অধ্যায় 66

66.1

সংজয় উবাচ
অর্জুনো বাসুদেবশ্চ ধন্বিনৌ পরমার্চিতৌ
কামাদন্যত্র সংভূতৌ সর্বাভাবায় সংমিতৌ

দ্যামন্তরং সমাস্থায় যথায়ুক্তং মনস্বিনঃ
চক্রং তদ্বাসুদেবস্য মায়য়া বর্ততে বিভো

সাপহ্নবং পাণ্ডবেষু পাণ্ডবানাং সুসংমতম্
সারাসারবলং জ্ঞাত্বা তত্সমাসেন মে শৃণু

নরকং শম্বরং চৈব কংসং চৈদ্যং চ মাধবঃ
জিতবান্ঘোরসংকাশান্ক্রীডন্নিব জনার্দনঃ

পৃথিবীং চান্তরিক্ষং চ দ্যাং চৈব পুরুষোত্তমঃ
মনসৈব বিশিষ্টাত্মা নয়ত্যাত্মবশং বশী

ভূয়ো ভূয়ো হি যদ্রাজন্পৃচ্ছসে পাণ্ডবান্প্রতি
সারাসারবলং জ্ঞাতুং তন্মে নিগদতঃ শৃণু

একতো বা জগত্কৃত্স্নমেকতো বা জনার্দনঃ
সারতো জগতঃ কৃত্স্নাদতিরিক্তো জনার্দনঃ

ভস্ম কুর্যাজ্জগদিদং মনসৈব জনার্দনঃ
ন তু কৃত্স্নং জগচ্ছক্তং ভস্ম কর্তুং জনার্দনম্

যতঃ সত্যং যতো ধর্মো যতো হ্রীরার্জবং যতঃ
ততো ভবতি গোবিন্দো যতঃ কৃষ্ণস্ততো জয়ঃ

পৃথিবীং চান্তরিক্ষং চ দিবং চ পুরুষোত্তমঃ
বিচেষ্টয়তি ভূতাত্মা ক্রীডন্নিব জনার্দনঃ

স কৃত্বা পাণ্ডবান্সত্রং লোকং সংমোহয়ন্নিব
অধর্মনিরতান্মূঢান্দগ্ধুমিচ্ছতি তে সুতান্

কালচক্রং জগচ্চক্রং যুগচক্রং চ কেশবঃ
আত্ময়োগেন ভগবান্পরিবর্তয়তেঽনিশম্

কালস্য চ হি মৃত্যোশ্চ জঙ্গমস্থাবরস্য চ
ঈশতে ভগবানেকঃ সত্যমেতদ্ব্রবীমি তে

ঈশন্নপি মহায়োগী সর্বস্য জগতো হরিঃ
কর্মাণ্যারভতে কর্তুং কীনাশ ইব দুর্বলঃ

তেন বঞ্চয়তে লোকান্মায়ায়োগেন কেশবঃ
যে তমেব প্রপদ্যন্তে ন তে মুহ্যন্তি মানবাঃ