
Kshinashastrastu kaunteyah karnena samabhidrutah
Drishtvarjunahatannaganpatitanparvatopaman
Rathamargavighatartham vyayudhah pravivesha ha
114.63
हस्तिनां व्रजमासाद्य रथदुर्गं प्रविश्य च
पाण्डवो जीविताकाङ्क्षी राधेयं नाभ्यहारयत्
Hastinam vrajamasadya rathadurgam pravishya cha
Pandavo jivitakankshi radheyam nabhyaharayat
114.64
व्यवस्थानमथाकाङ्क्षन्धनंजयशरैर्हतम्
उद्यम्य कुञ्जरं पार्थस्तस्थौ परपुरंजयः
Vyavasthanamathakankshandhananjayasharairhatam
Udyamya kunjaram parthastasthau parapuranjayah
114.65
तमस्य विशिखैः कर्णो व्यधमत्कुञ्जरं पुनः
हस्त्यङ्गान्यथ कर्णाय प्राहिणोत्पाण्डवो नदन्
Tamasya vishikhaih karno vyadhamatkunjaram punah
Hastyanganyatha karnaya prahinotpandavo nadan
114.66
चक्राण्यश्वांस्तथा वाहान्यद्यत्पश्यति भूतले
तत्तदादाय चिक्षेप क्रुद्धः कर्णाय पाण्डवः
Chakranyashvanstatha vahanyadyatpashyati bhutale
Tattadadaya chikshepa kruddhah karnaya pandavah
114.67
तदस्य सर्वं चिच्छेद क्षिप्तं क्षिप्तं शितैः शरैः
व्यायुधं नावधीच्चैनं कर्णः कुन्त्या वचः स्मरन्
Tadasya sarvam chichchheda kshiptam kshiptam shitaih sharaih
Vyayudham navadhichchainam karnah kuntya vachah smaran
114.68
धनुषोऽग्रेण तं कर्णस्त्वभिद्रुत्य परामृशत्
उत्स्मयन्निव राधेयो भीमसेनमुवाच ह
Dhanushogrena tam karnastvabhidrutya paramrishat
Utsmayanniva radheyo bhimasenamuvacha ha
114.69
पुनः पुनस्तूबरक मूढ औदरिकेति च
अकृतास्त्रक मा योत्सीर्बाल संग्रामकातर
Punah punastubaraka mudha audariketi cha
Akritastraka ma yotsirbala sangramakatara
114.70
यत्र भोज्यं बहुविधं भक्ष्यं पेयं च पाण्डव
तत्र त्वं दुर्मते योग्यो न युद्धेषु कथंचन
Yatra bhojyam bahuvidham bhakshyam peyam cha pandava
Tatra tvam durmate yogyo na yuddheshu kathanchana
114.71
मुनिर्भूत्वाथ वा भीम फलान्यद्धि सुदुर्मते
वनाय व्रज कौन्तेय न त्वं युद्धविशारदः
Munirbhutvatha va bhima phalanyaddhi sudurmate
Vanaya vraja kaunteya na tvam yuddhavisharadah
114.72
फलमूलाशने युक्तस्त्वं तथातिथिभोजने
न त्वां शस्त्रसमुद्योगे योग्यं मन्ये वृकोदर
Phalamulashane yuktastvam tathatithibhojane
Na tvam shastrasamudyoge yogyam manye vrikodara
114.73
पुष्पमूलफलाहारो व्रतेषु नियमेषु च
उचितस्त्वं वने भीम न त्वं युद्धविशारदः
Pushpamulaphalaharo vrateshu niyameshu cha
Uchitastvam vane bhima na tvam yuddhavisharadah
114.74
क्व युद्धं क्व मुनित्वं च वनं गच्छ वृकोदर
न त्वं युद्धोचितस्तात वनवासरतिर्भव
Kva yuddham kva munitvam cha vanam gachchha vrikodara
Na tvam yuddhochitastata vanavasaratirbhava
114.75
सूदान्भृत्यजनान्दासांस्त्वं गृहे त्वरयन्भृशम्
योग्यस्ताडयितुं क्रोधाद्भोजनार्थं वृकोदर
Sudanbhrityajanandasanstvam grihe tvarayanbhrisham
Yogyastadayitum krodhadbhojanartham vrikodara
114.76
कौमारे यानि चाप्यासन्नप्रियाणि विशां पते
पूर्ववृत्तानि चाप्येनं रूक्षाण्यश्रावयद्भृशम्
Kaumare yani chapyasannapriyani visham pate
Purvavrittani chapyenam rukshanyashravayadbhrisham
114.77
अथैनं तत्र संलीनमस्पृशद्धनुषा पुनः
प्रहसंश्च पुनर्वाक्यं भीममाह वृषस्तदा
Athainam tatra sanlinamasprishaddhanusha punah
Prahasanshcha punarvakyam bhimamaha vrishastada
114.78
योद्धव्यमाविशान्यत्र न योद्धव्यं तु मादृशैः
मादृशैर्युध्यमानानामेतच्चान्यच्च विद्यते
