অধ্যায় 65

65.1

বৈশংপায়ন উবাচ
দুর্যোধনে ধার্তরাষ্ট্রে তদ্বচোঽপ্রতিনন্দতি
তূষ্ণীংভূতেষু সর্বেষু সমুত্তস্থুর্নরেশ্বরাঃ

উত্থিতেষু মহারাজ পৃথিব্যাং সর্বরাজসু
রহিতে সংজয়ং রাজা পরিপ্রষ্টুং প্রচক্রমে

আশংসমানো বিজয়ং তেষাং পুত্রবশানুগঃ
আত্মনশ্চ পরেষাং চ পাণ্ডবানাং চ নিশ্চয়ম্

ধৃতরাষ্ট্র উবাচ
গাবল্গণে ব্রূহি নঃ সারফল্গু; স্বসেনায়াং যাবদিহাস্তি কিংচিৎ
ত্বং পাণ্ডবানাং নিপুণং বেত্থ সর্বং; কিমেষাং জ্যায়ঃ কিমু তেষাং কনীয়ঃ

ত্বমেতয়োঃ সারবিত্সর্বদর্শী; ধর্মার্থয়োর্নিপুণো নিশ্চয়জ্ঞঃ
স মে পৃষ্টঃ সংজয় ব্রূহি সর্বং; যুধ্যমানাঃ কতরেঽস্মিন্ন সন্তি

সংজয় উবাচ
ন ত্বাং ব্রূয়াং রহিতে জাতু কিংচি;দসূয়া হি ত্বাং প্রসহেত রাজন্
আনয়স্ব পিতরং সংশিতব্রতং; গাংধারীং চ মহিষীমাজমীঢ

তৌ তেঽসূয়াং বিনয়েতাং নরেন্দ্র; ধর্মজ্ঞৌ তৌ নিপুণৌ নিশ্চয়জ্ঞৌ
তয়োস্তু ত্বাং সংনিধৌ তদ্বদেয়ং; কৃত্স্নং মতং বাসুদেবার্জুনাভ্যাম্

বৈশংপায়ন উবাচ
ততস্তন্মতমাজ্ঞায় সংজয়স্যাত্মজস্য চ
অভ্যুপেত্য মহাপ্রাজ্ঞঃ কৃষ্ণদ্বৈপায়নোঽব্রবীৎ

সংপৃচ্ছতে ধৃতরাষ্ট্রায় সংজয়; আচক্ষ্ব সর্বং যাবদেষোঽনুয়ুঙ্ক্তে
সর্বং যাবদ্বেত্থ তস্মিন্যথাব;দ্যাথাতথ্যং বাসুদেবেঽর্জুনে চ