Yoddhavyamavishanyatra na yoddhavyam tu madrishaih
Madrishairyudhyamananametachchanyachcha vidyate
114.79
गच्छ वा यत्र तौ कृष्णौ तौ त्वा रक्षिष्यतो रणे
गृहं वा गच्छ कौन्तेय किं ते युद्धेन बालक
Gachchha va yatra tau krishnau tau tva rakshishyato rane
Griham va gachchha kaunteya kim te yuddhena balaka
114.80
एवं तं विरथं कृत्वा कर्णो राजन्व्यकत्थत
प्रमुखे वृष्णिसिंहस्य पार्थस्य च महात्मनः
Evam tam viratham kritva karno rajanvyakatthata
Pramukhe vrishnisinhasya parthasya cha mahatmanah
114.81
ततो राजञ्शिलाधौताञ्शराञ्शाखामृगध्वजः
प्राहिणोत्सूतपुत्राय केशवेन प्रचोदितः
Tato rajanshiladhautansharanshakhamrigadhvajah
Prahinotsutaputraya keshavena prachoditah
114.82
ततः पार्थभुजोत्सृष्टाः शराः काञ्चनभूषणाः
गाण्डीवप्रभवाः कर्णं हंसाः क्रौञ्चमिवाविशन्
Tatah parthabhujotsrishtah sharah kanchanabhushanah
Gandivaprabhavah karnam hansah kraunchamivavishan
114.83
स भुजंगैरिवायस्तैर्गाण्डीवप्रेषितैः शरैः
भीमसेनादपासेधत्सूतपुत्रं धनंजयः
Sa bhujangairivayastairgandivapreshitaih sharaih
Bhimasenadapasedhatsutaputram dhananjayah
114.84
स छिन्नधन्वा भीमेन धनंजयशराहतः
कर्णो भीमादपायासीद्रथेन महता द्रुतम्
Sa chhinnadhanva bhimena dhananjayasharahatah
Karno bhimadapayasidrathena mahata drutam
114.85
भीमोऽपि सात्यकेर्वाहं समारुह्य नरर्षभः
अन्वयाद्भ्रातरं संख्ये पाण्डवं सव्यसाचिनम्
Bhimopi satyakervaham samaruhya nararshabhah
Anvayadbhrataram sankhye pandavam savyasachinam
114.86
ततः कर्णं समुद्दिश्य त्वरमाणो धनंजयः
नाराचं क्रोधताम्राक्षः प्रैषीन्मृत्युमिवान्तकः
Tatah karnam samuddishya tvaramano dhananjayah
Naracham krodhatamrakshah praishinmrityumivantakah
114.87
स गरुत्मानिवाकाशे प्रार्थयन्भुजगोत्तमम्
नाराचोऽभ्यपतत्कर्णं तूर्णं गाण्डीवचोदितः
Sa garutmanivakashe prarthayanbhujagottamam
Narachobhyapatatkarnam turnam gandivachoditah
114.88
तमन्तरिक्षे नाराचं द्रौणिश्चिच्छेद पत्रिणा
धनंजयभयात्कर्णमुज्जिहीर्षुर्महारथः
Tamantarikshe naracham draunishchichchheda patrina
Dhananjayabhayatkarnamujjihirshurmaharathah
114.89
ततो द्रौणिं चतुःषष्ट्या विव्याध कुपितोऽर्जुनः
शिलीमुखैर्महाराज मा गास्तिष्ठेति चाब्रवीत्
Tato draunim chatuhshashtya vivyadha kupitorjunah
Shilimukhairmaharaja ma gastishtheti chabravit
114.90
स तु मत्तगजाकीर्णमनीकं रथसंकुलम्
तूर्णमभ्याविशद्द्रौणिर्धनंजयशरार्दितः
Sa tu mattagajakirnamanikam rathasankulam
Turnamabhyavishaddraunirdhananjayashararditah
114.91
ततः सुवर्णपृष्ठानां धनुषां कूजतां रणे
शब्दं गाण्डीवघोषेण कौन्तेयोऽभ्यभवद्बली
Tatah suvarnaprishthanam dhanusham kujatam rane
Shabdam gandivaghoshena kaunteyobhyabhavadbali
114.92
धनंजयस्तथा यान्तं पृष्ठतो द्रौणिमभ्ययात्
नातिदीर्घमिवाध्वानं शरैः संत्रासयन्बलम्
Dhananjayastatha yantam prishthato draunimabhyayat
Natidirghamivadhvanam sharaih santrasayanbalam
114.93
विदार्य देहान्नाराचैर्नरवारणवाजिनाम्
कङ्कबर्हिणवासोभिर्बलं व्यधमदर्जुनः
Vidarya dehannarachairnaravaranavajinam
Kankabarhinavasobhirbalam vyadhamadarjunah
114.94
तद्बलं भरतश्रेष्ठ सवाजिद्विपमानवम्
पाकशासनिरायस्तः पार्थः संनिजघान ह
Tadbalam bharatashreshtha savajidvipamanavam
Pakashasanirayastah parthah sannijaghana ha